1-2. Tûn laia Kristiante chuan engvângin nge Leviticus bu chu an ngaihven ang?

TIRHKOH Paula’n a ṭhian tleirâwl Timothea chu “Pathian Lehkha Thu zawng zawng hi Pathian thâwk khuma pêk a ni a, . . . a sâwt bawk a ni,” tiin a hriatnawntîr a. (2 Tim. 3:16) Chutah chuan Leviticus bu pawh a tel a ni. Bible-a chu lehkhabu chu engtin nge i thlîr? Mi ṭhenkhat chuan tûn lai huna ṭangkai tawh lo dân tam tak chuanna lehkhabu angin an thlîr mai thei; mahse, Kristian dikte chuan chutiang chuan an thlîr lo.

² Leviticus bu chu kum 3,500 vêl kal taa ziak ni mah se, Jehova’n “min zirtîrna tûrin” a vawng ṭha a. (Rom 15:4) Chu lehkhabu chuan Jehova ngaihtuahna a târ lan avângin, phûr takin kan zir chiang tûr a ni. Dik takin, thlarauva thâwk khum chu lehkhabu aṭang chuan zir tûr tam tak kan nei a ni. Chûng zînga palite chu i lo ngaihtuah ang u.

3. Engvângin nge kum tina neih Inremna Nîah inthawinate hlan a nih?

³ Zir tûr pakhatna: Kan inpêkna chu pawm a nih theih nân Jehova lawm hlawh kan nih a ngai. Kum tina neih Inremna Nîah Israel mite chu kal khâwmin ranin an inthawi ṭhîn a. Chûng inthawinate chuan sual laka tlenfai an ngai tih a hriatnawtîr a ni. Puithiam lalin chumi nia Hmun Thianghlim Bera  inthawina thisen a ken luh hmain, a hnam pumpuia an sual ngaihdamna aia pawimawh zâwk thil pakhat a tih hmasak a ngai a ni.

4. Leviticus 16:12, 13-a târ lan angin, puithiam lal chuan Inremna Nîa Hmun Thianghlim Bera a luh hmasak ber khân eng nge a tih? (A kâwma milem en rawh.)

⁴ Leviticus 16:12, 13 chhiar rawh. Inremna Nîa thilthleng chu han mitthla teh: Puithiam lal chu biak bûkah a lût a. Hei hi chumi nia Hmun Thianghlim Bera a luh vawi thum zînga a hmasa ber a ni. A kut khatin rimtui tui taka khat bêl tê a keng a, a kut lehlamin meilinga khat rangkachaka luan mei lâkna a keng bawk. Ani chu Hmun Thianghlim Ber luhna puanzâr hmaah a châwl a. Hmun Thianghlim Berah chuan zahna thûk tak nêna lûtin, thuthlung bâwm hmaah a ding a. Ani chu Pathian Jehova hmaah, entîr neiin a ding tih theih a ni. Tûnah, puithiam lal chuan rimtui tui tak chu meiling chungah fîmkhur takin a phul a; tichuan, pindan chu rimtuiin a khat ta a ni. * A hnuah, Hmun Thianghlim Berah chuan sual thawina thisen kengin a lût leh ang. Sual thawina thisen a hlan hmain rimtui a hâl hmasa tih chhinchhiah ang che.

5. Inremna Nîa rimtui hmanna aṭangin eng nge kan zir theih?

⁵ Inremna Nîa rimtui hmanna aṭangin eng nge kan zir theih? Bible chuan Jehova chhiahhlawh rinawmte pawm tlâka an ṭawngṭaina chu rimtui ang a ni tih a târ lang a. (Sâm 141:2; Thup. 5:8) Puithiam lal chuan zahna thûk tak nên rimtui chu Jehova hmaah a keng lût tih hre reng ang che. Chutiang bawkin, keini pawh ṭawngṭaia Jehova kan pan hunah zahna thûk tak kan nei a ni. Ani chu kan ṭih hle a. Fain a pa a pan thei anga lei leh vân Siamtu pan theihna leh hnaih theihna kan neih chu kan ngaihlu tak zet a ni. (Jak. 4:8) Ani chuan a ṭhiante angin min pawm a! (Sâm 25:14) He chanvo hi kan ngaihhlut êm avângin amah tihlungnih loh chu kan duh ngai lo vang.

