1-2. Ke ka baka la’ng Bakriste lehono ba swanetše go nyaka go ithuta ka puku ya Lefitiko?

MOAPOSTOLA PAULO o ile a gopotša mogwera wa gagwe Timotheo gore: “Lengwalo ka moka le buduletšwe ke Modimo gomme le [a] hola.” (2 Tim. 3:16) O be a bolela le ka puku ya Lefitiko. Wena o nagana’ng ka puku ye? Ba bangwe ba no e bona e le puku yeo e sa re holego ka selo lehono, eupša Bakriste ba therešo bona ga ba e lebelele bjalo.

² Puku ya Lefitiko e ngwadilwe mengwaga e ka bago e 3 500 e fetilego, eupša Jehofa o ile a e boloka gore e tle e ‘re rute.’ (Baroma 15:4) Ka ge puku ya Lefitiko e re thuša go bona kamoo Jehofa a naganago ka gona le kamoo a lebelelago dilo tše itšego ka gona, re swanetše go nyaka go ithuta ka yona. Ge e le gabotse, go na le dilo tše dintši tšeo re ka ithutago tšona pukung yeo ya Beibele. Anke ga bjale re boleleng ka tše nne tša tšona.

3. Ke ka baka la’ng moperisita yo a phagamego a be a dira dihlabelo ngwaga o mongwe le o mongwe ka Letšatši la Poelano?

³ Thuto ya pele: Pele Jehofa a ka amogela dihlabelo tša rena, re swanetše go amogelega go yena. Ngwaga o mongwe le o mongwe ka Letšatši la Poelano, Baisiraele ba be ba bokana gomme moperisita yo a phagamego a dira dihlabelo ka diphoofolo. Dihlabelo tšeo di be di gopotša Baisiraele gore ba be ba swanetše go hlwekišwa ka ge ba be ba na le sebe. Eupša pele moperisita yo a phagamego a ka tliša madi a diphoofolo tšeo go bego go dirwa dihlabelo ka tšona ka Sekgethwakgethweng, sa pele o be a swanetše go  dira selo se sengwe sa bohlokwa go feta go lebalelwa ga Baisiraele dibe.

4. Go ya ka Lefitiko 16:12, 13, moperisita yo a phagamego o be a dira’ng ge a be a tsena ka lekga la pele ka Sekgethwakgethweng ka Letšatši la Poelano? (Bona seswantšho sa letlakala la ka ntle.)

⁴ Bala Lefitiko 16:12, 13. Nagana ka seo se bego se direga ka Letšatši la Poelano: Moperisita yo a phagamego o be a tsena ka taberenakeleng. Le e be e le lekga la pele la makga a mararo ao a bego a swanetše go tsena ka Sekgethwakgethweng letšatšing leo. O be a tsena ka moo ka seatleng se sengwe a swere sebjana seo se tletšego diorelo tšeo di nkgago bose, gomme ka seatleng se sengwe a swere sebjana sa gauta seo se tletšego magala a tukago. * O be a ema ganyenyane pele ga seširo seo se bego se tswaletše Sekgethwakgethwa. Ke moka a tsena ka moo Sekgethwakgethweng ka tlhompho e tseneletšego, gomme a ema pele ga areka ya kgwerano. Go be go eba bjalo ka ge eka o eme pele ga Jehofa Modimo. Ke moka moperisita o be a tšhela diorelo godimo ga magala ao ka šedi, gomme Sekgethwakgethwa se tlala ka monko o bose. * Ka morago o be a tsena ka Sekgethwakgethweng gape a swere madi a diphoofolo tšeo go bego go dirilwe dihlabelo ka tšona. Ela hloko gore o be a fiša diorelo pele a ka neela madi a dibego tša sebe.

5. Re ithuta’ng tabeng ya go dirišwa ga diorelo Letšatšing la Poelano?

⁵ Re ithuta’ng tabeng ya go dirišwa ga diorelo Letšatšing la Poelano? Beibele e re botša gore dithapelo tšeo di amogelegago tša bahlanka ba botegago ba Jehofa di swana le diorelo. (Ps. 141:2; Kut. 5:8) Gopola gore moperisita yo a phagamego o be a bontšha tlhompho e tseneletšego ge a be a tliša diorelo pele ga Jehofa. Ka mo go swanago, le rena ge re rapela Jehofa re swanetše go mmontšha tlhompho e tseneletšego. Re leboga kudu gore Mmopi wa legodimo le lefase o re dumelela gore re mmatamele gomme re be le tswalano ya kgauswi le yena, go no swana le ngwana yo a nago le tswalano e botse le tatagwe. (Jak. 4:8) O re dumelela go ba bagwera ba gagwe. (Ps. 25:14) Ruri re tšeela tokelo ye godimo kudu moo e lego gore re ka se dire selo le ge e le sefe seo se ka mo nyamišago!

