1, 2. Левити киунуги ци финст ес, уой абони киристӕнттӕн зонун цӕмӕн гъӕуй?

АПОСТОЛ Павел е ’ригон ӕмбал Тимофеййӕн ӕ зӕрдӕбӕл ӕрлӕуун кодта: «Финстадӕ ӕнӕгъӕнӕйдӕр ӕй Хуцауи разамундӕй финст ӕма пайда ӕй» (2 Тим. 3:16). Левити киунугӕ дӕр Финстадӕмӕ хауй. Аци киунуги туххӕй ци гъуди кӕнис? Кӕмӕдӕрти уотӕ кӕсуй, ӕма аци киунуги закъӕнттӕ абони неци пайда ӕнцӕ. Фал ӕцӕг киристӕнттӕ ӕндӕрхузи гъуди кӕнунцӕ.

² Левити киунугӕ финст ӕрцудӕй еу 3 500 анзей разӕй, фал Йеговӕ байархайдта, цӕмӕй «махӕн зунд байамонунмӕ» абони уӕнгӕ дӕр ӕрхъӕрдтайдӕ (Ром. 15:4). Аци киунугӕй базонӕн ес, Йеговӕ цӕхуӕндӕр гъуддӕгтӕмӕ цӕхуӕн цӕстӕй кӕсуй, уой. Уомӕ гӕсгӕ махӕн дӕр пайда ӕй. Левити киунугӕй берӕ цӕбӕлдӕрти исахур уодзиан. Радзубанди кӕнӕн цуппар гъуддагебӕл.

3. Израилӕгтӕ алли анз дӕр Кӕдзосгӕнӕн бон нивӕндтӕ цӕмӕн хастонцӕ?

³ Фиццаг: цӕмӕй нин Йеговӕ нӕ нивӕндтӕ еса, уой туххӕй ни гъӕуама арази уа. Алли анз дӕр Кӕдзосгӕнӕн бон Израили адӕн еумӕ ӕрӕмбурд уиуонцӕ ӕма хестӕр саугин фонси нивӕндтӕ ӕрхӕссидӕ. Еци нивӕндтӕ израилӕгтӕн сӕ зӕрдӕбӕл лӕуун кодтонцӕ, сӕ тӕрегъӕдтӕй сӕ искӕдзос кӕнун ке гъудӕй, уой. Фал еци бон хестӕр саугин Тӕккӕ сугъдӕгдӕр бунатмӕ нивонди тоги хӕццӕ бацӕуни разӕй гъӕуама искодтайдӕ ӕндӕр гъуддаг. Ӕма еци гъуддаг израилӕгтӕн сӕ тӕрегъӕдтӕ ниххатир кӕнунӕй берӕ ӕхсидзгӕдӕр адтӕй.

4. Левити 16:12, 13 куд финст ӕй, уомӕ гӕсгӕ хестӕр саугин Кӕдзосгӕнӕн бон Тӕккӕ сугъдӕгдӕр бунатмӕ фиццаг хатт ку бацӕуидӕ, уӕд ци бакӕнидӕ? (Кӕсӕ хузӕмӕ ӕндаг цъарӕбӕл.)

 ⁴ Бакӕсӕ Левит 16:12, 13. Нӕ цӕститӕбӕл рауайун кӕнӕн: Кӕдзосгӕнӕн бон хестӕр саугин Хуцауи цатурмӕ фӕццӕуй. Еци бон Тӕккӕ сугъдӕгдӕр бунатмӕ гъӕуама ӕртӕ хатти бацӕуа ӕма нур фиццаг хатт бацӕудзӕй. Ӕ еу къохи ес хуӕрздӕф бодӕ иннӕ къохи ба содзгӕ зингтӕй идзаг сугъзӕрийнӕ зингхӕссӕн. Сугъдӕг бунат Тӕккӕ сугъдӕгдӕр бунатӕй ка хецӕн кӕнуй, еци ӕмбӕрзӕни рази ӕрлӕудтӕй. Уордӕмӕ ке бацӕудзӕй, е устур кадӕ ке ӕй, уой лӕдӕруй. Зӕгъӕн ес, ӕма Йеговӕн ӕхе рази ӕрлӕудзӕй. Уой фӕсте Тӕккӕ сугъдӕгдӕр бунатмӕ бацудӕй ӕма бадзурди кири рази ӕрлӕудтӕй. Уой фӕсте ба бодӕ сабургай содзгӕ зингтӕбӕл рауагъта ӕма цатур хуӕрздӕфӕй байдзаг ӕй *. Фӕстӕдӕр нӕуӕгӕй Тӕккӕ сугъдӕгдӕр бунатмӕ бацӕудзӕй, тӕрегъӕди туххӕй ци фонси нивӕндтӕ хаст ӕрцудӕй, уони тоги хӕццӕ. Уӕ гъос ӕрдарайтӕ: тӕрегъӕди туххӕй ци нивӕндтӕ хаст ӕрцудӕй, уони тог ӕрбахӕссуни разӕй саугин хуӕрздӕф бодӕ иссугъта.

