TƆM ÑƲƲ ŊGƲ ÐƖKPƐLƖKƖƔ YƆ 47
Lɔŋ weyi ɖɩpɩzɩɣ nɛ ɖɩkpɛlɩkɩ Levitiki takayaɣ taa yɔ
“Ɛsɔ fezuu ɖiyina nɛ pama Masɩ kpeekpe nɛ sɩwazɩɣ.”—2 TIM. 3:16.
HENDU 98 Masɩ lɩnɩ Ɛsɔ cɔlɔ
LƖMAƔZA SƆSƆNA *
1-2. Ɛbɛ yɔɔ pɩwɛɛ se Krɩstʋ ñɩma ɩsɔɔlɩ se patazɩ Levitiki takayaɣ taa sɔnɔ?
APOSTOLOO Pɔɔlɩ tɔzɩ ɛ-taabalʋ Timootee weyi ɛkɛ pɩɣa evelaɣ yɔ se “Ɛsɔ fezuu ɖiyina nɛ pama Masɩ kpeekpe nɛ sɩwazɩɣ.” (2 Tim. 3:16) Levitiki takayaɣ wɛ pɩ-taa. Lɩmaɣza wena ŋwɛnɩ Bibl taa takayaɣ ŋga kɔ-yɔɔ? Nabɛyɛ pɩzɩɣ nɛ pamaɣzɩ se paɣtʋ ndɩ ndɩ wɛ takayaɣ ŋga ka-taa nɛ tɩɩwazɩɣ-ɖʋ sɔnɔ, ɛlɛ Krɩstʋ ñɩma toovenim mba ñaamaɣzɩɣ mbʋ.
2 Pamaʋ Levitiki takayaɣ yɔ, pɩlakɩ ɛzɩ pɩnzɩ 3500 mbʋ yɔ. Paa mbʋ yɔ, Yehowa kandɩyɩ kɔ-yɔɔ se “pɩwɩlɩ-ɖʋ lɔŋ.” (Roma 15:4) Ɛzɩma Levitiki takayaɣ sɩɣnɩ-ɖʋ se ɖɩtɩlɩ Yehowa lɩmaɣza yɔ pʋyɔɔ lɛ, pɩwɛɛ se ɖɩsɔɔlɩ se ɖɩtazɩ ka-taa. Ɛsɔ fezuu ɖiyina nɛ pama takayaɣ ŋga, nɛ lɔŋ sakɩyɛ wɛ ka-taa se ɖɩpɩzɩɣ nɛ ɖɩkpɛlɩkɩ. Iyele nɛ ɖɩtazɩ ɩ-taa naanza taa.
ƐZƖMA PƖWƐƐ SE ÐƖLA NƐ ÐƆ-TƆM KƐDƖNƖ YEHOWA YƆ
3. Ɛbɛ yɔɔ palaɣaɣ kɩlaŋ Kɩwɛɛkɩm Hɩzʋʋ Kɩyakʋ Wiye paa pɩnaɣ ŋga?
3 Lɔŋ kajalaɣ ñɩŋ: Pɩsa nɛ Yehowa mʋ ɖa-kɩlaŋ lɛ, pɩwɛɛ se ɖɔ-tɔm ɛkɛdɩnɩ-ɩ. Paa pɩnaɣ ŋga, Kɩwɛɛkɩm Hɩzʋʋ Kɩyakʋ Wiye lɛ, Izrayɛɛlɩ samaɣ kpeɣliɣ nɛ cɔjɔ sɔsɔ kpakɩɣ kpɩna nɛ ɛlaɣ kɩlaŋ. Kɩlaŋ ɛnɩ ɩsɩɣaɣnɩ Izrayɛɛlɩ piya se sɩtɔzɩ se pɩwɛɛ se pahɩzɩ sɩ-kɩwɛɛkɩm nɛ sɩwɛɛ kele kele! Ɛlɛ, pʋcɔ nɛ cɔjɔ sɔsɔ sʋnɩ kɩlaʋ calɩm Lone Kiɖeɖee Sɔsɔyɛ taa puwiye lɛ, pɩwɛɛ se ɛla nabʋyʋ pʋcɔ, nɛ pɩ-tɔm cɛyaa nɛ pɩkɩlɩ samaɣ kɩwɛɛkɩm kpeɣu.
(Cɔnɩ tayʋʋ 4) *
4. Ɛzɩ Levitiki 16:12, 13 yɔɔdʋʋ yɔ, cɔjɔ sɔsɔ calɩɣ sʋʋ Lone Kiɖeɖee Sɔsɔyɛ taa, Kɩwɛɛkɩm Hɩzʋʋ Kɩyakʋ Wiye lɛ, ɛbɛ ɛlakɩ? (Cɔnɩ takayaɣ huyuu yɔɔ kɩlɛmʋʋ.)