6. Re ithuta’ng ka Jesu tabeng ya gore moperisita yo a phagamego o be a swanetše go fiša diorelo pele a ka neela dihlabelo?

⁶ Gopola gore moperisita yo a phagamego o be a swanetše go fiša diorelo pele a ka neela dihlabelo. Ka go dira bjalo, o be a kgonthišetša gore Modimo o be a tla amogela dihlabelo tša gagwe. Se se re ruta se sengwe ka Jesu. Ge Jesu a be a le mo lefaseng, o ile a swanelwa ke go dira selo se sengwe se bohlokwa kudu pele a ka neela bophelo bja gagwe e le sehlabelo. Selo seo se be se le bohlokwa kudu go feta go phološwa ga batho. Selo seo e be e le eng? O ile a swanelwa ke go kwa Jehofa le go mmotegela bophelo bja gagwe ka moka e le gore Jehofa a tle a amogele sehlabelo sa gagwe. Ka go dira bjalo, Jesu o ile a bontšha gore ga go na selo seo se phalago go kwa Jehofa. Le gona Jesu o ile a hlatsela gore tsela ya Tatagwe ya go buša ke ya toka e bile e nepagetše.

7. Ke ka baka la’ng Jehofa a ile a kgahlwa ke tsela yeo Jesu a ilego a phela ka yona ge a be a le mo lefaseng?

⁷ Ge Jesu a be a le mo lefaseng, o ile a dula a ekwa Jehofa bophelo bja gagwe ka moka. Le ge a ile a welwa ke diteko le go lebeletšana le mathata a mantši, e bile a be a tseba gore o tlo hwa gasehlogo, o ile a dula a ikemišeditše go hlatsela gore tsela ya Tatagwe ya go buša e di phala ka moka. (Bafil. 2:8) Ge Jesu a be a lebeletšane le diteko tše boima, o ile a rapela Jehofa  “ka megoo e matla le megokgo.” (Baheb. 5:7) Dithapelo tša gagwe tšeo di tšwago pelong di be di bontšha gore o be a botegela Jehofa, le gore o ikemišeditše go dula a mmotegela. Jehofa o be a bona dithapelo tša Jesu di swana le diorelo tša monko o bose. Jesu o ile a botegela Jehofa bophelo bja gagwe ka moka, e bile o hlatsetše gore tsela ya Tatagwe ya go buša e di phala ka moka.

8. Re ka ekiša Jesu bjang?

⁸ Re ka ekiša Jesu ka go dira sohle seo re ka se kgonago gore re botegele Jehofa le go mo kwa. Ge re welwa ke diteko, re swanetše go rapela Jehofa ka go tšwa pelong gore a re thuše ka gobane re nyaka go mo kgahliša. Ge re dira bjalo, le rena re bontšha gore re thekga tsela ya Jehofa ya go buša. Re lemoga gore Jehofa a ka se amogele dithapelo tša rena ge e ba re dira dilo tšeo a di hloilego. Eupša ge e ba re dira dilo tšeo a di ratago, re ka kgodišega gore dithapelo tša rena di tla swana le diorelo tša monko o bose go yena. Le gona re ka kgodišega gore ge e ba re botegela Tatago rena wa legodimong le go mo kwa, seo se mo thabiša kudu.—Die. 27:11.

9. Ke ka baka la’ng Baisiraele ba be ba neela Jehofa dihlabelo tša mohlakanelwa?

⁹ Thuto ya bobedi: Re hlankela Jehofa ka gobane re mo leboga. Go ithuta ka dihlabelo tša mohlakanelwa tšeo Baisiraele ba bego ba di dira go tlo re thuša go kwešiša taba ye gabotse. * Ka pukung ya Lefitiko, re ithuta gore Moisiraele o be a ka neela sehlabelo sa mohlakanelwa e le go bontšha “tebogo.” (Lef. 7:11-13, 16-18) O be a dira sehlabelo se ka gobane a be a nyaka, e sego ka gobane a be a gapeletšwa. Ka gona, se e be e le sebego sa boithaopo seo motho yoo a bego a se  dira ka ge a be a rata Jehofa Modimo wa gagwe. Nama ya phoofolo yeo go bego go dirilwe sehlabelo ka yona e be e jewa ke motho yo a bego a dirile sehlabelo seo, ba lapa la gagwe gotee le moperisita. Eupša dikarolo tše itšego tša phoofolo yeo ba be ba sa di je, di be di neelwa Jehofa feela. Ke dikarolo dife tšeo di bego di neelwa Jehofa?

10. Re ka swantšha bjang dihlabelo tša mohlakanelwa tšeo di hlalositšwego go Lefitiko 3:6, 12, 14-16, le kamoo Jesu a ilego a hlankela Jehofa ka gona?

