1-2. Wuarom sellen Christen vondoag dän Dach nieschierich sennen to daut Buak 3. Mose?

DE Apostel Paulus holp sienen jungen Frint Timotäus denkjen, daut “aule Schreft von Gott jejäft, . . . [un] wieetvoll” wia (2. Tim. 3:16). Doa es uk 3. Mose met en. Woo denkjst du äwa dit Bibelbuak? Eenje denkjen, doa sent bloos een deel Räajlen bennen, waut ons vondoag dän Dach nich mea fälen, oba woare Christen denkjen aundasch.

² Daut Buak 3. Mose wort ojjefäa 3 500 Joa trigj jeschräwen, oba Jehova oppbewoad daut, “daut wie doarut lieren sullen” (Reem. 15:4). Wie wudden sellen nieschierich sennen to dit Buak, wiels daut wiest ons, woo Jehova denkjt. En 3. Mose sent een deel Lieren bennen, waut Jehova fa ons haft oppschriewen loten. Well wie mol vea von dee unjasieekjen.

3. Wuarom deeden se jieda Joa aum Veseenungsdach Tieren opfren?

³ De ieeschte Lia: Jehova nemt onse Opfa bloos aun, wan wie am jefaulen. Ieeschtemma hilden de Israeliten jieda Joa dän Veseenungsdach. Dee vesaumelden sikj un doa worden uk Tieren jeopfat. Dise Opfa holpen an denkjen, daut see musten von de Sind friejemoakt woaren. Oba ea de Huaga Priesta daut Bloot von de Tiaopfa no de Aulaheilichste Stow brinjen kunn, must dee noch waut aundret  doonen, waut wichtja wia, aus daut Volkj von de Sinden frietomoaken.

4. Waut deed de Huaga Priesta, wan hee aum Veseenungsdach toom ieeschte Mol en de Aulaheilichste Stow nenjinkj, soo aus 3. Mose 16:12-13 daut sajcht? (See daut Bilt oppe väaschte Sied.)

⁴ Läs 3. Mose 16:12-13. Stal die mol väa, woo daut aum Veseenungsdach wia. De Huaga Priesta jinkj en daut Aunbädungszelt nenn. Doa must hee dän Dach dreemol en de Aulaheilichste Stow nengonen. Biem ieeschte Mol haud hee een Dinkj met Weiruak met un uk eene goldne Rieekjapaun voll Gloot. Ver de Aulaheilichste Stow wia eene Gardien, un doa bleef hee een bät stonen. Dan jinkj hee respakjtvoll en de Aulaheilichste Stow nenn, wua hee vere Bundeskjist stonen bleef. Doa stunt hee soo to sajen ver Jehova Gott! Nu streid de Priesta väasechtich dän heiljen Weiruak opp daut Gloot un de gaunze Stow rikjt sea scheen. * Lota jinkj hee dan wada en de Aulaheilichste Stow nenn un neem daut Bloot von de Tiaopfa met. Oba daut es oppfaulent, daut hee dän Weiruak vebrend, ea hee daut Bloot doa nenbrocht.

5. Waut lia wie doavon, daut se aum Veseenungsdach Weiruak brukten?

⁵ Waut kjenn wie doavon lieren, daut se aum Veseenungsdach Weiruak brukten? De Schreft wiest, daut de opprechtje Jebäda von Jehova siene true Deena soo sent aus Weiruak (Psa. 141:2; Opb. 5:8). De Huaga Priesta wia je sea respakjtvoll, aus hee dän Weiruak ver Jehova brocht. Biejlikj soo doo wie daut sea respakjtvoll, wan wie to Jehova bäden. Wie haben Ieaforcht fa am. Wie räakjnen daut sea väl, daut wie to dän bäden kjennen, waut Himmel un Ieed jemoakt haft, un daut wie dän kjennen noda komen, soo aus een Kjint sienen Voda (Jak. 4:8). Wie kjennen siene Frind sennen! (Psa. 25:14). Daut es ons soo väl wieet, daut wie am kjeenmol aunschmäaren wellen.

