1, 2. ¿Kenke Cristo itokilijkauaj moneki tijpatiitasej amochtli Levítico?

APÓSTOL Pablo kiilnamikilik iuampo Timoteo “toTeko temakak nochi nopa tlatsejtseloltik Tlajkuiloli, uan kipia iteki para techmachtia” (2 Tim. 3:16). Uan se tlen nopa “Tlajkuiloli”, eli amochtli Levítico. Ta, ¿tlake timoiljuia? Miakej maseualmej kiitaj eli se amochtli katli san kipia miak tlanauatili, tlen ayokmo techpaleuia. Uan katli nelnelia elis Cristo itokilijkauaj amo kiampa tikitaj.

² Levítico moijkuilok kipia se tres mil quinientos xiuitl. Uan Jehová kinejki ma ‘kiijkuilokaj para techmachtis’ (Rom. 15:4). Ni amochtli techpaleuia ma tijkuamachilikaj tlen toTeotsij moiljuia, yeka eli tlauel ipati timomachtisej tlen kiijtoua. Uan nopaya uelis tikitasej miak tlamachtili tlen ya. Ma tikitakaj naui tlamantli.

3. ¿Kenke temakayayaj tlakajkaualistli kema Kiixtsakuayayaj inintlajtlakoljuaj?

³ Tlamachtili se: moneki kuali ma techita Jehová uan kiampa kiselis tlen tijmakasej. Ipan tonali kema Kiixtsakuayayaj inintlajtlakoljuaj, israeleuanij mosentiliyayaj uan nopa sumo sacerdote temakayaya nopa tlakajkaualistli tlen tlapialmej. Kiampa kinilnamikiliyaya israeleuanij eliyayaj tlajtlakolejkej uan monekiyaya ma kinmakixtikaj. Uan kema nopa sumo sacerdote ayamo kiuikayaya kampa tlauel tlatsejtseloltik nopa tlakajkaualistli tlen inineso tlapialmej, achtoui monekiyaya  kichiuas seyok tlamantli tlen tlauel ipati uan amo kej kema kintlapojpoljuiyaya israeleuanij.

4. Kej kiijtoua Levítico 16:12, 13, ¿tlake kichiuayaya nopa sumo sacerdote kema achtoui kalakiyaya Kampa tlauel tlatsejtseloltik ipan tonali kema Kiixtsakuayayaj inintlajtlakoljuaj? (Xikita tlaixkopinkayotl tlen ipantsajka).

⁴ (Xijpoua Levítico 16:12, 13). Ma timoiljuikaj, kema nopa sumo sacerdote kalaki ipan tabernáculo. Kiuika incienso tlen ajuiyak mijyotia uan nojkia kiuika tlikoli. Ya moketsa kampa nopa cortina katli kitlajkoxeloua Kampa tlauel tlatsejtseloltik. Ika miak tlatlepanitakayotl kalaki Kampa tlauel tlatsejtseloltik uan (teipa nojua ompa kalakis) moketsa iixpa nopa Kaxa tlen kipixtok Tlajtolsenkaualistli o Arca del Pacto. Nopa kiixnextiyaya itstoya iixpa Jehová. Uajka kitlalia nopa incienso kampa tlikoli uan temi ika tlaajuiyajkayotl. * Teipa, nopa sumo sacerdote sampa kalaki Kampa tlauel tlatsejtseloltik uan kitoyaua nopa estli tlen ika kintlapojpoljuiaj inintlajtlakoljuaj. Kej tikitaj, achtoui kitlatiyaya nopa incienso uan teipa temakayaya nopa tlakajkaualistli tlen inineso tlapialmej.

5. ¿Tlake tijyekouaj kema kitekiuiyayaj nopa incienso ipan tonali kema Kiixtsakuayayaj inintlajtlakoljuaj?

⁵ ¿Tlake tijyekouaj kema kitekiuiyayaj nopa incienso ipan tonali kema Kiixtsakuayayaj inintlajtlakoljuaj? Ipan Biblia, nopa incienso kiixnextia tlamaijtoli tlen kichiuaj Jehová itekipanojkauaj (Sal. 141:2; Apoc. 5:8). Ma tikilnamikikaj kema nopa sumo sacerdote kiuikayaya incienso kichiuayaya ika miak tlatlepanitakayotl. Tojuantij nojkia kema timomaijtosej moneki tijchiuasej ika miak tlatlepanitakayotl. ToTeotsij katli kichijchijki nochi tlen onka, kineki ma timonechkauikaj iuaya, nopa tlauel tijpatiitaj kej se tetaj kichiua ika ikone (Sant. 4:8). Ya kineki ma timouampojchiuakaj iuaya (Sal. 25:14). Yeka tlauel tijpatiitaj, uan amo tijnekij tijchiuasej yon se tlamantli tlen uelis kiyolkokos.

