1-2. Ntakhara heeni Akristu annaphwanela okhalano nchuno na omuhuserya liivuru a Onamukucho?

MURUMMWA Paulo aahimuupuserya mmiravo Timoteo yoowo aari nthamwene awe, ariki: “Soorempwa seiyo soothene iveereliwe ti Muluku. Sinnaphara muteko.” (2 Tim. 3:16) Eyo tho ennavolowela liivuru a Onamukucho. Tiheeni munuupuwelaanyu vooloca sa liivuru yoola a Mpiipiliya? Wa akina, liivuru a Onamukucho ori va elista ya aliivuru yaawo ahirino mphurelo mmahiku ahu. Nyenya Akristu eeparipari aakhalano moonelo woohiyana.

² Liivuru a Onamukucho orempwe mu iyaakha 3.500 muculi. Naamwiihiiha, Yehova omukhapelela “ntakhara nihusiheryo nahu.” (Aro. 15:4) Liivuru ola onnanivaha ekamaama wa yeeyo Yehova onuupuweleiye vooloca sa miyaha mikina. Wa nthowa na yeeyo, nnaphwanela okhalano nchuno na omuhuserya. Moohikhwa minikwa, sookhalamo miyaha sawaaca nnaphwanelaahu ohuserya mu liivuru yoola a Mpiipiliya. Nnahaala othokororya misese sa seiyo.

3. Ntakhara heeni saanapakiwa mikucho mu Nihiku na Oleveleliwa Soocheka?

³ Nihusiheryo noopacerya: Wi Yehova eemererye mikucho sahu, nnaphwanela weemereryiwa ni yene. Mu ekwaha emoha vayaakhani, naanakhalavo Nihiku na Oleveleliwa Soocheka. Nloko na Aisarayeli naanathukumana nave mutokweene a anamukucho aanavaha mikucho. Mikucho seiho saanakhaviherya Aisarayeli wuupuwelela wi yaanachuna weelihiwa ntakhara soocheka saya. Nyenya mutokweene a anamukucho ahaakumve okusa nikhami na yoovaha ya mukucho wi avoloweno mu nipuro Naweelaxa, owo aaphwanela  okhwaaniherya murici mukina. Moohikhwa minikwa, murici owo waari woochuneya opwaha oleveleliwa soocheka sa Aisarayeli.

4. Mwawiiwanana ni Onamukutxho 16:12, 13 tiheeni mutokweene a anamukucho aapakeiye mu ekwaha yoopacerya aavoloweiye Onipuro Naweelasa mu Nihiku na Oleveleliwa Soocheka? (Moone eruku va ekaapa.)

⁴ Mwaalakhanye Onamukutxho 16:12, 13. Mwaanyiherye yaweereya yeela ya Nihiku na Oleveleliwa Soocheka. Mutokweene a anamukucho aanavolowa mu tapernaakulu. Mu ntata nimoha, owo oopharela epiya orimo erupani yawunkhela. Mu ntata nikina, owo opharenle echu ya ewooro orimo makhala a mooro. Owo onneemela ohoolo wa ekuwo yeeyo enakhuneela Onipuro Naweelasa. Ela ekwaha yoopacerya ya ikwaha raru onavoloweiye Onipuro Naweelasa mu Nihiku na Oleveleliwa Soocheka. Ni ncicimiho ntokweene, owo aanavolowa Onipuro Naweelasa nave aaneemela ohoolo wa Ekaaxa ya Waataana. Eyo yaakhala ntoko wi eemenle ohoolo wa Yehova Muluku! Voocharela, mweephoole namukucho aanayeeherya erupani vasulu va makhala a mooro, nave nipuro nlo naanakhala nawunkhela phaama. * Ohoolo waya, aanavolowa wanawiili Onipuro Naweelasa akunxe nikhami na mukucho wa soocheka. Moowerya woona? Mulipa a mukucho aapacerya opaha erupani yawunkhela ahipacenre operekha nikhami na mukucho wa soocheka.

