1, 2. ¿Tleka akin tikchiuaj ken Cristo noneki tomachtiskej amoxtli Levítico?

APÓSTOL Pablo okilnamikti iamigo, Timoteo, ika “nochi Yektlajkuilojli itech Dios ualejtikaj, niman yejua otechmakak para aman techpaleuiya” (2 Tim. 3:16). Amoxtli Levítico onka ipan yejuin “Yektlajkuilojli” noso Biblia. ¿Tlenon tiknemiliaj itech yejuin amoxtli? Sekimej kinemiliaj ika san se amoxtli kampa ijkuiliujtokej miyek tlanauatiltin tlen xok techpaleuiyaj, san ika, akin yemelak tikchiuaj ken Cristo xijkon tiknemiliaj.

² Ikipiyas kanaj 3,500 xiuitl ika onoijkuilo amoxtli Levítico, niman Jehová xokinek mapopoliui pampa kineki techmachtis ika yejuin (Rom. 15:4). Noneki kuajli tomachtiskej yejuin amoxtli pampa techpaleuiya matikasikamatikan kenon tlanemilia Jehová. Miyek tlen tiuelij itech yejuin amoxtli. Matikitakan naui.

3. ¿Tleka israelitas kinuentlaliayaj yolkamej ipan Tonajli ijkuak Notlapachouayaj Tlajtlakoltin?

³ Kachtopa: noneki tikyolpaktiskej Jehová niman ijkon uelis kiselis tlen tikchiuaj ipampa. Ipan Tonajli ijkuak Notlapachouayaj Tlajtlakoltin, kalpan Israel nosentlaliaya niman kinuentlaliaya yolkamej. Yejon uentin kintlalnamiktiaya nochimej  israelitas ika nonekiya makintlapopoluikan niman ijkon xkipiyaskej tlajtlakojli. San ika, achto ika ueyi teopixki kalakiskia ipan Santísimo ika inyesyo yolkamej tlen onouentlalijkaj niman ijkon Jehová makintlapopolui, ueyi teopixki nonekiya kichiuas okse itlaj, niman yejuin tlen kichiuaya más ueyi kijtosnekiya.

4. Ken kijtoua Levítico 16:12, 13, ¿tlenon kichiuaya ueyi teopixki ijkuak kemach ika sejpa kalakiya ipan Santísimo? (Xkita tlaixkopinajli tlen onka ixpan yejuin revista).

⁴ (Xpoua Levítico 16:12, 13). Ipan Tonajli ijkuak Notlapachouayaj Tlajtlakoltin, ueyi teopixki nonekiya yexpa kalakis ipan tabernáculo. Matiknemilikan tlenon kichiuaya ueyi teopixki ijkuak kemach ika sejpa kalakiya: yejua ipan se ima kitki tlen ajuiyak, niman ipan okse ima kitki tlixochtli. Achijtsin noteltia ixpan cortina tlen onka ikalakiyan Santísimo. Ika ueyi tetlakaitalistli, kalaki ipan Santísimo niman noteltia ixpan caja tlen tetlalnamiktia tlajtolkaualistli. Ijkuak ueyi teopixki ompa onkalakiya, kentla nemiskia ixpan Jehová. Teopixki aman yoliktsin kontema yejon tlen ajuiyak ipan on tlixochtli niman melak tlaajuiyaya ipan yejon cuarto. * Sakin, yejua oksejpa kalakis ipan Santísimo ika inyesyo yolkamej tlen onouentlalijkej. Kuajli matitlanemilikan itech yejuin: ueyi teopixki kitlatiaya tlen ajuiyak achto ika kalakis ika inyesyo yolkamej.

5. ¿Tlenon tiuelij itech ken notekitiltiaya tlen ajuiyak ipan Tonajli ijkuak Notlapachouayaj Tlajtlakoltin?

⁵ ¿Tlenon tiuelij itech ken notekitiltiaya tlen ajuiyak ipan Tonajli ijkuak Notlapachouayaj Tlajtlakoltin? Biblia kijtoua ika teoyomej tlen kinkaki Jehová kentla yeskia yejon tlen ajuiyak (Sal. 141:2; Apoc. 5:8). Matikilnamikikan ika ueyi teopixki kitkiya tlen ajuiyak ixpan Jehová ika tetlakaitalistli. Noijki ijkon, ijkuak tiknotsaj Jehová, tikchiuaj ika tetlakaitalistli. Melak tikpatiojkaitaj ika toTajtsin akin nochi okichijchiuj techkauilia matiknisiuikan, ijkon ken se konetl ueli kinisiuiya itaj (Sant. 4:8). Yejua kinektika touan nouikas (Sal. 25:14). Yejuin melak tikpatiojkaitaj niman hasta xtiknekij tikyolkokoskej nion achijtsin.