4 Kalɩ Levitiki 16:12, 13. Maɣzɩ ɛzɩma pɩɖɔŋaɣ Kɩwɛɛkɩm Hɩzʋʋ Kɩyakʋ Wiye yɔ, pɩ-yɔɔ nɛ ŋna: Cɔjɔ sɔsɔ sʋʋ Kediɣzaɣ kizinziku tɛɛ. Puwiye nɖɩ, pɩwɛɛ se ɛsʋʋ Lone Kiɖeɖee Sɔsɔyɛ taa tam nabudozo, nɛ kajalaɣ ɖeɖe ɛsʋ mbʋ yɔ. Ɛɖɔkɩ e-nesi nasɩyɩ taa ñanaɣ ŋga ka-taa suni sɔzɩŋ pɛɛ yaa sɔzɩŋ tɩlaaɖɩ yɔ, nɛ ɛɖɔkɩ e-nesi lɛɛsɩ taa sika mookaɣ ŋga ka-taa suni miŋ mamala yɔ. Ɛsɩŋ pazɩ pɩsaʋ ŋgʋ pohuuzi Lone Kiɖeɖee Sɔsɔyɛ nɔnɔɔ yɔ, kɩ-cɔlɔ. Ɛsʋ Lone Kiɖeɖee Sɔsɔyɛ taa nɛ ñamtʋ sɔsɔtʋ nɛ ɛsɩŋ ɛgbɛyɛ ɖʋʋ aɖakaɣ cɔlɔ. Papɩzɩɣ nɛ pɔtɔ se ɛsɩŋ Yehowa Ɛsɔ ɛsɩndaa maɣmaɣ! Lɛɛlɛɛyɔ lɛ, cɔjɔ pɩyɩɣ tɩlaaɖɩ kiɖeɖeu ŋgʋ, miŋ mamala yɔɔ camɩyɛ nɛ sɔzɩŋ kɩbaŋ ñɛyɩnɩ ɖaŋ. * Pʋwayɩ lɛ, ɛɖaɣnɩ sʋʋ Lone Kiɖeɖee Sɔsɔyɛ taa nɛ kɩwɛɛkɩm hɩzʋʋ kɩlaʋ calɩm. Yʋsɩ se ɛɖʋ tɩlaaɖɩ miŋ pʋcɔ nɛ ewokini kɩwɛɛkɩm hɩzʋʋ kɩlaʋ calɩm.
5. Ɛzɩma palakaɣnɩ tʋmɩyɛ tɩlaaɖɩ Kɩwɛɛkɩm Hɩzʋʋ Kɩyakʋ Wiye yɔ, ɛbɛ ɖɩpɩzɩɣ nɛ ɖɩkpɛlɩkɩ pɩ-taa?
5 Ɛzɩma palakaɣnɩ tʋmɩyɛ tɩlaaɖɩ Kɩwɛɛkɩm Hɩzʋʋ Kɩyakʋ Wiye yɔ, ɛbɛ ɖɩpɩzɩɣ nɛ ɖɩkpɛlɩkɩ pɩ-taa? Bibl yɔɔdaa se Yehowa sɛyaa siɣsiɣ ñɩma adɩma wɛ ɛzɩ tɩlaaɖɩ yɔ. (Keɣa 140:2; Natʋ 5:8) Tɔzɩ se cɔjɔ sɔsɔ sʋʋnɩ tɩlaaɖɩ Yehowa ɛsɩndaa nɛ ñamtʋ sɔsɔtʋ. Mbʋ ɖɔɖɔ ɖɩɩtɩmɩɣnɩ Yehowa lɛ, ɖɩlakɩ mbʋ nɛ ñamtʋ sɔsɔtʋ. Pɩkɛdɩnɩ-ɖʋ kpem se kedeŋa kpeekpe Lɩzɩyʋ ha-ɖʋ waɖɛ se ɖɩñɔtɩnɩ-ɩ nɛ ɖɩɖʋ-ɩ nɛ taabalɩyɛ ɛzɩ pɩɣa ñɔtʋʋnɩ ka-caa yɔ. (Yak. 4:8) Ɛkpakɩɣ-ɖʋ ɛzɩ ɛ-taabalaa yɔ! (Keɣa 24:14) Ða-taa wɛ leleŋ nɛ waɖɛ nɖɩ nɛ pʋyɔɔ lɛ, ɖɩtɩsɔɔlɩ kpa se ɖɩla mbʋ pɩɩkɛdɩɣnɩ-ɩ yɔ.
6. Ɛbɛ ɖɩpɩzɩɣ nɛ ɖɩkpɛlɩkɩ ɛzɩma cɔjɔ sɔsɔ ɖʋwaɣ tɩlaaɖɩ miŋ pʋcɔ nɛ ɛlaɣ kɩlaŋ yɔ pɩ-taa?
6 Tɔzɩ se pɩwɛɛ se cɔjɔ sɔsɔ ɛɖʋ tɩlaaɖɩ miŋ nɛ pʋcɔ ɛpɩzɩ nɛ ɛlaa kɩlaŋ. Ɛzɩma ɛɖʋʋ tɩlaaɖɩ miŋ kajalaɣ ɖeɖe yɔ, piyeki nɛ ɛ-taa tɛ se Yehowa taa kaɣ labʋ leleŋ nɛ kɩlaŋ weyi ɛlaɣ yɔ. Ɛbɛ ɖɩpɩzɩɣ nɛ ɖɩkpɛlɩkɩ pɩ-taa? Alɩwaatʋ ndʋ Yesu kaawɛ tɛtʋ yɔɔ yɔ, pɩɩwɛɛ se ɛla nabʋyʋ, nɛ pɩ-tɔm cɛyaa nɛ pɩkɩlɩ ɛyaa ñʋʋ yabʋ, pʋcɔ nɛ ɛpɩzɩ ɛkpaɣ e-wezuu nɛ ɛlaa kɩlaʋ. Ɛbɛ pɩɩwɛɛ se ɛla? Alɩwaatʋ ndʋ ɛɛwɛ tɛtʋ yɔɔ yɔ, pɩɩwɛɛ se ɛña Yehowa e-wezuu caɣʋ kpeekpe pʋcɔ nɛ Yehowa mʋ ɛ-kɩlaʋ. Pɩtɩŋnɩ pʋyɔɔ lɛ, Yesu pɩzaɣ se ɛwɩlɩ se Yehowa sɔɔlɩm labʋ kɛnɩnɩ wezuu kɩbaŋʋ caɣʋ. Yesu pɩzaɣ se ɛlʋ nɛ ɛwɩlɩ se ɛ-Caa kewiyitu tɔɔʋ wɛ siɣsiɣ nɛ ɛnʋ pʋmʋnaa se ɛtɔɔ kewiyitu kɩkɩlɩtʋ.
