1, 2. ¿Tleka moneki ma timomachtikan amochtli Levítico?

TLATITLANIL Pablo okilnamikti Timoteo “nochi tiotlajkuíloli Dios otlanawati makijkuilokah [uan ika] kuali matechmachtikah” (2 Tim. 3:16). Amochtli Levítico ompa poui. ¿Ken tikitaj tlen kijtoa nin amochtli? Sekimej kijtoaj amochtli Levítico san kinpia miakej tlanauatilmej uan ayakmo techpaleuiaj. Pero akinmej tikchiuaj ken Cristo amo ijkon timokuayejyekoaj.

² Yikipia kanaj mil quinientos xiuitl okijkuilojkej amochtli Levítico uan Jehová otechmakak ika “matimoixtlamachtikah” (Rom. 15:4). Nin amochtli techpaleuia ma tikajsikamatikan ken mokuayejyekoa Jehová. Ik non, moneki ma timomachtikan tlen kijtoa. Nin amochtli techmachtia miak tlamantli. Ma tikitakan naui tlamantli ken techpaleuia.

3. ¿Tleka okinmiktiayaj yolkamej ijkuak okintlapojpoluiayaj israelitas?

³ Techmachtia Jehová moneki techselis tla tiknekij ma kiseli tlen tikmakaj. Tonal ijkuak okintlapojpoluiayaj israelitas, nochtin omonechikoayaj uan teopixki okinmiktiaya yolkamej. Nin okiteititiaya okintlapojpoluiayaj israelitas. Pero teopixki achto okichiuaya itlaj miak ipati. Amo san okiuikaya inmieso yolkamej ompa kanin Santísimo para ma kintlapojpoluikan israelitas.

4. Ijkon ken kijtoa Levítico 16:12, 13, ¿tlen achto okichiuaya teopixki kanin okatka Santísimo ijkuak okintlapojpoluiayaj israelitas? (Xikita ixko revista).

 ⁴ (Xiktlajtolti Levítico 16:12, 13). Ma timokuayejyekokan ken okichiuayaj. Teopixki okalakiaya kanin okatka tabernáculo. Ika se ima okikitskijtiaya kopalkaxitl tlen okipiaya kopali ajuiak uan ika okse okikitskijtiaya itlaj tlen ochijchitoka ika oro uan ompa okiuikaya tekoli xotlatok. Omoketsaya ikuitlapan cortina kanin amo omotaya kanin kajki Santísimo. Ika tlakaitalistli okalakiaya uan omoketsaya ixpan Arca itech tlajtolsenkaualistli uan satepan ok ome uelta ijkon okichiuaya. Nin okineskayotiaya okatka ixpan Jehová. Ijkuakon okitlatiaya kopali ipan tekoli xotlatok uan nochi otlajuiayaya. * Satepan okiuikaya inmieso yolkamej tlen ika okintlapojpoluiayaj israelitas kanin okatka Santísimo. Achto okitlatiaya kopali uan satepan okimanaya inmieso yolkamej tlen ika okintlapojpoluiayaj israelitas.

5. ¿Tlen techmachtia ijkuak teopixki okitlatiaya kopali ijkuak okintlapojpoluiayaj israelitas?

⁵ ¿Tlen techmachtia ijkuak teopixki okitlatiaya kopali ijkuak okintlapojpoluiayaj israelitas? Biblia kijtoa ijkuak timotlatlaujtiaj yetoskia ken ijkuak okitlatiayaj kopali (Sal. 141:2; Apoc. 5:8). Ijkuak teopixki oyaya ixpan Jehová kitlatiti kopali, okalakiaya ika tlakaitalistli. Noijki ijkon tejuan ijkuak timotlatlaujtiaj tikchiuaj ika tlakaitalistli. Sapanoa tiktlasojkamatiliaj Jehová techkauilia iuan ma timouikakan ijkon ken se teta mouika iuan ikone (Sant. 4:8). Techselia ken tiiyolikniuan (Sal. 25:14). Tikitaj se tlateochiualistli timouikaj iuan toTajtsin Dios uan amo tiknekij tikyolkokoskej.

