LONGO DIA 47
Malongo Tuajiya Guzula mu Mukanda wa Levi
‘Mbimbi jiagasue jidi mu mukanda wa Nzambi, jiasonegewe mu ngolo jia nyuma ya Nzambi, nu jidi nu ndando.’—2 TIM. 3:16.
LUNGIMBO 98 Biblia Yasonegewe mu Ngolo jia Nyuma ya Nzambi
NDAGA JIDI MU LONGO EDI *
1-2. Mangino, mukunda natshi Aklisto adi naye gukamba gujiya ndaga jidi mu mukanda wa Levi?
MUPOSTOLO Phaula wasonegele futa dienji Timote egi, ‘mbimbi jiagasue jidi mu mukanda wa Nzambi jiasonegewe mu ngolo jia nyuma ya Nzambi, nu jidi nu ndando.’ (2 Tim. 3:16) Mukanda wa Levi nji udi mukatshi dia mbimbi jiene. Itshi udi mutangiza mukunda nu mukanda owu wa Biblia? Athu ako ajiya guwumona gifua mukanda umoshi udi nu mikhuala ishigo nu ndando mangino. Uvi Aklisto a giamatshidia ana tangizago ngenyi.
2 Mukanda wa Levi wasonegewe ivo 3 500 yabalega gale. Uvi Yehowa wawubambele hagula ‘utulongese.’ (Lomo 15:4) Mukanda wa Levi wana tukuatesa ha gujiya matangi a Yehowa gu ndaga jiko. Hene, tudi naye gukamba gujiya malongo adi mu mukanda wene. Gudi nu malongo avula tuajiya guheta mu mukanda owu wasonegewe mu ngolo jia nyuma ya Nzambi. Tutadilenu malongo nguana.
ITSHI TUAJIYA GUKALAGALA HAGULA YEHOWA ATUTSHIGINE
3. Mukunda natshi akhalele muhana milambu mu Lusugu lua Gutotesela Gubola?
3 Longo dia thomo: Hagula Yehowa atshigine milambu yetu, tudi naye thomo gutshiginyiwa gudi muene. Givo giagasue, mu Lusugu lua Gutotesela Gubola, gifutshi gia Isalele giakhalele gudibungisa, akhalele muhana milambu ya shitu. Milambu yene yakhalele muwunguluisa enya Isalele egi akhalele nu funu ya guwevuewa gu gubola guawo! Uvi gutuama egi nganga-nzambi wakoma angine nu mahatshi a milambu ha Fundo Diabalega Gijila, wakhalele naye thomo gutshita ndaga imoshi. Ndaga yene yakhalele nu ndando yavula gubalega gutotesela gubola gua gifutshi.
(Tala paragrafe 4) *
4. Ha gutadila Levi 16:12, 13, itshi yakhalele mukalagala nganga-nzambi wakoma tangua akhalele mungina giphungu gia thomo ha Fundo Diabalega Gijila mu Lusugu lua Gutotesela Gubola? (Tala gifanesa holu dia gizula.)
4 Tanga Levi 16:12, 13. Tangiza gale ndaga jiakhalele mubalega mu Lusugu lua Gutotesela Gubola. Nganga-nzambi wakoma wakhalele mungina mu inzo ya tenta. Lusugu luene, yakhalele giphungu gia thomo mu iphungu thathu gakhelele naye gungina ha Fundo Diabalega Gijila. Ha mago enji, wakhalele nu longa diazala pha nu uhafu wa vumba diabonga, nu mbabula ya wolo yakhalele nu makala a tshiuya adi mulema. Wakhalele mumagana gutuama dia mulele wakhalele mukhaphumuna fundo dia gijila nu Fundo Diabalega Gijila. Wakhalele mungina nu ginemua giagasue ha Fundo Diabalega Gijila, hangima wakhalele mumagana gutuama dia mushete wa gikotelo. Mu guzuela gua gifuanesa, wakhalele mumagana gutuama dia Yehowa Nzambi! Gungima, nganga-nzambi wakhalele mumba uhafu wa gijila ha makala a tshiuya, hangima fundo diene diakhelele muzala nu vumba diawaha. * Gungima, wakhalele mungina luko ha Fundo Diabalega Gijila nu mahatshi a milambu ya shitu mukunda nu gubola. Jiya egi nganga-nzambi wakhalele muwotshia uhafu gutuama egi ahane mahatshi a milambu ya gubola.
