1-2. Ko e ha kua lata e tau Kerisiano he vahā nei ke manamanatu ke he tohi ha Levitika?

KUA fakamanatu he aposetolo ko Paulo ke he kapitiga fuata haana ko Timoteo “ko e tau Tohi Tapu oti kana mai he Agaga he Atua ia, kua aoga ni.” (2 Timo. 3:16) Putoia ai e tohi ha Levitika. Fēfē e manatu haau ke he tohi ia he Tohi Tapu? Falu ne kitia ko e tohi ne ha ha i ai e tau matafakatufono ne nakai aoga he vahā nei ha tautolu, ka e nakai pihia e manatu he tau Kerisiano mooli.

² Tohia e tohi ha Levitika kavi ke he 3,500 e tau tau kua mole, ka e fakamau e Iehova “ke fakaako ai a tautolu.” (Roma 15:4) Ha kua fakamaama ia Levitika e manatu ha Iehova, lata a tautolu ke makai ke kumikumi ai. Loga e fakaakoaga ka moua e tautolu mai he tohi omoomoi ia. Kia fakatutala a tautolu ke he fā e fakaakoaga ia.

3. Ko e ha ne foaki e tau poa he tau tau takitaha he Aho he Fakafeiloaga?

³ Fakaakoaga fakamua: Lata a tautolu ke moua e taliaaga ha Iehova ke maeke ke talia e tau poa ha tautolu. He tau tau takitaha he Aho he Fakafeiloaga, ne fakapotopoto e motu ha Isaraela mo e foaki e tau poa manu. Lagomatai he tau poa ia ke fakamanatu ke he tau Isaraela e lata ha lautolu ke fakameā mai he tau agahala! Ato tamai he ekepoa ne mua e toto ke poa ke he Tapu Ue Atu he aho ia, kua lata fakamua a ia ke taute  taha matagahua, ko e matagahua ne mua e aoga ke he fakamagalo he tau agahala he motu.

4. He talahau ia Levitika 16:12, 13, ko e heigoa ne taute he ekepoa ne mua he hū atu fakamua haana ke he Tapu Ue Atu he Aho he Fakafeiloaga? (Kikite fakatino he kili.)

⁴ Totou Levitika 16:12, 13. Manamanatu ke he mena ne tupu he Aho he Fakafeiloaga: Hū atu e ekepoa ne mua ke he faituga. Ko e mogo fakamua anei mai he lagatolu kua lata a ia ke hū atu ke he Tapu Ue Atu he aho ia. He taha lima, kua totō e ia e kapiniu ne puke he tau mena manogi, mo e he taha lima, kua totō e ia e apa uta afi auro ne puke he tau malala kakā. Ne tū a ia i mua he ie puipui ne uufi e gutuhala ke he Tapu Ue Atu. He fakalilifu hokulo, hū atu a ia ke he Tapu Ue Atu mo e tū ki mua he puha he maveheaga. He puhala fakatai, kua tū a ia ki mua ha Iehova ko e Atua! Kua liligi fakamitaki he ekepoa mogonei e mena manogi tapu ke he tau malala kakā, ti ufia e poko ke he mena manogi. * To liu a ia he mogo fakamui ke hū atu ke he Tapu Ue Atu mo e toto he tau poa agahala. Mailoga kua huhunu e ia e mena manogi fakamua to foaki e ia e toto he tau poa agahala.

5. Ko e heigoa kua fakaako e tautolu mai he fakaaoga e mena manogi he Aho he Fakafeiloaga?

⁵ Ko e heigoa kua fakaako e tautolu mai he fakaaoga e mena manogi he Aho he Fakafeiloaga? Fakakite he Tohi Tapu ko e tau liogi he tau tagata tapuaki fakamooli ha Iehova ne talia kua tuga e tau mena manogi. (Sala. 141:2; Fakakite. 5:8) Manatu kua fakalilifu lahi ke he ekepoa ne mua ke tamai e mena manogi ki mua ha Iehova. Pihia foki, ka liogi a tautolu ki a Iehova kua taute e tautolu mo e fakalilifu hokulo. Loto fakaaue lahi a tautolu ke he Tufuga he lagi mo e lalolagi ha kua fakaatā a tautolu ke tutala mo e fakatata ki a ia, tuga e tama ke he matua taane. (Iako. 4:8) Talia e ia a tautolu ko e tau kapitiga haana! (Sala. 25:14) Loto fakaaue lahi a tautolu ke he lilifu nei mo e to nakai manako a tautolu ke fakamamahi a ia.