6. Itech tlen kichiuaya ueyi teopixki achto ika kinuentlalis yolkamej, ¿tlenon tiuelij itech inemilis Jesús?

⁶ Matikilnamikikan ika ueyi teopixki nonekiya kitlatis tlen ajuiyak achto ika kinuentlalis yolkamej. Ijkuak ijkon kichiuaya, kuajli kasikamatiya ika yokiyolpaktijka Jehová. ¿Tlenon tiuelij itech yejuin? Ijkuak Jesús ouajla nikan ipan tlaltikpaktli, yejua ononek kichiuas itlaj achto ika kitemakas inemilis topampa, niman tlen ononek kichiuas más ueyi okijtosnek xijkon ken kinmakixtis tlaltikpakchanejkej. Jesús kinekiya ika toTajtsin makiseli tlen kichiuaskia topampa, ika yejon, nochipa okitlakamat. Ijkon okiteititi ika melak kuajli tla se kitlakamati Jehová. Jesús noijki okiteititi ika Jehová tlayekana ika melajkayotl.

7. ¿Tleka Jehová okuelitak nochi tlen okichiuj Jesús ipan tlaltikpaktli?

⁷ Jesús melak kuajli okitlakamat Jehová ijkuak nikan onen ipan tlaltikpaktli. Maski okixnamik tlatlatalistin niman maski kimatstoya ika melak xkuajli ken kimiktiskiaj, yejua nochipa kinekiya kiteititis ika melak kuajli ken tlayekana iTaj (Filip. 2:8). Jesús okinots iTaj “ikan chikauak itlajtol niman ikan ixayo” (Heb. 5:7). Tlen kijtouaya ipan iteoyouan kiteititiaya ika nochipa kinekiya kitlakamatis Jehová niman yejon okipaleui nochipa itech mamelajkanemi. Jehová okitak iteoyouan  Jesús ken yejon tlen ajuiyak katka niman tlen notlatiaya yeuejkaui. Jesús okiteititi ika san Jehová kinamiki tlayekanas, niman Jehová okuelitak nochi tlen okichiuj Jesús.

8. ¿Kenon uelis tikchiuaskej ken Jesús?

⁸ Uelis tikchiuaskej ken Jesús tla tokojtiliaj tiktlakamatiskej Jehová niman tla itech timelajkanemij. Tla tikixnamikij itlaj tlauejli, matiktlajtlanilikan Jehová matechpaleui pampa tiknekij tikyolpaktiskej. Tla ijkon tikchiuaj, tikteititiskej ika tikpaleuiyaj itlayekanalis Jehová. Tikmatstokej ika Jehová xtechkakis tla tikchiujtinemij tlen yejua kitlauelita. San ika, tla tikchiuaj tlen yejua kuelita, kuajli matikmatstokan ika Jehová kitas toteoyouan ken yejon tlen melak ajuiyak. Niman uelis tikmatstoskej ika toTajtsin Jehová yolpaki pampa xkeman tijkauaj niman pampa tiktlakamatij (Prov. 27:11).

9. ¿Tleka israelitas kitemakayaj “uentin de yoltlalilistli”?

⁹ Ika ome: tiktekichiuiliaj Jehová pampa tiktlasojkamachiliaj. Matikitakan kenijki israelitas noijki kiueyichiuayaj Jehová. Yejuamej kitemakayaj “uentin de yoltlalilistli”. * Ipan amoxtli Levítico, tikitaj ika israelitas ueliskiaj kitemakaskej se “uentli de yoltlalilistli” niman ijkon kiteititiskej ika kitlasojkamachiliayaj Jehová (Lev. 7:11-13, 16-18). Yejuamej xkitemakayaj yejuin uentli tla pampa nonekiya ijkon kichiuaskej, yejuamej kitemakayaj pampa kisaya itech inyojlo, ijkon kiteititiayaj ika kitlasojtlayaj Jehová. Akin kitemakaya yejon uentli, ichanejkauan niman teopixkej kikuayaj  inakayo yejon yolki tlen okiuentlalijkaj. San ika, xnonekiya nochi kikuaskej pampa seki itlatki katka Jehová. ¿Katlejua?

10. ¿Tlenon tiuelij itech Jesús ijkuak titlanemiliaj itech tlen kijtoua Levítico 3:6, 14-16?

