1-2. Mwomwo ika vaka-Kulishitu makumbi ano vatela kutanga mukanda waVyavaLevi?

KAPOSETOLO Paulu anukishile sepa lyenyi wakanyike Chimoteu ngwenyi: “Visoneka vyosena vavihwima kuli Kalunga, kaha vinawahila kunangula.” (Chimo. 2, 3:16) Hamikanda yosena yize vahwima kuli Kalunga namukanda waVyavaLevi naukiko hawatwama. Uno mukanda kana mwaumona ngachilihi? Vatu vamwe vamona nge mumukanda kana mwazala kaha jishimbi jize kajeshi kuzata kuli vatu makumbi anoko, oloze vaka-Kulishitu kavaumona ngochoko.

² Kufuma halwola luze vasonekele mukanda waVyavaLevi munahichi myaka kafwe 3,500, oloze Yehova naulame kanawa palanga nakulelo lino mangana ‘utunangule etu.’ (Loma 15:4) Mukanda waVyavaLevi weji kutukafwanga tutachikize omu Yehova eji kushinganyekanga nomu amona vyuma. Shikaho, twatela kufwila kuutanga. Kuli vyuma vyavivulu tunahase kulinangula mumukanda kanou vahwima. Tushimutwilenu havyuma viwana.

3. Mwomwo ika vahanyinyinenga wana wakulumba mwaka himwaka haLikumbi lyaKulinga chaKufwika haShili?

³ Chatete: Yehova atela kutwivwila uselewa numba jino etavile wana wetu. Mwaka himwaka haLikumbi lyaKulinga chaKufwika haShili, muyachi waIsalele walikungulwililenga hamwe omu kapilishitu wakulitulaho ahanyinenga mawana avimuna vakuvatula. Mawana kana anukishile vaIsalele nge vatelelele kuvatomesa kushili. Oloze shimbu kanda kapilishitu wakulitulaho atwale manyinga Muze Mwajila Chikuma, atelelele kupwa wakulonga  mukuyoya chenyi kaha nawa wakushishika, chuma kana chikiko chapwile chachilemu kuhambakana nakukonekela shili yavaIsalele.

4. Kweseka namazu ahali VyavaLevi 16:12, 13, vyuma muka alingilenga kapilishitu wakulitulaho halwola lwatete engililenga muze Mwajila Chikuma haLikumbi lyaKulinga chaKufwika haShili? (Talenu muvwimbimbi wahalipapilo lyahelu.)

⁴ Tangenu VyavaLevi 16:12, 13. Achishinganyekenu vyuma vyasolokelenga haLikumbi lyaKulinga chaKufwika haShili. Kapilishitu wakulitulaho engililenga mutavanaku. Halikumbi kana engililenga muze Mwajila Chikuma mapapa katatu. Halwola lwatete ambachilenga vyuma vyalivumba lyamwaza kulivoko limwe, kaha kulivoko likwavo ambachilenga chinoma chato chamakala akakahya. Omu ahetelenga kwakamwihi nalihina lize lyahandunwine muze Mwajila namuze Mwajila Chikuma, emanyinenga chindende, kufumaho, engililenga muze Mwajila Chikuma mujila yakavumbi nakwimana kuchikasha chalushiko. Echi chasolwele nge ou kapilishitu emanyinenga kumeso aYehova Kalunga mujila yachifwanyisa. Kaha ahingunwinenga vyuma vyajila vyalivumba lyamwaza hamakala akakahya, ngocho muze mukapete mwanukile livumba lyalupengopengo. * Kufumaho, engilile cheka muze Mwajila Chikuma oku nambate manyinga awana wahashili. Nganomu tunashimutwila lyehi, kapilishitu wakulitulaho avangililenga kuhaka wana wavyuma vyalivumba lyamwaza hakakahya shimbu kanda ahane manyinga awana wahashili.

5. Uno jila vazachishililengamo vyuma vyalivumba lyamwaza vize valumbilenga Halikumbi lyaKulinga chaKufwika haShili, yatunangula vyuma muka?

⁵ Uno jila vazachishililengamo vyuma vyalivumba lyamwaza vize valumbilenga haLikumbi lyaKulinga chaKufwika haShili, yatunangula vyuma muka? Mbimbiliya yasolola ngwayo, kulomba chavangamba jaKalunga vakushishika chize eji kwitavilanga chapwa nge vyuma vyalivumba lyamwaza. (Samu 141:2; Kuso. 5:8) Anukenu ngwenu, kapilishitu wakulitulaho atwalilenga vyuma vyalivumba lyamwaza kuli Yehova mukavumbi. Chochimwe nayetu nawa, omu natulombanga kuli Yehova twatela kulinga ngocho mukavumbi. Twawahilila chikuma hakutwitavisa kuli Tengi yetu uze atengele vyuma vyosena tupandame kuli ikiye ngana muze mwana eji kupandamanga kuli ise. (Yako. 4:8) Atumona kupwa tumasepa jenyi. (Samu 25:14) Twawahilila chikuma hakupwa masepa jaKalunga kaha katweshi nakusaka kulinga vyuma vize navimwivwisa kupihyako.

