1, 2. ¿Keyej monekiskia techyolnotsas timomachtiskej amatajkuilol Levítico?

TATITANIL Pablo kielnamiktij itasojikniuj Timoteo ke “in Tajkuilolamatsitsin nochi yejuan Dios kichiuak [...]. Ika ya nojon [...] uelis se kuitinemis” (2 Tim. 3:16). Itech nejin “Tajkuilolamatsitsin” poui Levítico. ¿Keniuj tikonita nejin amatajkuilol? Sekin kiitaj ke ompa ixnesij miak tanauatilmej tein amo tapaleuiajok. Sayoj ke tejuan amo ijkon tikitaj.

² Levítico moijkuiloj kemej tres mil quinientos xiujmej achto, sayoj ke Jiova kichiuak maj hasta axkan moajsi uan ijkon “ika timomachtiske” (Rom. 15:4). Nejin amatajkuilol tein iaxka Dios techpaleuia maj tikajsikamatikan keniuj tanemilia Dios, yejua ika monekiskia techyolnotsas timomachtiskej. Uelis techmachtis miak taman. Maj tikitakan naui.

3. ¿Keyej motemaktiayaj tapialmej itech Tonal keman Motapojpoluiayaj Tajtakolmej?

³ Tein yekinika techmachtia: moneki maj Jiova techseli uan ijkon no kiselis tein tikmakaj. Xijxiujtika, itech Tonal keman Kintapojpoluiayaj ininTajtakoluan israelitas mosentiliayaj uan tayekankatiopixkat kintemaktiaya tapialmej. Nejon kinelnamiktiaya israelitas ke monekia kinkixtiliskej tajtakol. Sayoj ke tayekankatiopixkat monekia kichiuas okse taman nejon tonal achto ke kalakiskia kampa Okachi Yektik ika ininesyo tapialmej tein kintemaktijka. Nejon taman okachi tayekantoya ke kintapojpoluiskej inintajtakoluan israelitas.

4. Kemej kijtoua Levítico 16:12, 13, ¿toni kichiuaya tayekankatiopixkat keman yekinika kalakia kampa Okachi Yektik itech Tonal keman Motapojpoluiaya Tajtakolmej? (Xikonita taixkopin ipeujyan amaix.)

 ⁴ (Xikonixtajtolti Levítico 16:12, 13). Maj tiknemilikan tein mochiuaya nejon tonal. Tayekankatiopixkat kalaki itech tabernáculo. Itech se imay kiuika kopal tein ajuiyak uan itech okse imay kiuika tekolkaxit tachijchiuj ika oro tein kipia miak tekol. Moketsa iixpan ueyi tasal tein pilkatok tein ika tatsaktoya kampa Okachi Yektik. Ijkuak yekinika kalaki nejon tonal (uan ojpaok kichiuas) uan ika miak poujkaitalis moketsa iixpan Arca tein kiixnextia netenkaualis, ika nejon kemej yeskia moketsaya iixpan Jiova. Ompa, ika tekol kichiua maj kopal peua popoka uan kualtsin peua taajuiyaya. * Satepan oksepa kalakis kampa Okachi Yektik ika ininesyo tapialmej tein ika kintapojpoluiaj inintajtakoluan israelitas. Maj tikitakan ke achto kitatia kopal uan satepan kitemaka ininesyo tapialmej tein kintemaktij.

5. ¿Toni techmachtia kemej mokuia kopal itech Tonal keman Motapojpoluiaya Tajtakolmej?

⁵ ¿Toni techmachtia kemej motekitiltiaya kopal itech Tonal keman Motapojpoluiaya Tajtakolmej? Biblia kinextia ke kopal tein popoka kemej yeskia ininnetataujtil itekitikauan Dios (Sal. 141:2; Apoc. 5:8). Maj tikelnamikikan ke tayekankatiopixkat tapopochuiaya iixpan Jiova ika miak poujkaitalis. No ijkon, keman timotataujtiaj tikchiuaj ika miak poujkaitalis. Semi tikpatiuitaj maj toTachijchiujkauj techkaua maj iuan timotokikan, kemej kichiua se konetsin iuan ipopaj (Sant. 4:8). Techselia kemej tiitasojikniuan (Sal. 25:14). Nejon se ueyi tatiochiualis tein tikpiaj, yejua ika amo tiknekij tikchiuaskej teisa tein amo kiyolpaktis.