5. Кӕдзосгӕнӕн бон саугин бодӕ ке иссодзидӕ, уомӕй цӕбӕл ахур кӕнӕн?

⁵ Саугин Кӕдзосгӕнӕн бон бодӕ ке иссодзидӕ, уомӕй цӕбӕл ахур кӕнӕн? Библи куд лӕдӕрун кӕнуй, уомӕ гӕсгӕ Йеговӕн ӕ еузӕрдон лӕггадгӕнгути кувдтитӕ боди хузӕн ӕнцӕ (Пс. 141:2; Рарг. 5:8). Уӕлдӕр куд загъд адтӕй, уотемӕй хестӕр саугин Йегови размӕ бодӕ бахӕссун ӕхецӕн устур кадӕбӕл нимадта. Мах дӕр Йеговӕмӕ ку фӕкковӕн, уӕд гъӕуама бӕрӕг уа, ке ин аргъ кӕнӕн ӕма имӕ нӕ бон ковун ке ӕй, уой нӕхецӕн устур кадӕбӕл ке нимайӕн. Мах хъӕбӕр боз ан, Дуйнесфӕлдесӕг нин уӕхӕн барӕ ке равардта, цӕмӕй имӕ бахӕстӕг уӕн, сувӕллон ӕ фидӕмӕ куд бахӕстӕг уй, уотӕ (Иак. 4:8). Йеговӕ нӕ нимайуй е ’мбӕлттӕбӕл! (Пс. 25:14). Ци кади аккаг нӕ искодта, уомӕн уотӕ хъӕбӕр аргъ кӕнӕн, ӕма нӕ нӕ фӕндуй, цӕмӕй ӕй ескӕд фӕффудӕнгъӕл кӕнӕн.

6. Хестӕр саугин нивонд ӕрхӕссуни разӕй бодӕ ке иссодзидӕ, уомӕй цӕбӕл ахур кӕнӕн?

⁶ Куд загътан, уотемӕй хестӕр саугин нивонд ӕрхӕссуни разӕй гъӕуама бодӕ иссугътайдӕ. Уой фӕрци ӕй федарӕй зудта, нивонд ку ӕрхӕсса, уӕд си Йеговӕ арази ке уодзӕй. Уомӕй цӕбӕл ахур кӕнӕн? Йесо цалинмӕ ӕ цард нивонди не ’рхаста, уӕдмӕ ’й еу ӕхсидзгӕ гъуддаг бакӕнун гъудӕй ӕма е адӕни фӕййервӕзун кӕнунӕй берӕ ӕхсидзгӕдӕр адтӕй. Цума е ци адтӕй? Зӕнхӕбӕл цӕргӕй гъӕуама Йеговӕбӕл еузӕрдонӕй байзадайдӕ, цӕмӕй ин Йеговӕ ӕ нивонд райстайдӕ. Уотемӕй Йесо бавдистайдӕ, Йегови фӕндон ӕнхӕст кӕнун царди тӕккӕ хуӕздӕр над ке ӕй, удта ӕ Фидӕн, уӕхӕн барӕ ке ес, цӕмӕй Дун-дуйней Хецау уа ӕма уомӕй растдӕр разамунд ке неке дӕттуй.