6. ¿Ken mouika tlen Jesús okichi iuan ijkuak teopixki achto okitlatiaya kopali?

⁶ Ma tikilnamiktokan teopixki achto okitlatiaya kopali uan satepan okinmiktiaya yolkamej. Ijkon okimatiaya Jehová kiseliskia tlen kimakaskia. ¿Tlen techmachtia? Ijkuak Jesús ouala tlaltikpak, achto okichi itlaj miak ipati uan satepan topatka omotemakak. Ye nochipa okitlakamatki Jehová uan ijkon kiseliskia ijkuak motemakaskia. Ijkon okiteititi okachi kuali ma tikpiakan tonemilis ken Jehová kineki. Jesús okiteititi san Jehová kinamiki tlanauatis uan kichiua ika melajkayotl.

7. ¿Tleka Jehová okiyolpakti tlen okichi Jesús?

⁷ Jesús nochipa okintlakamatki itlanauatiluan Jehová ijkuak okatka nikan tlaltikpak. Maski okimatiaya kiyejyekoskiaj, kipiaskia ouijkayotl uan kitlajyouiltiskiaj ijkuak kimiktiskiaj, ye nochipa okiteititi san iTajtsin kinamiki tlanauatis (Filip. 2:8, TNM). Jesús “chikawak omotiotsajtsili iwa ochokak” ijkuak okixnamik ouijkayotl (Heb. 5:7). Omotlatlaujti ika nochi iyolo uan non okipaleui ma kitlakamati iTajtsin. Ijkuak omotlatlaujti, Jehová okijneki ken yetoskia kopali ajuiak. Nochi tlen okichi Jesús okiyolpakti Jehová uan okiteititi san ye kinamiki tlanauatis.

8. ¿Ken uelis tikchiuaskej ken Jesús?

⁸ Tejuan noijki uelis tikchiuaskej ken Jesús tla timochijchikauaj tikintlakamatij  itlanauatiluan Jehová uan tiyolmelajkej. Tiktlatlaujtiaj Jehová ma techpaleui ma tikyolpaktikan ijkuak tikixnamikij ouijkayotl. Ijkon tikteititiaj san ye kinamiki tlanauatis. Tikmatokej tla titlajtlakolchiuaskej amo techkakis ijkuak tiktlatlaujtiskej. Pero tla tikpiaj tonemilis ken ye kineki uan tiktlatlaujtiaj ika nochi toyolo, kijnekuis ken kopali ajuiak. Amo ma tikilkauakan tikyolpaktiaj Jehová tla tiyolmelajkej uan tiktlakamatij (Prov. 27:11).

9. ¿Tleka israelitas itlaj okitemakayaj?

⁹ Techmachtia tiktekichiuiliaj Jehová porque inauak timotlasojkamatij. Axkan ma tikitakan okse tlamantli tlen okichiuayaj israelitas ijkuak okiueyichiuayaj Jehová. * Amochtli Levítico kijtoa israelitas itlaj okitemakayaj uan ijkon okiteititiayaj omotlasojkamatiayaj (Lev. 7:11-13, 16-18). Amikaj okinmiluiaya omonekiaya kitemakaskej non tlamanali. Yejuan okitemakayaj ika nochi inyolo. Non tlamanali okimakayaj Jehová porque okitlasojtlayaj. Akin okitemakaya tlamanali, okikuaya nakatl iuan akinmej ochantiaya uan noijki iuan teopixkej. Pero seki nakatl amo okikuayaj porque san Jehová omonekiaya kimakaskej. ¿Tlen okimakayaj?

10. Ijkon ken kijtoa Levítico 3:6, 12, 14-16, ¿tleka tikijtoaj Jesús okichi ken israelitas ijkuak okitemakayaj tlamanali?