6. ¿Toni techmachtia keman tayekankatiopixkat achto kitatiaya kopal uan satepan kintemaktiaya tapialmej?

⁶ Maj tikelnamiktokan ke tayekankatiopixkat achto monekia kitatis kopal uan satepan kintemakas tapialmej. Ijkon kimatia ke kiyolpaktijtoya Jiova. ¿Toni techmachtia nejon? Keman Jesús yetoya nikan taltikpak, achto ke kitemakas inemilis monekik kichiuas se taman tein okachi tayekantoya ke kinmakixtis taltikpakneminij. Monekik nochipa kitakamatis Jiova porin sayoj ijkon yejuatsin kiseliskia inemilis tein kitemakak. Ijkon kinextij ke okachi kuali maj timonejnemiltikan kemej Jiova tanauatia. Jesús kinextij ke sayoj Jiova kinamiki taixyekanas uan ke tel kuali kemej taixyekana.

7. ¿Keyej kiyolpaktij Jiova nochi tein Jesús kichiuak nikan taltikpak?

⁷ Jesús senkis kitakamatik itanauatiluan Jiova keman nemik nikan taltikpak. Yejua ueliskia kitayekanaltis tein kinejnekia, kipanok ouijkayomej uan kimatia ke semi tajyouiskia achto ke kimiktiskiaj, maski ijkon kisentokak kipaleuij itaixyekanalis Jiova (Filip. 2:8, TNM). Jesús “kitsajtsiliaya Itajtsin ika ne itatautilis uan hasta no ka chokilis” keman kiixnamikik ouijkayomej (Heb. 5:7). Kemej kiluiaya iPopaj nochi tein kimachiliaya, kinextij ke amo kikauaya uan kipaleuij maj nochipa kitakamati. Inetataujtiluan Jesús iixpan Jiova katkaj kemej popoch  tein ajuiyak. Nochi tein Jesús kichiuak nikan taltikpak kiyolpaktij iPopaj uan ika kipaleuij itaixyekanalis.

8. ¿Keniuj uelis tikchiuaskej kemej Jesús?

⁸ No uelis tikchiuaskej kemej Jesús komo timochikauaj tiktakamatiskej itanauatiluan Dios uan amo keman tikauaj. Keman tikpanouaj ouijkayomej, tiktataujtiaj Jiova maj techpaleui porin tiknekij tikyolpaktiskej. Keman ijkon tikchiuaj, tiknextiaj ke tikpaleuiaj itaixyekanalis. Tikmatij ke amo kikakis tonetataujtiluan komo tikchiuaj tein amo kiuelita. Sayoj ke, komo tikchiuaj tein kiyolpaktia uelis titakuaujtamatiskej ke tonetataujtiluan yeskij kemej popoch tein kualtsin ajuiyak. Uan uelis senkis tikmatiskej ke tikyolpaktiaj toTajtsin keman amo tikauaj uan tiktakamatij (Prov. 27:11).

9. ¿Keyej motemakayaj netetayokolilmej tein ika motasojkamatiaj?

⁹ Tein ojpatika techmachtia: tiktekitiliaj Jiova porin iuan timotasojkamatij. Maj tikitakan okse taman kemej israelitas kiueyichiuayaj Dios: ika netetayokolilmej tein ika motasojkamatiaj. * Amatajkuilol Levítico techmachtia ke israelitas ueliaj kitemakayaj tapialmej tein ika “kinextiayaj ke motasojkamatiaj” (Lev. 7:11-13, 16-18). Nejin amo kitemakayaj porin monekia kichiuaskej, ta porin kinejnekiaj kichiuaskej. Kitemakayaj porin kitasojtayaj ininDios, Jiova. Akin kitemakaya nejin netetayokolil, ikalyetouanij  uan tiopixkamej kikuayaj inakayo tapial tein kitemaktijkaj. Sayoj ke seki taman tein kipiaya tapial sayoj katka iaxka Jiova. ¿Kemej katiyejua?

10. ¿Keniuj kemej Jesús kitekitilij Jiova tamati kemej netetayokolilmej tein ika motajtoua itech Levítico 3:6, 12, 14-16?