¹⁰ Thuto ya boraro: Re neela Jehofa sohle seo re se kgonago ka gobane re mo rata. Jehofa o be a lebelela lekhura e le karolo e kaonekaone ya phoofolo. Le gona o ile a bolela gore dikarolo tše itšego tša phoofolo, go akaretša le dipshio, e be e le tša bohlokwa kudu. (Bala Lefitiko 3:6, 12, 14-16.) Ka gona Jehofa o be a thaba kudu ge Moisiraele a be a mo neela dikarolo tšeo tša phoofolo, go akaretša le makhura. Moisiraele yo a bego a neela Jehofa dilo tše, o be a bontšha gore o nyaka go neela Jehofa sehlabelo se sekaonekaone. Ka mo go swanago, Jesu le yena o ile a neela Jehofa sehlabelo se sekaonekaone ka go dira sohle seo a bego a ka se kgona gore a mo hlankele ka ge a be a mo rata. (Joh. 14:31) Jesu o be a kgahlwa ke go dira thato ya Modimo, ge e le gabotse, o be rata molao wa Modimo ka pelo ya gagwe ka moka. (Ps. 40:8) Ruri Jehofa o be a thaba kudu go bona Jesu a mo hlankela ka go rata!

11. Tsela yeo re hlankelago Jehofa e swana bjang le dihlabelo tša mohlakanelwa, gona seo se ka re kgothatša bjang?

¹¹ Go swana le dihlabelo tšeo tša mohlakanelwa, tsela yeo re hlankelago Jehofa e bontšha kamoo re ikwago ka gona ka yena. Re nea Jehofa sohle seo re ka se kgonago, le gona re dira seo ka gobane re mo rata ka dipelo tša rena ka moka. Ruri Jehofa o swanetše go ba a thaba ge a bona batho ba dimilione ba mo hlankela ka baka la ge ba mo rata e bile ba rata melao ya gagwe. Go a kgothatša go tseba gore Jehofa o tšeela godimo tsela yeo re mo hlankelago ka yona gotee le gore ke ka baka la eng re mo hlankela. Ka mohlala, ge e ba o tšofetše gomme o se sa kgona go hlankela Jehofa go etša peleng, o ka kgodišega gore Jehofa o kwešiša maemo a gago. O ka bona eka ga o direle Jehofa mo gontši, eupša yena o bona seo se lego ka pelong ya gago, e lego seo se go tutueletšago go mo direla sohle seo o ka se kgonago. O thabišwa ke go bona sohle seo o ka mo direlago sona ka pelo ya gago ka moka.

12. Tsela yeo Jehofa a bego a lebelela dihlabelo tša mohlakanelwa ka yona e re nea kgonthišetšo efe?

¹² Re ithuta’ng dihlabelong tša mohlakanelwa? Ge mollo o be o fiša dikarolo tše kaonekaone tša phoofolo yeo go bego go dirwa sehlabelo ka yona, muši o be o rotogela godimo gomme seo se be se thabiša Jehofa. Ka gona le wena o ka kgodišega gore Jehofa o a thaba ge o dira sohle seo o ka se kgonago go mo hlankela ka go rata. (Bakol. 3:23) Nagana kamoo Jehofa a thabišwago ke seo o se dirago. Go sa šetšwe gore o direla Jehofa mo gontši goba o mo direla mo gonyenyane, o tšeela godimo seo o mo direlago sona e bile a ka se tsoge a se lebetše.—Mat. 6:20; Baheb. 6:10.

13. Go ya ka Lefitiko 9:23, 24, Jehofa o ile a bontšha bjang gore o be a amogela baperisita bao ba bego ba sa tšwa go kgethwa?

¹³ Thuto ya bone: Jehofa o šegofatša karolo ya lefaseng ya mokgatlo wa gagwe. Nagana ka seo se ilego sa direga ka 1512 B.C.E., ge taberenakele e be e hlomilwe kgauswi le Thaba ya Sinai. (Ek. 40:17) Moshe o ile a etelela pele tiragalo yeo go yona Arone le barwa ba gagwe ba ilego ba kgethwa go ba baperisita. Setšhaba sa Baisiraele se ile sa bokana gore se tle se bone ge baperisita bao ba neela dihlabelo tša bona tša mathomo tša diphoofolo. (Lef. 9:1-5) Jehofa o ile a bontšha bjang gore o be a amogela baperisita bao ba bego ba sa tšwa go kgethwa? Ge Arone le Moshe ba dutše ba šegofatša setšhaba seo, Jehofa o ile a romela mollo wo o tšwago legodimong gomme  wa fiša ka mo go feletšego sehlabelo seo se bego se le aletareng.—Bala Lefitiko 9:23, 24.

