1-2. Muloñadi akwaKristu makonu chatela kuzatishilawu mukanda waAlevi?

KAPOSTOLU PAWULU wamwanukishili ibwambu dindi Timotewu nindi “Nsona yejima ayonena kudi Nzambi nawa [yayiwahi].” (2 Tim. 3:16) Munabombeli nimukanda waAlevi. Yumanyi yimwatoñojokaña haniwu mukanda? Amakwawu atoñojokaña nawu himukanda mwekala hohu nshimbi yabulaña kuzatika makonu, ilaña akwaKristu alala hiyatoñojokaña muniyi njilaku.

² Mukanda waAlevi awusonekeli yaaka 3,500 yinahitihu, ilaña Yehova wawuhembeli kulonda “etu tudiziliku.” (Rom. 15:4) Dichi twatela kuwuzatisha chikupu iwu mukanda, muloña watukwashaña kwiluka chatoñojokañayi Yehova nichatiyañayi. Hela chochu, muniwu mukanda wonenawu mudi yuma yayivulu yitwatela kudizilaku. Tuhanjekenu hayuma yiwana.

3. Muloñadi chalambwilileñawu nyilambu chaaka nichaaka Hefuku Dakubuta Nshidi?

³ Chatachi: Twatela kwikala nawuselewa waYehova hakwila nawu nyilambu yetu ayiteji. Chaaka nichaaka Hefuku Dakubuta Nshidi, muza wawaIsarela wapompeleña hamu nawa alambwileña nyilambu yawanyama. Iyi nyilambu yayanukishileña aIsarela nawu akeñekeleña kuyitookesha kunshidi. Ilaña henohu kapristu muneni kanda yaleti mashi amulambu Mwamweni Mwajila hanidi ifuku, chatachi wasambilileña kuzata mudimu wukwawu, mudimu wadiña walema kubadika kwanakena nshidi yamuza wawaIsarela.

4. Neyi chinamwekeshiwu haAlevi 16:12, 13, chumanyi chelileñayi kapristu muneni neyi neñili katachi Mwamweni Mwajila Hefuku Dakubuta Nshidi? (Talenu mwevulu wudi hakava.)

 ⁴ Tañenu Alevi 16:12, 13. Toñojokenu hachuma chamwekeneña Hefuku Dakubuta Nshidi. Kapristu Muneni neñili mutabanaka. Aka dikatachi kwiñila hakapampa kasatu katela kwiñilayi Mwamweni Mwajila hanidi ifuku. Chikasa chimu, nasendeliku cheña hadi insensi yevumba dadiwahi nawa kuchikwawu nakwatiliku fwosholu hadi makala akesi to-o! Nemani kwakwihi nehina dajika hawiñililu wakapeka kaMwamweni Mwajila. Nakalemesha kakeni, neñili Mwamweni Mwajila nawa nemani kuchimbañu chachitiyañenu. Dikwila nawu nemani kumesu aYehova Nzambi muchifwikija. Dichi kapristu nechili insensi yajila hamakala akesi nawa mukapeka munepuki Ivumba dadiwahi. * Kuhiñahu, wukwiñila cheñi Mwamweni Mwajila namashi amulambu wanshidi. Dichi nasambili kwocha insensi henohu kanda yalambuli mashi amulambu wanshidi.

5. Yumanyi yitwatela kudizila kuinsensi yazatishileñawu Hefuku Dakubuta Nshidi?

⁵ Yumanyi yitwatela kudizila kuinsensi yazatishileñawu Hefuku Dakubuta Nshidi? Bayibolu yamwekeshaña nawu kulomba kwetejañayi Yehova kwawakwakudifukula indi ashinshika kudi neyi insensi. (Mas. 141:2; Chim. 5:8) Mwatela kwanuka nenu kapristu muneni wamwekesheleña kalemesha kakeni hakuleta insensi kumesu aYehova. Munjila yoyimu, neyi tunakulomba kudi Yehova twalombaña nakalemesha kakeni. Twazañalalaña chikupu kwiluka netu Nleñi wakuleña kwejima watwitejaña kuswina kwakwihi nayena neyi chekalaña mwana natata yindi. (Yak. 4:8) Watwiteja kwikala amabwambu jindi. (Mas. 25:14) Twalemesha nankashi ichi chawaana chakwila twakeñaña kwila yuma yinateli kumuneñesha wanyi.