7. Йесо ӕ цардӕй ӕ Фиди зӕрдӕ куд рохс кодта?

⁷ Йесо зӕнхӕбӕл ку цардӕй, уӕд алли гъуддаги дӕр Йеговӕмӕ игъуста. Ӕма кӕд фӕлварӕнтӕбӕл, удта зиндзийнӕдтӕбӕл ӕмбалдӕй ӕма имӕ гъезӕмайраг мӕлӕт ке ӕнгъӕлмӕ кӕсуй, уой зудта, уӕддӕр ӕй фӕндадтӕй бавдесун, ӕ Фиди хецаудзийнадӕй хуӕздӕр ке нӕййес, уой (Фил. 2:8). Зин уавӕрти ку уидӕ, уӕд «дзиназгӕй ӕма цӕстисуг калгӕй» Хуцаумӕ ковидӕ (Дзиуит. 5:7). Куд зӕрдибунӕй кувта, уомӕй бӕрӕг адтӕй, Йеговӕбӕл еузӕрдон ке ӕй, е. Удта ’й  уой фӕрци никки хъӕбӕрдӕр фӕндадтӕй ӕ Фидӕмӕ игъосун. Йеговӕн Йесой кувдтитӕ хуӕрздӕф боди хузӕн адтӕнцӕ. Йесо ӕ цардӕй ӕ Фиди зӕрдӕ рохс кодта ӕма ’й бавдиста, Йеговӕн уӕхӕн барӕ ке ес, цӕмӕй Дун-дуйней Хецау уа.

8. Нӕ бон куд ӕй Йесой фӕнзун?

⁸ Мах бон дӕр ӕй Йесой хузӕн ӕгас хъауритӕй архайун, цӕмӕй Йеговӕмӕ игъосӕн ӕма ибӕл еузӕрдон уӕн. Фӕлварӕнти рӕстӕг Йеговӕй зӕрдиагӕй ӕнхус фӕккорӕн, уомӕн ӕма нӕ фӕндуй ӕ зӕрдӕ рохс кӕнун. Уотемӕй бавдесӕн, Йегови хецаудзийнади фарс ке лӕууӕн, уой. Мах ӕй лӕдӕрӕн, Йеговӕ е ’сӕфт кӕмӕй уинуй, еци гъуддӕгтӕ ку кӕнӕн, уӕд нин нӕ кувдтитӕ ке нӕ игъосдзӕй. Фал кӕд Йегови уагӕвӕрдтӕмӕ гӕсгӕ цӕрӕн, уӕд гъӕуама ма гурусхӕ кӕнӕн, нӕ зӕрдиаг кувдтитӕ ин хуӕрздӕф боди хузӕн ке ’нцӕ, уобӕл. Мах ӕй федарӕй зонӕн, нӕ еузӕрдондзийнадӕ ӕма нӕ коммӕгӕсдзийнадӕ нӕ уӕларвон Фидӕн ӕхцӕуӕн ке ’нцӕ (Ӕмб. 27:11).

9. Израилӕгтӕ фарни нивӕндтӕ цӕмӕн хастонцӕ?

⁹ Дуккаг: Йеговӕн лӕггадӕ кӕнӕн, боз си ке ан, уой туххӕй. Ӕркӕсӕн, рагон Израили фарни нивӕндтӕ цӕмӕн хастонцӕ, уомӕ *. Левити киунугӕй базонӕн ес, израилӕгтӕ фарни нивӕндтӕ, «Хуцауӕй боз ке адтӕнцӕ», уой туххӕй ке хастонцӕ (Лев. 7:11–13, 16–18). Еци нивӕндтӕ хӕссун сӕ ихӕс н’ адтӕй. Адӕймаг уӕхӕн нивонд ӕрхӕссидӕ  барвӕндӕй, Йегови ке уарзта, уой туххӕй. Нивондгонд фонси фидӕй хуӕрӕн адтӕй ӕрмӕстдӕр нивонд ка ӕрхаста, еци адӕймагӕн, ӕ бийнонтӕн ӕма саугинӕн. Фал фонси нивӕндти кӕцидӕр хӕйттӕ ба ӕрмӕстдӕр Йегови адтӕнцӕ. Кӕци хӕйттӕ?