6. ¿Tlake techmachtia tlen Jesús kema nopa sumo sacerdote achtoui kitlatiyaya nopa incienso uan teipa temakayaya nopa tlakajkaualistli?

⁶ Ma tikilnamikikaj nopa sumo sacerdote achtoui kitlatiyaya nopa incienso, uan teipa temakayaya nopa tlakajkaualistli. Kiampa motemachiyaya Jehová kiseliskia tlen kimakaskia. ¿Tlake techmachtia? Kema Jesús itstoya ipan Tlaltipaktli, achtoui monejki kichiuas se tlamantli tlen tlauel ipati uan kiampa ueliskia temakas inemilis uan kinmakixtis maseualmej. Tlaj kinekiyaya Jehová ma kiseli nopa tlakajkaualistli, monekiyaya kichiuas nochi tlen Jehová kiiljuik uan amo kema kitlauelkauaskia. Kiampa Jesús kinextik tlauel kuali kema timonejnemiltiaj kej Jehová kipaktia. Uan nojkia kinextik eli xitlauak kej Jehová tlanauatia.

7. ¿Kenke kiyolpakiltik Jehová nochi tlen Jesús kichijki kema itstoya ipan Tlaltipaktli?

⁷ Kema Jesús itstoya ipan Tlaltipaktli kichijki nochi tlen Jehová kinauatik. Maske kipanoskia miak tlaouijkayotl o tlauel kitlaijiyouiltiskiaj kema kimiktiskiaj, ya mosentlalik kinextis san Jehová kinamiki tlanauatis (Filip. 2:8). Jesús momaijtok “ika nochi iyolo hasta chokak” kema kiixnamijki miak tlaouijkayotl (Heb. 5:7). Kej momaijtouayaya kinextik amo kinekiyaya kitlauelkauas Jehová uan kipaleuik kichiuas nochi tlen ya kinauatik. Nopa tlamaijtoli tlen  kichiuayaya Jesús, Jehová kiitak kej nopa incienso tlen ajuiyak mijyotiyaya. Ika nochi tlen Jesús kichijki, kiyolpakiltik iTata uan kiuejkapantlalik iTlanauatijkayo.

8. ¿Kenijkatsa uelis tijchiuasej kej Jesús?

⁸ Uelis tijchiuasej kej Jesús kema tijchiuaj kampeka amo tijtlauelkauasej toTeotsij uan tijneltokasej itlanauatiljuaj. Kema tikixnamikij tlaouijkayotl tikiljuiaj Jehová ma techpaleui tijchiuasej tlen ya kipaktia. Kema kiampa tijchiuaj tijmanauiaj Jehová iTlanauatijkayo. Tlaj tijchiuaj tlen Jehová amo kipaktia, ya amo techtlakakilis. Uan tlaj tijchiuaj tlen ya kipaktia, uelis timotemachisej kema timomaijtosej elis kej nopa incienso tlen ajuiyak mijyotia. Uan pampa amo tijtlauelkauaj uan tijchiuaj tlen technauatia, tlauel kiyolpakiltia toTata Jehová (Prov. 27:11).

9. ¿Kenke temakayayaj “tlakajkaualistli para ma kipiakaj tlayoltlalili”?

⁹ Tlamachtili ome: tijtekipanouaj Jehová pampa tijnekij tijtlaskamatilisej. Uelis tijyekosej ni tlamantli tlaj tikitasej tlen kichiuayayaj israeleuanij kema kiueyichiuayayaj toTeotsij, inijuantij temakayayaj “tlakajkaualistli para ma kipiakaj tlayoltlalili”. * Ipan amochtli Levítico, tijyekouaj israeleuanij ueliyayaj temakaj “tlakajkaualistli para ma kipiakaj tlayoltlalili” pampa kinextiyayaj kitlaskamatiliyayaj toTeotsij (Lev. 7:11-13, 16-18). Amo temakayayaj nopa tlakajkaualistli pampa monekiyaya kichiuasej, kichiuayayaj  pampa inijuantij kinekiyayaj. Yeka eliyaya se tlakajkaualistli tlen kimakayayaj Jehová pampa kiikneliyayaj. Katli temakayaya nopa tlakajkaualistli, ichampoyouaj uan sacerdotes kikuayayaj nopa nakatl. Uan se keski inakayo tlen nopa tlapiali san Jehová kinamikiyaya kimakasej. ¿Tlake tlen nopa tlapiali inakayo san Jehová kinamikiyaya kimakasej?