¹⁰ Tein expatika techmachtia: tikmakaj Jiova tein okachi kuali porin tiktasojtaj. Jiova kiitaya ke ichiauakyo tapial yejua tein okachi kuali. No kijtoj ke iriñones uan ieltapach semi kipiayaj ipatiuj (xikonixtajtolti Levítico 3:6, 12, 14-16). Yejua ika Jiova semi yolpakia keman se israelita kitemakaya iriñones, ieltapach uan ichiauakyo tapial. Israelita akin kitemakaya se tapial kemej netetayokolil kinextiaya ke semi kinejnekia kimakas Jiova tein okachi kuali. No ijkon, Jesús kimakak iPopaj tein okachi kuali keman kitekitilij porin kitasojtaya (Juan 14:31). Jesús semi kiyolpaktiaya kichiuas itanejnekilis Dios uan semi kitasojtaya itanauatiluan (Sal. 40:8). ¡Jiova semi yolpakik keman kiitak keniuj iKonetsin motemakaya kitekitilis!

11. 1) ¿Keniuj kemej tiktekitiliaj Dios tamati kemej netetayokolilmej tein ika motasojkamatiaj israelitas? 2) ¿Keniuj uelis techyolseuis nejon?

¹¹ Ijkon kemej israelitas kimakayaj Jiova netetayokolilmej, tejuan no kemej yeskia tikmakaj netetayokolilmej keman tiktekitiliaj porin tiktasojtaj. Uan tikmakaj tein okachi kuali. ¡Jiova semi kiyolpaktia kiitas keniuj miakej millones motemakaj kitekitiliskej porin kitasojtaj! Techyolseuia tikelnamikiskej ke yejuatsin kiita uan kipatiuita amo sayoj tein tikchiuaj, ta no keyej tikchiuaj. Kemej neskayot, komo tixiuejkejya uan amo ueliok tikchiuaj nochi tein tikuelitaskiaj, uelis tikneltokaskej ke Jiova amo kiita nejon. Xa tiknemiliaj se semi tepitsin tein tikmakaj, sayoj ke yejuatsin kiita ueyi netasojtalis tein techolinia maj tikchiuakan nochi tein tiuelij. Kiyolpaktia kiselis tein okachi kuali tein ueli tikmakaj.

12. ¿Keniuj momachiliaya Jiova keman israelitas kitemakayaj netetayokolilmej tein ika motasojkamatiaj uan toni uelis senkis tikneltokaskej?

¹² ¿Toni techmachtiaj netetayokolilmej tein ika motasojkamatiaj israelitas? Jiova semi kiyolpaktiaya ijkuak pankisaya pokti keman tataya tein okachi kuali tein kipiaya se tapial. Yejua ika uelis senkis tikneltokaskej ke Jiova yolpaki keman tiktekitiliaj porin tiktasojtaj (Col. 3:23). Maj tiknemilikan keniuj semi yolpaki. Yejuatsin kipatiuita nochi tein tikchiuaj itech itekiyo, yeski miak oso amo uan amo keman kielkauas (Mat. 6:20; Heb. 6:10).

13. Kemej kijtoua Levítico 9:23, 24, ¿keniuj kinextij Jiova ke kiseliaya Aarón uan ikoneuan kemej tiopixkamej?

¹³ Tein naujpatika techmachtia: Jiova kitiochiua inechikol tein moajsi nikan taltikpak. Maj tikitakan tein panok itech xiuit 1512 achto itech totonaluan, keman tabernáculo kitalijkej itsintan tepet Sinaí (Éx. 40:17). Moisés kiixyekanak nechikol kampa kinixtalijkej Aarón uan ikoneuan kemej tiopixkamej. Ijkuak, israelitas kiitakej keniuj tiopixkamej peuak kintemaktiaj tapialmej (Lev. 9:1-5). ¿Keniuj kinextij Jiova ke kiseliaya Aarón uan ikoneuan kemej tiopixkamej? Keman Aarón uan Moisés kintiochiujkej israelitas, Jiova kiualtitanik tit uan kichiuak maj tata nochi tein kitalijkaj itech  altar (xikonixtajtolti Levítico 9:23, 24).