6. Puithiam lalin inthawinate a hlan hmaa rimtui a hâlna aṭangin eng nge kan zir theih?

⁶ Puithiam lalin inthawinate a hlan hmain rimtui a hâl tih hre reng ang che. Chutiang kawng chuan, inthawinate a hlan hunah Pathianin a pawm ang tih a chiang thei a ni. Chuta ṭangin eng nge kan zir theih? Leia a awm laiin, Isua chuan inthawi nâna a nun a hlan theih hmain mihringte chhandamna aia pawimawh zâwk thil pawimawh tak tih tûr a nei a. Chu chu eng nge ni? A inthawina chu pawm tlâk a nih theih nân leia a nun chhûng zawng rinawm taka Jehova thu a âwih a ngai a ni. Chutiang kawng chuan, Isua’n Jehova duh zâwng mila thil tih chu nun dân kawng ṭha ber a ni tih a târ lang ang. Chu bâkah, a Pa lalchungnunna, a nih loh leh a rorêl dân chu thiam a chantîr—a nih loh leh a felin a dik—tih a târ lang bawk ang.

7. Engvângin nge leia Isua nun pumhlûm chuan a Pa a tihlâwm?

⁷ Leia a nun chhûng zawngin, Isua chuan Jehova tehna felte a zâwm famkim a. Eng thlêmna leh fiahna mahin—hrehawm taka thihna tûr pawhin—a Pa rorêl dân humhim a duhna chu a tichhe thei lo. (Phil. 2:8) Fiahnate a hmachhawn hunah, Isua chu “nasa taka au leh mitui tla chungin” a ṭawngṭai a. (Heb. 5:7) Tih tak zeta a ṭawngṭaina chuan Jehova chunga a rinawmzia leh thuâwih a tum tlatzia a târ lang a ni. Jehova tân chuan, Isua ṭawngṭainate chu rimtui tui tak ang a  ni a. Isua nun pumhlûm chuan a Pa a tilâwm tak zetin, A lalchungnunna chu thiam a chantîr a ni.

8. Isua nun kawng chu engtin nge kan entawn theih?

⁸ Keini pawh, theih tâwp chhuaha Jehova thu âwihin, leh rinawmna nun kawng zawhin Isua kan entawn thei a. Jehova tihlâwm kan duh avângin, fiahnate kan hmachhawn hunah tih tak zetin a ṭanpuina kan dîl a ni. Chutiang kawng chuan, Jehova rorêl dân chu kan thlâwp a. A huat zâwng nungchangte kan nei a nih chuan, Jehova’n kan ṭawngṭainate chu a pawm lo vang tih kan hria. Mahse, A tehnate mila kan nun chuan, tih tak zeta kan ṭawngṭainate chu Jehova tân rimtui tak ang a ni ang tih kan ring nghet tlat thei a. Rinawm taka a thu kan âwihna chuan kan Pa vâna mi a tilâwm tih kan chiang thei a ni.—Thuf. 27:11.

9. Engvângin nge remna thilhlan chu an hlan?

⁹ Zir tûr pahnihna: Jehova chunga kan lâwm avângin a rawng kan bâwl. Chumi târ lan nân, hmân lai Israel mite hun laia biakna dik pêng pawimawh tak dang, remna thilhlan chungchâng hi i lo ngaihtuah ang u. * Leviticus bu-ah, Israel mi chuan remna thilhlan chu ‘lâwmthu sawi nâna thilhlan’ angin a hlân thei tih kan hria a. (Lev. 7:11-13, 16-18) Ani chuan tih tûr a nih vâng ni lovin, a duh avângin a hlân a ni. Chu chu Pathian Jehova a hmangaih avânga mahni duh thua thilhlan a ni. A hlântu, a chhûng te, leh puithiamte chuan chu inthawina sa chu an ei ang. Mahse, inthawina saa ṭhenkhat chu Jehova  hnênah chauh an hlân ṭhîn a ni. A englaite nge an hlan?

10. Leviticus 3:6, 12-a târ lan remna thilhlan inthawina chuan a Pa duh zâwng a tihnaa Isua chêttîrtu chungchâng eng nge min zirtîr?