14. Arone le barwa ba gagwe ba swantšhetša bomang lehono?

¹⁴ Mollo wo o tšwago legodimong woo o ilego wa fiša dihlabelo o ile wa bontšha’ng? O ile wa bontšha gore Jehofa o be amogela Arone le barwa ba gagwe bao ba bego ba sa tšwa go kgethwa go ba baperisita, e bile a ba thekga. Ge Baisiraele ba be ba bona gore Jehofa o thekga baperisita bao, ba ile ba kwešiša gore le bona ba be ba swanetše go ba thekga. Na seo se a re ama? Ee, ka gobane se se be se swantšhetša baperisita ba bohlokwa bao ba bego ba sa tla. Jesu ke Moperisita yo a Phagamego, gomme go na le baperisita ba bangwe ba 144 000 bao ba tlago go buša le yena e le dikgoši legodimong.—Baheb. 4:14; 8:3-5; 10:1.

15-16. Jehofa o bontšhitše bjang gore o amogela “mohlanka yo a botegago le wa temogo”?

¹⁵ Ka 1919, Jesu o ile a kgetha sehlopha se senyenyane sa bana babo rena bao ba tloditšwego gore e be “mohlanka yo a botegago le wa temogo.” Mohlanka yoo o etelela pele modiro wa go ruta batho ka Beibele e bile o nea balatedi ba Kriste “dijo tša bona ka nako e swanetšego.” (Mat. 24:45) Na re kgona go bona gore Modimo o amogela mohlanka yo a botegago le wa temogo?

¹⁶ Sathane le balatedi ba gagwe ba dira sohle seo ba ka se kgonago go thibela modiro wa mohlanka yo a botegago le wa temogo. Ge nkabe mohlanka yo a sa thušwe ke Jehofa, go be go ka se kgonege gore a dire modiro wo. Le ge go bile le dintwa tše pedi tša lefase, mathata a tša ditšhelete, e bile batho ba Modimo ba ile ba tlaišwa le go se swarwe ka toka, mohlanka yo a botegago le wa temogo o tšwetše pele a fepa balatedi ba Kriste lefaseng ka moka. Nagana ka dikgatišo tše dintši tšeo di lego gona lehono tšeo re di hwetšago mahala, e bile di hwetšagalago ka maleme a fetago a 900! Se se bontšha gabotse  gore Modimo o thekga mohlanka yo a botegago. Selo se sengwe gape seo se bontšhago gore Modimo o šegofatša mohlanka yo a botegago, ke modiro wa go bolela ditaba tše dibotse. Ditaba tše dibotse di “bolelwa lefaseng ka moka.” (Mat. 24:14) Ruri re kgona go bona gore Jehofa o hlahla mokgatlo wa gagwe lehono e bile o dira gore o atlege.

17. Re ka bontšha bjang gore re thekga mokgatlo wo Jehofa a o dirišago?

¹⁷ Re swanetše go ipotšiša gore: ‘Na ke leboga gore ke karolo ya mokgatlo wa Jehofa?’ Go swana le ge Jehofa a ile a romela mollo wo o tšwago legodimong go bontšha gore o be a amogela bao a bego a ba kgethile mehleng ya Moshe, le lehono o re neile bohlatse bjo bo lego molaleng bjoo bo bontšhago gore o diriša mokgatlo wa gagwe. Ruri re na le dilo tše dintši tšeo re ka di lebogago. (1 Bathes. 5:18, 19) Re ka bontšha bjang gore re thekga mokgatlo wo Jehofa a o dirišago? Re bontšha se ka go diriša seo re ithutilego sona ka Beibeleng, dikgatišong tša rena, dibokeng le dikopanong tše dikgolo le tše dinyenyane. Go oketša moo, re ka bontšha gore re thekga mokgatlo wa Jehofa ka go dira sohle seo re ka se kgonago go botša batho ditaba tše dibotse.—1 Bakor. 15:58.

18. O ikemišeditše go dira’ng?

¹⁸ Anke re direng sohle seo re ka se kgonago go diriša dilo tšeo re ithutilego tšona ka pukung ya Lefitiko. Anke re direng sohle seo re ka se kgonago gore Jehofa a amogele dihlabelo tša rena. Anke re hlankeleng Jehofa ka gobane re mo leboga. Anke re tšweleng pele re nea Jehofa sohle seo re ka se kgonago ka gobane re mo rata ka dipelo tša rena ka moka. Le gona, anke re direng sohle seo re ka se kgonago gore re tšwele pele re thekga mokgatlo wo a o dirišago lehono. Ka go dira dilo tše ka moka, re bontšha Jehofa gore re tšeela godimo tokelo yeo a re filego yona ya go mo hlankela re le Dihlatse tša gagwe!