5. Tiheeni nnahuseryaahu orweela wa ophariheliwa wa erupani yawunkhela mu Nihiku na Oleveleliwa Soocheka?

⁵ Tiheeni nnahuseryaahu ni mukhalelo wa ophariheliwa erupani yawunkhela mu Nihiku na Oleveleliwa Soocheka? Piipiliya onaloca wi, wa Yehova, mavekelo a akapuro awe oororomeleya ari ntoko erupani yawunkhela. (Sal. 141:2; Wup. 5:8) Muupuwele wi mutokweene a anamukucho aanooniherya ncicimiho ntokweene vaavaa aavoloweiye ni erupani yawunkhela ohoolo wa Yehova. Mmukhalelo woolikana, vaavaa nnamwaacamelaahu Yehova mu nivekelo, nnapaka eyo ni ncicimiho ntokweene. Ninnamuthamala Mpatusa a Ichu soothene oneemererya wi nimwaacamele, hiiha ntoko mwaana onamwaacameleiye tiithi awe. (Tiy. 4:8) Owo onnaneemererya ntoko asinthamwene awe! (Sal. 25:14) Ela ekari yavameekhaaya ophiyerya wi hinaahaala weemererya opaka echu vyakala enamuthananiha Yehova.

6. Tiheeni nihusenryaahu ni meerelo a mutokweene a anamukucho weeyela erupani yawunkhela ahaakumve ovaha mikucho?

⁶ Muupuwele tho wi mutokweene a anamukucho aaphwanela weeyela erupani yawunkhela ahaakumve ovaha mikucho. Mwawiihiiha, owo aanaroromela wi ookhalano weemereryiwa wa Muluku wi aperekhe mikucho. Tiheeni nnahuseryaahu ni yeela? Muupuwele vooloca sa Yesu. Noosuwela wi owo aarwa veelaponi yavathi wi avahe okumi awe ntoko mukucho. Ari veelaponi yavathi, Yesu aaphwanela opaka echu yookhweleyasa—echu yookhweleyaxa opwaha ovahererya nivuluxo ntakhara achu—ahaakumve ovaha okumi awe ntoko mukucho. Tiheeni yeeyo? Moorweela wa okhala aweemeleleya ni oororomeleya, Yesu aaphwanela oreherya ephiro wi Yehova eemererye mukucho awe. Mmukhalelo yoola, Yesu aahaala wooniherya wi opaka ichu mmukhalelo Yehova onachuneiye ori mukhalelo woophwanelela okhala. Yesu aahaala wooniherya mookwakwaleya wa oothene wi olamulela wa Yehova ti waphaama ni wawookololowa.

7. Ntakhara heeni mukhalelo Yesu aakhanleiye waamweeriha Yehova okhala oohakalala?

⁷ Mu ekumi awe yoothene veelaponi yavathi, Yesu aahimwiiwelela Yehova moophaameya. Hinaavo nikacamiho naari yaweeha—naari mano osuwela wi aahaala ohoolela okhwa wa woopiha—naamweerinhe Yesu omaala waakiha mukhalelo wa olamulela wa Tiithi awe. (Fil. 2:8) Vaavaa aahoolenleiye saweeha, Yesu aahivekela  “akhuwelaka ni miithori.” (Ahe. 5:7) Mavekelo awe awiiseela yaanooniherya wi murima awe waari woororomeleya wa Yehova nave mavekelo awo yaahimukhaviherya ohivolola mu omwiiwelela Yehova. Wa Yehova, mavekelo a Yesu yaari awunkhela ni oohakalaliha ntoko erupani. Mukhalelo Yesu aakhanleiye waamweeriha Yehova okhala oohakalala. Nave Yesu aahooniherya wi olamulelo wa Tiithi awe ti waphaama ni woophwanelela.