6. Chasambilileñayi kapristu muneni kwocha insensi henohu kanda yahani mulambu chinakutudizishadi?

⁶ Kapristu muneni wasambilileña kwocha insensi henohu kanda yalambuli mulambu. Chasambilileñayi kwocha insensi, wamwekesheleña nindi Nzambi wukumutiya kuwaha. Chumanyi chitwatela kudizilaku? Hampinji yadiñayi Yesu hamaseki, wazatilihu chuma chimu chalema henohu kanda yahani wumi windi kwikala mulambu, chuma chalema kubadika kukuula muchidi wamuntu. Chumanyi chenichi? Wateleleli kumwovwahila Yehova muchihandilu chindi chejima heseki kulonda Yehova yeteji mulambu windi. Kwila mwenimu, Yesu wamwekesheleña nindi kwila yuma yamutiyishaña Yehova kuwaha dichuma chachiwahi. Nawa wamwekesheli cheñi nindi chiyuulu chaTata yindi chachiwahi nawa dichinashikilimu kuyuula.

7. Muloñadi chihandilu chaYesu chejima chahanu hamaseki chichamutiyishilileña Tata yindi kuwaha?

⁷ Yesu wamwovwahilili Yehova muchihandilu chindi chejima. Hela chakwila wahitili mukweseka nimukukala kwasweja, welukili nindi wukufwa kufwa kwayeña, dichi wafwilileña kumwekesha nindi Tata yindi hohu diyi wunateli kuyuula chiwahi. (Fwi. 2:8) Chamweneñayi kukala, Yesu walombeleña “iku nakudila chikupu nimadilu.” (Heb. 5:7) Kulomba kwindi kwakufuma hamuchima kwamwekesheli nawu wadiña washinshika kudi Yehova nawa chamuletesheli kusweja kumwovwahila. Kulomba kwaYesu kudi Yehova, kwadiña neyi ivumba dadiwahi  dainsensi. Chihandilu chaYesu chejima chamutiyishileña Tata yindi kuwaha nikujilika chiyuulu Chindi.

8. Tunateli kwimbujola ñahi chihandilu chaYesu?

⁸ Tunateli kumwimbujola Yesu kuhitila mukwikala ashinshika nikumwovwahila Yehova. Neyi tunakuhita mukweseka, twalombaña kudi Yehova netu yatukwashi muloña twakeñaña kumutiyisha kuwaha. Chitwelaña mwenimu, twamwekeshaña netu tunakuhakwilaku chiyuulu chaYehova. Tweluka netu Yehova kwila yatiya kulomba kwetu neyi twilaña yuma yahelayi nehi. Hela chochu, neyi twilaña yuma yakeñayi, kulomba kwetu kwakufuma hamuchima kudi Yehova kunateli kwikala neyi ivumba dadiwahi dainsensi. Nawa twatela kwiluka netu tunateli kumulemesha Tata yetu wamwiwulu neyi twikala ashinshika nikumwovwahila.—Yish. 27:11.

9. Muloñadi aIsarela chalambwilileñawu nyilambu yakuwunda?

⁹ Chamuchiyedi: Twamukalakelaña Yehova muloña twakeñaña kumutiyisha kuwaha. Hakwila tutiyishi chiwahi iyi nsañu, tuhanjekenu hanyilambu yakuwunda yahanineñawu aIsarela hakudifukula kwalala. * Mumukanda waAlevi twadizañamu netu, kaIsarela walambwileña mulambu wakuwunda neyi chuma “chakusakilila nachu.” (Lev. 7:11-13, 16-18) Walambwileña iwu mulambu bayi  neyi dichateleli kwilayiku, ilaña dichakeñeleñayi. Wafwilileña kwila mwenimu muloña wakumukeña Yehova Nzambi yindi. Muntu wahanineña mulambu nichisaka chindi kushilahu nikapristu adiileña mbiji yakanyama wunalambuluwu. Ilaña yiidi yimu yakanyama ayihanineña hohu kudi Yehova? Yiidi yamuchidinyi?