7. Ɛbɛ yɔɔ Yesu wezuu caɣʋ kpeekpe kaakɛdɩnɩ ɛ-Caa?
7 Alɩwaatʋ ndʋ Yesu kaacaɣ wezuu tɛtʋ yɔɔ yɔ, ɛɖɔm Yehowa paɣtʋ kila wena awɛ siɣsiɣ yɔ a-yɔɔ hɔɔlɩŋ tɩŋa taa. Takɩm yaa nazɩm nabʋyʋ, halɩ pɩkpɛndɩnɩ kʋñɔŋ ŋgʋ ɛtɔkaɣ se pʋcɔ nɛ ɛsɩ yɔ, pɩtɩcamɩ sɔɔlɩm mbʋ ɛɛwɛna se ɛlʋ nɛ ɛwɩlɩ se ɛ-Caa pɩmʋnaa se ɛtɔɔ kewiyitu yɔ. (Fil. 2:8) Alɩwaatʋ ndʋ Yesu katɩ tɩlasɩ yɔ, ɛtɩmnɩ “kubusi sɔsɔsɩ nɛ ɛsɩtɛɣlɩm.” (Ebr. 5:7) Ɛzɩma ɛtɩmaɣnɩ ɛ-laŋɩyɛ pilim yɔ, pɩwɩlaɣ se ɛɛwɛ siɣsiɣ Yehowa ɛsɩndaa nɛ halɩ piiyeba nɛ ɛtɛzɩ tɛm ɛ-taa se ɛñaŋ Yehowa. Yehowa ɛsɩndaa lɛ, Yesu adɩma kaawɛ ɛzɩ tɩlaaɖɩ ŋgʋ kɩñɛyɩ sɔzɩŋ yɔ. Yesu wezuu caɣʋ kpeekpe kaakɛdɩnɩ ɛ-Caa siŋŋ nɛ kɩwɩlaɣ se ɛnʋ pɩmʋnaa se ɛtɔɔ kewiyitu kɩkɩlɩtʋ.
8. Ɛzɩma ɖɩpɩzɩɣ nɛ ɖɩmaɣzɩnɩ Yesu wezuu caɣʋ?
8 Ðɩpɩzɩɣ nɛ ɖɩmaɣzɩnɩ Yesu pɩtɩŋnɩ ɛzɩma ɖɩñakɩ pana se ɖɩña Yehowa nɛ ɖɩwɛɛ siɣsiɣ ɛ-ɛsɩndaa yɔ pɩ-yɔɔ. Ðɩkatɩɣ tɩlasɩ lɛ, ɖɩtɩmɩɣnɩ Yehowa nɛ ɖa-laŋɩyɛ pilim se ɛsɩnɩ-ɖʋ mbʋ pʋyɔɔ yɔ, ɖɩsɔɔlaa se ɖɔ-tɔm ɛkɛdɩnɩ-ɩ. Ye ɖɩlakɩ mbʋ yɔ, pɩwɩlɩɣ se ɖɩɖʋʋ nesi Yehowa kewiyitu tɔɔʋ. Ðɩnɩɣ pɩ-taa se ye ɖɩlakɩ mbʋ Yehowa paɖɩɣ yɔ, eewelisiɣ ɖa-adɩma. Ɛlɛ ye ɖɩɖɔŋ Yehowa paɣtʋ kila yɔɔ ɖe-wezuu caɣʋ taa yɔ, ɖa-taa pɩzɩɣ nɛ pɩtɛ se adɩma wena ɖɩlakɩnɩ ɖa-laŋɩyɛ pilim yɔ, awɛɣ ɛzɩ tɩlaaɖɩ ŋgʋ kɩñɛyɩ sɔzɩŋ yɔ ɛ-ɛsɩndaa. Nɛ ɖa-taa pɩzɩɣ nɛ pɩtɛ se ɖa-cɩŋgɩlɩm wɛtʋ nɛ ɖe-siɣsiɣ wɛtʋ kɛdɩɣnɩ ɖa-Caa weyi ɛwɛ ɛsɔdaa yɔ.—Adu. 27:11.
ƐSƖMƖYƐ NƐ SƆƆLƖM SEƔTIƔNI-ÐƲ SE ÐƖSƐƐ YEHOWA
(Cɔnɩ tayʋʋ 9) *
9. Ɛbɛ yɔɔ palakaɣ laŋhɛzɩyɛ kɩlaŋ?