8. Nni ncharihe hai yootakiherya ya Yesu?

⁸ Hiyaano tho nnanwerya omutakiherya Yesu. Mwawiihai? Moorweela wa wiilipiserya omwiiwelela Yehova ni okhala oororomeleya wa yene. Wakhala wi munnahoolela saweeha, mvekele wa Yehova wi ookhaviheryeeni opaka yeeyo enamuhakalaliha. Mweerano hiiha, munooniherya wi munnakhaviherya olamulelo wa Yehova. Opwaha yeeyo, muupuwele wi Yehova hanii aakhule mavekelo ahu wakhala wi nnapaka echu yeeyo oniiceiye. Mmakupa makina, wakhala wi ninnapaka ichu saphaama, Yehova onahaala weemererya mavekelo ahu ookhumela vathi va murima. Awo anahaala okhala ntoko erupani yawunkhela phaama. Muroromele wi ororomeleya ni wiiwelela wanyu onnamweeriha Yehova okhala oohakalala.—Masi. 27:11.

9. Ntakhara heeni Aisarayeli yaanavaha mikucho sa murecele?

⁹ Nihusiheryo nanaawiili: Ninnamurumeela Yehova nthowa na omuthamalela ni omusivela. Nnahaala ohuseryavo echu moorweela wa othokororya mikucho sa murecele Aisarayeli yaapakaaya. Mikucho seiha saari makupa ookhweleya a malapelo eeparipari o Isarayeli akhalai. * Liivuru a Onamukucho onnathariha wi Muisarayeli aanawerya  ovaha mikucho sa murecele ntoko “mukucho yoola woothamala.” (Onam. 7:11-13, 16-18) Owo haapaka mukucho yoola nthowa na okhinyereryiwa, nyenya nthowa na ochuna. Yaari yooveleela yoochuna yeeyo Muisarayeli aapakeiye nthowa na omusivela Muluku awe, Yehova. Muchu yoowo aapaka mukucho, amusi awe ni anamukucho yaanakhuura enama ya mwaasinama ovahiwe mukucho. Nyenya makupa makina a enama pahiru yaaphariheliwa wi avahiwe Yehova. Makupa taani?

10. Mmukhalelo taani mikucho sa murecele seiho inalociwa mu Onamukutxho 3:6, 12, 14-16 inalikanaaya ni muteko yoowo Yesu aapankeiye ntakhara Yehova?

¹⁰ Nihusiheryo naneeraru: Ninnapaka owetha wahu nthowa na omusivela Yehova. Yehova oona makhurwa ntoko makupa ochuneya a mwaaxinama. Nave owotho aahiloca wi makupa ookhweleya, ophitaanyerya ikhopela saahikhalano esisapo yavameekhaaya. (Mwaalakhanye Onamukutxho 3:6, 12, 14-16.) Mwawiihiiha, Yehova aanahakalala vaavaa Muisarayeli aaveleeleiye moochuna makhurwa ni makupa ookhweleya a mwaasinama. Muisarayeli eerano yeela, owo aanooniherya wi aanachuna omvaha Yehova echu yaphaama aareiyeno. Moolikana, moochuna Yesu aahimvaha Yehova echu yasisapo aareiyeno. Aceenyeryeyaka ni omusivela Muluku, Yesu aahimurumeela ni murima woothene. (Yoh. 14:31) Opaka yookhwela ya Muluku yaari echu yoochuneyaxa wa Yesu. Owo aanasivela vancipale malamulo a Muluku. (Sal. 40:8) Mookhwa minikwa, Yehova aahihakalala woona wiiveleela wa Yesu wi amulapele yene!