10. Левити 3:6, 12, 14–16 фарни нивӕндти туххӕй ци финст ес, уой фӕрци нӕ бон куд ӕй балӕдӕрун, Йесой ӕ Фиди фӕндон ӕнхӕст кӕнун цӕмӕн фӕндадтӕй, уой?

¹⁰ Ӕртиккаг: Йегови ке уарзӕн, уой туххӕй ин дӕттӕн, хуӕздӕрӕй нӕмӕ ци ес, уой. Йегови цӕсти фонсӕн ӕ хуӕздӕр хай адтӕй фиу, ургтӕ ӕма игӕр. (Бакӕсӕ Левит 3:6, 12, 14–16.) Уомӕ гӕсгӕ, Йегови зӕрдӕ хъӕбӕр барохс уидӕ, израилӕгтӕ ин еци хӕйттӕ нивондӕн зӕрдиагӕй ку ӕрхӕссиуонцӕ, уӕд. Уомӕй бавдесиуонцӕ, хуӕздӕрӕй сӕмӕ ци адтӕй, уой сӕ Йеговӕн раттун ке фӕндадтӕй. Уотӕ Йесо дӕр, Йегови ке уарзта, уой туххӕй ин ӕгас зӕрдӕй лӕггадӕ кодта ӕма ин уотемӕй лӕвардта, хуӕздӕрӕй имӕ ци адтӕй, уой (Иоан. 14:31). Йесойӕн Хуцауи фӕндон ӕнхӕст кӕнун ӕхцӕуӕн адтӕй, удта ин ӕ закъон дӕр берӕ уарзта (Пс. 40:8). Расагъӕс кӕнӕ, Йеговӕ куд цийнӕ кодта, Йесо ин куд зӕрдиагӕй лӕггадӕ кодта, уомӕ кӕсгӕй!

11. Нӕ лӕггадӕ фарни нивӕндти хӕццӕ рабарӕн цӕмӕн ес ӕма нин е нӕ нифс куд федар кӕнуй?

¹¹ Мах лӕггадӕ дӕр фарни нивонди хузӕн ӕй, уомӕн ӕма уой фӕрци Йеговӕн ӕвдесӕн, цӕхуӕн зӕрдӕ имӕ дарӕн, уой. Хуӕздӕрӕй нӕмӕ ци ес, уой ин дӕттӕн, уомӕн ӕма ’й ӕгас зӕрдӕй уарзӕн. Йегови лӕггадгӕнгутӕ милиуантӕ ’нцӕ ӕма расагъӕс кӕнӕ, куд ӕхцӕуӕн ин ӕй, ӕхе дӕр ӕма ин ӕ уагӕвӕрдтӕ дӕр ке уарзунцӕ, уой туххӕй ин ке лӕггадӕ кӕнунцӕ, е! Йеговӕ, ци кӕнӕн, айдагъ уой нӕ уинуй, фал ӕй цӕмӕн кӕнӕн, уой дӕр ӕма нин нӕ зӕрдиаг хъиамӕтӕн аргъ кӕнуй. Е нин нӕ нифс куд нӕ федар кӕнуй! Зӕгъӕн, кӕд каргун дӕ ӕма дӕ цӕйбӕрцӕ фӕндуй, уойбӕрцӕ лӕггадӕ кӕнун дӕ бон нӕбал ӕй, уӕд ӕй зонӕ, Йеговӕ дин дӕ уавӕр ке лӕдӕруй. Ка ’й зонуй дӕмӕ уотӕ кӕсуй, ӕма фагӕ нӕ лӕггадӕ кӕнис. Фал ӕй Йеговӕ уинуй, хъӕбӕр берӕ ’й ке уарзис ӕма уой туххӕй дӕ бон ци ӕй, уой ке кӕнис. Ду Йеговӕн дӕттис хуӕздӕрӕй дӕмӕ ци ес, уой ӕма ин е хъӕбӕр ӕхцӕуӕн ӕй.

12. Йеговӕ фарни нивӕндтӕмӕ цӕхуӕн цӕстӕй кастӕй ӕма нин е нӕ нифс куд федар кӕнуй?