¹⁰ Zir tûr pathumna: Hmangaihna avângin Jehova hnênah kan neih ṭha ber kan pe. Jehova chuan ran thau chu a ṭha lai ber angin a thlîr a. Chu bâkah, a kalte pawh tiamin, a taksa pêng ṭhenkhat pawhin hlutna an nei tih a sawi bawk. (Leviticus 3:6, 12, 14-16 chhiar rawh.) Chuvângin, Israel miin mahni duh thua a thau leh ran taksa pêng pawimawh laite a hlan chuan Jehova chu a lâwm hle. Chutiang thil hlântu Israel mi chuan Pathian hnênah a neih ṭha ber hlan a duhzia a târ lang a ni. Chutiang bawkin, Isua chuan Jehova a hmangaih avânga thinlung zawng zawnga rawngbâwlin a neih ṭha ber chu inhuam takin a hlân a. (Joh. 14:31) Ani chuan Pathian duh zâwng tih chu nuam a tiin, a dânte chu a ngaina tak zet a ni. (Sâm 40:8) Isua’n inhuam takin rawng a bâwl tih Jehova’n a hmuh chuan a va lâwm dâwn tak êm!

11. Kan rawngbâwlna chu engtin nge chûng remna thilhlan inthawinate nên a inan a, chu chuan engtin nge min thlamuan theih?

¹¹ Chûng remna thilhlan inthawinate angin, Jehova rawng kan bâwlna chuan amah kan hmangaihna a târ lang. Jehova chu thinlung zawng zawnga kan hmangaih avângin a hnênah kan neih ṭhat ber kan pe a. Mi maktaduai tam takin amah leh a kawngte an ngainat êm avângin a rawng an bâwl tih Jehova’n a hmuh chuan a va lâwm dâwn tak êm! Ani chuan kan thiltihte chauh ni lovin, min chêttîrtu pawh a hmuin a hlut a ni tih kan hriat avângin kan thla a muang thei a. Entîr nân, kum upat avânga i duh anga tamin i thawk thei lo a nih chuan, Jehova’n i theih chin tâwk a hria tih chiang ang che. I thil hlan tûr chu a beitham hle niin i ngai mai thei; mahse, i tih theihte ti tûrin hmangaihna thûk takin a chêttîr che tih Jehova’n a hmu a. Ani chuan i neih ṭhat ber i pêk chu lâwm takin a pawm a ni.

12. Jehova’n remna thilhlan inthawina a chhân lêt dân aṭangin eng nge kan rin tlat theih?

¹² Remna thilhlan inthawinate aṭangin eng nge kan zir theih? Inthawina sa ṭha lai berte meia a kan laia mei khu chho chuan Jehova a tilâwm a ni. Chuvângin, inhuam tak leh theih tâwp chhuaha i rawngbâwlna chu Jehova’n a lâwm tih ring tlat ang che. (Kol. 3:23, 24) A hlim dân tûr chu han mitthla teh. Hmangaihna avânga i thawhrimna chu a tam emaw, a tlêm emaw pawh ni se, ani chuan chûngte chu ro hlu anga ngaiin a hre reng ang.—Mt. 6:20; Heb. 6:10.

13. Leviticus 9:23, 24-a sawi angin, Jehova’n puithiamho chu a pawm tih engtin nge a târ lan?

¹³ Zir tûr palina: Jehova chuan lei lama a inawpna pâwl chu mal a sâwm. B.C.E. 1512-a Sinai Tlâng bula biak bûk din a nih laia thilthleng kha han ngaihtuah teh. (Ex. 40:17) Mosia chuan Arona leh a fapate chu puithiam ni tûrin a buatsaih a. Israel mite chu puithiamte’n ran hmanga inthawina hmasa ber an hlan lai en tûrin an kal khâwm a. (Lev. 9:1-5) Jehova’n puithiama a ruat tharte chu a pawm tih engtin nge a târ lan? Arona leh Mosia’n mipuite mal an sâwm zawh chuan Jehova’n maichâm chunga an thilhlan kângral tûrin mei a rawn tîr a ni.—Leviticus 9:23, 24 chhiar rawh.