11. Ntakhara heeni muteko ahu oryaaya ntoko mikucho sa murecele? Nave eyo enanihakararya hai?

¹¹ Hiiha ntoko mikucho sa murecele, muteko ahu ntakhara Yehova mukhalelo wa wiiveleela wi nooniherye moonelo ahu wa yene. Hiyaano nnachuna omvaha Yehova yeeyo eri yaphaama woona wi ninnamusivela ni murima ahu woothene. Mwaanyiherye mukhalelo Yehova onahakalaleiye vaavaa onawooneiye macikhwi aachu emurumeelaka mwa wiiveleela woona wi annamusivela yene vamoha ni malamulo awe. Nyenya tho ti yoohakalaliha osuwela wi Yehova tahi wi onavaha esisapo meerelo ahu pahiru, nyenyatho echu enanceenyerya weerano eyo. Ntoko yootakiherya, waakhanle wi mohuuluvala nave hamunawerya opaka soothene ntoko mwaachunelaanyu mmuteko wa Yehova, muroromele wi onnoona wiilipixerya wanyu opwaha okotakota wanyu. Akhweya munahaala wuupuwela wi himwaano sincipale wi mumvahe Yehova. Nyenya owo onnoona osivela yoowo onaweerihaani opaka yeeyo munaweryaanyu opaka. Owo onnatepa oohakalala weemererya wiilipiserya yoowo munamvahaanyu.

12. Yehova oona hai ni mikucho sa murecele, nave eyo enanlipiha hai?

¹² Tiheeni nihusenryaahu ni mikucho sa murecele? Vaavaa mooro waapahaaya makupa okhweleya a mwaasinama, mwiisi waanawela nave Yehova aanahakalala. Mwawiihiiha, wakhala wi munnalapa mwa wiiveleela nave mwiilipiseryaka, muroromele wi Yehova onnahakalala. (Kol. 3:23) Mwaanyiherye otheya wawe wa oweemereryaani. Wa Yehova, echu yoochuneya tahi waaca wa muteko anyu. Wakhala wi muteko munapharaanyu onaceenyeryiwa ni osivela, ti woochuneya wa Muluku. Mweeparipari, Yehova onahaala wuupuwela muteko anyu ilukuluku soothene.—Mat. 6:20; Ahe. 6:10.

13. Mwawiiwanana ni Onamukutxho 9:23, 24, Yehova oonihenrye hai wi aaheemererya onamukucho ole?

¹³ Nihusiheryo naneesese: Yehova onnareeliha makupa a veelaponi yavathi a marehereryo awe. Muupuwele yeeyo yeeren’ye mu eyaakha ya 1512 ahaakumve Kristu, vaavaa tapernaakulu aakuhiweiye vasulu va mwaako Sinai. (Muk. 40:17) Mose aahihoolela muthukumano vaava Aroni ni anaawe yaathanliwaaya okhala anamukucho. Nloko na Aisarayeli naahithukumana  wi noone mukhalelo anamukucho yeeraaya eperekhe mu ekwaha yoopacerya mikucho sa asinama. (Onam. 9:1-5) Yehova oonihenrye hai wi aaheemererya onamukucho yoole woopacerya? Vaavaa Aroni vamoha ni Mose yaarelihaaya muloko, Yehova aahirumiha mooro yoowo weeyenle moomalela mikucho seiho saari va altari.—Mwaalakhanye Onamukutxho 9:23, 24.

14. Ntakhara heeni weemererya Yehova aavanheiye wa onamukucho wa Aroni ni anaawe wookhalano esisapo wa hiyaano olelo?

¹⁴ Ela yaari yaweereya yoohakalalihaxa. Vano mooro waarweenle wirimu wooniherya eheeni? Wi Yehova aanakhaviherya moomalela onamukucho wa Aroni vamoha ni anaawe. Vaavaa Aisarayeli yoonnaaya yaweereya yeela wi anamukucho yaaheemereryiwa ni Yehova, moohikhwa minikwa oothene yaahikhalano mathowa aphaama a waakhaviherya tho. Apwanne ela yookhalano esisapo wa hiyaano? Chiryene! Onamukucho o Isarayeli waari muuruxi wa onamukucho mutokotoko. Kristu tori Mutokweene a Anamukucho ahu, nave owo onamukhalano macikhwi 144 a mamwene ni anamukucho eni elapeke vamoha ni yene wirimu.—Ahe. 4:14; 8:3-5; 10:1.

