1-2. Mwanda waka bene Kidishitu dyalelo bafwaninwe kwifunda mukanda wa Bene Levi?

MUTUMIBWA POLO wāvulwije Temote mulunda nandi nkasampe amba, “Kisonekwa kyonso i kisonekejibwe na mushipiditu wa Leza kadi i kya kamweno.” (2 Tm. 3:16) Mu kino kisonekwa mubadilwa ne mukanda wa Bene Levi. Le umonanga namani uno mukanda wa mu Bible? Bamo babwanya kwiumona bu mukanda’tu udi na mulongo wa bijila kebitutalepo dyalelo, ino bene Kidishitu ba bine kebeumwenepo namino.

² Mukanda wa Bene Levi wālembelwe pano ke padi kintu kya myaka 3 500, ino Yehova wēulamine “mwanda wa kwitufundija.” (Loma 15:4) Mukanda wa Bene Levi byoulombola patōka milangwe ya Yehova, tufwaninwe kwifunda’o na kipyupyu. Bine, kudi ñeni mivule yotubwanya kuboila ku uno mukanda wa ku bukomo bwa mushipiditu. Twisambilei’ko bidi pa ñeni iná.

3. Mwanda waka bitapwa byādi bilambulwa mwaka ne mwaka mu Difuku dya Kupūta Bubi?

³ Ñeni mibajinji: Pa kusaka’mba bitapwa byetu bitabijibwe, tufwaninwe bidi kwitabijibwa na Yehova. Mwaka ne mwaka mu Difuku dya Kupūta Bubi, muzo wa Isalela wādi wibunga pamo ne kulambula bitapwa bya banyema. Bino bitapwa byādi bivuluja bene Isalela amba bafwaninwe kutōkejibwa ku bubi! Inoko kumeso kwa kitobo mukatampe kutwela na mashi a kitapwa mu Kijila Nakampata mu dine difuku’dya, wādi wingila bidi mwingilo mukwabo, mwine wādi na  mvubu kutabuka kulekelwa kwa bubi bwa muzo.

4. Mungya Bene Levi 16:12, 13, le kitobo mukatampe wādi ulonga bika shi watwela musunsa mubajinji mu Kijila Nakampata mu Difuku dya Kupūta Bubi? (Tala kifwatulo pa kibalu.)

⁴ Tanga Bene Levi 16:12, 13. Mona’po mu ñeni mulongekela bintu mu Difuku dya Kupūta Bubi: Kitobo mukatampe watwela mu kipema. Uno i musunsa mubajinji mu misunsa isatu yafwaninwe kutwela mu Kijila Nakampata mu dino difuku. Ukwete ku kuboko kumo kintu kidi’mo ensense ya luvumba luyampe, ku kuboko kukwabo nako ukwete’ko kininga kya olo kiyule makala a mudilo. Waimana kumeso a mpashila idi pa kibelo kya Kijila Nakampata. Na bulēme bonso, watwela mu Kijila Nakampata, waimana ku meso a sanduku wa kipwano. Wimene mu muswelo wa kyelekejo ku meso a Yehova Leza! Ebiya kitobo wapungulwila senene ensense ijila pa makala a mudilo, pene’pa mu kyumba mubayula luvumba luyampe. * Kupwa usa kutwela monka mu Kijila Nakampata na mashi a byamulambu bya bubi. Yuka’mba kumeso kwa kulambula mashi a byamulambu bya bubi, usōkanga bidi ensense.

5. Le i ñeni’ka yotubwanya kuboila ku ensense yādi ingidijibwa mu Difuku dya Kupūta Bubi?

⁵ Le i ñeni’ka yotubwanya kuboila ku ensense yādi ingidijibwa mu Difuku dya Kupūta Bubi? Bible ulombola’mba milombelo mitabijibwe ya batōtyi ba Yehova ba kikōkeji idi pamo bwa ensense. (Ñim. 141:2; Kus. 5:8) Vuluka’mba kitobo mukatampe wādi wenda na bulēme bukatampe na ino ensense ku meso a Yehova. Mu muswelo umo onka, potufwena Yehova mu milombelo, tumulombanga na bulēme bukatampe. Tumwakaminwe. Tufwijanga’ko bininge Umpangi wa diulu ne ntanda pa kwitupa mukenga wa kumufwena ne kupwana nandi pamo bwa mwana na shandi. (Yak. 4:8) Witabije twikale balunda nandi! (Ñim. 25:14) Tusangedile dino dyese, o mwanda ketusakengapo kumufītyija mutyima.

