1, 2. ¿Imaraykun cristianokuna Levítico libromanta astawan yachananchis?

APÓSTOL Pablon amigon Timoteota niran: “Diospa simin qelqapi qelqasqa kaqqa llapanmi Diospa yuyaychasqan, chaymi chaykunaqa allinpuni yachachinapaq”, nispa (2 Tim. 3:16). Levítico libropas Diospa yuyaychasqanmi, chaymi yanapawasunman. Wakin runakunan ninku: “Levítico libropiqa kamachikuykunallan kashan manan servinñachu kay tiempopaqqa”, nispa. Cristianokunan ichaqa mana chhaynatachu qhawarinchis.

² Levítico libroqa yaqa 3.500 watakuna ñaupaqtan qelqakuran, chaywanpas Jehová Diosmi waqaychachiran ‘yachachiwananchispaq’ (Rom. 15:4). Chay libroqa yanapawanchismi Diospa imayna piensasqanta yachananchispaq, chaymi kallpachakunanchis estudiananchispaq, chayta ruwaspaqa imaymanatan yachasun, kaypi tawa yachachikuykunamanta yachasun.

3. ¿Imaraykun Jucha pampachay p’unchaypi animalkunata sacrificiopi jaywaranku?

³ Juj kaq yachachikuy: Jehová Diospa sonqonpaq jinan imatapas ruwananchis. Sapa watanmi israelitakuna Jucha pampachay p’unchay chayamuqtin juñukuqku animalkunatataq apaqku; uma sacerdotetaq chay animalkunata Jehová Diosman jaywaq, chayqa israelitakunaq juchan perdonasqa kananpaqmi karan. Ichaqa manaraq uma sacerdote ch’uyay-ch’uya cheqaspi chay sacrificiokunaq yawarninta  jaywashaqtinmi, juj importante ruwayta ñaupaqta ruwanan karan.

4. Levítico 16:12, 13 textopi nisqan jina, ¿imatan uma sacerdote ñaupaqta ruwaran Jucha pampachay p’unchaypi? (Tapanpi kaq dibujota qhaway).

⁴ (Leey Levítico 16:12, 13). Jucha pampachana p’unchaypin uma sacerdote yupaychana karpaman jaykuran. Chay p’unchaypiqa kinsa kutitan jaykuq. Ñaupaq kaq kutipin jujnin makinpi sumaq q’apaq inciensota apaq, jujnin makinpitaq inciensota q’apachinanpaq sansata apaq. Chaymantataq ch’uyay-ch’uya cheqasta tapaq cortinaq ñaupanpi sayaykuq. Jinaspa ch’uyay-ch’uya cheqasman jaykuspa rimanakuy arcaq ñaupanpi sayaykuq. Chayqa Jehová Diospa ñaupaqenpipas sayaykunman jinan karan. Jinaspa sumaqllata sansa pataman inciensota jich’aykuq, jinan sumaq q’apaq q’osñi cuarto ukhupi junt’aykuq. * Chay qhepamantaq jucha pampachay ofrendawan ch’uyay-ch’uya cheqasman jaykuran. Qhawarisqanchis jina uma sacerdoteqa inciensotan ñaupaqta q’apachiran chaymantañan jucha pampachay sacrificiota jaywaran.

5. ¿Imatan yachanchis Jucha pampachay p’unchaypi inciensota q’osñichiymanta?

⁵ ¿Imatan yachanchis Jucha pampachay p’unchaypi incienso q’osñichiymanta? Bibliapin willan Diospa serviqninkunaq mañakusqanku sumaq q’apaq incienso jina kasqanta (Sal. 141:2; Apo. 5:8). Yachasqanchis jina, uma sacerdoteqa ancha respetowanmi Jehová Diospa ñaupaqenpi inciensota q’osñichiran. Chay jinallataqmi noqanchispas Jehová Diosmanta mañakuspaqa ancha respetowan ruwananchis. ¡Imayna juj wawa mana manchakuspa taytanman chimpaykun, chay jinatan noqanchispas Jehová Diosman chimpaykunanchis! (Sant. 4:8.) Payqa amigonta jinan qhawariwanchis, chaymi manapuni sonqonta nanachiyta munanchischu (Sal. 25:14).