6. Ko e heigoa ka fakaako e tautolu mai he huhunu he ekepoa ne mua e mena manogi fakamua to foaki e ia e tau poa?

⁶ Manatu kua lata e ekepoa ne mua ke huhunu e mena manogi fakamua to foaki e ia e tau poa. He puhala nei, iloa tonu e ia to talia he Atua a ia ka foaki e tau poa. Ko e heigoa ka fakaako e tautolu mai he mena nei? He nofo a Iesu he lalolagi, lata a ia ke taute fakamua taha mena ne mua atu e aoga ke he fakamouiaga ma e tau tagata ato foaki e ia haana a moui mo poa. Ko e heigoa e mena nai? He moui fakamooli mo e mahani hakohako, lata a Iesu ke tauteute e puhala ma Iehova ke talia e poa haana. He puhala nai, to fakamooli e Iesu ko e taute e tau mena he puhala ha Iehova ko e puhala hako ke moui. To fakatokoluga po ke fakamooli e Iesu e tonu mo e hako he pule katoatoa he Matua haana.

7. Ko e ha e puhala moui katoa ha Iesu he lalolagi kua fakafiafia ke he Matua haana?

⁷ He moui katoa ha Iesu he lalolagi, ne fakatumau e omaoma katoatoa haana ke he tau tuaga tututonu ha Iehova. Nakai fai kamatamata po ke amaamanaki ke mate mamahi, ka fakalolelole e manako haana ke lalago e puhala ne pule e Matua haana. (Filipi 2:8) He fehagai mo e tau kamatamata, liogi a Iesu “mo e tagi lahi mo e tau hihina mata.” (Hepe. 5:7) Ne puna mai e tau liogi fakamakamaka haana he loto fakamooli mo e fakamalolō e manako haana ke fakatumau e omaoma. Ki a Iehova, ko e tau liogi ha Iesu kua tuga e tau  mena manogi. Ko e puhala moui katoa ha Iesu kua fakafiafia lahi e Matua haana mo e fakatokoluga e pule katoatoa Haana.

8. Fifitaki fēfē e tautolu e puhala moui ha Iesu?

⁸ Fifitaki e tautolu a Iesu he eketaha ke momoui fakamooli mo e mahani hakohako ke he tau puhala mo e tau fakatufono ha Iehova. Ka fehagai a tautolu mo e tau kamatamata, liogi fakamakutu ke moua e lagomatai ha Iehova ha kua manako a tautolu ke fakafiafia a ia. He tau puhala nai, fakakite e tautolu e lalagoaga ke he puhala ne pule a Iehova. Mailoga e tautolu to nakai talia e Iehova e tau liogi ha tautolu ka taute e tautolu e tau mahani ne vihiatia e ia. Kaeke ke momoui fakatatau a tautolu ke he tau tuaga ha Iehova, mauokafua a tautolu ko e tau liogi ha tautolu mai he tau loto kua tuga e mena manogi ki a Iehova. Ti iloa tonu e tautolu ko e omaoma fakamooli ha tautolu kua fakafiafia e Matua he lagi.​—Fakatai 27:11.

9. Ko e ha ne foaki e tau poa fakaaue?

⁹ Fakaakoaga ke uaaki: Fekafekau a tautolu ki a Iehova ha kua loto fakaaue a tautolu ki a ia. Ke fakamaama e mena nei, fakatutala la a tautolu ke he tau poa fakaaue, ko e taha vala aoga lahi he tapuakiaga mooli i Isaraela i tuai. * He tohi ha Levitika, fakaako e tautolu kua maeke e tagata Isaraela ke foaki e poa fakaaue ko e “poa fakaheke.” (Levi. 7:11-13, 16-18) Foaki e ia e poa nei he nakai kua lata a ia, ka kua manako a ia. Ti ko e poa foaki noa nei ne taute he tagata ha kua fakaalofa a ia  ke he haana a Atua ko Iehova. Ko e tagata ne taute e poa, haana magafaoa, mo e tau ekepoa to kai e vala kakano he manu ne poa. Ka ko e falu vala he manu ne poa kua foaki hokoia ni ki a Iehova. Tau vala fe?

10. Ko e heigoa e tau poa fakaaue ne fakamaama ia Levitika 3:6, 12, 14-16 ne fakaako ki a tautolu hagaao ke he manako ha Iesu ke taute e finagalo he Matua haana?