14. Jehova’n Arona thlah puithiamho a pawmna chu engvângin nge kan tân a pawimawh?

¹⁴ Puithiam lal ruat a nih laia vân aṭanga mei lo tla chuan eng nge a târ lan? Jehova  chuan Arona thlah puithiamho chu a pawm tak zet tih a târ lang a. Israel mite chuan Jehova’n puithiamho a awmpui tih finfiahna an hmuh chuan anni pawhin theih tâwpa thlâwp a ngai tih an hre thiam a ni. Chu chuan keini nên inkûngkaihna a nei em? Nei e! Israel rama puithiamho chu puithiam ropui zâwkte hlimthla mai an ni a. Puithiam Lalber Krista chuan vâna a rawngbâwlpui tûr lal puithiamho 1,44,000 a nei a ni.—Heb. 4:14; 8:3-5; 10:1.

15-16. Jehova’n “bawi rinawm, fing tak” chu a pawm tih engtin nge a târ lan?

¹⁵ Kum 1919-ah, Isua’n hriak thih unau tlêm tê chu “bawi rinawm, fing tak” ni tûrin a ruat a. Chu bâwih chuan thu hrilh rawngbâwlnaah hma hruaiin, Krista hnungzuite chu “a hun apianga an chaw chan tûr” a pe a ni. (Mt. 24:45) Bâwih rinawm leh fing tak chu Pathianin a pawm tih finfiahna chiang tak kan hmu em?

¹⁶ Setana leh amah thlâwptute chuan bâwih rinawm hnathawh chu tihtâwp an tum a. Chu bâwih chuan Jehova ṭanpuina dawng lo se chuan, an hnathawh chu hlen theih rual a ni lo vang. Khawvêl indopui pahnih te, tihduhdahna te, khawvêl pum huapa ei leh bâr harsatna te, leh rorêl dik lohnate a awm chung pawhin, bâwih rinawm leh fing chuan leia Krista hnungzuitute chu thlarau lam chaw a pe chhunzawm zêl a ni. Tûn laia ṭawng 900 aia tama a thlâwna hmuh theih thlarau lam chaw hnianghnâr tak hi han ngaihtuah teh! Hei hi Pathianin a ṭanpuizia finfiahna chiang tak a ni a. Jehova malsâwmna an dawnzia finfiahna dang, thu hrilh rawngbâwlna pawh hi han ngaihtuah teh. Chanchin ṭha chu “khawvêl zawng zawngah” hrilh  a ni tawh tak zet a ni. (Mt. 24:14) Jehova chuan tûn laia a inawpna pâwl chu a kaihruaiin, nasa takin mal a sâwm tih rinhlelh rual a ni lo.

17. Jehova inawpna pâwl kan thlâwpzia engtin nge kan lantîr theih?

¹⁷ Heti hian kan inzâwt tûr a ni, ‘Jehova lei lam inawpna pâwla ka tel thei hi ka lâwm em?’ tiin. Jehova chuan Mosia leh Aronate hun laia vân aṭanga mei tak tak a rawn tirh anga chiang finfiahna min pe a. Lâwmna tûr chhan tam tak kan nei a ni. (1 Thes. 5:18, 19) Jehova inawpna pâwl kan thlâwpzia engtin nge kan lantîr theih? Kan thu leh hla chhuah te, inkhâwm te, leh inkhâwmpuite aṭanga kan dawn Bible ṭanchhan kaihhruainate zawmna hmangin kan lantîr thei a ni. Chu bâkah, thu hrilh leh zirtîr rawngbâwlnaa a tam thei ang bera telin kan thlâwpzia kan lantîr thei bawk.—1 Kor. 15:58.

18. Eng tih nge kan tum tlat ang?

¹⁸ Leviticus bu aṭanga kan zirte chu nunpui i tum tlat ang u. Kan inpêknate chu Jehova pawm tlâk nihtîr i tum ang u. Jehova chunga kan lâwm avângin a rawng i bâwl chhunzawm zêl ang u. Kan thinlung zawng zawnga kan hmangaih avângin Jehova hnênah kan neih ṭhat ber i pe zawm zêl ang u. Pathianin tûn laia a hman a inawpna pâwl chu thinlung zawng zawngin i thlâwp ang u. Chutiang kawng chuan, Jehova hnênah a Thuhretute nia rawngbâwl theihna chanvo hlu kan neih chu kan hlut tak zet tih kan lantîr thei a ni.