¹⁰ Ika yeyi: tikmakaj Jehová tlen más kuajli pampa tiktlasojtlaj. Jehová kitaya ika nochi “on chauak” tlen kipiaya yolki yejon tlen más kuajli katka. Noijki okijtoka ika nonekiya kimakaskej iriñones yolki niman okseki tlen kipiaya, pampa nochi yejon melak kipatiojkaitaya (xpoua Levítico 3:6, 14-16). Kuakon, Jehová melak yolpakiya ijkuak se israelita kimakaya nochi yejon niman noijki “on chauak” tlen kipiaya yolki. Akin kichiuaya yejuin kiteititiaya ika melak kinekiya kimakas Jehová tlen melak kuajli. Noijki ijkon, Jesús melak okitlasojtlak Jehová niman okimakak tlen más kuajli, kema, yejua chikauak okitekichiuili Jehová (Juan 14:31). Jesús kiyolpaktiaya kichiuas tlen Jehová kinekiya, niman melak kitlasojtlaya iTlajtol (Sal. 40:8). ¡San xkonnemili kenon yolpakiya Jehová ijkuak kitaya kenon melak kuajli kitekichiuiliaya iKonetsin!

11. a) ¿Tleka tikijtouaj ika tlen tikchiuaj ipampa Jehová kentla yeskiaj “uentin de yoltlalilistli”? b) ¿Kenon techyolseuiya yejuin?

¹¹ Israelitas kitemakayaj “uentin de yoltlalilistli” pampa kisaya itech inyojlo, niman ijkon kiteititiayaj ika kitlasojtlayaj Jehová. Tlen tikchiuaj ipampa Jehová noijki ijkon ken yejon uentin, tiknekij tikititiskej tlen tikmachiliaj ipampa. Tikmakaj Jehová tlen más kuajli pampa tiktlasojtlaj ika nochi toyojlo. Kuajli tikmatstokej ika melak yolpaki kitas kenon miyekej tlaltikpakchanejkej kitekichiuiliaj pampa kitlasojtlaj niman kipatiojkaitaj itlanauatiluan. Techyolseuiya tikilnamikiskej ika yejua xsan kita niman xsan kitlasojkaita tlen tikchiuaj, yejua noijki kita tleka tikchiuaj. Se neskayotl, tla xok más tiuelij tiktekichiuiliaj Jehová pampa yotiueuentsintiakej, kuajli matikmatstokan ika Jehová xkitstika tlenon xtiuelij tikchiuaj. Kanaj tikitaj ika xmiyek tlen uelis tikchiuaskej ipampa, san ika, yejua kita ika tiktlasojtlaj niman tokojtiliaj tikchiuaskej nochi tlen tiuelij. Yejua kiyolpaktia kiselis tlen tikchiuaj ipampa.

12. ¿Kenon nomachiliaya Jehová ijkuak kimakayaj “uentin de yoltlalilistli”, niman tlenon uelis kuajli tikmatstoskej?

¹² ¿Tlenon tiuelij itech yejon “uentin de yoltlalilistli”? Jehová yolpakiya ijkuak pokisaya niman tlatlaya yejon tlen más kuajli katka itech se yolki. Kuakon, kuajli matikmatstokan ika tikyolpaktiaj Jehová ijkuak tiktekichiuiliaj ika nochi toyojlo (Col. 3:23). ¡San xkonnemili kenon yolpaki! Maski tla miyek tiuelij tikchiuaj ipan itekiyo noso ka, yejua kita kenon melak tiktlasojtlaj. Yejua nochipa kilnamiktos yejuin (Mat. 6:20; Heb. 6:10).

13. Itech tlen kijtoua Levítico 9:23, 24, ¿kenon okiteititi Jehová ika kinseliaya akin okintlapejpenijkaj?

¹³ Ika naui: Jehová kiteochiua ikalpan tlen onka ipan tlaltikpaktli. Matikitakan tlen opanok ipan xiuitl 1512 i.x.x. 1, ijkuak “okitelketskej on tabernáculo” ikxitlan tepetl Sinaí (Éx. 40:17). Moisés okichiuj tlen Jehová okitlajtlanilijka niman ijkon kintlapejpenis Aarón iuan ikoneuan ken teopixkej. Israelitas ononechikojkej niman ijkon kitaskej kenon teopixkej kemach ika sejpa kinuentlaliskiaj yolkamej (Lev. 9:1-5). ¿Kenon okiteititi Jehová ika kinseliaya akin okintlapejpenijkaj? Ijkuak Aarón niman Moisés okinteochiujkej israelitas, Jehová okuajtitlan tlitl niman okitlati on uentli tlen “onkatka ipan on tlaixpan” (xpoua Levítico 9:23, 24).