6. Waut lia wie doavon, daut de Huaga Priesta dän Weiruak vebrend, ea hee de Opfa brocht?

⁶ De Huaga Priesta must je dän Weiruak vebrennen, ea hee de Tieren opfad. Soo muak hee secha, daut Gott eenen Jefaulen aun am haud, wan hee de Opfa brocht. Waut lia wie von daut? Aus Jesus oppe Ieed wia, must hee uk waut sea wichtjet doonen, ea hee sien Läwen aus een Opfa jeef. Daut wia soogoa wichtja, aus de Menschen raden. Waut wia daut? Hee must hia oppe Ieed Jehova emma tru bliewen un jehorchen, daut dee sien Opfa aunnämen kunn. Doaderch bewees Jesus, daut et rajcht wia, Jehova sienen Wellen to doonen. Hee stunt fa sienen Voda aus hechsten Harscha en un bewees, daut dee rajcht harschen deed.

7. Wuarom haud Jehova eenen Jefaulen aun aules, waut sien Sän deed?

⁷ Aus Jesus oppe Ieed wia, wia hee Jehova en aules jehuarsom. Hee wort vesocht un muak schwoare Tieden derch un hee wist, daut hee wudd eenen grausomen Doot haben, un doch wia hee sikj eenich to bewiesen, daut sien Voda de basta Harscha wia (Filip. 2:8). Aus Jesus aufjeprooft wort, haft hee “jebät un jeprachat un jeschräajen met Tronen” (Heb. 5:7). Siene opprechtje Jebäda weesen, daut hee Jehova tru wia, un holpen am, daut hee Jehova emma jehorchen wull. Jesus siene Jebäda wieren fa Jehova soo aus  scheena Weiruak. Aules, waut Jesus deed, jefoll sienen Voda un bewees, daut Jehova de basta Harscha wia.

8. Woo kjenn wie Jesus nodoonen?

⁸ Wie kjennen Jesus nodoonen, wan wie ons bastet doonen, om Jehova tru to sennen un to jehorchen. Wan wie aufjeprooft woaren, dan pracha wie Jehova no Help, wiels wie am jefaulen wellen. Soo kjenn wie wiesen, daut wie am aus Harscha unjadon sent. Wie weeten, daut Jehova onse Jebäda nich aunnämen woat, wan wie waut doonen, waut hee haust. Oba wan wie soo läwen, aus hee daut haben well, dan kjenn wie ons doaropp veloten, daut onse opprechtje Jebäda fa am soo sent aus scheena Weiruak. Un wie kjennen ons secha sennen, daut onsen himlischen Voda daut jefelt, wan wie am tru un jehuarsom sent (Spr. 27:11).

9. Wuarom brochten de Israeliten Dankopfa?

⁹ De tweede Lia: Wie deenen Jehova, wäajen wie am dankboa sent. Daut es aun de Dankopfa to seenen, waut de Israeliten muaken. * En daut Buak 3. Mose lia wie, daut een Israelit ut Dankboakjeit kunn een “Dankopfa brinjen” (3. Mo. 7:11-13, 16-18). Hee brocht daut nich, wäajen hee daut must, oba wäajen hee daut wull. Daut wia een frieweljet Opfa, waut eena ut Leew fa Jehova Gott muak. Deejanja, waut daut brocht, eet met siene Famielje un de Priestasch toop daut Fleesch von daut jeopfade Tia. Oba eenje Bieta von dit Tia wieren bloos fa Jehova. Woone Bieta wieren daut?

10. En waut fa Stekjen wieren de Dankopfa, wua 3. Mose 3:6, 12, 14-16 von rät, biejlikj soo aus daut, waut Jesus fa Jehova deed?