6. Uma sacerdoteqa ñaupaqtan inciensota q’osñichiran, ¿imaynatan Jesús chay jinata ruwaran?

⁶ Yachasqanchis jina uma sacerdoteqa sacrificio ofrendata jaywananpaqqa inciensotan ñaupaqta q’osñichinan karan. Chayta ruwaqtinmi sacerdoteqa Jehová Diospa allin qhawarisqa karan. Chay jinallataqmi Jesuspas manaraq vidanta noqanchisrayku sacrificiopi taytanman jaywashaspa tukuypi Jehová Diosta kasukunan karan, chayraqmi taytanqa Jesuspa sacrificakusqanta chaskinan karan. Diospa kamachisqanman jina kausaspan Jesusqa rikuchiran chay ruway ancha importante kasqanta. Rikuchillarantaq Diospa kamachisqan chaninpuni kasqantapas.

7. ¿Imaraykun Jesús Diospa sonqonta kusichiran?

⁷ Jesusqa Diospa tukuy kamachikuyninkunatan kasukuran. Imaymana sasachakuypiña millaytaña wañuchinanku karan chaypas, manapunin Jehová Diosta qhepancharanchu, aswanmi rikuchiran Jehová Dioslla allin kamachikuq kasqanta (Filip. 2:8). Jinaspapas sasachakuykunata aguantananpaqmi Diosmanta mañakuran “fuerteta wajakuspa, weqenta jich’aspa” ima (Heb. 5:7). Tukuy sonqomanta mañakusqanmi kallpacharan Taytanta kasukunanpaq. Chay mañakusqanmi Taytanpaq sumaq q’apaq incienso jina karan. Jesús tukuypi kasukuq kasqanmi Taytanpa  sonqonta kusichiran, rikuchirantaq Dioslla kamachinanpaq derechoyoq kasqanta.

8. ¿Imaynatan Jesuspa ruwasqanta jina ruwasunman?

⁸ Noqanchispas Jesús jinan tukuy atisqanchista ruwananchis Jehová Diospaq junt’aq kasukuq kananchispaq. Sasachakuypi tarikuspataq Diosta tukuy sonqomanta wajakunanchis yanapawananchispaq, chhaynapin sonqonta kusichisun. Chayta ruwaspan rikuchisun Diospa kamachisqanta apoyasqanchista. Diospa sonqonpaq jina kausasun chayqa mañakusqanchisqa sumaq q’apaq incienso jinan kanqa. Ichaqa sichus cheqnikusqanta ruwasun chayqa, manan uyariwasunchu mañakusqanchista. Arí, Diospa sonqonta kusichinapaqqa kasukuq junt’aq iman kananchis (Prov. 27:11).

9. ¿Imaraykun israelitakuna sumaq kausay ofrendata jaywaranku?

⁹ Iskay kaq yachachikuy: Agradecekuq kasqanchisraykun Jehová Diosta servinchis. Levítico libropi willasqan jina, israelitakunaqa sumaq kausay ofrendatan * jaywaranku ‘Señor Diosta agradecekusqankumanta’ (Lev. 7:11-13, 16-18). Chay ofrendataqa paykunallamantan jaywaranku, manan obligasqachu karanku. Chaytaqa jaywaranku Jehová Diosta munakusqankuraykun. Chay sacrificiota jaywaqqa familianwan sacerdotewan iman mijuranku sacrificiopi  jaywasqa animalpa aychanta. Jehová Diosmanmi ichaqa chay animalpa allin partenkunata qonanku karan. ¿Mayqenkunan karan?

10. ¿Imaynapin Jesuspa ruwasqanwan tupan Levítico 3:6, 12, 14-16 textopi willasqan sumaq kausay ofrendawan?