6. Mwomwo ika kapilishitu wakulitulaho avangililenga kuhana wana wavyuma vyalivumba lyamwaza shimbu kanda ahane wana wavimuna vakuvatula?

⁶ Anukenu ngwenu kapilishitu wakulitulaho avangililenga kulumba vyuma vyalivumba lyamwaza shimbu kanda ahane wana wavimuna vakuvatula. Kuvangila kulinga chuma kana chalingishile Kalunga amwivwile uselewa. Vyuma muka natulinangulako? Omu Yesu apwile hano hamavu, shimbu kanda ahane kuyoya chenyi kupwa wana wandando yakusokola, avangilile kulinga chuma chize chapwile chachilemu chikuma kuhambakana kuyovoka chavatu. Uno chuma muka vene ocho? Avangililile kupwa wakulonga kaha nawa wakushishika mukuyoya chenyi numba jino Yehova etavile wana wenyi. Kulinga ngocho chalingishile Yesu asolole nge kulinga vyuma mujila yize etavila Kalunga chikiko chuma chakwoloka. Kaha nawa Yesu asolwele hatoma nge wata chipwe chiyulo chaIse chapwa chakwoloka.

7. Vyuma muka alingile Yesu vize vyevwishile Ise kuwaha?

⁷ Omu Yesu apwile hano hamavu, akavangijilenga jishimbi jaYehova jakwoloka. Vyeseko chipwe kufwa mujila yayipi, kavyazeyesele Yesu ahone kuhakwila jila yakwoloka eji kuyulilangamo Iseko. (Fwili. 2:8) Omu apwilenga muvyeseko alombelenga “oku ali nakuteta  chikuma miteto, nakulila masoji.” (Hepe. 5:7) Kulomba chenyi chakufuma kumuchima chamujikijishile apwenga lika wakushishika. Yehova amwenenga kulomba chaYesu, ngana mwavyuma vyalivumba lyalupengopengo. Yesu omu apwile hano hamavu ajilikile wata waYehova, nakulinga vyuma vize vyevwishile Ise kuwaha mukuyoya chenyi chosena.

8. Tunahase kulondezeza ngachilihi Yesu?

⁸ Twatela kulondezeza Yesu hakulama kulonga chetu nakwononoka Yehova nakukavangizanga jishimbi jenyi. Nge tuli nakumona vyeseko, kaha twatela kulembelela Yehova mangana atukafwe tulinge vyuma vize navimwivwisa kuwaha. Kulinga ngocho nachisolola nge twakundwiza chiyulo chaYehova. Twatela kutachikiza ngwetu Yehova keshi kwitavila kulomba chetuko nge natulinga vyuma vize ahunga. Oloze nge natuyoya mujila yize etavila, kaha chikupu vene kulomba chetu nachipwa nge vyuma vyalivumba lyalupengopengo kuli Yehova. Kulonga nakushishika chetu, navivwisa Setu wamwilu kuwaha.—Vishi. 27:11.

9. Mwomwo ika vaIsalele vahanyinyinenga wana wakusolola kuunda?

⁹ Chamuchivali: Tweji kusololanga kusakwilila chetu kuli Yehova hakumuzachila. Natulinangula chishina chachilemu kuli vaIsalele vakushikulu omu vahanyinenga mawana akusolola kuunda kupwa jila yikwavo yakulemesalamo Yehova. * Tweji kutanganga mumukanda waVyavaLevi nge, kaIsalele ahanyinenga wana wakusolola kuunda, “kupwa wana wakusolola kusakwilila” chenyi. (Lev. 7:11-13, 16-18) KaIsalele ahanyinenga wana wakusolola kuunda kuli Kalunga mwomwo yakumuzanga keshi nge  mwomwo yachilikako. Shikaho, kaIsalele alisuwilenga ivene kuhana wana kana mwomwo azangile Kalunga kenyi Yehova. Mutu uze ahanyinenga wana kana, tanga yenyi nakapilishitu valilenga nyama yakanyama uze ahanyine kupwa wana. Oloze kwapwile vihanda vimwe vyakanyama vize vahanyinenga kaha kuli Yehova. Uno vihanda muka vene ovyo?