9 Lɔŋ naalɛ ñɩŋ: Ðɩsɛɣ Yehowa mbʋ pʋyɔɔ yɔ ɖɩwɛnɩ ɛ-yɔɔ ɛsɩmɩyɛ. Pɩsa nɛ ɖɩñɩɣ niye pɩ-yɔɔ lɛ, iyele nɛ ɖɩyɔɔdɩ laŋhɛzɩyɛ kɩlaŋ tɔm. Ɩɩkɛ ɖɔɖɔ caanaʋ taa Izrayɛɛlɩ ñɩma toovenim Ɛsɔ sɛtʋ hɔɔlʋʋ sɔsɔʋ nakʋyʋ. * Ðɩkpɛlɩkɩ Levitiki takayaɣ taa se Izrayɛɛlɩ pɩɣa nakɛyɛ pɩzɩɣ nɛ kalaa laŋhɛzɩyɛ kɩlaʋ ɛzɩ “samtʋ kɩlaʋ” yɔ; pʋ-tɔbʋʋ se kalakɩ kɩlaʋ ŋgʋ se kawɩlɩnɩ kɛ-ɛsɩmɩyɛ. (Lev. 7:11-13, 16-18) Pɩtɩkɛ se pɩkɛnɩ-kɛ kɩjɛyʋʋ yɔɔ kalakaɣ kɩlaʋ ŋgʋ, ɛlɛ kalakaɣ-kʋ nɛ sɔɔlɩm faaa. Ye mbʋ, pɩɩkɛ sɔɔlɩm kɩlaʋ ŋgʋ nɔɔyʋ lakaɣ mbʋ pʋyɔɔ yɔ ɛsɔɔlɩ ɛ-Ɛsɔ Yehowa yɔ. Weyi ɛlakɩ kɩlaʋ yɔ, ɛ nɛ ɛ-hɔʋ taa ñɩma nɛ layaa pɔtɔkɩ kpɩnɛ nɖɩ palawa yɔ ɖɩ-nandʋ. Ɛlɛ kpɩnɛ nɖɩ palawa yɔ, ɖɩ-hɔɔlɩŋ nɩɩyɩ wɛɛ lɛ, Yehowa ɖeke pɛcɛlaɣ-ɩ. Hɔɔlɩŋ ɛnɩ lɛ weyi?
(Cɔnɩ tayʋʋ 10) *
10. Laŋhɛzɩyɛ kɩlaŋ weyi ɩ-tɔm pɔyɔɔdɩ Levitiki. 3:6, 12, 14-16 taa yɔ, ɛbɛ ɩkpɛlɩkɩɣ-ɖʋ mbʋ piseɣtaɣ Yesu nɛ ɛlakɩ ɛ-Caa sɔɔlɩm yɔ pɩ-yɔɔ?
10 Lɔŋ naadozo ñɩŋ: Sɔɔlɩm yɔɔ lɛ, ɖɩhaɣ Yehowa mbʋ payɩ ɖɩwɛna nɛ pɩkpaɖɩ ɖeu yɔ. Yehowa ɛsɩndaa lɛ, num kɛ kpɩnɛ hɔɔlʋʋ ŋgʋ kɩkpaɖɩ ɖeu yɔ. Ɛyɔɔdaa ɖɔɖɔ se kpɩnɛ hɔɔlɩŋ nɩɩyɩ, pɩkpɛndɩnɩ kataŋgayɩsɩ kɛ mbʋ pɩmʋ ñɩm siŋŋ yɔ. (Kalɩ Levitiki 3:6, 12, 14-16.) Ye mbʋ, alɩwaatʋ ndʋ Izrayɛɛlɩ pɩɣa nakɛyɛ haɣ Yehowa faaa kpɩnɛ hɔɔlɩŋ weyi ɩmʋ ñɩm siŋŋ yɔ nɛ num lɛ, pɩkɛdɩɣnɩ-ɩ nɛ pɩkpaɖɩ. Izrayɛɛlɩ pɩɣa ŋga kalakɩ Yehowa haɖɛ nɖɩ yɔ, kawɩlɩɣ-ɩ se kɔsɔɔlaa se kaha-ɩ mbʋ kɛwɛna nɛ pɩkpaɖɩ ɖeu yɔ. Mbʋ ɖɔɖɔ Yesu kaasɔɔlɩ faaa nɛ ɛha Yehowa mbʋ ɛɛwɛna nɛ pɩkpaɖɩ ɖeu yɔ, pɩtɩŋnɩ ɛzɩma ɛlabɩ mbʋ payɩ ɛpɩzaɣ yɔ se ɛsɛɛ-ɩ, mbʋ pʋyɔɔ yɔ ɛsɔɔlɩ-ɩ yɔ. (Yoh. 14:31) Yesu ɛsɩndaa lɛ, Ɛsɔ sɔɔlɩm labʋ kaakɛnɩ-ɩ taa leleŋ pʋyʋ nɛ ɛɛsɔɔlɩ Ɛsɔ paɣtʋ siŋŋ. (Keɣa 39:9) Maɣzɩ ɛzɩma pɩɩkɛdɩnɩ Yehowa se Yesu sɛɣaɣ-ɩ nɛ sɔɔlɩm faaa yɔ pɩ-yɔɔ nɛ ŋna!
Sɔɔlɩm mbʋ ɖɩwɛnɩ Yehowa yɔɔ yɔ, piseɣtiɣ-ɖʋ se ɖɩha-ɩ mbʋ ɖɩwɛna nɛ pɩkpaɖɩ ɖeu yɔ (Cɔnɩ tayʋʋ 11-12) *
11. (a) Ɛzɩma tʋma wena ɖɩlakɩ Yehowa sɛtʋ taa yɔ, awɛ ɛzɩ laŋhɛzɩyɛ kɩlaŋ yɔ? (b) Nɛ ɛzɩma pɩpɩzɩɣ nɛ pɩhɛzɩ ɖa-laŋɩyɛ?