5. Luholo akhalele mukalegela uhafu mu Lusugu lua Gutotesela Gubola ludi gutulongesa itshi?
5 Luholo akhalele mukalegela uhafu mu Lusugu lua Gutotesela Gubola ludi gutulongesa itshi? Biblia idi mumonesa egi, gutoga gua akombeledi a Yehowa gudi gifua uhafu. (Ngi. 141:2; Yat. 5:8) Jiya egi, nganga-nzambi wakoma wakhalele mubata uhafu gutuama dia Yehowa nu ginemua giagasue. Luholo lumoshi nji, tangua tudi mukombelela Yehowa, tudi naye gumutoga nu gunemesa guagasue. Tudi naye guhana Mufugi wetu mvudi yavula luholo atuhanele luendu lua gusuena hehi nu muene mu gisambu, gifua luholo mona ana suena hehi nu sh’enji. (Yak. 4:8) Yehowa wana tuzula gifua mafut’enji! (Ngi. 25:14) Tuana suanguluga muavula nu luendu luene. Hene, tuana tshiginago gukalagala ndaga ishigo musuanguluisa Yehowa.
6. Longo ditshi tuazula mu luholo nganga-nzambi wakoma akhalele muwotshia uhafu gutuama egi ahane milambu?
6 Jiya egi nganga-nzambi wakhalele naye thomo guwotshia uhafu gutuama egi ahane milambu. Ngenyi, yakhalele gumukuatesa ha gujiya egi Nzambi wakhalele musuanguluga nenji. Idi gutulongesa itshi? Gutuama egi Yesu ahane mulambu wa monyo wenji ha mavu, wakhalele naye gutshita ndaga imoshi ya ndando. Ndaga yene yakhalele nu ndando yavula gubalega guhuluishiwa gua athu agasue ha mavu. Ndaga itshi? Wakhalele naye gutumagela Yehowa monyo wenji wagasue ha mavu hagula Yehowa atshigine giwa mulambu wenji. Ngenyi, Yesu wakhalele naye gumonesa egi gukalagala gutshigina gua Yehowa gudi gima giawaha gubalega. Luko, wakhalele naye gumonesa egi ufumu wa Yehowa nu utuameji wenji udi watagana nu wabonga gubalega.
7. Mukunda natshi monyo wa Yesu ha mavu wasuanguluishile Sh’enji?
7 Yesu watumagele Yehowa uu nu gu gufua guenji. Wataganele nu gulolewa, nu malamba akola. Wajiyile egi udi mufua gufua gumoshi gua lamba diago. Uvi yalebeselego desizio dienji dia gumonesa egi utuameji wa Sh’enji udi wabalega gubonga. (Fili. 2:8) Tangua ataganele nu malamba, wakombelele Nzambi “nu gudila guakola nu masoji.” (Heb. 5:7) Gukombelela guenji nu mutshima wagasue guamonesele egi wakhalele wagujinginyina gudi Yehowa. Guamukuatesele nji ha gutumagela Yehowa muavula. Gu meso a Yehowa, gukombelela gua Yesu guakhalele gifua uhafu wa vumba diawaha. Gujinginyina guenji gudi Yehowa monyo wenji wagasue ha mavu, guamonesele egi gukalagala gutshigina gua Sh’enji guabalega ima yagasue. Guamonesele luko egi Ufumu wa Sh’enji udi wabonga nu watagana.
8. Luholo lutshi tuajiya gulandula gifezegeselo gia Yesu?
8 Tuajiya gulandula gifezegeselo gia Yesu gula tudi mutshita yagasue ha gutumagela Yehowa, nu ha gukhala agujinginyina gudi muene. Gula tuatagana nu gulolewa, tukombelele muavula Yehowa atukuatese handaga tuana tshigina gumusuanguluisa. Gula tuatshita ngenyi, mbatumonesa egi tuana tumagela ufumu wa Yehowa. Tuakotelesa egi Yehowa mbagatshiginago gukombelela guetu gula tudi mutshita ndaga jiana tuna muene. Uvi gula tudi mukalagala ndaga jiana zumba muene, tuajiya gusha mutshima egi gukombelela guetu mbagukhala gifua uhafu wa vumba diawaha gu meso enji. Luko, gujinginyina guetu nu khadilo dietu dia gutumaga mbadisuanguluisa Sh’etu wa mu dilu.—Ish. 27:11.