15-16. Tiheeni enooniherya wi “mulapeli òroromeleya ni awisuwela” ookhalano weemereryiwa wa Yehova?

¹⁵ Mu 1919, Yesu aahithanla nikhuuru nikhaani na Akristu awoocihiwa ntoko “mulapeli òroromeleya ni awisuwela.” Mulapeli owo onnahoolela muteko woolaleerya nave onnavaha “yolya mwa elukuluku yophwanelela” wa oomuchara a Kristu. (Mat. 24:45, BNM) Apwanne nookhalano soothoonyerya sookwakwaleya wi chiryene mulapeli oororomeleya ni awiisuwela ookhalano weemererya wa Muluku?

¹⁶ Satana ni elapo awe annapaka owetha waya wi emaalihe muteko wa mulapeli oororomeleya. Mmoonelo wa muchu, hoki okhale wooweryeya wi namuteko oororomeleya aakhwaniherye murici awe. Nyenya moohipwacha ikhoco piili sa elapo  yoothene, wiikariwa woonanara, orama wa ichu soomwiilini ni ohoosiwa, mulapeli oororomeleya ni awiisuwela onnatitelela ovahererya yoolya yoomunepani wa oomuchara a Kristu veelaponi yavathi. Muupuwele waaca wa yoolya yoomunepani yeeyo enaphwanyeya mahaleene mu ilocelo opwaha 900! Ela yawooniherya yookwakwaleya yawi mulapeli oororomeleya ookhalano nikhaviheryo na Muluku. Moone yawooniherya ekina ya mareeliho a Yehova: muteko woolaleerya. Chiryene, michaka saphaama sinnalaleiwa “mweelapo yoothene yookhalamo achu.” (Mat. 24:14) Moohikhwa minikwa, Yehova onnahoolela nave onnareeliha vancipale malapelo awe olelo.

17. Nnooniherya hai wi ninnakhaviherya marehereryo a Yehova yaawo onaphariheleiye?

¹⁷ Ti yaphaama wiikoha: ‘Apwanne kinnathamalela nthowa na opaka makupa a marehereryo a Yehova?’ Sawooniherya Yehova onanivaheiye ti sawooneya hiiha ntoko mooro yoowo waarweenle wirimu mu elukuluku ya Mose ni Aroni. Hiyaano nookhalano mathowa awaaca a othamalela. (1 Tes. 5:18, 19) Vano nni nooniherye hai wi ninnakhaviherya marehereryo yaawo Yehova onaphariheleiye? Moorweela wa ochariha malakiheryo yaawo anaphwanyeya Mpiipiliyani yaawo nnaakhelaahu mu soolaleeryiwa ni mmithukumano sa muloko, sa ekulucu ni sa muceche. Opwaha yeela, nnahaala wooniherya okhaviherya wahu moorweela wa wiilipiserya mmuteko woolaleerya ni ohusiha.—1 Kor. 15:58.

18. Tiheeni mulakelenlaanyu opaka?

¹⁸ Mukhale oolakelela ochariha soothene nihusenryaahu mu liivuru a Onamukucho. Yoopacerya, mwaavye weemererya wa Yehova wi aakhele mikucho sanyu. Yanawiili, mmulapeke Yehova muceenyeryeyaka ni othamalela. Yaneeraru, mpake owetha wanyu ntakhara Yehova muceenyeryeyaka ni osivela. Nave yaneesese, mukhaviherye ni murima woothene marehereryo yaawo onareeliheiye. Neerano soothene seiha, ninnamooniherya Yehova wi ninnavaha esisapo ya okhala Anamoona awe.