¹⁰ Fakaakoaga ke toluaki: Mai he fakaalofa, foaki e tautolu e tau mena mitaki oti ha tautolu ki a Iehova. Ko e tau vala gako e tau vala mitaki lahi he manu ki a Iehova. Talahau foki e ia e falu vala pauaki he manu, putoia e tau fuaifi, ne uho lahi. (Totou Levitika 3:6, 12, 14-16.) Fiafia pauaki a Iehova ka foaki noa he Isaraela e tau vala pauaki he manu mo e tau vala gako ki a Ia. Ko e Isaraela ne taute e poa pihia kua fakakite e manako hokulo haana ke foaki e tau mena ne mua e mitaki ke he Atua. He puhala pihia, makai a Iesu ke foaki e tau mena mitaki oti haana ki a Iehova he fekafekau loto katoa mai he fakaalofa haana ki a Ia. (Ioane 14:31) Ma Iesu, ko e taute e finagalo he Atua ko e mena fiafia; ha ha ia ia e fiafia lahi mahaki ke he fakatufono he Atua. (Sala. 40:8) Fiafia mooli a Iehova ke kitia a Iesu he fekafekau fakamakai ki a Ia!

11. Puhala fe ne tuga e tau poa fakaaue e fekafekauaga ha tautolu, ti fakamafana fēfē e mena ia ki a tautolu?

¹¹ Tuga e tau poa fakaaue pihia, ko e fekafekauaga ha tautolu ki a Iehova ko e fakakiteaga foaki noa he logonaaga ha tautolu ki a Ia. Foaki e tautolu e tau mena mitaki oti ki a Iehova, ti taute pihia e tautolu ha kua fakaalofa a tautolu ki a ia mai he tau loto katoa. Fiafia mooli a Iehova ke kitia e tau tagata tapuaki tokologa haana ne makai ke fekafekau ki a ia mai he fakaalofa hokulo ki a ia mo e fiafia ke he tau puhala haana! Mafanatia a tautolu ke manatu kua kitia e Iehova mo e tokiofa e tau gahua ha tautolu ti pihia mo e tau logonaaga ha tautolu. Ma e fakatai, kaeke kua motua a koe ti nakai lahi mahaki e mena kua maeke ke taute, kia mafanatia kua maama e Iehova e tau kūkū haau. Liga manatu a koe kua tote e mena haau ne taute, ka e kitia e Iehova e fakaalofa hokulo he loto haau ne omoomoi a koe ke taute e mena kua maeke a koe. Fiafia a ia ke talia e mena kua maeke a koe ke foaki.

12. Ko e heigoa e fakamafanaaga ka moua e tautolu mai he tali ha Iehova ke he tau poa fakaaue?

¹² Ko e heigoa ka fakaako e tautolu mai he tau poa fakaaue? He huhunu ke he afi e tau vala mitaki lahi he manu, ne hake e ahua ki luga ti fiafia a Iehova. Kia mafanatia, kua fiafia a Iehova ke he fekafekauaga makai mo e loto katoa haau. (Kolo. 3:23) Manamanatu la ke he taliaaga haana. Onoono a ia ke he tau laliaga makutu haau ke he fekafekauaga haana, pete he lahi mo e tote, kua uho mooli ti manatu mo e tokiofa tukulagi e ia.​—Mata. 6:20; Hepe. 6:10.

13. Hagaao ke he Levitika 9:23, 24, fakakite fēfē e Iehova e taliaaga haana ke he fakatokaaga ekepoa?

¹³ Fakaakoaga ke fāaki: Kua fakamonuina e Iehova e vala he fakatokatokaaga haana he lalolagi. Manamanatu ke he mena ne tupu he 1512 F.V.N. he mogo ne fakatū e faituga i kelekele he Mouga ko Sinai. (Esoto 40:17) Taute e Mose e fakamanatuaga ke kotofa a Arona mo e tau tama taane haana mo tau ekepoa. Ne fakapotopoto e motu ha Isaraela ke kitia e tau ekepoa ne foaki e tau poa fakamua ha lautolu he tau manu. (Levi. 9:1-5) Fakakite fēfē e Iehova e taliaaga haana ke he tau ekepoa ne kotofa foou? He fakamonuina e Arona mo Mose e tau tagata, ne fakafano hifo e Iehova e afi ti vela oti e poa i luga he fatapoa.​—Totou Levitika 9:23, 24.