 ¹⁰ Techmachtia tikmakaj Jehová tlen okachi kuali porque tiktlasojtlaj. Jehová okipatioitaya ichiauakyo nakatl. Noijki omonekiaya kimakaskiaj iriñones uan hígado yolkatl porque non okachi okipatioitaya (xiktlajtolti Levítico 3:6, 12, 14-16). Ijkon israelitas okiyolpaktiayaj Jehová ijkuak okimakayaj non nakatl uan chiauak. Ijkuak ijkon okichiuayaj, okiteititiayaj okimakayaj Jehová tlen okachi kuali. Jesús noijki ijkon okichi ijkuak okitekichiuili iTajtsin porque sapanoa okitlasojtlaya (Juan 14:31). Oyolpakiaya ijkuak okitekichiuili Jehová uan okipatioitaya itlanauatil (Sal. 40:8). ¡Jehová sapanoa oyolpakik porque okitak ikone okitekichiuiliaya ika nochi iyolo!

11. (1) ¿Tleka tikijtoaj ijkuak tiktekichiuiliaj Jehová yetoskia ken ijkuak israelitas okitemakayaj tlamanali? (2) ¿Tlen techyolseuia?

¹¹ Israelitas okitemakayaj tlamanali ika nochi inyolo porque okitlasojtlayaj toTajtsin Dios. Tejuan noijki ijkuak tiktekichiuiliaj Jehová ika nochi toyolo yetoskia ken tikmakaj se tlamanali porque tiktlasojtlaj. Tikmakaj tlen okachi kuali porque tiktlasojtlaj ika nochi toyolo. Jehová yolpaki porque miakej itekipanojkauan kitekichiuiliaj ika nochi inyolo porque kitlasojtlaj uan kinpatioitaj itlanauatiluan. Jehová amo san kita tlen tikchiuaj, ye noijki kita tleka tiktekichiuiliaj uan kipatioita. Non sapanoa techyolseuia. Ma tikitakan tleka ijkon tikijtoaj. Tla yitikpiaj miak xiuitl uan ayakmo tiuelij tikchiuaj tlen achto otikchiuayaj, ma tikilnamiktokan Jehová amo san kita tleka ayakmo tiktekichiuiliaj ken achto. Xamo ijkon timokuayejyekoaj. Pero ma tikilnamiktokan ye kita tiktlasojtlaj uan non techpaleuia ma tikmakakan tlen okachi kuali. Ye kiyolpaktia tlen tejuan tikmakaj ika nochi toyolo.

12. ¿Ken omomachiliaya Jehová ijkuak israelitas itlaj okimakayaj uan tlen ma tikilnamiktokan?

¹² ¿Tlen techmachtia tlen okitemakayaj israelitas ijkuak omotlasojkamatiayaj? Jehová oyolpakiaya ijkuak okijnekuiaya okitlatiayaj nakatl tlen okachi okipatioitaya. Tejuan noijki ma tikilnamiktokan Jehová yolpaki ijkuak timochijchikauaj tiktekichiuiliaj ika nochi toyolo (Col. 3:23). Ma timokuayejyekokan ken sapanoa yolpaki. Jehová kipatioita tla miak tiktekichiuiliaj noso amo miak uan ye nochipa kilnamiktos (Mat. 6:20; Heb. 6:10).

13. Ijkon ken kijtoa Levítico 9:23, 24, ¿ken okiteititi Jehová okinseliaya teopixkej tlen okintlalijkej?

¹³ Techmachtia Jehová kiteochiua ialtepe. Ma tikitakan tlen opanok xiuitl 1512 ijkuak ayamo oualaya Jesús. Ijkuakon okichijchijkej tabernáculo ikxitlan tepetl Sinaí (Éx. 40:17). Moisés okiyekanki non nechikol uan noijki non tonal okitlalijkej ma yeto teopixki Aarón uan noijki ikoneuan. Nochtin israelitas omonechikojkej uan okitakej ijkuak teopixkej yikin opejki kinmiktiaj yolkamej uan okinmanilijkej Jehová (Lev. 9:1-5). ¿Ken okiteititi Jehová okinseliaya teopixkej tlen okintlalijkej? Ijkuak Aarón uan Moisés okinteochijkej israelitas, Jehová okiualtitlanki tlitl uan okitlati  nochi tlen okimanilijkej (xiktlajtolti Levítico 9:23, 24).

14. ¿Tleka tikpatioitaj Jehová okinseli teopixkej tlen okintlalijkej?

¹⁴ Tlen opanok okiteititi Jehová okinseliaya teopixkej tlen okintlalijkej. Ijkuak israelitas okitakej Jehová okinseli teopixkej, okajsikamatkej yejuan noijki omonekiaya kinpaleuiskej. Nin techmachtia itlaj miak ipati. Ninmej teopixkej okineskayotijkej se teopixki tlen okachi ueyititok. Cristo ye teopixki okachi ueyititok uan iuan tlanauatiskej 144,000 ompa iluikak uan yetoskej teopixkej uan tekiuajkej (Heb. 4:14; 8:3-5; 10:1).

15, 16. ¿Tlen kiteititia Jehová kipaleuia “tlakeuali yolmelajki uan ixtlamatki”?

¹⁵ Itech 1919 okintlalijkej sekimej tlapejpenalmej ma yetokan “tlakeuali yolmelajki uan ixtlamatki”. Nin tlakeuali kiyekana tetlapouilistli uan kinmaka “tlakuali ijkuak moneki” imachtijkauan Jesús (Mat. 24:45, TNM). ¿Yotikitakej Jehová kipaleuia “tlakeuali yolmelajki uan ixtlamatki”?

¹⁶ Satanás uan akinmej kipaleuiaj kichiuaj miak tlamantli porque amo kinekij ma tekipano “tlakeuali yolmelajki uan ixtlamatki”. “Tlakeuali yolmelajki uan ixtlamatki” amitlaj uelis kichiuaskia tla amo kipaleuiskia toTajtsin Dios. Yomochijkej ome guerras ipan nochi tlaltikpak uan amo onka tomin. Noijki kintlajyouiltiaj itekipanojkauan Jehová maski amitlaj intlajtlakol. Pero “tlakeuali yolmelajki uan ixtlamatki” kinmaka tlen kinpoloa imachtijkauan Jesús tlen katej nikan tlaltikpak. Tikinpiaj miakej amatlajkuilolmej ika kanaj novecientos tlajtolmej uan  amo tikinnemakaj ijkuak tikintemakaj. Nin kiteititia Jehová techpaleuia. Noijki techpaleuia ma titetlapouikan ipan “nochi n tlaltíkpaktli” (Mat. 24:14). Nochi nin kiteititia Jehová kiyekana ialtepe uan sapanoa kiteochiua.

17. ¿Ken tikteititiaj tikpaleuiaj ialtepe Jehová?

¹⁷ Axkan ma timotlajtlanikan: “¿Niktlasojkamatilia Jehová porque nipoui itech ialtepe?”. Yiuejkika Jehová okiualtitlanki tlitl uan ijkon okiteititi kinpaleuiskia akinmej okintlalijkej teopixkej. Axkan noijki Jehová yotechititi kipaleuia ialtepe. Ik non, ma tiktlasojkamatilikan porque tipouij itech ialtepe (1 Tes. 5:18). ¿Ken tikteititiaj tikpaleuiaj ialtepe Jehová? Ma tikchiuakan tlen kijtoaj amatlajkuilolmej, ma timonechikokan, ma tiakan uejueyij nechikolmej, ma timochijchikauakan ma titetlapouikan uan ma tikinpaleuikan oksekimej ma mochiuakan imachtijkauan Jesús (1 Cor. 15:58).

18. ¿Tlen tiknekij tikchiuaskej?

¹⁸ Moneki ma tikchiuakan tlen techmachtia amochtli Levítico. Timochijchikauaj ma techseli Jehová uan ijkon kiselis tlen tikmakaj. Ma tiktekichiuilikan uan ijkon tikteititiskej timotlasojkamatij. Tiktlasojtlaj Jehová ika nochi toyolo, ik non, nochipa ma tikmakakan tlen okachi kuali. Ika nochi toyolo ma tikpaleuikan ialtepe. Ijkon tikteititiskej tikpatioitaj tiktekichiuiliaj uan noijki tikpatioitaj tiyetoskej tiiTlaixpantijkauan.