1, 2. ¿Imamandata Levítico libromanda yachajunaca minishtirishca can?

APÓSTOL Pabloca Timoteotaca cashnami nirca: “Dios escribichishca tucui Shimicunaca [...] yachachingapajmi ali” can nishpa (2 Tim. 3:16). Levítico libroca ‘Dios escribichishca Shimipashmi’ can. Huaquin gentecunaca Levítico libroca imapipash na ayudanllu, punda tiempomanda leycunata charimandami yanga librolla can nin. Shinapash Jesusta ali catijcunaca na shina yuyapanchichu.

² