1-2. Kifer nou bizin interese pou kone seki ena dan liv Levitik?

LAPOT Pol ti rapel so zenn kamarad Timote ki “tou Lekritir inspire par Bondie ek li itil.” (2 Tim. 3:16, NW) Parmi sa bann Lekritir-la ena osi liv Levitik. Kouma to konsider sa liv Labib la? Sertin dimounn panse ki se enn liv kot ena boukou lalwa ki nepli itil pou nou lepok, me bann vre Kretien pa pans koumsa.

² Sa fer anviron 3,500 an ki finn ekrir liv Levitik, me Zeova inn prezerv sa liv-la “pou nou linstriksion.” (Rom. 15:4) Liv Levitik fer nou konn fason panse Zeova ek so bann santiman. Alor, nou bizin interese pou kone seki ena dan sa liv-la. Avredir, nou kapav aprann boukou leson dan sa liv-la. Anou examinn kat parmi sa bann leson-la.

3. Kifer eski ti ofer bann sakrifis Zour Rekonsiliasion?

³ Premie leson: Nou bizin gagn faver Zeova pou ki Li aksepte nou bann sakrifis. Sak lane, pandan Zour Rekonsiliasion, nasion Izrael ti rasanble ek gran pret ti ofer bann sakrifis zanimo. Sa bann sakrifis-la ti rapel bann Izraelit ki zot ti bizin gagn pirifikasion pou zot bann pese. Me sa zour-la, avan ki gran pret amenn disan bann sakrifis dan landrwa ki Pli Sin, li ti bizin fer enn lot kitsoz, enn kitsoz ki ti boukou pli inportan ki pardon bann pese ki nasion Izrael ti fer.

4. Dapre Levitik 16:12, 13, premie fwa ki gran pret ti rant dan landrwa ki Pli Sin pandan Zour Rekonsiliasion, ki li ti fer? (Get zimaz lor kouvertir.)

 ⁴ Lir Levitik 16:12, 13. * Mazinn sa senn-la: Zour Rekonsiliasion, gran pret rant dan tabernak. Sa zour-la, li bizin rant dan landrwa ki Pli Sin trwa fwa, ek la li pe prepar li pou rantre pou premie fwa. Dan enn lame, li ena enn resipian ki ranpli ar lansan parfime, ek dan lot lame, li ena enn resipian an-or ki ranpli ar sarbon so. Pandan enn ti moman, li aret li kot rido ki devan lantre landrwa ki Pli Sin. Apre sa, avek boukou respe, li rant dan landrwa ki Pli Sin ek li debout devan lars lalians. Dan enn fason sinbolik, li pe debout devan Zeova! Lerla, li koumans met lansan lor sarbon so, ek pies-la koumans santi bon. * Plitar, gran pret pou re-rant dan landrwa ki Pli Sin avek disan sakrifis pou pese. Me remarke ki li bril sa lansan-la avan ki li ofer disan sakrifis pou pese.

5. Ki leson nou aprann ar lansan ki ti servi pandan Zour Rekonsiliasion?

⁵ Ki leson nou aprann ar lansan ki ti servi pandan Zour Rekonsiliasion? Labib montre ki Zeova konsider lapriyer so bann fidel serviter kouma lansan. (Ps. 141:2; Rev. 5:8) Nou’nn trouve ki se avek boukou respe ki gran pret ti amenn lansan devan Zeova. Li parey, kan nou priye Zeova, nou bizin fer sa avek boukou respe. Nou bien rekonesan ki Kreater liniver permet nou priye Li ek vinn pros ar Li, parey kouma enn zanfan avek so papa. (Zak 4:8) Zeova aksepte ki nou vinn so kamarad! (Ps. 25:14) Nou telman apresie sa privilez-la ki zame nou pa pou anvi fer nanye ki kapav desevwar Li.

6. Gran pret ti bril lansan avan ki li ti ofer bann sakrifis. Ki leson nou aprann ar sa?

⁶ Pa bliye ki gran pret ti bizin bril lansan avan ki li ofer bann sakrifis. Kifer li ti fer sa? Pou fer sir ki li gagn faver Bondie kan li ofer bann sakrifis. Ki leson nou aprann ar sa? Kan li ti lor later, Zezi ti bizin fer enn kitsoz inportan avan ki li donn so lavi an sakrifis. Sa kitsoz-la ti boukou pli inportan ki sov bann imin. Ki li ti bizin fer? Li ti bizin res fidel anver Zeova ek obeir Li toutlong so lavi lor later pou ki Zeova aksepte so sakrifis. Dan sa fason-la, Zezi ti pou montre ki fer volonte Zeova se pli bon fason pou viv. Zezi ti pou zistifie souverennte so Papa, setadir li ti pou prouve ki Zeova so fason dirize pli bon.