10. ¿Kenke tlen Jesús kichijki eliyaya sanse ika nopa tlakajkaualistli tlen “tlayoltlalili” tlen kiijtoua Levítico 3:6, 12, 14-16?

¹⁰ Tlamachtili eyi: tikikneliaj Jehová, yeka tlauel tijtekipanouaj. Jehová tlauel kipatiitayaya ininchiajka tlapialmej. Nojkia kiitayaya tlauel ipati isosone o ieyo se tlapiali (xijpoua Levítico 3:6, 12, 14-16). Yeka, Jehová tlauel yolpakiyaya tlaj se israelejketl kimakayaya kej tlakajkaualistli ichiajka uan isosone se tlapiali. Ika nopa tlamantli kinextiyaya kimakayaya Jehová tlen tlauel ipati. Nojkia, Jesús kimakak iTata tlen tlauel ipati, kema kitekipanok ika nochi iyolo pampa tlauel kiiknelik (Juan 14:31). Jesús tlauel kipaktiyaya kichiuas tlen iTata kinauatik uan tlauel kipatiitak itlanauatiljuaj (Sal. 40:8). ¡Tlauel yolpakiyaya Jehová kema kiitayaya iKone kitekipanouayaya ika nochi iyolo!

11. ¿Kenijkatsa kema tijtekipanouaj Jehová eli sanse kej kema temakayayaj tlakajkaualistli tlen “tlayoltlalili”, uan kenke tlauel techyolchikaua?

¹¹ Nopa tlakajkaualistli tlen “tlayoltlalili” kichiuayaya pampa kinekiyayaj temakasej, uan kinextiyayaj kiikneliyayaj toTeotsij. Kema tijtekipanouaj Jehová eli kej nopa tlakajkaualistli, pampa tijnextiaj tlen tijnekij tijmakasej. Tlauel tijtekipanouaj, uan tijchiuaj pampa tikikneliaj ika nochi toyolo. Jehová nelia tlauel yolpaki pampa kiita tlauel miakej maseualmej kitekipanouaj pampa tlauel kiikneliaj uan nojkia pampa kiikneliaj itlanauatiljuaj. Ya amo san kipatiita tlen tijchiuaj, kipatiita kema kiita kenke tijchiuaj, uan tlauel techyolchikaua tijmatisej ni tlamantli. Uelis pampa ya tiueyi ayokmo tiueli titlatekipanoua kej tijnekiskia, xikilnamiki Jehová kiita tlen ta tiueli tijchiua uan kimati nochi tlen tijchiua eli pampa tlauel tikiknelia. Ya tlauel yolpaki kema kiampa tijchiuaj.

12. ¿Kenijkatsa kiyolmatiyaya Jehová kema kimakayayaj nopa tlakajkaualistli tlen “tlayoltlalili”, uan kenijkatsa techpaleuia?

¹² ¿Tlake techmachtia nopa tlakajkaualistli tlen “tlayoltlalili”? Kema ipokyo tlen nopa tlakajkaualistli tlejkoyaya, Jehová tlauel yolpakiyaya pampa kimakayayaj tlen ya kipaktiyaya. Yeka, uelis timotemachisej Jehová nojkia yolpaki kema tijtekipanouaj ika nochi toyolo (Col. 3:23). Ximoiljui kenijkatsa Jehová nelia tlauel yolpaki. Maske uelis tijtekipanosej miak o se kentsi, tlaj tijchiuaj pampa tikikneliaj, ya amo kema kiilkauas (Mat. 6:20; Heb. 6:10).

13. Kej kiijtoua Levítico 9:23, 24, ¿kenijkatsa Jehová kinextik kintlapejpenijtoya kej sacerdotes Aarón uan ikoneuaj?

¹³ Tlamachtili naui: Jehová kinteochiua itekipanojkauaj katli itstokej ipan Tlaltipaktli. Ma tikitakaj tlen panok ipan xiuitl 1512 a.u.J., kema kichijchijkej nopa tabernáculo nechka kampa tepetl Sinaí (Éx. 40:17). Moisés kiyakanki nopa iljuitl uan kintekimakakej Aarón uan ikoneuaj kej sacerdotes. Nochi israeleuanij mosentilijkej uan kiampa kiitakej kema sacerdotes pejkej temakaj tlakajkaualistli (Lev. 9:1-5). ¿Kenijkatsa Jehová kinextik kintlapejpenijtoya kej  sacerdotes? Kema Aarón uan Moisés kinteochijkej israeleuanij, Jehová “kititlanki tlitl tlen iixtla uan nimantsi kitlamitlatik nochi nopa tlakajkaualistli” (xijpoua Levítico 9:23, 24).