6. Le i ñeni’ka yotubwanya kuboila ku kusōka kwādi kusōka kitobo mukatampe ensense kumeso kwa kulambula bitapwa?

⁶ Vuluka’mba kitobo mukatampe wādi usōka ensense kumeso kwa kulambula bitapwa. Pa kino, wādi bidi ukimba kuyuka shi i mwitabijibwe na Leza kitatyi kyalambula bitapwa. Le i ñeni’ka yotuboila’ko? Yesu paādi pano pa ntanda, wālongele kintu kya mvubu​—kintu kya mvubu mikatampe kupita kupandija bantu​—kumeso kwa kulambula būmi bwandi bu kitapwa. Le i kintu’ka? Pa kulama bululame bwandi ne lulamato, Yesu wāteakenye dishinda mwanda wa Yehova etabije kitapwa kyandi. Mu uno muswelo, Yesu wālombwele amba i biyampe kulonga bintu musakila Yehova. Yesu wābingije bubikadi bwa Shandi ne kulombola’mba muludikilo wa Leza i moloke.

7. Mwanda waka Yesu wāsangeje Shandi mu būmi bwandi bonso pano pa ntanda?

⁷ Mu būmi bwandi bonso pano pa ntanda, Yesu wākōkele mu muswelo mubwaninine ku misoñanya myoloke ya Yehova. I kutupu ditompo nansha dimo dyāmulengeje aleke kubingija muludikilo wa Shandi, nansha ke lufu lusansa lwine. (Fid. 2:8) Paātenwe na matompo, Yesu wālombele “na diwi dikatampe ne impolo.” (Bah. 5:7) Milombelo yandi ya kininga yādi ilombola’mba udi na lulamato, kadi yāmukweshe akōkele nyeke. Ku meso a Yehova, milombelo ya Yesu yādi pamo bwa  luvumba luyampe lwa ensense. Yesu wāsangeje Shandi mu būmi bwandi bonso ne kubingija bubikadi bwandi.

8. Le i muswelo’ka otubwanya kwiula Yesu?

⁸ Tubwanya kwiula Yesu na kulonga bukomo bwa kulama bululame bwetu ne kulamata ku mashinda a Yehova ne ku bijila byandi. Potulwa na matompo, tulombanga Yehova na kininga etukwashe mwanda tusakanga kumusangaja. Mu uno muswelo, tukwatakanyanga muludikilo wa Yehova. Tuyukile amba Yehova kaketabijapo milombelo yetu shi tulonga bintu byashikilwe. Inoko, shi tulonde misoñanya ya Yehova, tubwanya kukulupila’mba milombelo yetu itamba ku mutyima ikekala pamo bwa ensense ya luvumba luyampe ku meso a Yehova. Kadi tubwanya kukulupila’mba bululame ne lulamato lwetu bisangajanga Tata wetu wa mūlu.​—Nki. 27:11.

9. Mwanda waka bene Isalela bādi balambula bitapwa bya kipwano?

⁹ Ñeni ya bubidi: Twingidilanga Yehova mwanda tusakanga kumufwija’ko. Pa kwivwanija uno mwanda, twisambilei bidi pa byamulambu bya kipwano, kintu kikwabo kya mvubu kyādi kilongwa mu butōtyi bwa bine mu Isalela wa kala. * Mu mukanda wa Bene Levi, twifunda’mo amba mwine Isalela wādi ulambula kitapwa kya kipwano “bu kilomboji kya kufwija’ko.” (Levi 7:11-13, 16-18) Kādipo ulambula kino kyamulambu na kuningilwa ino i na kusaka kwandi. Kino kyādi kyamulambu kya kwilanga kyādi kilambula muntu mwanda usenswe Leza  wandi, Yehova. Muntu wādi ulambula kino kyamulambu, kisaka kyandi, ne babitobo bādi badya mwita wa kitapwa kya nyema. Inoko kudi bipindi bimo bya kitapwa kya nyema byādi bilambulwa’nka kudi Yehova kete. Le i bipindi’ka?