10. Uno wana wakusolola kuunda vavuluka hali VyavaLevi 3:6, 12, 14-16, walifwana ngachilihi namilimo yize Yesu azachililenga Kalunga?

¹⁰ Chamuchitatu: Tweji kuzachilanga Yehova mwomwo twamuzanga. Yehova amwenenga maji akanyama kupwa amalemu. Kaha avulukilenga navihanda vimwe vyakufwana nge jiso kupwa vyavilemu. (Tangenu VyavaLevi 3:6, 12, 14-16.) Shikaho, Yehova evwilenga kuwaha kachi nge kaIsalele mwaneha vihanda vyakanyama vyavilemu namaji kuli ikiye. KaIsalele uze ahanyinenga wana kana asolwele hatoma nge afwililile kuhana wana wamwaza kuli Kalunga. Chochimwe nawa, kuzanga Yehova chalingishile Yesu alisuule nakulihana kuli ikiye nakumuzachila namuchima wenyi wosena. (Yowa. 14:31) Yesu azangilenga kulinga mwaya muchima waKalunga mwomwo azangile kukavangiza jishimbi jaKalunga. (Samu 40:8) Twafwelela ngwetu Yehova evwile kuwaha hakumona Yesu mwamuzachila namuchima wenyi wosena.

11. Uno milimo tweji kuzachilanga Yehova yalifwana ngachilihi nawana wakusolola kuunda, kahechi cheji kutukolezezanga ngachilihi?

¹¹ Ngana mwawana wakusolola kuunda, milimo tweji kuzachilanga Yehova yasolola nge twamumona kupwa wamulemu mukuyoya chetu. Tweji kumuzachilanga namichima yetu yosena mwomwo twamuzanga chikuma. Yehova eji kwivwanga kuwaha chikuma hakumona vangamba jenyi navamuzachila mwomwo yakumuzanga nakumona jijila jenyi kupwa jajilemu chikuma. Kutachikiza ngwetu Yehova amona milimo tweji kumuzachilanga namichima yetu yosena kupwa yayilemu, cheji kutukolezezanga. Chakutalilaho, nge kamweshi nakuzata kanawa milimo yakushipilitu mwomwo yaushinakaji kaha mwatela kutachikiza ngwenu Yehova atachikiza kanawa ukalu wenu. Munahase kushinganyeka ngwenu, kamweshi nangolo jakuzachila Yehovako, oloze tachikizenu ngwenu Yehova eji kumonanga zangi yenu yize yeji kumilingisanga mumuzachile kweseka noho hakumina ngolo jenu. Kaha nawa ijivenu ngwenu Yehova eji kwitavilanga milimo yize mweji kumuzachilanga.

12. Uno Yehova evwilenga ngachilihi hamawana akusolola kuunda vamuhanyinenga, kahechi cheji kutukolezezanga ngachilihi?

¹² Uno Yehova evwilenga ngachilihi hamawana akusolola kuunda vamuhanyinenga? Omu kakahya kalilenga vihanda vyakanyama vize valumbilenga, wishi wakakumukilenga nakuya mwilu, ngocho Yehova evwile kuwaha. Ejivenu ngwenu Yehova eji kwivwanga kuwaha hakumuzachila namichima yenu yosena. (Kolo. 3:23) Eji kumonanga milimo mweji kumuzachilanga kupwa yayilemu numba yipwa yayindende chipwe yayinene, kaha nawa keshi kukayivulyamako haya myaka yosena.—Mateu 6:20; Hepe. 6:10.

13. Kweseka namukanda waVyavaLevi 9:23, 24, uno Yehova asolwele ngachilihi nge etavilile vapilishitu vaze vatongwele?

¹³ Chamuchiwana: Yehova anakukisula chihanda chaliuka lyenyi lyahano hamavu. Achishinganyekenu vyuma vyasolokele ha 1512 B.C.E., omu valemene tavanaku hapili Shinai. (Kulo. 40:17) Mose atwaminyinyine chilika chakutongola Alone navana venyi mangana vapwenga vapilishitu. Muyachi waIsalele walikungulwile hamwe nakutala omu vapilishitu vahanyinenga vimuna vakuvatula. (Levi 9:1-5) Uno Yehova asolwele ngachilihi nge etavilile vaze vapilishitu vatongwele? Omu Mose naAlone vakiswile vatu, kakahya kafumine mwilu kuli Yehova nakwocha uze wana wasalile halijiko lyakulumbila.—Tangenu VyavaLevi 9:23, 24.