¹⁰ Kinsa kaq yachachikuy: Jehová Diosta munakusqanchisrayku allin kaqta payman qonchis. Jehová Diosqa animalkunaq wiranta, iskaynin rurunta higadonta iman ancha allinpaq qhawariran (leey Levítico 3:6, 12, 14-16). Jehová Diosqa anchatan kusikuran mayqen israelitapas sonqomanta animalpa wiranta, iskaynin rurunta higadonta ima jaywaqtin. Chayta ruwaq israelitaqa Jehová Diosmanmi allin kaqta qosharan. Chay jinallataqmi Jesuspas tukuy atisqanta ruwaran Jehová Diosta servinanpaq (Juan 14:31). Jesusqa anchatan Diospa kamachikuyninkunata munakuran chaymi kusisqa sonqowan Diospa munayninta ruwaran (Sal. 40:8). ¡Maytachá Jehová Diosqa kusikuran wawan tukuy sonqowan servisqanmanta!

11. a) ¿Imaynapin tupan Dios servisqanchis sumaq kausay ofrenda jaywaywan? b) ¿Imaraykun chay yachay kusichiwanchis?

¹¹ Jehová Diostaqa tukuy sonqomantan servinchis payta munakusqanchisrayku, chaymi chay ruwayqa tupan sumaq kausay ofrenda jaywaywan. Jehová Diosqa maytachá kusikun millonninpi runakuna tukuy sonqomanta payta servisqankuta rikumuspa. Jinaspapas ancha allinpaqmi qhawarin paypaq llank’asqanchista imarayku ruwasqanchistapas. Chayta yachaspan anchata kusikunchis. Sichus yuyaqña kashanki manataq ñaupaqpi jinañachu ruwayta atishanki chayqa, ama llakikuychu Diosmi yachan imaynapi tarikusqaykita. Yachantaqmi atisqaykiman jina payta servinaykipaq kallpachakusqaykita. Payqa anchatan kusikun allin kaqta qosqanchismanta.

12. ¿Imaynatan Jehová Dios qhawariran sumaq kausay ofrenda jaywasqankuta? ¿Imaraykun chay yachasqanchis kallpachawanchis?

¹² ¿Imatan yachanchis sumaq kausay ofrenda jaywasqankumanta? Jehová Diosqa anchatan kusikuran animalpa allin partenkuna ruphachisqanku q’osñiwan. Chay jinallataqmi Jehová Diosqa anchata kusikun tukuy sonqowan payta serviqtinchis (Col. 3:23). Jehová Diospaq askhataña pisitaña ruwaranchis chaypas, payqa ancha allinpaqmi qhawarin ruwasqanchista, manataqmi jayk’aqpas qonqanqachu (Mat. 6:20; Heb. 6:10).

13. Levítico 9:23, 24 textopi nisqanman jina, ¿imaynatan Jehová Dios rikuchiran nombrasqa sacerdotekunata allinpaq qhawarisqanta?

¹³ Tawa kaq yachachikuy: Jehová Diosqa llaqtantan allinta cuidan. 1512 watapi imachus pasasqanmanta yachasun, chay watapin Sinaí orqoq qayllanpi Diosta yupaychanapaq karpa sayarichisqa karan (Éx. 40:17). Moisesmi Israel llaqtata juñuran, chaypin Aaronta wawankunatawan sacerdote kanankupaq nombraran. Chay kutipin israelitakuna rikuranku sacerdotekunata Jehová Diosman sacrificiopi animalkuna jaywasqankuta (Lev. 9:1-5). ¿Imaynatan Jehová Dios rikuchiran chay sacerdotekunata allinpaq qhawarisqanta? Aaronwan Moiseswan Israel llaqtata bendecisqanku qhepamanmi Jehová Diosqa janaq pachamanta ninata kachaykamuran, chay  ninataq altar patapi jaywasqanku ofrendata llapallanta ruphaykuran (leey Levítico 9:23, 24).