10. Indi nyilambu yakuwunda yashimunawu haAlevi 3:6, 12, 14-16 yinesekani ñahi namudimu wamukalakeleleñawu Yehova kudi Yesu?

¹⁰ Chamuchisatu: Twamukalakelaña Yehova chakufuma hamuchima. Yehova walemesheli nankashi manji akanyama. Yehova washimwini cheñi yiidi yikwawu, kushilahu ninshiya nindi yadiña yalema. (Tañenu Alevi 3:6, 12, 14-16.) Dichi, Yehova watiyileña kuwaha sweje-e neyi kaIsarela mukudikeñela yamulambula iyi yiidi yakanyama yamanji. KaIsarela walambwileña yumiyi wamwekesheleña nindi nakumwinka Yehova chakufuma hamuchima. Munjila yoyimu, Yesu, wamukalakeleli Yehova namuchima windi wejima muloña Wakumukeña. (Yow. 14:31) Yesu wakeñeli nankashi kwila nkeñelu yaYehova nawa wakeñeli nankashi nshimbi jaNzambi. (Mas. 40:8) Yehova watiyileña kuwaha chamukalakeleleñawu kudi Yesu muloña wakumukeña.

11. Nyidimu yetu yinesekani ñahi nanyilambu yakuwunda, nawa chumichi chatukundejaña ñahi?

¹¹ Nyidimu yitwamukalakelaña Yehova yidi neyi nyilambu yakuwunda, muloña diyi yamwekeshaña chitwamukeña. Twamukalakelaña Yehova hakumina ñovu jetu, muloña twamukeña chakufuma hamuchima. Yehova watiyaña kuwaha hakumona mamiliyoni awantu anakumukalakela muloña wakusweja kumukeña nikukeña nshimbi jindi. Yehova wamonaña nyidimu yetu nawa wayilemesha. Chumichi chatukundejaña hama. Chakutalilahu, neyi mwakula dehi nawa munakukañanya kuzata neyi chimwazatileña, ilukenu nenu Yehova weluka kukala kumunakumona. Hadaha mwatoñojokaña nenu mukutwesha wanyi kumukalakela Yehova nankashi, ilaña Yehova weluka kukeña kwenu kwayileñelaña mumuzatileña hanakumini ñovu jenu. Watambwilaña yuma yejima yimwamwinkaña kwesekeja nañovu jenu.

12. Yehova watiyileña ñahi nanyilambu yakuwunda, nawa chumichi chatukoleshaña ñahi?

¹² Yumanyi yitwatela kudizila kunyilambu yakuwunda? Kesi chikanoñesheleña yiidi yayiwahi yakanyama, wishi wafutumukileña nakuya mwiwulu, Yehova watiyileña kuwaha. Mwatela kwiluka nenu Yehova watiyaña kuwaha chimwamukalakelaña nawumi wenu wejima. (Kol. 3:23) Yehova wayitiyaña kuwaha. Walemesha nankashi mudimu wenu wumwakalakalaña chili weneni hela wanyanya. Nyidimu yimwamuzatilaña yalema nawa wakayanukaña mpinji yejima.—Mat. 6:20; Heb. 6:10.

13. Kwesekeja na Alevi 9:23, 24, Yehova wamwekesheli ñahi nindi nayiteji atupristu?

¹³ Chamuchiwana: Yehova nakukiswila kuloñesha kwindi kwahamaseki. Talenu chuma chamwekeni mu 1512 B.C.E. chatuñiliwu tabanaka kumpidi yaSinayi. (Kwid. 40:17) Mosi walombweli ichi chidika hamutondeliwu Aroni nianyanindi kwikala atupristu. Muza wawaIsarela wapompeli kulonda wumoni atupristu chahanineñawu nyilambu yatachi yawanyama. (Lev. 9:1-5) Yehova wamwekesheli ñahi nindi wetejeli atupristu  atondeliyi? Chakiswilileñawu aAroni naMosi antu, Yehova watemesheli kesi nawa kanoñesheli nyilambu yejima yashalilihu hakameña.—Tañenu Alevi 9:23, 24.