 ¹⁰ De dredde Lia: Wie jäwen Jehova ons bastet, wiels wie am leewen. Fa Jehova wia daut Fat daut baste un hee tald uk aundre Bieta von de Tieren fa besonda, biejlikj de Nieren (läs 3. Mose 3:6, 12, 14-16). Am jefoll daut sea, wan een Israelit am dise Bieta un uk daut Fat opfad. Wan een Israelit daut deed, dan wia to seenen, daut hee Gott daut gaunz baste jäwen wull. Jesus wia uk wellich reed, Jehova daut gaunz baste to jäwen. Hee deend Jehova von gaunzen Hoaten, wiels hee am leewd (Joh. 14:31). Fa Jesus wia daut eene Freid, Gott sienen Wellen to doonen, un hee leewd Gott sien Jesaz (Psa. 40:9). Secha jefoll Jehova daut sea, daut Jesus am soo wellich deend!

11. (a) En waut fa Stekjen es ons Deenst soo aus de Dankopfa? (b) Wuarom jeft ons daut Moot?

¹¹ Ons Deenst fa Jehova es biejlikj soo aus de Dankopfa, wiels wie am doaderch wiesen, woo wie äwa am denkjen. Wie jäwen Jehova ons bastet, wiels wie am von gaunzen Hoaten leewen. Secha jefelt Jehova daut sea, daut millionende Menschen am deenen, wiels dee am leewen un jehorchen wellen! Jehova sitt, waut wie doonen, un hee räakjent daut väl. Oba hee weet uk, wuarom wie waut doonen. Daut jeft ons väl Moot. Wan wie biejlikj aul ella sent un nich mea soo väl doonen kjennen, dan kjenn wie ons secha sennen, daut Jehova ons vestonen kaun. Veleicht jleew wie, daut wie nich mea väl auntobeeden haben, oba Jehova sitt de groote Leew, waut ons bat doa brinjt, aules to doonen, waut wie kjennen. Am jefelt daut, wan wie daut baste jäwen, waut wie kjennen.

12. Woo docht Jehova äwa de Dankopfa, un wuarom jeft ons daut Moot?

¹² Waut kjenn wie von de Dankopfa lieren? Jehova freid sikj doaräwa, wan de baste Bieta von daut Tia em Fia vebrenden un de Ruak oppjinkj. Daut wiest ons, daut Jehova sikj uk äwa ons freit, wan wie am von Hoaten jieren deenen (Kol. 3:23). Stal die väa, woo schaftich hee kjikjt, wiels hee met die tofräd es! Daut kjemt nich doaropp aun, aus du väl ooda weinich fa am doonen kaust. Wan du daut ut Leew deist, es daut bie am sea väl wieet un hee woat daut nienich vejäten (Mat. 6:20; Heb. 6:10).

13. Woo wees Jehova no 3. Mose 9:23-24 no, daut hee eenen Jefaulen aun de Priestasch haud?

¹³ De vieede Lia: Jehova säajent daut, waut siene Organisazion hia oppe Ieed deit. See wie mol, woo daut wia, aus daut Aunbädungszelt aune 1512 v. Chr. bie dän Sinai-Boajch oppjestalt wort (2. Mo. 40:17). Moses deed daut Toopkomen leiden, wua Aaron un siene Säns aus Priestasch aunjestalt worden. Un de Israeliten kunnen daut seenen, woo de Priestasch doa toom ieeschte Mol Tieren opfaden (3. Mo. 9:1-5). Woo wees Jehova, daut hee aun de Priestasch eenen Jefaulen haud, waut se jroz aunjestalt hauden? Aus Aaron un Moses daut Volkj säajenden, leet hee Fia vom Himmel komen, waut de Opfa opp dän Aultoa gaunz vebrend (läs 3. Mose 9:23-24).