14. Ko e ha e taliaaga ha Iehova ke he fakatokaaga ekepoa ha Arona kua aoga ki a tautolu he vahā nei?

 ¹⁴ Ko e heigoa ne tupu he kitia e mena ofoofogia he kotofa e ekepoa ne mua? Fakakite e Iehova e lalagoaga katoatoa haana ke he fakatokaaga ekepoa ha Arona. Magaaho ne kitia he tau Isaraela e fakamooliaga maaliali nei he lalagoaga ha Iehova ke he tau ekepoa, ha ha ia lautolu e kakano mitaki ke lalago katoatoa e tau ekepoa. Aoga nakai e mena ia ki a tautolu? Ē! Ko e tau ekepoa i Isaraela ko e ata ni anei he fakatokaaga ekepoa ne mua. Ko Keriso ko e Ekepoa ne Mua ue atu ne ha ha ai e matakau he tau patuiki mo e tau ekepoa ne 144,000 ka fekafekau fakalataha mo ia he lagi.​—Hepe. 4:14; 8:3-5; 10:1.

15-16. Fakakite fēfē e Iehova e taliaaga haana ke he “fekafekau fakamoli mo e loto matala”?

¹⁵ He 1919, fifili e Iesu e matakau tote he tau matakainaga taane fakauku ko e “fekafekau fakamoli mo e loto matala.” Takitaki he fekafekau ia e gahua fakamatala mo e foaki ke he tau tutaki he Keriso e “tau mena kai ke he tau magaaho [tonu].” (Mata. 24:45) Kitia nakai e tautolu e fakamooliaga maaliali he taliaaga he Atua ke he fekafekau fakamoli mo e loto matala?

¹⁶ Ko Satani mo e lalolagi haana kua lahi e mena ne taute ke fakauka e gahua he fekafekau fakamoli, mai he kitiaaga he tagata. Pete he ua e felakutaki he lalolagi, favaleaga mamahi, tau matematekelea fakatupe he lalolagi katoa, mo e taute fakakelea, kua matutaki e fekafekau fakamoli mo e loto matala ke foaki e tau mena kai fakaagaaga ke lata mo e tau tutaki he Keriso he lalolagi. Manamanatu ke he loga e tau mena kai fakaagaaga kua moua mogonei ne nakai fai totogi, ke he molea e 900 vagahau! Ko e fakamooliaga maaliali he lalagoaga he Atua. Manamanatu  foki ke he fakamooliaga kua fakamonuina e Iehova: ko e gahua fakamatala. Kua fakamatala mooli e tala mitaki “ke he lalolagi oti.” (Mata. 24:14) Nakai fakauaua ai, hane takitaki mo e fakamonuina lahi e Iehova e fakatokatokaaga haana he vahā nei.

17. Fakakite fēfē e tautolu e lalagoaga ma e fakatokatokaaga hane fakaaoga e Iehova?

¹⁷ Mitaki ke hūhū hifo ki a tautolu, ‘Loto fakaaue nakai au ke fakalataha mo e fakatokatokaaga ha Iehova he lalolagi?’ Foaki mai e Iehova ki a tautolu e fakamooliaga mauokafua ne tuga e afi mooli ne hifo mai he lagi he vahā ha Mose mo Arona. Lahi mooli e mena ha tautolu ke loto fakaaue ki ai. (1 Tesa. 5:18, 19) Fakakite fēfē e tautolu e lalagoaga ke he fakatokatokaaga hane fakaaoga e Iehova? He muitua ke he takitakiaga ne fakavē ke he Tohi Tapu he tau tohi ha tautolu mo e he tau feleveiaaga, tau toloaga, mo e tau fonoaga. Lafi ki ai, fakakite e tautolu e lalagoaga he fakalataha katoatoa ke he gahua fakamatala mo e fakaako atu.​—1 Kori. 15:58.

18. Ko e heigoa haau kua eketaha ke taute?

¹⁸ Kia eketaha a tautolu ke fakagahua e tau fakaakoaga mai he tohi ha Levitika. Moua e tautolu e taliaaga ha Iehova ke maeke e tau foakiaga ha tautolu ke talia ai. Maeke a tautolu ke fekafekau ki a Iehova ha kua loto fakaaue a tautolu ki a ia. Maeke a tautolu ke matutaki ke foaki e tau mena oti kua mitaki ki a Iehova ha kua fakaalofa a tautolu ki a ia mo e tau loto katoa. Ti maeke a tautolu ke lalago katoatoa e fakatokatokaaga kua fakamonuina e ia mogonei. He taute e tau mena oti ia, maeke a tautolu ke fakakite ki a Iehova kua tokiofa e tautolu e lilifu kua moua e tautolu ke fekafekau ki a ia ko e haana Tau Fakamoli!