10. Le bitapwa bya kipwano bitelelwe mu Bene Levi 3:6, 12, 14-16 bitufundija kintu’ka kyādi kitonona Yesu alonge kiswa-mutyima kya Shandi?

¹⁰ Ñeni ya busatu: Buswe bwitutononanga tupe Yehova kintu kiyampe kutabuka. Yehova wādi umona māni bu kipindi kiyampe kutabuka ku nyema. Kadi wātelele ne bipindi bikwabo bya mvubu, kubadila’mo ne mfyo, bine byādi na mvubu mikatampe. (Tanga Bene Levi 3:6, 12, 14-16.) O mwanda Yehova wādi usangala shi mwine Isalela wamulambula aye mwine bino bipindi bya mvubu ne māni. Mwine Isalela wādi ulambula kino kyamulambu, wādi ulombola’mba udi na mutyima wa kupa Leza kintu kiyampe kutabuka. Mu muswelo umo onka, Yesu nandi wālambwile kudi Yehova kintu kiyampe kutabuka na kumwingidila na muya onso mwanda wādi umusenswe. (Yoa. 14:31) Yesu wādi usangela kulonga kiswa-mutyima kya Leza, mwanda wādi usenswe bininge bijila bya Leza. (Ñim. 40:8) Bine, Yehova wāsangele pa kumona Yesu umwingidila na mutyima tō!

11. Le mwingilo wetu udingakene namani na bitapwa bya kipwano, ne kino kibwanya kwitukankamika namani?

¹¹ Pamo bwa bino bitapwa bya kipwano, mwingilo otwingidila Yehova, ulombolanga motumumwena. Tupanga Yehova kintu kiyampe kutabuka, kadi tumupanga’kyo mwanda tumusenswe na mutyima wetu onso. Bine Yehova usangalanga pa kumona batōtyi bandi midiyo ne midiyo bamwingidila na mutyima tō pa mwanda wa buswe bobamusenswe aye ne mashinda andi! Tubwanya kukankamikwa shi tuvuluke amba Yehova umwene bilongwa byetu na mvubu ne kine kitutonona twibilonge. Kimfwa, shi kodi mununu ne kukibwanyapo kulonga bivule na mosakila, kulupila’mba Yehova uyukile biyampe mikalo yobe. Padi ubwanya kumona’mba kubwanyapo kupa Yehova bivule, ino aye umwene buswe bukatampe bukutonona ulonge byobwanya kulonga. Aye uketabija kintu kiyampe kyobwanya kumupa.

12. Le muswelo wādi umona Yehova bitapwa bya kipwano witukulupija bika?

¹² Le i ñeni’ka yotubwanya kuboila ku bitapwa bya kipwano? Mudilo powādi usōka bipindi bya nyema biyampe kutabuka, mwishi wādi ukanda, kadi Yehova nandi wādi usangala. Nanshi kulupila’mba Yehova usangedile mwingilo omwingidila na mutyima tō ne na muya onso. (Kol. 3:23) Fwatakanya’po bidi mwakusangedile. Umonanga mwingilo mukatampe ne mutyetye omwingidila na buswe, bu kyabulēme kyakavuluka ne kwikimona nyeke na mvubu.​—Mat. 6:20; Bah. 6:10.

13. Mungya Bene Levi 9:23, 24, le Yehova wālombwele namani amba witabije kutongwa kwa babitobo?

¹³ Ñeni ya buná: Yehova weselanga kipindi kya pano panshi kya bulongolodi bwandi. Tulangulukilei bidi pa bintu byālongekele mu 1512 Yesu Kaile kitatyi kyāubakilwe kipema munshi mwa Lūlu lwa Shinai. (Div. 40:17) Mosesa ye wāimanine kinkumenkume kya kutongwa kwa Alone ne bandi bana bu babitobo. Muzo wa Isalela wēbungile mwanda wa kwimwena palambula babitobo bitapwa bya banyema musunsa mubajinji. (Levi 9:1-5) Le Yehova wālombwele namani amba witabije  kutongwa kwa bano babitobo bapya? Ba Alone ne Mosesa pobādi besela bantu, Yehova wātuma mudilo, nao wāsōka kitapwa kyonso pa kisōkelo.​—Tanga Bene Levi 9:23, 24.