14. ¿Keyej techpaleuia tikmatiskej ke Jiova kinseliaya tiopixkamej ne uejkauj?

¹⁴ Ika tein Jiova kichiuak, kinextij ke senkis kipaleuiaya Aarón uan ikoneuan. Keman israelitas kiitakej ke Jiova kinseliaya tiopixkamej, kiajsikamatkej ke yejuan no monekia kinpaleuiskej. ¿Keyej techpaleuia tikmatiskej ke Jiova kinseliaya tiopixkamej ne uejkauj? Porin nejon tiopixkamej kinixnextiaj okseki tiopixkamej. Ompa iluikak Cristo yejua Tayekankatiopixkat, uan iuan tekitiskej okseki 144,000 tiopixkamej uan tekiuanij (Heb. 4:14; 8:3-5; 10:1).

15, 16. ¿Toni kinextia ke Jiova kipaleuia “takeual ten yolkuali uan ten kuatamatke”?

¹⁵ Itech xiuit 1919, Jesús kiixtalij se amo ueyi oloch tokniuan taixpejpenalmej akin yeskia “takeual ten yolkuali uan ten kuatamatke”. Nejin tokniuan kiixyekanaj tekit tein mochiua itech tanojnotsalis uan kinmakaj itatojtokakauan Cristo tamachtilis keman moneki (Mat. 24:45). ¿Tikitaj ke Dios kiselia tein kichiuaj nejin tokniuan?

¹⁶ Satanás uan akin kinixyekana kitemouanij kitsakuiliskej tekit tein kichiua “takeual ten yolkuali uan ten kuatamatke”. Tein melauj, komo Jiova amo kipaleuiskia amo ueliskia kichiuas nejon tekit. Mochiuanij ome uejueyi neteuilismej uan noyampa miakej kipanouanij tatasojtilis; uan no, kinchiuilianij tein amo kuali uan kintajyouiltianij itekitikauan Dios. Maski ijkon, nejin takeual kisentoka kinmaka tamachtilis itatojtokakauan Cristo. Kemej neskayot, tikpiaj miak amaixmej tein amo tikixtauaj itech  panoua novecientos tataman tajtolmej. Nejin kinextia ke Jiova kinpaleuia nejon tokniuan. Se taman tein no kinextia ke Jiova techtiochiujtok yejua tanojnotsalis. Kuali tanauatilmej moteixmatiltijtok “tech nochi senmanauak” (Mat. 24:14). Senkis moita ke Jiova kiyekantok uan kitiochiujtok inechikol.

17. ¿Keniuj tiknextiaj ke tikpaleuiaj inechikol Jiova tein kipia nikan taltikpak?

¹⁷ Maj timotajtanikan: “¿Nimotasojkamati porin nipoui itech inechikol Dios nikan taltikpak?”. Itech itonaluan Moisés, Jiova kiualtitanik tit tein ika kinextij ke kinpaleuiaya tiopixkamej. Axkan, Jiova kinextijtok ke kipaleuia inechikol nikan taltikpak. Senkis tikitaj ke onkak miak taman tein moneki tiktasojkamatiskej (1 Tes. 5:18). ¿Keniuj tiknextiaj ke tikpaleuiaj inechikol Jiova? Keman tikchiuaj tein timomachtiaj itech Biblia, itech toamaixuan, itech nechikolmej uan uejueyi nechikolmej, uan keman timochikauaj titanojnotsaskej uan tikinchiuaskej imomachtijkauan Cristo (1 Cor. 15:58).

18. ¿Toni tikixtaliaj tikchiuaskej?

¹⁸ Moneki tikixtaliskej tikchiuaskej tein timomachtiaj itech amatajkuilol Levítico. Maj timochikauakan tikyolpaktiskej Jiova uan ijkon kiselis tekit tein tikchiuaj. Maj tiktekitilikan porin iuan timotasojkamatij. Maj tiksentokakan tikmakakan tein okachi kuali porin semi tiktasojtaj. Uan maj senkis tikpaleuikan inechikol tein kipia nikan taltikpak. Komo tikchiuaj nochi nejon, tiknextiliskej Jiova ke tikpatiuitaj tiktekitiliskej uan tiyeskij tiitaixpantijkauan.