14. ¿Kenke techpaleuia tijmatisej kema toTeotsij kintlapejpenik kej sacerdotes Aarón uan ikoneuaj?

¹⁴ Ika ni tlamantli, Jehová kinextik kintlapejpenijtoya kej sacerdotes Aarón uan ikoneuaj. Kema israeleuanij kiitakej Jehová kintlapejpenijtoya Aarón uan ikoneuaj, inijuantij nojkia pejkej kinpaleuiaj. Tlauel techpaleuia tlen inijuantij kichijkej, pampa tlen kichijkej san kiixnextik tlen teipa panoskia, uan ni eliskia tlauel ipati. Cristo eli Sumo Sacerdote uan ika 144,000 katli kintlapejpenijtokej yasej iluikak, tlatekipanosej kej sacerdotes uan tlanauatianij (Heb. 4:14; 8:3-5; 10:1).

15, 16. ¿Kenijkatsa kinextijtok Jehová kipaleuia “tlalnamijkatlatekipanojketl tlen nelia temachtli”?

¹⁵ Ipan 1919, Jesús kintekimakak se keski toikniuaj katli tlatekipanoskiaj kej “tlalnamijkatlatekipanojketl tlen nelia temachtli”. Nopa “tlalnamijkatlatekipanojketl” kiyakana tlajtolmoyaualistli uan techmaka tlamachtili tlen techpaleuia (Mat. 24:45). ¿Tikitaj kenijkatsa toTeotsij nelia kitlapejpenijtok “tlalnamijkatlatekipanojketl”?

¹⁶ Satanás uan katli kipaleuiaj kinektokej kitsakuilisej nopa tekitl tlen kichiua “tlalnamijkatlatekipanojketl”. Tlaj Jehová amo kipaleuiskia amo ueliskia kichiuas nopa tekitl. Onkatok ome uejueyi tlauilankayotl uan ipan nochi Tlaltipaktli tlantok tomij. Nojkia toTeotsij itekipanojkauaj tlauel kintlaijiyouiltijtokej. Maske kiampa panotok, “tlalnamijkatlatekipanojketl” nochipa techmakatok  tlamachtili. Ma timoiljuikaj ipan miak amatlajkuiloli tlen tijpiaj ipan kipano 900 tlajtoli tlen amo moneki tikixtlauasej. Ni kinextia kenijkatsa Jehová kipaleuia “tlalnamijkatlatekipanojketl”. Jehová nojkia kinextijtok kenijkatsa kiteochijtok tlajtolmoyaualistli. Nopa kuali tlamachtili momoyaua “ipan nochi tlaltinij ipan ni Tlaltipaktli” (Mat. 24:14). Ni kinextia Jehová kiteochiua uan kiyakana itlanechikol.

17. ¿Kenijkatsa tijnextiaj tijpaleuiaj toTeotsij itlanechikol?

¹⁷ Ma timotlajtlanikaj: “¿Niyolpaki niitstos ipan toTeotsij itlanechikol?”. Kema itstoya Moisés, Jehová kititlanki tlitl tlen iluikak, kiampa kinextik kintlapejpenijtoya katli kintekimakatoya. Nojkia, Jehová kinextijtok kipaleuia itlanechikol ipan ni tonali. Yeka nochipa ma tijtlaskamatilikaj (1 Tes. 5:18). ¿Kenijkatsa tijnextiaj tijpaleuiaj toTeotsij itlanechikol? Kema tijchiuaj kampeka tijchiuasej ipan tonemilis tlen techtlajtolmaka ipan amatlajkuiloli, tlanechikoli, ipan uejueyi tlanechikolistli, uan kema titlajtolmoyauaj uan tikinpaleuiaj sekinok ma mochiuakaj Cristo itokilijkauaj (1 Cor. 15:58).

18. ¿Tlake timosentlalijtokej tijchiuasej?

¹⁸ Yeka, ma timosentlalikaj tijchiuasej ipan tonemilis tlen amochtli Levítico techmachtia. Nojkia ma tijchiuakaj kampeka kuali ma techita Jehová kema tijtekipanouaj. Tlauel tijtlaskamatiliaj toTeotsij, uan yeka tijtekipanouaj. Nojkia, pampa tlauel tikikneliaj, tijchiuaj nochi tlen tiuelij. Uan nochipa ma tijpaleuikaj toTeotsij itlanechikol tlen techyakana ipan ni tonali. Tlaj tijchiuasej ni tlamantli, tijnextisej tlauel tijpatiitaj tijtekipanosej Jehová uan tielisej itlajtoltemakauaj.