1-2. Tae-i ǃaroman Xristeǁîna nētsē Levitikus ǂkhanis ǃnâ ǃgâiǃgâibasensa nî ūhâ?

APOSTEL Paulub ge ǁîb di ǂkham ǀhōsab Timoteuba ge ǂâiǂâiǃnâ, “xoas hoas ge Elob xa ǃgomǂgāǃnâhe hâ, tsî a harebe.” (2Tim. 3:16) Nēs ge Levitikus ǂkhanis tsîna ǃkhōǂgā hâ. Nē ǂkhanis xa da tae-e ra ǂâi? ǂGuin ge ǀnîsi ra ǂâi nēs ge ǂkhanis hîna ǂgui ǁgaragu ǀguiga ūhâsa tsî nētsē sîsenǂuiba ūhâ tama hâ di xawe Xristeǁîn ǂâi ǀgaub ge nēsa xu ra ǀkhara.

² Levitikus ǂkhanis ge 3 500 kuriga ǃkharu hâse ge xoa-e xaweb ge Jehovaba sida “ǁkhāǁkhās ǃoa” nē ǂkhanisa ge xoa kai. (Rom. 15:4) Levitikus ǂkhanis ge Jehovab mati ra ǂâi tsî tsâsa ra ǁnâuǃā kai da. ǁNā-amaga da ge nē ǂkhanisa ǃgâise nî ôaǃnâ. ǁNā ǂkhanisa xu da ge ǂgui xūna a ǁkhāǁkhāsen ǁkhā. Hā re î da haka xūna ǃhoaǃgao.

3. Tae-i ǃaroma i ge ǁguibade ǂkhîbagus tsēs ai kurib hoaba gere dīhe?

³ ǂGurose: Sida ǁguibadi nî ǃkhōǃoa-e ǃkhaisa da ga ǂgao o, o da Jehovab xa nî ūǃoa-e. Mâ kurib hoaba ǂkhîbagus di tsēs ai, os ge Israelǁaesa ǀguiba gere hā tsî xamanina gere ǁguiba. ǁNā ǁguiban ge Israelǁaesa gere ǂâiǂâiǃnâ ǁîn ǁorena xun nî ǃanu ǃkhaisa. ǀGapi pristeri ǁîb di ǀaob ǁguibab go xamani i diba nî sī-ūs aiǃâb ge aibe ǁnās xa ǂhâǂhâsa xū-e nî dīs ge ge i.

4. Levitikus 16:12, 13 ǃoagub ge ǀgapi pristera tae-e gere dī ǃanu ǃkhaib ǃnâb nî ǂgâs aiǃâ ǂkhîbagus di tsēs ai? (Tsoatsoas ai hâ ai-īsiba mû re.)

 ⁴ Khomai re Levitikus 16:12, 13. Tae-i ge ǂkhîbagus di tsēs ai gere īs xa ǂâi re: ǀGapi pristeri ge tabernakeli ǃnâ gere ǂgâ. ǁNās ge ge ǃnonaǁî ǃnā i hînab ge ǁnā tsēs ai ǃanu ǃkhaib ǃnâ gere ǂgâsa. ǀGui ǃoms ǃnâb ge ǃgâihamxūna ge ūhâ i tsî nau ǃoms ǃnâ ǃnuni ǀurib ǀkha kurisa xapas hîna ǀaesa ūhâsa ge ūhâ i. ǁÎb ge ǃanu ǃkhaib ǃnâb nî ǂgâs aiǃâ gordyni aisi ra mâ. ǁÎb ge ǃgôaǃgâsib ǀkha ǃanu ǃkhaib ǃnâ ǂgâ tsî tempeli ais ai gere mâ. ǀNî hâ mîdi ǃnâb ge Jehovab ais ai mâ. ǁNās khaoǃgâb ge pristera ǃgâihamxūna ǂnomdi ai ra ǁhō tsîs ge hoa ǃkhaisa ǁkhoaxase ra ham. * Pristeri ge ega ǁkhawa xamani i hînab go ǁguiba i di ǀaob ǀkha ǃanu ǃkhaib ǃnâ gere ǂgâ. ǁÎb ge ǃgâihamxūna aibe ra khau ǁoreb di ǀaob di ǁguibasab nî mās aiǃâ.