TUANA KOMBELELA YEHOWA HANDAGA TUANA TSHIGINA GUMUHANA MVUDI NU TUANA GUMUZUMBA
(Tala paragrafe 9) *
9. Mukunda natshi enya Isalele akhalele muhana milambu ya guhuima?
9 Longo dia mbadi: Tuana kombelela Yehowa handaga tuana tshigina gumuhana mvudi. Ha gukotelesa muabonga ndaga eyi, tutadilenu milambu ya guhuima yakhalele muhana enya Isalele. * Mukanda wa Levi udi gutumonesa egi, enya Isalele akhalele muhana milambu ya guhuima ha ‘guhana Nzambi mvudi.’ (Levi 7:11-13, 16-18) Akhalelego guaashinjiga gu ngolo ha guyihana. Akhalele guyihana gula atshigina. Guzumba guawo gudi Yehowa Nzambi guene guakhalele guaatuma ha guyihana. Muthu wakhalele muhana mulambu, nu enya fami yenji nu nganga-nzambi akhalele mudia mbiji ya shitu yahanewe mulambu. Uvi itshinyi iko ya shitu yakhalele muhanewa phamba gudi Yehowa. Itshinyi itshi?
(Tala paragrafe 10) *
10. Gudivua gutshi gudi mukatshi dia milambu ya guhuima adi muzuelela mu Levi 3:6, 12, 14-16 nu mudimo wa Yesu?
10 Longo dia thathu: Guzumba guetu gua Yehowa, guana tutuma ha gumuhana ima yetu ya ndando. Yehowa wakhalele muzula maji a shitu gifua gitshinyi gia ndando yavula. Wazuelele egi, itshinyi iko ya shitu gifua jiso, yakhalele nu ndando yavula gubalega. (Tanga Levi 3:6, 12, 14-16.) Hene, Yehowa wakhalele musuanguluga muavula gula enya Isalele amuhana itshinyi yene ya shitu nu maji. Gula muenya Isalele wahana Yehowa itshinyi eyi ya shitu, wakhalele mumonesa egi wamuhana gima gimoshi gia ndando yavula. Luholo lumoshi nji, Yesu wakhalele muhana Yehowa ima yenji ya ndando nu mutshima umoshi. Luholo lutshi? Wakhalele gumutshitshila mudimo nu monyo wenji wagasue handaga wakhalele gumuzumba. (Yone 14:31) Yesu wakhalele musuanguluga gukalagala gutshigina gua Yehowa. Wakhalele muzumba muavula mikhuala ya Nzambi. (Ngi. 40:8) Yehowa wasuangulugile mangololo ha gumona luholo Yesu akhalele gumukombelela nu mutshima wagasue!
Tuana hana Yehowa ima yetu ya ndando handaga tuana gumuzumba (Tala paragrafe 11-12) *
11. (a) Luholo lutshi mudimo wetu udi gifua milambu ya guhuima? (b) Luholo lutshi gujiya ngenyi guana gutuhana ngolo?
11 Mudimo tuana kalegela Yehowa udi gifua milambu ya guhuima, handaga wana tukuatesa ha gumumonesa luholo tuana gumutangijila. Tuana hana Yehowa ima yetu ya ndando handaga tuana gumuzumba nu mutshima wetu wagasue. Yehowa wana suanguluga tangua ana mona ba milio a akombeledi enji adi gumukombelela handaga ana gumuzumba muavula, nu ana zumba mikhuala yenji! Yehowa ganago gumona phamba ndaga tuana kalagala, uvi wana mona nji matangi ana tutuma ha gutshita ndaga jiene. Gujiya ngenyi guana tuhana ngolo. Hene, gula udi muthu wa gukola, ushigo luko nu ngolo jia gutshita muavula mudimo wa Yehowa, jiya egi Yehowa udi mujiya mulonga waye kiawaha. Matangua ako, wajiya gudivua gifua wanago gukalegela Yehowa muavula. Uvi jiya egi, Yehowa wana mona guzumba guakola guana gututuma ha gutshita ndaga wajiya gukalagala. Wana suanguluga nu ima ya ndando wana gumuhana.
12. Luholo Yehowa adivuile mukunda nu milambu ya guhuima ludi gutumonesa itshi?
12 Milambu ya guhuima idi gutulongesa itshi? Tangua itshinyi ya ndando ya shitu yakhalele muwetshiewa ha tshiuya, mishi yakhalele mukanduga mu dilu. Yakhalele musuanguluisa Yehowa muavula. Jiya egi, Yehowa wana suanguluga nji nu mudimo wana gumukalegela nu mutshima waye wagasue. (Kol. 3:23) Yehowa wana mona mudimo waye, nga mudimo wene udi wavula nga wazonda. Yehowa wana zula mudimo waye nu ndando, muene mbagawubuitshigo mutshima.—Mat. 6:20; Heb. 6:10.