7. Kifer Zezi ti viv dan enn fason ki ti fer so Papa plezir?

⁷ Toutlong so lavi lor later, Zezi ti obeir Zeova dan enn fason parfe. Mem si li ti gagn bann tantasion ek bann leprev ek mem si li ti kone ki li ti pou bien soufer avan ki li mor, Zezi ti bien deside pou prouve ki fason dirize so Papa pli bon. (Fil. 2:8, NW) Kan li ti fer fas ar bann sitiasion difisil, Zezi ti “priye bien for ziska vers so larm.” (Ebre 5:7) So bann lapriyer sinser ti montre ki li fidel ar Bondie ek sa ti ed li pou ena plis determinasion pou obeir Bondie. Pou Zeova, bann lapriyer Zezi ti santi bon kouma enn lansan parfime. Toutlong so lavi, Zezi ti viv dan enn fason ki ti fer so Papa plezir ek ki ti montre ki Zeova ena tou drwa pou dirize.

8. Kouma nou kapav imit Zezi?

⁸ Nou kapav imit Zezi kan nou fer tou  pou obeir Zeova ek res fidel anver Li. Kan nou fer fas ar bann sitiasion difisil, nou sipliy Zeova pou ed nou parski nou anvi fer Li plezir. Kan nou fer sa, nou montre Zeova ki nou soutenir so fason dirize. Nou kone ki Zeova pa pou ekout nou bann lapriyer si nou fer bann kitsoz ki Li deteste. Parkont, si nou viv an-akor avek so bann prinsip, nou kapav sir ki Li pou konsider nou bann lapriyer sinser kouma enn lansan ki santi bon. Ek nou kapav sir osi ki nou lobeisans ek nou fidelite pou fer Li plezir.​—Prov. 27:11.

9. Kifer bann Izraelit ti ofer bann sakrifis lape?

⁹ Deziem leson: Nou servi Zeova parski nou rekonesan anver Li. Pou konpran sa pli bien, anou gete seki nou aprann avek bann sakrifis lape, enn sakrifis bien inportan ki ti form parti dan vre ladorasion dan ansien Izrael. * Dan liv Levitik, nou aprann ki enn Izraelit ti kapav ofer enn sakrifis lape “pou montre so rekonesans.” (Lev. 7:11-13, 16-18) Li ti fer sa sakrifis-la parski li ti anvi fer sa, pa parski li ti oblize. Alor, enn Izraelit ti ofer sa sakrifis-la volonterman parski li ti kontan Zeova. Sa dimounn ki ti fer sa sakrifis-la, so fami, ek bann pret ti manz laviann sa zanimo-la. Me sertin parti zanimo-la ti rezerve zis pou Zeova. Ki sa bann parti-la sa?

10. Ki lien nou kapav fer ant sakrifis lape ki mansione dan Levitik 3:6, 12, 14-16 avek fason ki Zezi ti fer volonte Zeova?

¹⁰ Trwaziem leson: Nou donn Zeova nou  best parski nou kontan Li. Zeova ti konsider lagres kouma meyer parti ki ena dan enn zanimo. Li ti osi explike ki sertin parti enn zanimo, kouma rognon, ena enn gran valer pou Li. (Lir Levitik 3:6, 12, 14-16. *) Alor, Zeova ti bien kontan kan enn Izraelit volonterman ti ofer Li sa bann parti-la ek osi lagres enn zanimo. Sa Izraelit-la ti montre ki li ti ena enn gran dezir pou donn Zeova so best. Dan mem fason, Zezi volonterman ti donn Zeova so best. Zezi inn servi so Papa avek tou so leker parski li kontan Li. (Zan 14:31) Zezi ti kontan fer volonte so Papa; li ti extra kontan lalwa Bondie. (Ps. 40:8) Pena dout ki Zeova ti bien kontan pou trouv Zezi servi Li avek tou so leker!

11. Kifer nou kapav konpar nou servis ar bann sakrifis lape, ek kifer sa rasir nou?

¹¹ Nou servis pou Zeova li parey kouma sa bann sakrifis lape la, parski se atraver nou servis ki nou montre Zeova seki nou resanti pou Li. Nou donn Zeova nou best parski nou kontan Li avek tou nou leker. Pena dout ki Zeova extra kontan kan Li trouv plizir milyon dimounn pe servi Li avek tou zot leker ek pe obeir Li! Sa rasir nou kan nou kone ki Zeova trouv nou bann aksion ek nou bann mobil ek ki sa ena enn gran valer pou Li. Par exanp, si to enn kikenn ki aze ek ki to nepli kapav fer otan ki avan, to kapav sir ki Zeova konpran twa. Kitfwa to panse ki to pa pe fer boukou pou Zeova, me Zeova trouv sa gran lamour ki pe motiv twa la pou fer seki to kapav. Kan nou donn Zeova nou best, Li aksepte sa avek plezir.

12. Ki Zeova ti resanti kan ti ofer Li bann sakrifis lape, ek kouma sa ankouraz nou?

¹² Ki nou kapav aprann ar bann sakrifis lape? Kan dife ti bril bann meyer parti enn zanimo, lafime ti mont lao ek sa ti fer Zeova plezir. Alor, to kapav sir ki sa fer Zeova plezir kan to fer to best pou servi Li. (Kol. 3:23, NW) Mazine kouma Li kontan kan Li get twa! Li konsider to bann zefor, ki zot gran ouswa tipti, kouma bann trezor ki ena boukou valer ek Li pou rapel zot touletan.​—Mat. 6:20; Ebre 6:10, NW.