5. Tae-e da ǃgâihamxūn ge ǂkhîbagus tsēs ai gere sîsen-ūhe ǀgausa xu ra ǁkhāǁkhāsen?

⁵ Tae-e da ǃgâihamxūn ge ǂkhîbagus tsēs ai gere sîsen-ūhe ǀgausa xu ra ǁkhāǁkhāsen? Elobmîs ge ra ǁgau Jehovab ǂgomǂgomsa ǃoaba-aon di ǀgoredi hîna ǁîb xa ra ūǃoa-e di ge ǃgâihamxūn khami ī di. (Psa. 141:2; J.ǂHa. 5:8) ǀGapi pristeri ge ǃgâihamxūna ǃgôaǃgâsib ǀkha Jehovab aiǃâ gere sī-ū. ǁKhā ǀgaub ǃnâ da ge Jehovaba ǃoa da ga ǀgore o, o nēsa ǃgôaǃgâsib ǃnâ ra dī. Kaise da ge ra ǃgôaǃgâ Kuru-aob ge mā-am da o i da ǁîba ǃoa ǀgū ǀgôa i ǁgûba ǃoa ra ǀgu khami. (Jak. 4:8) ǁÎb ge ǁîb ǀhōsan ase ra ūǃoa da. (Psa. 25:14) Nē aiǂhanuba da ge kaise ra ǃgôaǃgâ tsî ǁîba ra ǂkhîoǃnâ kai xūna dī ǂgao tama hâ.

6. Tae-e da ǀgapi pristeri ge ǃgâihamxūna aibe gere khau ǁguibasab nî mās aiǃâsa xu ra ǁkhāǁkhāsen?

⁶ ǂÂis ǃnâ ūhâ re ǀgapi pristeri ge aibe ǃgâihamxūna nî khaus ge ge ī ǁguibasab nî dīs aiǃâ. ǃGâihamxūna ǂgurose khaus ǃnâ-ūb ge gere dī îb Jehovaba ǁîb di ǁguibasa ūǃoa. Tae-e da nēsa xu a ǁkhāǁkhāsen ǁkhā? ǃHūbaib aib hâ hînab ge Jesuba khoesib di ûiga sâus xa ǂhâǂhâsa xū-e nî dīs ge ge ī, nēsab ge ǁîb ûibab ǁguibas ase nî mās aiǃâ nî dīs ge ge ī. Tae-eb nî dīsa ge ī? ǃHūbaib aib hâ hînab ge ǂgomǂgomsase Jehovaba nî ǁnâuǀnams ge ge i îb Jehovaba ǁîb di ǁguibasa ūǃoa ǁkhā. ǁNā ǀgaub ǃnâb ge Jesuba gere ǁgau Jehovab ǀgaub ai xūna dīs a ǂhanu ǀgausa ûis ǃaroma. Jesub ge nî ǁgaus ge ge ī ǁîb ǁGûb di ǂgaeǂguis a ǂhanu ǃkhaisa.

7. Jesuba tae-i ǃaroma ǃhūbaib aib ge hâ i o Jehovaba gere ǂkhîǂkhî?

⁷ ǃHūbaib aib ge hâ i o, ob ge Jesuba hoaǁae Jehovaba gere ǁnâuǀnam. ǃÂitsâgu tsî ǃgomsin tsînab gere hōǃâ tsî ǁōb nî ǃkhaisab ge ǂan i xaweb ge Jesuba gere ǁgau ǁîb ǁGûb di ǂgaeǂguis a ǃgâi ǃkhaisa. (Phil. 2:8) ǃÂitsâheb gere o, ob ge Jesuba “ǃgari ǃaus tsî ǁgamron ǀkha” gere ǀgore. (Heb. 5:7) ǁÎb ǀgoredi ge gere ǁgau Jehovab ǃoagub a ǂgomǂgomsa ǃkhaisa tsî gere dī îb Jehovaba ǁnâuǀnam ǀgara. Jehovab ǃgao i ge Jesub di ǀgorede ǃgâihamxū-i khami ge ī i. Jesub ûib hoab ge Jehovaba gere ǃgâiaǂgao kai tsî ǁîb ǂgaeǂguis a ǂhanu ǃkhaisa gere ǁgau.

8. Mati da Jesub di ûiba a ǁgae ǁkhā?

 ⁸ Jesuba da ge ǁgae ǁkhā sida ǁkhāsib hoab ǃnâ hâna dī tsî Jehovaba ǁnâuǀnam tsî ǁîb ǃoagu ǂgomǂgomsase hâs ǃnā-ū. ǃÂitsâhe da ga o, o da ge Jehovaba ǃoa nî ǀgore ǁîb huib ǃaroma ǁîba da ra ǃgâiaǂgao kai amaga. Nē ǀgaugu ǃnâ da ge ra ǁgau Jehovab di ǂgaeǂguisa da ra ǂkhâǃnâ ǃkhaisa. ǂAnǃgâ da ge nî Jehovab ge sida ǀgorede ūǃoa tide ǁîb ǃhui hâ xūna da ga dī o. Xawe da ga Jehovab ǁgaragu ǃoagu ûi o, o da ge ǂgomǃgâsiba nî ūhâ sida ǀgoredi ǃgâihamxū-i khami Jehovab ǃoagu īsa. Tsî da ge ǂgomǃgâsib tsîna nî ūhâ sida ǂhauǃnâsib tsî ǂgomǂgomsasib tsîn sida ǀhomsi ǁGûba ra ǃgâiaǂgao kai ǃkhaisa.—ǂKhm. 27:11.