YEHOWA UDI MUKUATESA ULONDEGI WENJI
13. Ha gutadila Levi 9:23, 24, luholo lutshi Yehowa amonesele egi wagitshinyile lume nganga-nzambi jinyi jiatombewe?
13 Longo dia nguana: Yehowa wana kuatesa gitshinyi gia ha mavu gia ulondegi wenji. Tangiza luko ndaga yakalegewe mu 1512 gutuama dia tangua dietu, tangua inzo ya tenta yahagewe gu mbongo ya Mulundu wa Sinayi. (Guz. 40:17) Moize watuamezele gudibungisa gua lusugu luene. Watombele Alona nu an’enji ha gukhala nganga-nzambi. Enya Isalele adibungishile ha gumona luholo nganga-nzambi jiakhalele muhana milambu yawo ya thomo ya shitu. (Levi 9:1-5) Luholo lutshi Yehowa amonesele egi wagitshinyile lume nganga-nzambi jinyi jiatombewe? Hakhalele Alona nu Moize mukombelela mukunda nu athu, Yehowa watumine tshiuya tua mu dilu, tuawetshiele milambu yagasue yakhalele ha giwotshielo.—Tanga Levi 9:23, 24.
14. (a) Yehowa watshiginyile mudimo wa nganga-nzambi wa Alona nu an’enji. (b) Mukunda natshi idi nu ndando gudi esue mangino?
14 Tshiuya tuakatugile mu dilu tuamonesele itshi? Tuamonesele egi, Yehowa watshiginyile Alona nu an’enji atombewe ha gukhala nganga-nzambi. Enya Isalele amonele diago haphelo egi Alona nu an’enji atombewe lume gudi Yehowa. Luko, akotelesele egi ene nji adi naye gukuatesa nganga-nzambi jinyi jiatombewe. Ndaga eyi idi nu ndando gudi esue ba? Ayi! Mudimo wa nganga-nzambi jia mu Isalele ikulu wakhalele givule-vule gia mudimo wakoma wa nganga-nzambi jiakhalele naye guza. Klisto, Nganga-nzambi Wakoma, udi nu nganga-nzambi jiko 144 000 mbajihinyina nenji hamoshi mu dilu.—Heb. 4:14; 8:3-5; 10:1.
Yehowa udi mutuameza nu gukuatesa ulondegi wenji. Tudi naye gutumagela ulondegi wenji (Tala paragrafe 15-17) *
15-16. Luholo lutshi Yehowa ana monesa egi wana tshigina ‘muhiga wafubidila nu watema’?
15 Mu 1919, Yesu watombele hunji diazonda dia Aklisto ambiwe maji mu nyuma ha gukhala ‘muhiga wafubidila nu watema.’ Muhiga muene wana tuameza mudimo wa gulongesa, nu wana hana alandudi a Klisto “ima yawo ya gudia ha kumbi diatagana.” (Mat. 24:45) Uvi, itshi idi gutumonesa egi Nzambi wana kuatesa muhiga wafubidila nu watema?
16 Satana nu athu enji ana luisa mudimo wa muhiga wafubidila. Gula nga Yehowa ganago kuatesa muhiga owu, nga yakhala lamba hagula atagenese inemo yenji. Ita mbadi yakoma yakalegewe ha mavu agasue. Athu ana tagana nu lamba dia falanga ha mavu a mudidi. Luko, Akombeledi a Nzambi ana sagesewa nu ana monesewa lamba. Ikhale ngenyi, muhiga wafubidila wana landula guhana alandudi a Klisto ima ya gudia ya mu nyuma. Tangiza gale ima yavula ya mu nyuma tudi nayo mangino mu mazuelelo gubalega 900! Idi mumonesa haphelo egi Yehowa udi mukuatesa lume muhiga. Itshi idi mumonesa luko egi Yehowa wana kuatesa ulondegi wenji? Mudimo wa gulongesa. Lukuma luabonga ludi mulongesewa ‘ha mavu agasue.’ (Mat. 24:14) Tudi mumona diago egi, Yehowa udi mutuameza nu gukuatesa ulondegi wenji mangino.