14. ¿Tlenon kixneskayotia yejon teopixkej akin onenkej yeuejkaui?

¹⁴ Melak temojkatlachialti kenon Jehová  okiteititi ika kinseliaya Aarón iuan ikoneuan ken teopixkej. Ijkuak israelitas okitakej ika toTajtsin kinpaleuiskia, okasikamatkej ika yejuamej noijki nonekiya kinpaleuiskej. Yejuin tlen onochiuj yeuejkaui melak techpaleuiya, pampa yejon teopixkej akin onenkej yeuejkaui kixneskayotia okse itlaj tlen melak ueyi kijtosneki. ¿Itech tlenon titlajtotokej? Aman nemi se Ueyi Teopixki akin itoka Cristo, niman nemij 144,000 teopixkej akin iuan tekipanoskej ne iluikak (Heb. 4:14; 8:3-5; 10:1).

15, 16. ¿Kenon yokiteititi Jehová ika kiyekana “tekitketl” yolmelauak niman tlamachilise?

¹⁵ Ipan 1919, Jesús okitlali se grupo kampa nemiskiaj sekimej tokniuan tlapejpeniltin, yejuamej yeskiaj on “tekitketl” yolmelauak niman tlamachilise. Yejuin “tekitketl” kiyekana tenojnotsalistli niman techmaka tlen techpoloua niman ijkon machikaujto totlaneltokil (Mat. 24:45). ¿Kuajli tikitaj ika Jehová kiyekantika yejuin “tekitketl” yolmelauak niman tlamachilise?

¹⁶ Satanás niman akin kipaleuiyaj yokiyejyekojkej kiteltiskej nochi tekitl tlen kichiua “tekitketl” yolmelauak niman tlamachilise. Yejuin “tekitketl” xkuajli onkisaskia tla toTajtsin xkiyekanaskia. Yopanokej ome uejueyimej guerras, yokintlaueltokakej itekipanojkauan Jehová, kemantika xitlaj tomin, san ika, maski ijkon, “tekitketl” ok kinmakatika itekipanojkauan Jehová tlen kinpoloua niman ijkon makiueyichiujtokan Jehová. San matikonnemilikan kenon miyek amatlajkuiloltin tikinpiyaj. Toamatlajkuiloluan notlajtolkuepaj ipantsin 900 tlajtoltin niman xtechtlajtlaniliaj tomin niman ijkon tikinpiyaskej. Yejuin kuajli techititia ika toTajtsin kinyekantika tokniuan akin tlayekanaj. Tikitaj ika Jehová noijki techteochiujtika  pampa techpaleuiya matitenojnotsakan. ITlajtol toTajtsin noteijlitika “nochiuiyan ipan in tlaltikpaktli” (Mat. 24:14). Kuajli tikitaj ika Jehová kiteochiujtika ikalpan.

17. ¿Kenon uelis tikteititiskej ika tikpaleuijtokej ikalpan Jehová?

¹⁷ Matotlajtoltikan: “¿Nikpatiojkaita ika ninemi ipan ikalpan Jehová?”. Yeuejkaui Jehová okimititi israelitas ika kipaleuijtoya ikalpan ijkuak okuajtitlan tlitl, niman aman Jehová noijki kuajli yotechititi ika kipaleuijtika ikalpan. Kinamiki matiktlasojkamachilikan (1 Tes. 5:18, 19). ¿Kenon uelis tikteititiskej ika tikpaleuijtokej ikalpan Jehová? Uelis tikteititiskej tla tikchiuaj tlen kijtoua Biblia niman tlen notlalia ipan toamatlajkuiloluan, tla tikchiuaj tlen techijliaj ipan tlanechikoltin niman uejueyimej tlanechikoltin, niman tla chikauak titenojnotsaj niman tla tikinpaleuiyaj oksekimej noijki manochiuakan inomachtijkauan Cristo (1 Cor. 15:58).

18. ¿Tlenon tiknekij tikchiuaskej?

¹⁸ Matikchiuakan tlen yotiuelkej itech amoxtli Levítico. Matokojtilikan tikyolpaktiskej Jehová niman ijkon makiseli tlen tikchiuaj ipampa. Matiktekichiuilikan Jehová pampa tiktlasojkamachiliaj. Matikmakatokan tlen más kuajli pampa tiktlasojtlaj ika nochi toyojlo. Niman matikpaleuikan ikalpan tlen aman kiyekantika. Tla tikchiuaj nochi yejuin, tikititiskej Jehová ika tikpatiojkaitaj tiktekichiuiliskej niman tiyeskej iteixpantijkauan.