9. Tae-i ǃaroma i ge ǂkhîb ǁguibade gere māhe?

⁹ ǀGamǁîse: Jehovaba da ge ǁîba da ra gangan amaga ra ǃoaba. Nēs xa da ge ǃnāsase nî ǁkhāǁkhāsen ǃkharu ge ǁaeb Israelǁaes gere dī ǂkhîb di ǁguibasa da ra ôaǃnâ hîna. * Levitikus ǂkhanis ǃnâ da ge ra ǁkhāǁkhāsen Israelǁî-i ge ǂkhîb di ǁguibasa “ganganǁguibas” ase ge mā ǁkhā i. (Lev. 7:11-13, 16-18) Nē ǁguibasan ge ǁgarisase ge dī tama hâ i xawe ǁîn gere ǂgao amaga gere dī. Nē ǁguibasa i ge khoe-e māsenxase gere dī ǁî-i Elob Jehovaba i a ǀnam amaga. Khoe-i hîna ǁguibasa ra dī-i, ǁî-i omaris ǁanin tsî  pristergu tsîn ge ǁguiba-e ge xamani-i ǁgan-e gere ǂû. Xawe ǀnî ǃâ-i xamani-i di i ge Jehovaba ǃoa ǁguibas ase gere māhe. Mâ ǃâna nēna ge ī?

10. ǂKhîb di ǁguibadi hîna Levitikus 3:6, 12, 14-16 ǃnâ hâde tae-e Jesub ge ǁîb ǁGûb di ǂâisa dīs xa gere ǂkhâǃnâ-es xa ra ǁkhāǁkhā da?

¹⁰ ǃNonaǁîse: ǀNammi xa ǂkhâǃnâ-e hâse da ge Jehovaba sida ǁkhāsib hoaba ra mā. Jehovab ge kauba xamani-i ǃgâi ǃâb ase gere mû. ǁÎb ge mîs tsîna ge hî ǀnî ǃâgu xamani-i di-i ǃnaide ǃkhōǂgā hâse kaise ra ǃgôaǃgâhe ǃkhaisa. (Khomai re Levitikus 3:6, 12, 14-16.) ǁNās ǀkhab ge Jehovaba kaise gere ǃgâiaǂgao Israelǁî-i ge ǁnā ǃâgu xamani-i di-i tsî kaub tsîna gere ǁguiba o. Israelǁî-i hîna ge nēti i ǁguibasa gere mā i ge gere ǁgau Eloba i ǁî-i ǁkhāsib ǃnâ hâ i hoa-e ra mā ǃkhaisa. ǁKhā ǀgaub ǃnâb ge Jesuba Jehovaba ǁîb ǁkhāsib ǃnâ ge hâ în hoana ge mā ǁîba ǃoabas ǃnâ-ū ǀnambib a amaga. (Jhn. 14:31) Jesub ge Elob ǂâisa dīs xa kaise ge ǃgâibahe i, ǁîb ge Elob di ǂhanuga ge ǀnam i. (Psa. 40:8) Jehovab ge kaise gere ǃgâiaǂgao Jesub ge māsenxase ǁîba gere ǃoaba o.