¹² Хуцауи адӕн фарни нивӕндтӕ ке хастонцӕ, уомӕй цӕбӕл ахур кӕнӕн? Фонсӕн ӕ хуӕздӕр хӕйттӕ ку содзиуонцӕ, уӕд се смаг Йеговӕн ӕхцӕуӕн уидӕ. Мадта мах дӕр нӕ лӕггади нӕ бон цидӕриддӕр ӕй, уой ку фӕккӕнӕн, уӕд Йеговӕн ӕхцӕуӕн фӕууй (Кол. 3:23). Расагъӕс кӕнӕ, Йеговӕ дӕумӕ кӕсгӕй куд фӕццийнӕ кӕнуй. Дӕ лӕггади ӕгас хъауритӕй цидӕриддӕр кӕнис, уомӕ Йеговӕ хӕзнай цӕстӕй кӕсуй, ӕма уӕлдай нӕй, берӕ кӕнис ӕви минкъий. Е дин дӕ хъиамӕттӕ некӕд феронх кӕндзӕй (Матф. 6:20; Дзиуит. 6:10).

13. Левити 9:23, 24 куд финст ӕй, уомӕ гӕсгӕ Йеговӕ куд бавдиста, саугинтӕй арази ке адтӕй, уой?

¹³ Цуппӕрӕймаг: Йеговӕ арфӕ кӕнуй ӕ организаций зӕнхон хаййӕн. Расагъӕс кӕнӕ, нӕ эри размӕ 1512 анзи израилӕгтӕ Синаййи хонхрӕбун Хуцауи цатур ку ӕрӕвардтонцӕ, уӕд ци ’рцудӕй, уобӕл (Рац. 40:17). Моисей Аарони ӕма ӕ фуртти саугинтӕй исӕвардта. Израили адӕн ӕрӕмбурд ӕнцӕ, цӕмӕй бакастайуонцӕ, саугинтӕ фиццаг хатт фонси нивӕндтӕ куд хӕсдзӕнцӕ, уомӕ (Лев. 9:1–5). Цума Йеговӕ куд бавдиста, саугинтӕй ӕвӕрд ка ӕрцудӕй, уонӕй арази ке адтӕй? Моисей ӕма Аарон адӕнӕн ку райарфӕ кодтонцӕ, уӕд Йеговӕй арт рацудӕй ӕма,  нивондхӕссӕнбӕл ци нивонд адтӕй, уой ранихъуардта. (Бакӕсӕ Левит 9:23, 24.)

14. Израили ци саугинтӕ адтӕй, етӕ кӕмӕ амонунцӕ?

¹⁴ Уӕларвӕй арт ке ӕрцудӕй, е цӕбӕл дзорӕг адтӕй? Уотемӕй Йеговӕ бавдиста, Ааронӕн ӕма ӕ фурттӕн ке ӕнхус кӕндзӕй. Израилӕгтӕ уой ку фӕууидтонцӕ, уӕд балӕдӕрдтӕнцӕ, еци саугинтӕн етӕ дӕр ке гъӕуама ӕнхус кӕнонцӕ. Йеговӕ Израили саугинтӕй арази ке адтӕй, уой зонун мах цӕмӕн гъӕуй? Уомӕн ӕма етӕ амудтонцӕ устурдӕр саугинтӕмӕ – Хестӕр саугин Йесомӕ ӕма, ӕ хӕццӕ уӕлӕрвти паддзӕхтӕй ӕма саугинтӕй ка лӕггадӕ кӕндзӕй, еци 144 минемӕ (Дзиуит. 4:14; 8:3–5; 10:1).

15, 16. Йеговӕ «ӕууӕнкгун ӕма зундгин цагъарӕй» арази ке ӕй, е цӕмӕй бӕрӕг ӕй?

¹⁵ 1919 анзи Йесо исӕвардта «ӕууӕнкгун ӕма зундгин цагъари». Еци цагъар разамунд дӕттуй игъосун кӕнуни гъуддагӕн ӕма Киристей фӕдбӕлдзӕугутӕн «хуӕруйнаг афойнадӕбӕл дӕттуй» (Матф. 24:45). Хуцау ӕууӕнкгун ӕма зундгин цагъарӕй арази ке ӕй, уой уинӕн?