14. Uno kutachikiza ngwetu Yehova etavilile Alone navana venyi kupwa vapilishitu nachitunganyalisa ngachilihi?

 ¹⁴ Uno kaze kakahya kafumine mwilu kasolwele vyuma muka? Yehova hakutuma kakahya asolwele nge etavilile Alone navana venyi vaze vatongwele vapwenga vapilishitu. Omu vaIsalele vamwene ngwavo chikupu vene Yehova netavila vapilishitu kana, navakiko vafwililile kukundwiza vaze vapilishitu. Kutala chuma kana chapwa chachilemu kuli etu tahi? Eyo. Mwomwo vapilishitu vaze vapwile muIsalele, vapwile kaha nakwimanyinako Kulishitu uze apwa Kapilishitu Wakulitulaho. Kapilishitu wakulitulaho Yesu hamwe kaha navaze 144,000, vaze vapwa vapilishitu, navakayulanga hamwe naYesu mwilu.—Hepe. 4:14; 8:3-5; 10:1.

15-16. Uno Yehova nasolola ngachilihi nge netavila “ndungo wakushishika wakuzangama?”

¹⁵ Mumwaka wa 1919, Yesu atongwele kalizavu kakandende kamalunga vakuwavisa kupwa “ndungo wakushishika wakuzangama,” uze eji kutetekelanga mulimo wakwambulula nakuhana vaka-kukavangiza Kulishitu “kulya chavo halwola lwakutamo.” (Mateu 24:45) Kutala tuli nakumona unjiho wakusolola nge Yehova netavila milimo ali nakuzata ou ndungo wakushishika wakuzangama tahi?

¹⁶ Satana nakaye kenyi vanazatenga nangolo mangana vahonese milimo anakuzata ou ndungo wakushishika wakuzangama. Numba tuhu kunapunga jijita jakaye jajinene jivali, naluyanjisa nauhutu mukaye, kaha nawa vatu jaKalunga vanavavangijikilanga vihande vyamakuli nakuvayanjisa, oloze ndungo wakushishika natwaleho lika kuhananga kulya chakushipilitu kuli vaka-kukavangiza Kulishitu hano hamavu. Achishinganyekenu hakulya chakushipilitu chize chinalisale ngana oholyapwa, chikiko nawa vali nakuchihana hawana wakanyombo mumalimi akuzomboka 900! Echi chinasolola hatoma nge, chikupu vene Yehova ali nakukafwa ndungo wakushishika wakuzangama. Kaha  nawa Kalunga ali nakukisula mulimo wetu wakwambulula. Mujimbu wamwaza vali ‘nakuwambulula hamavu hosena.’ (Mateu 24:14) Chakuzeneka kukakasana, Yehova ikiye ali nakutwaminyina nakukisula liuka lyenyi makumbi ano.

17. Tunahase kukundwiza ngachilihi liuka lize ali nakutwaminyina Yehova?

¹⁷ Twatela kulihulisa ngwetu: “Uno ngwawahilila chikuma kupwa muchihanda chaliuka lyaYehova chahano hamavu tahi? Yehova natuhane unjiho wakusolola hatoma nge ali nakutwaminyina liuka lyenyi ngana muze anehele kakahya kufuma mwilu mumakumbi aMose naAlone. Chikupu vene, tuli navyuma vyavivulu vize vyatela kutulingisa tupwenga namuchima wakusakwilila. (Teso. 1, 5:18, 19) Tunahase kukundwiza ngachilihi liuka lize ali nakutwaminyina Yehova? Tunahase kulinga ngocho, hakukavangiza jindongi jize veji kutuhananga mumikanda yetu, najize veji kutunangulanga kukukunguluka chachikungulwilo, nachachihanda nachangalila. Kaha nawa tunahase kusolola ngwetu tuli nakukundwiza liuka kana hakwazananga chikuma mumulimo wakwambulula nakunangula vatu.—Koli. 1, 15:58.

18. Vyuma muka muli nakufwila kulinga?

¹⁸ Tufwilenu kuzachisa vyuma tunalinangula mumukanda waVyavaLevi. Tufwilenu kwivwisa Yehova kuwaha mangana etavile milimo tweji kumuzachilanga. Tutwalenuho lika kusolola kusakwilila chetu kuli Yehova hakumuzachila. Kaha nawa kuzanga Yehova namichima yetu yosena nachitukafwa tutwalenuho lika kumuzachilanga. Shikaho, tutwalenuho lika kukundwiza liuka lize ali nakuzachisa makumbi ano. Nge natulinga ngocho, kaha natusolola ngwetu twazanga Yehova nakumusakwilila hakutokwa twatwama nacho hakupwa tuVinjiho jenyi.