11. Sida ǃoabasa mati ǂkhîb di ǁguibadi khami ī tsî nēsa mati a ǁkhaeǂgao da ǁkhā?

¹¹ Sida ǃoabas Jehovab ǃoagu da ūhâs ge nē ǂkhîb di ǁguiba di khami ī nēs ǃnâ-ū da Jehovaba ra ǁgau amaga ǁîb xa da mati ra tsâsa. Jehovaba da ge sida ǁkhāsib hoab ǃnâ hâ-e ra mā ǁîba da sida ǂgaob hoab ǀkha a ǀnam amaga. Jehovab ge kaise ra ǃgâiaǂgao miliundi ǃoaba-aonab da mû o hîna ǁîb tsî ǁîb ǀgaugu tsînan a ǀnam amaga ra ǃoaba bina. Jehovab ge dī da ra xūn ǀguina ǃgôaǃgâ tama hâ xawe tae-i ǃaroma da nēsa ra dīs tsîna tsî nēs ge kaise a ǁkhaeǂgao da ǁkhā. Aiǁgause ǀnîsi du ga kaira tsî dī du geres xa ǃnāsase dīhō tama ga ra io, o du ge ǂgomǃgâsiba nî ūhâ Jehovab sadu ǁkhāsiga ra ǁnâuǃā ǃkhaisa. ǀNîsi du ge ra ǂâi Jehovab ǃoabas ǃnâ du ǃnāsase dīhō tama hâ di xaweb ge Jehovaba ra mû ǁîba du a ǀnam tsîb nē ǀnamma ra ǁgari du ǃkhaisa dī ǁkhā du an hoana dīsa. ǁÎb ge sida ǁkhāsib ǃnâ hâ i hoa i hîna da ra dī-e ra ūǃoa.

12. Jehovaba mati ǂkhîb di ǁguibadi xa gere tsâ tsî nēsa mati ra ǂkhâǃnâ da?

¹² Tae-e da ǂkhîb di ǁguibade xu a ǁkhāǁkhāsen ǁkhā? ǀAes ge ǃgâi ǃâb xamani-i di-e gere khau khami i ge ǀana ǀgapiga gere ī tsîb ge Jehovaba nēs xa gere ǃgâiaǂgao. ǁNās ǀkha da ge ǂgomǃgâsiba nî ūhâ Jehovab sida ǀkha nî ǂkhîǂâixasa ǁîba da ga māsenxase ǃoaba o. (Kol. 3:23) ǂÂi re ǁîb matikōse sadu ǀkha nî ǂkhîǂâixa ǀgausa. Nēsi du ga ǂkhariro tamas ka io kaise Jehovab ǃoabas ǃnâ ga ra dī xaweb ge ǁîba nēn hoana ra ǃgôaǃgâ tsî nēsa hoaǁae nî ǂâihō.—Mat. 6:20; Heb. 6:10.

13. Levitikus 9:23, 24 ǃoagub ge Jehovaba mati ǁgau pristergab ra ǃkhōǃoa ǃkhaisa?

¹³ Hakaǁîse: Jehovab ge ǁîb di ǀapeǂhumis hîna ǃhūbaib ai hâsa ra ǀkhae. Aiǁgause ǂâi re tae-i ge īsa tabernakeli ge 1512ǁî kuri Sinai ǃhommi ǃnāga a omhe o. (Eks. 40:17) Moseb ge Aronni tsî ǁîb ǀgôagu tsîn ge pristergu ase a ǁgaumâihe ǁaxasiba gere ǂgaeǂgui. Isrealǁaes ge ǀguiba ge hā în pristergu mati xamanin ǁguibade ra mā ǀgauba kō. (Lev. 9:1-5) Jehovaba mati ǀasase ge ǁgaumâihe pristergab ra ǃkhōǃoa ǃkhaisa ge ǁgau? Aronni tsî Moseb tsîn  khoena ra ǀkhae khamib ge Jehovaba ǀaeba ǀhomma xu ge sî i-i altars ai gere dī-e ǁguibade hîkākāhe.—Khomai re Levitikus 9:23, 24.

14. Jehovab ge Aronni tsî ǁîb ǀgôagu tsîna pristergu ase ǃkhōǃoa ǃkhais ǃnâ da tae-i ǃaroma ǃgâiǃgâibasensa nî ūhâ?

¹⁴ ǀHomma xu ge ǀgapi pristergu gere ǁgaumâi-e tsēs ai hā ǀaeba tae-e ge ǁgau? Jehovab ge ǀaeba ge sî Îb ǁgau Aronni tsî ǁîb ǀgôagu hîna ge pristergu ase ǁgaumâi-egab ra ǃkhōǃoa ǃkhaisa. Israelǁîn ge mû o Jehovab pristerga ra ǂkhâǃnâ ǃkhaisa os ge nēsa ge dī în ǁîn tsîna pristerga ǂkhâǃnâ. Nēsa sida ǃgaos tsîna a ǂhâǂhâsa? Îo. Nē pristergu ge ǀgapi tsî ǂhâǂhâsa pristera gere ǂnûǁkhaeba amaga. Xristub hîna a ǀgapi pristeri ge 144 000 pristerga ūhâ hîna ǁîb ǀkha ǀguiba ǀhommi ǃnâ nî ǂgaeǂguiga.—Heb. 4:14; 8:3-5; 10:1.