14. Yehova chayitejeliyi aAroni nianyanindi kwikala atupristu chamwekeshañadi kudi etu makonu?

¹⁴ Kesi kafumini mwiwulu hampinji yatondeliwu kapristu muneni kamwekeshelidi? Yehova wamwekesheli nindi wamwitejeli Aroni nianyanindi kwikala atupristu. A Isarela chamweniwu iwu wunsahu wafumini kudi Yehova elukili nawu atela kukwashaña atupristu. Komana chumichi chalema kudi etu? Eña! Wupristu wadiñaku muIsarela wadiña nakwimenaku mwevulu wachuma chalema. Kristu, diyi Kapristu Muneni wudi nawatupristu 144,000, akayuula hamu nindi mwiwulu.—Heb. 4:14; 8:3-5; 10:1.

15-16. Yehova namwekeshi ñahi nindi nakukwasha “nduñu wamaana nikashinshi”?

¹⁵ Mu 1919, Yesu watondeli kadizanvu kawamanakwetu awayishewa kwikala “nduñu wamaana nikashinshi.” Iwu nduñu walombolaña mudimu wakushimwina nawa wenkaña akwakumulondela Kristu “yakuda yawu hampinji yatelela.” (Mat. 24:45) Komana tunakumona netu Nzambi wamwiteja nduñu wamaana nikashinshi?

¹⁶ Satana nikaayi kindi anakweseka kukañesha mudimu wanduñu wamaana nikashinshi. Chakadi wukwashu waYehova nduñu wamaana nikashinshi hadi kutweshaku. Nduñu wamaana nikashinshi natwalekihu kuloñeshela akwakumulondela Kristu yakuda hela chakwila mukaayi mwadiña njita jiyedi jamaneni, kukala  kwamali, kukabisha antu jaNzambi nikuyijaha. Toñojokenu hanyikanda yitukweti makonu, iyi nyikanda yawaana nawa yidi mumadimi kubadika ha 900. Yuma yejimiyi yinakumwekesha nawu Nzambi nakukwasha nduñu washinshika. Mudimu wakushimwina niwena hichinjikijilu chinakumwekesha nkisu jaYehova. Mwalala nsañu yayiwahi anakuyishimwañena “mwahita iseki dejima.” (Mat. 24:14) Chakadi nikujina, Yehova nakulombola nikukiswila kuloñesha kwindi makonu.

17. Tunateli kumwekesha ñahi netu tunakuzatila hamu nakuloñesha kunakuzatishayi Yehova?

¹⁷ Twatela kudihula netu, ‘Komana nasakililaña hakwikala mukuloñesha kwaYehova?’ Mumafuku aMosi Yehova watemesheli kesi kufuma mwiwulu nakumwekesha nindi wetejeli antu atondeliyi. Munjila yoyimu, Yehova natwinki chinjikijilu chinakumwesha nawu nakuzatisha kuloñesha kwindi. Tukweti wunsahu wawuvulu wukuletesha tusakilileña. (1 Tes. 5:18, 19) Tunateli kuzatila ñahi hamu nakuloñesha kunakuzatishayi Yehova? Kuhitila mukulondela yuma yitwadizaña muBayibolu, munyikanda yetu, hakupompa, hakupompa kwañinza nihakupompa kweluña. Kubombelahu, tunateli kuzatila hamu kuhitila mukuzata mudimu wakushimwina nikutañisha.—1 Kor. 15:58.

18. Chumanyi chimunakufwila kwila?

¹⁸ Dichi tutwalekenuhu kuzatisha yuma yitunadizi mumukanda waAlevi. Tunakukeña Yehova yeteji nyilambu yetu. Tumukalakelaña Yehova muloña tunakukeña kumutiyisha kuwaha. Dichi tutwalekenuhu kumukalakela Yehova kwesekeja nahanakumini ñovu yetu muloña twamukeña namuchima wetu wejima. Nawa tuzatenu hanakumini ñovu yetu kulonda tuzatileña hamu nakuloñesha kunakuzatishayi makonu. Neyi twila yumiyi, tukumwekesha kudi Yehova netu twalemesha kukooleka kwakwikala aYinsahu jindi.