17. Luholo lutshi tuajiya gumonesa egi tudi mukuatesa ulondegi wa Yehowa?
17 Tudi naye gudihula egi, ‘Ngana suanguluga luholo ngudi mu ulondegi wa Yehowa ba?’ Mu tangua dia Moize, Yehowa watumine tshiuya tua mu dilu ha gumonesa egi watshiginyile athu anyi atombewe. Mangino nji, Yehowa wana tumonesa haphelo egi muene udi mutuameza ulondegi wenji. Tudi naye gumuhana mvudi yavula. (1 Tes. 5:18, 19) Luholo lutshi tuajiya gumonesa egi tudi mukuatesa ulondegi wa Yehowa? Tuajiya guyimonesa gula tudi mutumagela ndaga tudi mulonguga mu Biblia, mu mikanda yetu nu mu video, mu gudibungisa gua mu hungu, nu mu ba asamble etu. Luko, gula tudi mudihana muavula mu mudimo wa gulongesa.—1 Kol. 15:58.
18. Desizio ditshi wazula?
18 Tuzule desizio dia gutumagela malongo tuazula mu mukanda wa Levi. Hagula Yehowa atshigine milambu yetu, tudi naye thomo gutshiginyiwa gudi muene. Tuana kombelela Yehowa handaga tuana tshigina gumuhana mersi. Tulandulenu guhana Yehowa ima yetu ya ndando handaga tuana gumuzumba nu mutshima wetu wagasue. Tutshitenu yagasue ha gutumagela ulondegi wa Yehowa. Gula tuatshita ndaga eji, mbatumonesa egi tuana suanguluga nu luendu lua gukombelela Yehowa nu lua gukhala Matemue enji!
LUNGIMBO 96 Mukanda wa Nzambi Udi Umonyi
^ par. 5 Mukanda wa Levi udi nu mikhuala Yehowa ahanele Isalele ikulu. Esue Aklisto tushigo naye gulandula mikhuala yene. Uvi yajiya gutukuatesa mangino. Hene, mu longo edi, tuza mumona malongo tuajiya guzula mu mukanda wa Levi.
^ par. 4 Uhafu wakhalele muwetshiewa mu inzo ya tenta wakhalele muzudiwa gifua wa gijila. Mu Isalele ikulu, akhalele muwotshia uhafu phamba ha gukombelela Yehowa. (Guz. 30:34-38) Uvi, gushigo nga ndaga imoshi idi mumonesa egi Aklisto a mu siekle ya thomo akhalele muwetshia uhafu mu gikombelelo giawo.
^ par. 9 Ha gujiya ndaga jiavula jiatadila milambu ya guhuima, tala mukanda Étude perspicace des écritures, volume 2 diyiji 847.
^ par. 54 UKOTELESHI WA IFUANESA: Mu Lusugu lua Gutotesela Gubola, nganga-nzambi wakoma wakhalele mungina ha Fundo dia Balega Gijila. Ha mago enji, wakhalele nu longa dia uhafu nu mbabula ya makala a tshiuya adi mulema. Fundo diene diazalele nu vumba diabonga. Gungima, wakhalele mungina luko ha Fundo Diabalega Gijila nu mahatshi a milambu ya shitu mukunda nu gubola.
^ par. 56 UKOTELESHI WA IFUANESA: Muenya Isalele mumoshi udi muhana nganga-nzambi gimeme gia mulambu wa guhuima, ha gumonesa egi fami yenji idi muhana Yehowa mersi.
^ par. 58 UKOTELESHI WA IFUANESA: Hakhalele Yesu ha mavu, wamonesele guzumba guakola gudi Yehowa luholo akhalele munemesa mikhuala ya Nzambi, nu luholo akhalele mukuatesa alandudi enji ha guyitumagela.
^ par. 60 UKOTELESHI WA IFUANESA: Phangi mumoshi wa mukhetu udi musonegela athu mikanda ha guaalongesa Biblia. Ngenyi, udi muhana Yehowa ima yenji ya ndando, ngatshima muene udi wagukula.
^ par. 62 UKOTELESHI WA IFUANESA: Mu Février 2019, phangi Gerrit Lösch, wa mu Hunji dia Akulu Atuameji, udi mumonesa guzoga gua Biblia Traduction du monde nouveau mu zuelelo dia allemand. Mangino, alongeshi a gu Allemagne, gifua aphangi awa muyadi a akhetu, adi musuanguluga gukalegela Biblia yene mu mudimo wa gulongesa.