15-16. Jehovaba mati ‘ǂgomǂgomsa tsî gā-ai ǃgābab’ ra ūǃoa ǃkhaisa ge ǁgau?

¹⁵ 1919ǁÎ kurib ǃnâb ge Jesuba ǂkhari ǂnubis ǂkhauhesa ǃgâsaga “ǂgomǂgomsa tsî gā-ai ǃgāb” ase ge ǁgaumâi. Nē ǃgāb ge aoǁnâ sîsenni ǃnâ ǂgaeǂguisa ra ū tsî Xristub saosabena ‘ǁîn ǂû-e ǁaeb ai’ ra mā. (Mat. 24:45) Mû i da ra Jehovab ge ‘ǂgomǂgomsa tsî gā-ai ǃgāba’ a ūǃoa ǀgausa?

¹⁶ Satanni tsî ǁîb ǂkhâǃnâ-aon tsîn ge nē ǃgāb di sîsen-e ra ǀam kai ǂgao. Nē ǃgāb ga Jehovab di huiba ūhâ tama hâ o, o i ge nē sîsen-e ga ī tama hâ. ǀGam torokha ge ge hâ i tsî ǃhūbaib ǂhawase i ge mari ǃgomsiga hâ. Elob khoen tsîn ge ra mâǃoahe xaweb ge ‘ǂgomǂgomsa tsî gā-ai  ǃgāba’ Xristub saosaben hîna ǃhūbaib ai hâna noxoba gagasise ra ǂûmâ. Gagasi ǂû-i hîna da nētsē marioǃnâse ra hō i xa ǂâi re, 900 xa ǃnāsa gowagu ǃnâ. Nēs ge ra ǁgau Elob ǁîb ǃgāba ra ǂkhâǃnâ ǃkhaisa. Aoǁnâ sîsenni ge a ǀnî hâ ǀkhae hîna Jehovaba xu ra hā-e. ǃGâiǂhôas ge amabes ǃnâ ‘ǃhūbaib hoab ai ra aoǁnâhe.’ (Mat. 24:14) Jehovab ge ǁîb ǀapeǂhumisa nētsē ra daoǁgau tsî ra ǀkhae.

17. Mati da Jehovab ra sîsen-ū ǀapeǂhumisa nî ǂkhâǃnâ?

¹⁷ Dîsen re, ‘Jehovab ǀapeǂhumis di ǃâ ta a ǃkhaisa ta ra ǃgôaǃgâ?’ Moseb tsēdi ǃnâb ge Jehovaba ǀaeba ǀhomma xu ge sî îb ǁgau ǁîb xa ǁgaumâi-e hâ khoegab ra ūǃoa ǃkhaisa. ǁKhā ǀgaub ǃnâb ge Jehovaba nētsē ǁgauǁgau-e ge mā ǁîb ǀapeǂhumisab ra sîsen-ū ǃkhaisa. Kaise ǂgui xūn ǃgao da ge Jehovaba ra gangan. (1Tes. 5:18, 19) Mati da Jehovab ra sîsen-ū ǀapeǂhumisa a ǂkhâǃnâ ǁkhā? Nēsa da ge Elobmîs ai ǃgaoǃgaosa daoǁgaudi hîna da sida ǂkhanin, ǀhaodi tsî kai ǀhaodi tawa ra hōna ǁnâuǀnams ǃnâ-ū ra dī. Nēs ǂam-ai da ge sida ǂkhâǃnâsa aoǁnâs tsî ǁkhāǁkhās sîsenni ǃnâ ǁhaos ǃnâ-ū a ǁgau ǁkhā.—1Kor. 15:58.

18. Tae-e da nî mîǁgui dīsa?

¹⁸ Hoa da ge nî dītsâ Levitikus ǂkhanis ǃnâ da go ǁkhāǁkhāsen xūna ûiǂûisa. Jehovab sida ǁguibade nî ūǃoa ǃkhaisa da ge ra ǂgao. Jehovaba da ra gangan amaga da ge ǁîba nî ǃoaba. Jehovaba da a ǀnam amaga da ge sida ǁkhāsib ǃnâ hân hoana nî dī, ǁîba ǃoabas ǃnâ. Tsî da ge ǂgaob hoab ǀkha ǁîb nētsē ǃhūbaib ai ra sîsen-ū ǀapeǂhumisa nî ǂkhâǃnâ. Nē xūna dīs ǃnâ-ū da ge Jehovaba nî ǁgau ǁîba da ǁîb ǀHûǀguitimî-aon ase ǃoabas ǃnâ-ū ra ǃgôaǃgâ ǃkhaisa.