¹⁶ Сайтан ӕма ӕ дуйне хъӕбӕр архайунцӕ, цӕмӕй ӕууӕнкгун цагъари ӕрлӕуун кӕнонцӕ. Ӕма ӕнӕ Йегови ӕнхусӕй еци куст ӕцӕгӕйдӕр ӕрлӕудтайдӕ. Фал ӕууӕнкгун ӕма зундгин цагъари неци бакъулумпи кодта: нӕдӕр дууӕ дуйнеуон тугъди, нӕдӕр экономики уавӕр, нӕдӕр нӕ фӕдбӕл ке зелунцӕ ӕма нӕ ӕнӕфудӕй ке ӕфхуӕрунцӕ, е. Цагъар Киристей фӕдбӕлдзӕугутӕн абони уӕнгӕ дӕр ӕууӕндундзийнадӕ федаргӕнӕн хуӕруйнаг дӕттуй. Расагъӕс кӕнӕ, абони нӕмӕ цӕйбӕрцӕ публикацитӕ ес, уобӕл. Етӕ еугурӕйдӕр лӕвар ӕнцӕ ӕма ӕнцӕ 900 ӕвзагемӕй фулдӕрбӕл! Уомӕй бӕрӕг  ӕй, Хуцау ӕууӕнкгун цагъарӕн ке ӕнхус кӕнуй. Игъосун кӕнуни гъуддаг куд цӕуй, е дӕр Йегови арфӕдзийнадӕбӕл дзорӕг ӕй. Ӕма ӕцӕгӕйдӕр, хуарз хабар игъустгонд цӕуй «ӕгас зӕнхи цъарӕбӕл дӕр» (Матф. 24:14). Мадта бӕрӕг ӕй, абони Йеговӕ ӕ организацийӕн разамунд ке дӕттуй ӕма ин рӕдауӕй ке арфӕ кӕнуй, е.

17. Нӕ бон куд ӕй Йегови организаций хӕццӕ ӕмгуст кӕнун?

¹⁷ Хуарз уайдӕ, алкедӕр ни ку расагъӕс кӕнидӕ: «Йегови организаций ке дӕн, уомӕн аргъ кӕнун?» Моисеййи дзаманти уӕларвӕй арт ку ’рцудӕй, уӕд ӕй Йеговӕ бавдиста, саугинтӕй ке исӕвардта, уонӕй арази ке адтӕй. Уотӕ нин абони дӕр Йеговӕ ӕвдесуй, ӕ организаций фӕрци ке архайуй, уой. Ӕма си мах дӕр берӕ цӕйдӕрти туххӕй боз ан (1 Фес. 5:18, 19). Нӕ бон куд ӕй Йегови организаций хӕццӕ ӕмгуст кӕнун? Уой туххӕй гъӕуй Библий, нӕ публикацити, нӕ фембӕлдти ӕма конгрессти ци базонӕн, уомӕ гӕсгӕ архайун, удта ма игъосун кӕнуни ӕма ахуркӕнуйнӕгтӕ цӕттӕ кӕнуни гъуддаги дӕр ӕгас хъауритӕй архайун (1 Кор. 15:58).

18. Дӕ федар фӕндӕ ци ӕй?

¹⁸ Мадта, Левити киунугӕй ци базудтан, уомӕ гӕсгӕ архайӕн. Мах фӕндуй, цӕмӕй нин Йеговӕ нӕ нивӕндтӕй арази уа. Йеговӕн лӕггадӕ кӕндзиан, боз си ке ан, уой туххӕй. Хуӕздӕрӕй нӕмӕ ци ес, уой идарддӕр дӕр Йеговӕн дӕтдзиан, уомӕн ӕма ’й ӕгас зӕрдӕй уарзӕн. Удта ин ӕ организаций хӕццӕ ӕгас хъауритӕй ӕмгуст кӕндзиан. Уотемӕй Йеговӕн бавдесдзиан, лӕггадӕ ин ке кӕнӕн, уой нӕхецӕн устур кадӕбӕл ке нимайӕн!