11 Tʋma wena ɖɩlakɩ Yehowa sɛtʋ taa yɔ, awɛ ɖɔɖɔ ɛzɩ laŋhɛzɩyɛ kɩlaŋ ɛnɩ yɔ, mbʋ pʋyɔɔ yɔ awɩlɩɣ Yehowa ɛzɩma ɖɩsɔɔlɩ-ɩ yɔ. Ðɩhaɣ Yehowa mbʋ ɖɩwɛna nɛ pɩkpaɖɩ ɖeu yɔ, mbʋ pʋyɔɔ yɔ ɖɩsɔɔlɩ-ɩ nɛ ɖa-laŋɩyɛ pilim. Maɣzɩ ɛzɩma pɩkɛdɩɣnɩ Yehowa se ɛyaa miiliyɔɔwaa sakɩyɛ sɛɣ-ɩ mbʋ pʋyɔɔ yɔ, pɔsɔɔlɩ-ɩ siŋŋ nɛ pɔsɔɔlɩ ɛ-paɣtʋ yɔ pɩ-yɔɔ nɛ ŋna! Ye ɖɩtɔzʋʋ se mbʋ ɖɩlakɩ yɔ, pɩtɩkɛ pi-ɖeke pɩmʋnɩ ñɩm Yehowa ɛsɩndaa, ɛlɛ mbʋ piseɣtiɣ-ɖʋ nɛ ɖɩlakɩ-pʋ yɔ pɩmʋ ñɩm ɛ-ɛsɩndaa ɖɔɖɔ yɔ, pɩpɩzɩɣ nɛ pɩhɛzɩ ɖa-laŋa. Kɩɖaʋ nakʋyʋ yɔ. Ye ŋkpadɩyaa nɛ ŋŋpɩzɩɣ se ŋtasɩ labʋ tʋma sakɩyɛ ɛzɩ ŋsɔɔlʋʋ yɔ, ña-taa ɛtɛ se Yehowa nɩɣ ñɔ-tɔm taa. Pɩpɩzɩɣ nɛ pɩlabɩ-ŋ ɛzɩ mbʋ ŋlakɩ yɔ pɩtɩɖɔɔ yɔ, ɛlɛ sɔɔlɩm sɔsɔm mbʋ piseɣtiɣ-ŋ nɛ ŋlakɩ mbʋ ŋpɩzɩɣ yɔ, Yehowa naɣ-pʋ. Nɛ pɩkɛdɩɣnɩ-ɩ se ɛmʋ mbʋ ŋwɛna nɛ pɩkpaɖɩ ɖeu nɛ ŋpɩzɩɣ nɛ ŋha-ɩ pʋ yɔ.
12. (a) Palakaɣ laŋhɛzɩyɛ kɩlaŋ lɛ, ɛzɩma pɩlakaɣ Yehowa? (b) Nɛ ɛzɩma pɩpɩzɩɣ nɛ pɩhɛzɩ ɖa-laŋɩyɛ?
12 Ɛbɛ ɖɩpɩzɩɣ nɛ ɖɩkpɛlɩkɩ laŋhɛzɩyɛ kɩlaŋ taa? Alɩwaatʋ ndʋ miŋ ñakaɣ kpɩnɛ hɔɔlɩŋ weyi ɩkpaɖɩ ɖeu yɔ, sɔzɩŋ kpaɣaɣ nɛ pɩkɛdɩɣnɩ Yehowa. Ye mbʋ, ña-taa ɛtɛ se tʋma wena ŋlakɩnɩ ña-kalɩzaɣ pilim Yehowa sɛtʋ taa yɔ, akɛdɩɣnɩ-ɩ. (Kol. 3:23) Maɣzɩ ɛzɩma Yehowa mʋyʋʋnɩ taa leleŋ yɔ pɩ-yɔɔ nɛ ŋna. Tʋma wena ŋlakɩ Yehowa sɛtʋ taa yɔ, paa awɛ ññɩɩ yaa aɖɔwa yɔ, ɛ-ɛsɩndaa lɛ, akɛ ñɩm pʋyʋ nɛ ɛɛsɔʋ a-yɔɔ kpa.—Mat. 6:20; Ebr. 6:10.
YEHOWA WAZƖƔ Ɛ-ƐGBƐYƐ
13. Ɛzɩ Levitiki 9:23, 24 yɔɔdʋʋ yɔ, ɛzɩma Yehowa wɩlaa se pɩkɛdɩnɩ-ɩ se palɩzɩ cɔjɔnaa kɩfama?