14. I kika kinenenwa’mba kwitabija kobāitabije Alone ne bandi bana bu babitobo kudi Yehova i kwa kamweno kotudi?

¹⁴ Le bintu bilenga moyo byālongekele pa kutongwa kwa kitobo mukatampe byādi bilombola bika? Tamba penepa, Yehova wālombwele amba ukwatakenye babitobo bātongelwe. Bene Isalela pa kumona’mba Yehova ukwatakenye babitobo, nabo bamona bubinga bwa kwibakwatakanya ne pa mfulo. Le kino kidi na kamweno kotudi? En-en! Butobo bwa mu Isalela bwādi bu munjiñininya wa butobo bukatampe kutabuka. Kidishitu Kitobo Mukatampe kutabuka, udi na balopwe babitobo 144 000 bakengila nabo momwa mūlu.​—Bah. 4:14; 8:3-5; 10:1.

15-16. Le Yehova i mulombole namani amba witabije “umpika mukōkele ne mudyumuke”?

¹⁵ Mu 1919, Yesu watongele kakisumpi katyetye ka batutu bashingwe māni bu “umpika mukōkele ne mudyumuke.” Uno umpika utangidile mwingilo wa busapudi ne kupa balondi ba Kidishitu ‘byakudya pa kitatyi kifwaninwe.’ (Mat. 24:45) Le tumwene bubinga bwa patōkelela bulombola’mba Leza witabije umpika mukōkele ne mudyumuke?

¹⁶ Satana ne ntanda yandi baloñanga bukomo mwanda wa kwimika mwingilo wingila umpika mukōkele, kadi shi wadi wingilwa na bukomo bwa bumuntu, longa ke mwimane. Nansha byokwaikele mavita abidi a ntanda, kupangwapangwa kwa endaenda, kukoma kwa lupeto ntanda yonso,  ne kususulwa pampikwa mwanda, umpika mukōkele ne mudyumuke wendelelanga kupa balondi ba Kidishitu ba pano pa ntanda byakudya bya ku mushipiditu. Langulukila pa byakudya bivule bya ku mushipiditu byotudi nabyo dyalelo, bya ku bitupu, kadi mu ndimi 900 ne kupita! I bukamoni bulombola’mba Leza umukwatakenye. Tutalei bubinga bukwabo bulombola’mba Yehova witweselanga: mwingilo wa busapudi. Na bubine, myanda miyampe isapulwanga “pa ntanda yonso ikelwe na bantu.” (Mat. 24:14) Ne kutatana kwine mpika, Yehova uludikanga ne kwesela bininge bulongolodi bwandi dyalelo.

17. Le i muswelo’ka otubwanya kukwatakanya bulongolodi bwingidija Yehova?

¹⁷ I biyampe twiipangule amba, ‘le mfwijanga’ko pa kwikala mu kipindi kya pano pa nshi kya bulongolodi bwa Yehova?’ Yehova i mwitupe bubinga kebupatanibwapo budi pamo bwa mudilo wātūkile mūlu mu mafuku a ba Mosesa ne Alone. Bine, tudi na bintu bivule bya kufwijija’ko. (1 Ts. 5:18, 19) Le i muswelo’ka otubwanya kukwatakanya bulongolodi bwingidija Yehova? I na kulonda buludiki bwa mu Bible bobetupa mu mabuku etu, ku kupwila ne ku bitango. Kadi tubwanya kwibukwatakanya na kwingila bininge mwingilo wa kusapula ne kufundija.​—1 Ko. 15:58.

18. Le ubasumininwa kulonga bika?

¹⁸ Nanshi tusumininwei kwingidija ñeni yotwaboila ku mukanda wa Bene Levi. Twitabijibwei na Yehova pa kusaka’mba bitapwa byetu bitabijibwe. Twingidilei Yehova mwanda tusakanga kumufwija’ko. Twendelelei kupa Yehova kintu kiyampe kutabuka mwanda tumusenswe na mutyima wetu onso. Kadi tukwatakanyei na mutyima umo bulongolodi bwaesela dyalelo. Shi tulonge namino, tukalombola Yehova amba tusangedile dyese dya kumwingidila bu Batumoni bandi!