14. Diosqa allinpaqmi qhawariran Aaronta churinkunatawan sacerdote kanankupaq nombrasqankuta, ¿imaraykun chaymanta yachay importante?

¹⁴ Jehová Diosqa ninata kachaykamuspanmi rikuchisharan Aaronta churinkunatawan sacerdote kanankupaq ajllasqankuta allinpaq qhawarisqanta. Chayta rikuspan israelitakunapas sacerdotekunata apoyananku karan. Chay sacerdotekunaqa jamuq tiempopi aswan sumaq sacerdotekuna kananmantan rikuchisharanku. Jesusmi chaypiqa uma sacerdote, paywan kuskataq 144.000 ajllasqa cristianokuna sacerdotekuna reykuna ima kanqaku (Heb. 4:14; 8:3-5; 10:1).

15, 16. ¿Imakunan rikuchin Jehová Dios ‘allin yuyayniyoq junt’aq kamachita’ apoyasqanta?

¹⁵ Jesusmi 1919 watapi janaq pachaman riq cristianokunamanta ajllaran ‘allin yuyayniyoq junt’aq kamachita’. Paykunan Diosmanta willaypi umallishanku, jinallataq Jesuspa discipulonkunaman ‘tiempollanpi mijunata qoshanku’ (Mat. 24:45). ¿Reparanchischu paykuna Diospa allin qhawarisqa kasqankuta?

¹⁶ Satanaspas runankunapas iskay jatun guerrakunawan, pachantinpi sasachakuykunawan, qatiykachaykunawan ima allin yuyayniyoq junt’aq kamachiq llank’ayninta tatichiyta munaranku. Chaywanpas allin yuyayniyoq junt’aq kamachiqa tiempollanpin Jesuspa discipulonkunata yachachishan qelqakunawan juñunakuykunawan ima.  Chaymi kunanqa 900 más rimaykunapi qelqakunata ruwakushan gratislla rakikunanpaq. Chaykunapin sut’ita rikukun allin yuyayniyoq junt’aq kamachita Jehová Dios apoyasqanta. Jinaspapas ‘allin willakuykunatan pachantinpi willashanku’ (Mat. 24:14). Arí, chaykunawanmi sut’ita rikunchis Jehová Dios kay tiempopi llaqtanta pusarishasqanta yanapashasqantapas.

17. ¿Imaynatan rikuchisunman Diospa llaqtanta apoyasqanchista?

¹⁷ Maytan Jehová Diosta agradecekunanchis llaqtanpi kasqanchismanta. Moisespa tiemponpin Jehová Diosqa janaq pachamanta ninata kachaykamusqanwan rikuchisharan ajllasqanku sacerdotekunata allinpaq qhawarisqanta, chay jinallataqmi kay tiempopipas sut’ita rikuchiwashanchis llaqtanta allin yuyayniyoq junt’aq kamachinwan pusarishasqanta. Chaymantan Jehová Diosta tukuy sonqomanta agradecekunanchis (1 Tes. 5:18). ¿Imaynatan rikuchisunman Diospa llaqtanta apoyasqanchista? Qelqakunapi, juñunakuykunapi, asambleakunapipas Bibliamanta yachasqanchista kasukuspa, allin willakuykunata runakunaman willaspa yachachispa ima (1 Cor. 15:58).

18. ¿Imakunata ruwananchispaqmi kallpachakunanchis?

¹⁸ Kallpachakusun Levítico libropi yachachikuykunaman jina kausananchispaq. Jehová Dios serviyninchista allinpaq qhawarinanpaqqa sonqonpaq jinan imatapas ruwananchis. Chaymantapas Jehová Diostan ñaupaqta servinanchis sonqomanta payta agradecekusqanchisrayku. Tukuy sonqomantataq llaqtanta apoyananchis. Chaykunata ruwaspan rikuchisun payta munakusqanchista, Testigon kasqanchiswanpas kusikusqanchista.