13 Lɔŋ naanza ñɩŋ: Yehowa wɛɛ nɛ ɛwazɩɣ ɛ-ɛgbɛyɛ hɔɔlʋʋ ŋgʋ kɩwɛ tɛtʋ yɔɔ yɔ. Maɣzɩ mbʋ pɩɩlabɩ pɩnaɣ 1512 P.P.Y. alɩwaatʋ ndʋ pesiɣ Kediɣzaɣ kizinziku Sinayii Pʋʋ liu tɛɛ yɔ pɩ-yɔɔ nɛ ŋna. (Ejl. 40:17, 18) Palakaɣ sɔnzɩ se palɩzɩ Aarɔɔnɩ nɛ ɛ-pɩyalaa nɛ pɛkɛ cɔjɔnaa lɛ, Moyizi cɔnɩnɩ sɩ-yɔɔ. Izrayɛɛlɩ samaɣ kaakpeɣlaa se kana ɛzɩma cɔjɔnaa laɣ pa-kajalaɣ kpɩna kɩlaŋ yɔ. (Lev. 9:1-5) Ɛzɩma Yehowa wɩlaa se pɩkɛdɩnɩ-ɩ se palɩzɩ cɔjɔnaa kɩfama mba? Alɩwaatʋ ndʋ Aarɔɔnɩ nɛ Moyizi pɛwɛɛ nɛ pawazɩɣ samaɣ yɔɔ lɛ, Yehowa yele nɛ miŋ lɩɩnɩ ɛsɔdaa nɛ ɩñaɣ kɩlaʋ ŋgʋ kɩɩwɛ altaaru yɔɔ yɔ kɩ-tɩŋa.—Kalɩ Levitiki 9:23, 24.
14. Ɛzɩma Yehowa wɩlaa se pɩkɛdɩnɩ-ɩ se Aarɔɔnɩ nɛ ɛ-pɩyalaa pɛkɛ cɔjɔnaa yɔ, ɛbɛ yɔɔ pitukuuni-ɖʋ sɔnɔ?
14 Ɛbɛ miŋ weyi ɛlɩnɩ ɛsɔdaa nɛ ɛñaɣ kɩlaʋ yɔ ɛwɩlaa? Yehowa yeba se miŋ ɛlɩɩnɩ ɛsɔdaa nɛ pɩwɩlɩ se ɛ-taa wɛ leleŋ nɛ ɛzɩma palɩzɩ Aarɔɔnɩ nɛ ɛ-pɩyalaa se pɛkɛ cɔjɔnaa yɔ. Alɩwaatʋ ndʋ Izrayɛɛlɩ piya na kaɣlaa se Yehowa ɖʋnɩ nesi nɛ palɩzɩ cɔjɔnaa mba lɛ, piyeba nɛ pana se pɩpɔzaa se paɖʋ-wɛ nesi nɛ pa-laŋɩyɛ pilim. Ɛzɩma Yehowa wɩlaa se cɔjɔnaa mba palɩzɩ Izrayɛɛlɩ piya alɩwaatʋ taa yɔ pɩkɛdɩnɩ-ɩ yɔ, ɛbɛ yɔɔ pitukuuni-ɖʋ sɔnɔ? Pitukuuni-ɖʋ sɔnɔ mbʋ pʋyɔɔ yɔ, pɩsɩŋnɩ cɔjɔtʋ kɩbandʋ natʋyʋ ndʋ tɩ-tɔm cɛyaa nɛ pɩkɩlɩ yɔ. Krɩstʋ kɛnɩ Cɔjɔ Sɔsɔ weyi ɛkpaɖaa yɔ; nɛ ɛ nɛ ɛyaa 144000 waa mba pɛkɛ cɔjɔnaa nɛ awiya yɔ, pakaɣ labʋ tʋmɩyɛ nɔɔ kʋɖʋmaɣ taa ɛsɔdaa.—Ebr. 4:14; 8:3-5; 10:1.
Yehowa wɛɛ nɛ eɖiyiɣ ɛ-ɛgbɛyɛ nɛ ɛwazɩɣ-ɖɩ. Ðɩɖʋʋ-ɖɩ nesi nɛ ɖa-laŋɩyɛ pilim (Cɔnɩ tayʋʋ 15-17) *
15-16. Ɛzɩma Yehowa wɩlaa se “yom siɣsiɣ tʋ nɛ lɔŋsɩnɖʋ” tɔm kɛdɩnɩ-ɩ?
15 Pɩnaɣ 1919 taa, Yesu lɩzɩ koobiya patam numwaa nabɛyɛ cabɩ se pɛkɛ “yom siɣsiɣ tʋ nɛ lɔŋsɩnɖʋ.” Yom ɛnʋ ɛɖɛɣ nɔɔ tɔm susuu tʋmɩyɛ taa nɛ ɛhaɣ Krɩstʋ wayɩ tɩŋɩyaa “tɔɔnaɣ alɩwaatʋ ndʋ tɩmʋnaa yɔ tɩ-yɔɔ.” (Mat. 24:45) Ðɩnaɣ kpayɩ kpayɩ ɛzɩma Ɛsɔ wɩlɩɣ se yom siɣsiɣ tʋ nɛ lɔŋsɩnɖʋ tɔm kɛdɩnɩ-ɩ yɔ?