13. Dapre Levitik 9:23, 24, kouma Zeova ti montre ki Li ti aksepte sa bann pret ki ti’nn etabli la?

¹³ Katriem leson: Zeova pe beni parti so lorganizasion ki lor later. Anou gete ki ti arive an 1512 Avan Nou Lepok, kan bann Izraelit ti ranz tabernak kot lipie Montagn Sinai. (Ex. 40:17) Moiz ti fer enn seremoni pou etabli Aaron ek so bann garson kouma pret. Nasion Izrael ti rasanble pou get bann pret ofer zot bann premie sakrifis zanimo. (Lev. 9:1-5) Kouma Zeova ti montre ki Li ti aksepte sa bann pret ki ti’nn etabli la? Pandan ki Aaron ek Moiz ti pe beni lepep, Zeova ti avoy enn dife depi lesiel pou bril net bann sakrifis ki ti ena lor lotel.​—Lir Levitik 9:23, 24. *

14. Kisannla bann pret dan ansien Izrael reprezante azordi?

 ¹⁴ Kifer Zeova ti fer dife sorti depi lesiel pou bril sa bann sakrifis-la? Li ti fer sa pou montre dan enn fason bien kler ki Li ti aksepte ek soutenir Aaron ek so bann garson kouma pret. Kan bann Izraelit ti trouv sa, zot ti konpran ki zot osi zot ti bizin soutenir sa dispozision-la. Kifer li inportan ki nou konn sa? Parski, dan enn fason sinbolik, bann pret dan ansien Izrael reprezant enn lot group pret ki ena bann pli gran responsabilite azordi: Zezi Kris, antan ki pli Gran Pret, ek bann 144,000 ki pou servi kouma pret ek lerwa dan lesiel.​—Ebre 4:14; 8:3-5; 10:1.

15-16. Kouma Zeova montre ki Li aksepte “lesklav fidel ek saz”?

¹⁵ An 1919, Zezi ti etabli enn ti group frer ki ena lesperans pou al dan lesiel kouma “lesklav fidel ek saz.” Sa esklav-la diriz laktivite predikasion ek li donn bann disip Zezi “zot nouritir dan ler ki bizin.” (Mat. 24:45, NW) Eski nou ena bann prev ki montre ki Bondie aksepte ek soutenir “lesklav fidel ek saz”?

¹⁶ Satan ek so lemond pe fer tou pou aret travay sa esklav-la. Si Zeova pa ti ed sa esklav-la, li ti pou inposib ki li fer travay ki’nn donn li. Malgre de lager mondial, bann persekision, bann kriz ekonomik, ek bann linzistis, lesklav fidel ek saz inn kontign nouri bann disip Zezi lor plan spiritiel. Reflesi lor tou bann piblikasion ki nou ena azordi. Sa bann piblikasion-la zot gratis ek zot disponib dan plis ki 900 lang. Li kler ki Bondie pe soutenir sa esklav-la! Nou laktivite predikasion se enn lot prev ki Zeova pe beni sa esklav-la. Bonn nouvel pe “anonse partou dan lemonn.”  (Mat. 24:14) Pena okenn dout ki Zeova pe diriz so lorganizasion azordi ek ki Li pe bien beni li!

17. Kouma nou kapav soutenir lorganizasion Zeova?

¹⁷ Li bon nou demann noumem: ‘Eski mo rekonesan ki mo form parti dan lorganizasion Zeova?’ Dan lepok Moiz, Zeova ti avoy enn dife depi lesiel pou montre ki Li ti aksepte bann dimounn ki Li ti swazir. Dan nou lepok osi parey, dan enn fason bien kler, Zeova donn nou bann prev ki Li pe servi so lorganizasion. Nou ena boukou rezon pou montre nou rekonesans. (1 Tes. 5:18, 19) Kouma nou kapav soutenir lorganizasion Zeova? Premierman, kan nou met an pratik bann konsey Biblik ki nou gagne dan bann piblikasion, bann renion, ek bann lasanble. Ek deziemman, kan nou partisip afon dan laktivite predikasion ek lansegnman.​—1 Kor. 15:58.

18. Ki nou bien deside pou fer?

¹⁸ Anou bien deside pou met an pratik bann leson ki nou’nn aprann dan liv Levitik. Anou fer tou pou gagn faver Zeova pou ki Li aksepte nou bann sakrifis. Anou servi Zeova parski nou rekonesan anver Li. Anou kontign donn Zeova nou best parski nou kontan Li avek tou nou leker. Ek anou soutenir avek tou nou leker lorganizasion ki Li pe beni azordi. Kan nou fer sa bann kitsoz-la, nou montre Zeova ki se enn gran privilez pou servi Li kouma so Temwin!