14. Fa waut wieren de Priestasch en Israel een Jlikjnis?

¹⁴ Waut muak Jehova derch daut Fia dietlich? Hee wees, daut hee eenen Jefaulen doaraun haud, daut Aaron un siene  Säns Priesta worden, un daut hee dee utjewält haud un unjastetten wudd. Aus de Israeliten daut sagen, wort an daut kloa, daut see dise Priestasch uk unjastetten sullen. Kjenn wie doa waut von lieren? Jo, wiels de Priestasch en Israel wieren bloos een Schauten, ooda Jlikjnis, fa Priestasch, waut noch wichtja wieren. Jesus es de jratra Huaga Priesta un woat toop met 144 000 aundre Priestasch un Kjennichs em Himmel deenen (Heb. 4:14; 8:3-5; 10:1).

15-16. Aun waut es daut to seenen, daut Jehova eenen Jefaulen haft aun dän truen, weisen Kjnajcht?

¹⁵ Aune 1919 stald Jesus eene kjliene Grupp von jesaulwde Breeda aun aus dän truen, weisen Kjnajcht. Dis Kjnajcht jeit em Prädichtwoakj veraun un jeft Christus siene Nofolja “to rajchte Tiet äten” (Mat. 24:45). Hab wie Bewies doafäa, daut Gott eenen Jefaulen haft aun dän truen, weisen Kjnajcht?

¹⁶ De Soton un siene Welt wullen dän truen Kjnajcht daut schwoa ooda mau rajcht ommäajlich moaken, daut dee siene Oabeit doonen kunn. Daut jeef biejlikj dän Ieeschten un dän Tweeden Weltkjrich un doa wia oppe gaunze Welt Trubbel met daut Jelt un Gott siene Deena worden foaken schlajcht behaundelt ooda vefolcht. Un doch kunn de trua, weisa Kjnajcht Christus siene Nofolja oppe Ieed emma jeisteljet Äten jäwen! Nu hab wie jeisteljet Äten opp mea aus 900 Sproaken un derwen doa nuscht fäa betolen. Daut es een kloara Bewies doafäa, daut Gott dän truen, weisen Kjnajcht unjastett! Daut Prädichtwoakj es noch een Bewies fa Jehova sienen Säajen. De goode  Norecht woat werkjlich “en de gaunze Welt jeprädicht” (Mat. 24:14). Aul dit bewiest gaunz kloa, daut Jehova vondoag dän Dach siene Organisazion leiden un sea säajnen deit.

17. Woo kjenn wie wiesen, daut wie de Organisazion unjastetten, wua Jehova met schauft?

¹⁷ Daut wudd goot sennen to äwalajen: “Sie ekj dankboa, daut ekj hia oppe Ieed to Jehova siene Organisazion jehieren kaun?” Krakjt soo aus Jehova en Moses un Aaron siene Tiet Fia vom Himmel schekjt, haft hee uk vondoag dän Dach gaunz kloa bewäsen, daut hee siene Organisazion unjastetten deit. Wie haben werkjlich väl, wua wie kjennen fäa dankboa sennen (1. Tess. 5:18-19). Woo kjenn wie de Organisazion unjastetten, wua Jehova met schauft? Wan wie dän biblischen Rot nokomen, waut wie derch onse Bieekja, Toopkomes un Kongressen kjrieen, un wan wie soo goot aus mäajlich biem prädjen un lieren metmoaken (1. Kor. 15:58).

18. To waut best du die gaunz eenich?

¹⁸ Well wie ons gaunz eenich sennen, daut notokomen, waut wie von daut Buak 3. Mose jelieet haben. Wie wellen, daut Jehova eenen Jefaulen aun daut haft, waut wie fa am doonen. Wie deenen am, wiels wie am dankboa sent. Un wie wellen am wieda ons bastet jäwen, wiels wie am von gaunzen Hoaten leewen. Un wie doonen aules, waut wie kjennen, toom dee Organisazion unjastetten, waut sienen Säajen haft. Derch aul daut kjenn wie Jehova wiesen, woo väl wie daut räakjnen, daut wie siene Zeijen sent un am deenen kjennen!