16 Sataŋ nɛ mba paɖʋʋ-ɩ nesi yɔ pɛwɛɛ nɛ pañakɩ pana se pasɩnzɩ yom siɣsiɣ tʋ tʋmɩyɛ. Pɩtaakɛ Yehowa sɩnʋʋ yɔɔ yɔ, yom ɛnʋ ɛtaapɩzɩɣ nɛ ɛlakɩ ɛ-tʋmɩyɛ. Yoŋ sɔsɔŋ naalɛ nɛ liidiye kʋñɔmɩŋ ndɩ ndɩ kaatukuni ɛjaɖɛ kpeekpe. Pɩtasɩ lɛ, Pomuli Ɛsɔ samaɣ nɛ panazɩ-kɛ. Paa mbʋ yɔ, yom siɣsiɣ tʋ nɛ lɔŋsɩnɖʋ wobi pɩ-yɔɔ nɛ ɛhaɣ fezuu taa tɔɔnaɣ Krɩstʋ wayɩ tɩŋɩyaa mba pɛwɛ tɛtʋ yɔɔ yɔ. Maɣzɩ ɛzɩma fezuu taa tɔɔnaɣ tɔyɩ sɔnɔ nɛ patayɩɣ-kɛ falaa kʋnʋmɩŋ weyi ɩcɛzɩ 900 taa mbʋ yɔ, pɩ-yɔɔ nɛ ŋna! Pɩnaɣ kpayɩ kpayɩ se Yehowa sɩɣnɩ yom ɛnʋ. Ɛzɩma tɔm susuu tʋmɩyɛ wɛɛ nɛ pɩɖɔŋ yɔ, pɩwɩlɩɣ se Yehowa wɛɛ nɛ ɛwazɩɣ tʋmɩyɛ nɖɩ ɖɩ-yɔɔ. Toovenim, pɛwɛɛ nɛ posusuu tɔm kɩbandʋ “tɛtʋ kpeekpe yɔɔ.” (Mat. 24:14) Pɩtʋʋ fɛyɩ se Yehowa wɛɛ eɖiyiɣ ɛ-ɛgbɛyɛ nɛ ɛwazɩɣ-ɖɩ sɔnɔ siŋŋ.
17. Ɛzɩma ɖɩpɩzɩɣ nɛ ɖɩwɩlɩ se ɖɩɖʋʋ nesi ɛgbɛyɛ nɖɩ Yehowa wɛɛ nɛ ɛlakɩnɩ tʋmɩyɛ yɔ?
17 Pɩwɛɣ ɖeu se ɖɩpɔzɩ ɖa-tɩ se: ‘Yehowa ɛgbɛyɛ hɔɔlʋʋ ŋgʋ kɩwɛ tɛtʋ yɔɔ yɔ, mɛwɛnɩ ɛsɩmɩyɛ ɛzɩma mɛwɛ kɩ-taa yɔ pɩ-yɔɔ?’ Moyizi alɩwaatʋ taa, Yehowa yeba nɛ miŋ lɩɩnɩ ɛsɔdaa nɛ pɩwɩlɩ se ɛ-taa wɛ leleŋ nɛ cɔjɔnaa mba palɩzaa yɔ. Sɔnɔ ɖɔɖɔ Yehowa wɩlɩ-ɖʋ kpayɩ kpayɩ se ɛwɛɛ nɛ ɛlakɩnɩ ɛ-ɛgbɛyɛ tʋmɩyɛ. Pɩwɛɛ kpem se ɖɩwɩlɩ ɖɛ-ɛsɩmɩyɛ pɩ-yɔɔ. (1 Tes. 5:18, 19) Ɛzɩma ɖɩpɩzɩɣ nɛ ɖɩwɩlɩ se ɖɩɖʋʋ nesi ɛgbɛyɛ nɖɩ Yehowa wɛɛ nɛ ɛlakɩnɩ tʋmɩyɛ yɔ? Ðɩlakɩ mbʋ pɩtɩŋnɩ ɛzɩma ɖɩɖɔŋ lɔŋ weyi patɩŋɩɣnɩ Bibl yɔɔ nɛ patasɩɣ-ɖʋ ɖa-takayɩsɩ taa, ɖe-kediɣzisi taa, ageeta kigbeɣliŋ nɛ kigbeɣliŋ sɔsɔŋ taa yɔ ɩ-yɔɔ yɔ. Pɩtasɩ lɛ, ɖɩpɩzɩɣ nɛ ɖɩwɩlɩ se ɖɩɖʋʋ nesi ɛgbɛyɛ nɖɩ, pɩtɩŋnɩ ɛzɩma ɖɩlakɩ ɖo-ɖoŋ ɖeɖe tɔm susuu nɛ tɔm wɩlʋʋ tʋmɩyɛ taa yɔ pɩ-yɔɔ yɔ.—1 Kɔr. 15:58.
18. Ɛbɛ ŋtɛm ña-taa se ŋlakɩ?
18 Pɩwɛɛ se ɖɩtɛ ɖa-taa se ɖɩɖɔŋ lɔŋ weyi ɖɩkpɛlɩkɩ Levitiki takayaɣ taa yɔ ɩ-yɔɔ. Ðɩsɔɔlaa se Yehowa ɛmʋ ɖa-kɩlaŋ. Ðɩsɛɣ Yehowa mbʋ pʋyɔɔ yɔ ɖɩwɛnɩ ɛsɩmɩyɛ ɛ-yɔɔ. Ðiwoki pɩ-yɔɔ nɛ ɖɩha Yehowa mbʋ ɖɩwɛna nɛ pɩkpaɖɩ ɖeu yɔ, mbʋ pʋyɔɔ yɔ, ɖɩsɔɔlɩ-ɩ nɛ ɖa-laŋɩyɛ pilim. Nɛ ɖɩlakɩ mbʋ payɩ ɖɩpɩzɩɣ yɔ se ɖɩɖʋ nesi ɛgbɛyɛ nɖɩ Yehowa wɛɛ nɛ ɛlakɩnɩ tʋmɩyɛ sɔnɔ yɔ. Ye ɖɩlakɩ pɩtɩŋa payɩ mbʋ yɔ, ɖɩpɩzɩɣ nɛ ɖɩwɩlɩ Yehowa se waɖɛ nɖɩ ɖɩwɛna se ɖɩkɛ ɛ-Aseɣɖe Tɩnaa yɔ, ɖɩmʋ ñɩm ɖɛ-ɛsɩndaa.
HENDU 96 Ɛsɔtɔm takayaɣ kɛnɩ-ɖʋ ñɩm pʋyʋ
^ tay. 5 Paɣtʋ ndʋ Yehowa kaaɖʋ caanaʋ taa Izrayɛɛlɩ yɔ, ɖɩnaɣ-tʋ Levitiki takayaɣ taa. Ɛzɩma ɖɩkɛ Krɩstʋ ñɩma yɔ, pɩtɩtasɩ cɛyʋʋ se ɖɩɖɔ paɣtʋ ndʋ tɩ-yɔɔ ɛlɛ tɩpɩzɩɣ nɛ tɩsɩnɩ-ɖʋ sɔnɔ. Tɔm ñʋʋ kʋnɛ kɩ-taa, ɖɩkaɣ tazʋʋ lɔŋ kɩbaŋ weyi ɖɩpɩzɩɣ nɛ ɖɩkpɛlɩkɩ Levitiki takayaɣ taa yɔ ɩ-taa.
^ tay. 4 Pakpakaɣ tɩlaaɖɩ ŋgʋ paɖʋwaɣ miŋ kediɣzaɣ kizinziku tɛɛ yɔ se kɩwɛ kele kele; nɛ caanaʋ taa lɛ, Yehowa sɛtʋ taa ɖeke Izrayɛɛlɩ piya lakaɣnɩ-kʋ tʋmɩyɛ. (Ejl. 30:34-38) Patɩma ɖoli se tɩlaaɖɩ miŋ ɖʋʋ kaakɛ kajalaɣ pɩnzɩ mɩnʋʋ taa Krɩstʋ ñɩma Ɛsɔ sɛtʋ hɔɔlʋʋ nakʋyʋ.
^ tay. 9 Ye ŋsɔɔlaa se ŋtɩlɩ laŋhɛzɩyɛ kɩlaŋ yɔɔ tɔm nɛ pɩkpaɖɩ yɔ, kalɩ Étude perspicace des Écritures, Volume 2, h. 847.
^ tay. 54 KƖLƐMƖŊ YƆƆ TƆM: Kɩwɛɛkɩm Hɩzʋʋ Kɩyakʋ Wiye, Izrayɛɛlɩ cɔjɔ sɔsɔ wɛɛ nɛ ɛsʋʋnɩ sɔzɩŋ tɩlaaɖɩ nɛ miŋ mamala Lone Kiɖeɖee Sɔsɔyɛ taa.
^ tay. 56 KƖLƐMƖŊ YƆƆ TƆM: Izrayɛɛlɩ pɩɣa nakɛyɛ woni heu nɛ kɛcɛlɩ layʋ se palaa laŋhɛzɩyɛ kɩlaʋ nɛ pɩwɩlɩ ɛsɩmɩyɛ nɖɩ ka nɛ kɔ-hɔʋ pɛwɛnɩ Yehowa yɔɔ yɔ.
^ tay. 58 KƖLƐMƖŊ YƆƆ TƆM: Alɩwaatʋ ndʋ Yesu lakaɣ ɛ-Ɛsɔ sɛtʋ tʋmɩyɛ tɛtʋ yɔɔ yɔ, ɛwɩlɩ sɔɔlɩm sɔsɔm mbʋ ɛwɛnɩ Yehowa yɔɔ yɔ, pɩtɩŋnɩ ɛzɩma ɛɖɔŋaɣ Ɛsɔ paɣtʋ yɔɔ nɛ ɛzɩma ɛsɩnɩ ɛ-wayɩ tɩŋɩyaa se pɔɖɔ tɩ-yɔɔ ɖɔɖɔ camɩyɛ yɔ.
^ tay. 60 KƖLƐMƖŊ YƆƆ TƆM: Koobu halɩñɩnʋ akpadɩyʋ nɔɔyʋ fɛyɩnɩ tomnaɣ taa alaafɩya camɩyɛ, paa mbʋ yɔ, ɛhaɣ Yehowa mbʋ payɩ ɛwɛna nɛ pɩkpaɖɩ ɖeu yɔ pɩtɩŋnɩ ɛzɩma ɛmaɣ takayɩsɩ nɛ ɛlɩzɩɣnɩ aseɣɖe yɔ pɩ-yɔɔ.
^ tay. 62 KƖLƐMƖŊ YƆƆ TƆM: Février 2019 taa, Koobu Gerrit Lösch weyi ɛwɛ Nɔɔɖɛyaa ɛgbɛyɛ taa yɔ, ɛwɛɛ nɛ ɛwɩlɩɣ Ɛjaɖɛ kɩfaɖɛ tɔm ɖɛzʋʋ Bibl ŋgʋ palɩzɩ Caama kʋnʋŋ taa yɔ. Sɔnɔ, tɔm susuyaa mba pɛwɛ Caama ɛjaɖɛ taa yɔ, palakɩnɩ tʋmɩyɛ Bibl kɩfalʋʋ ŋgʋ palɩzaa yɔ tɔm susuu taa nɛ taa leleŋ, ɛzɩ koobiya halɩñɩma panɛ pa-naalɛ yɔ.
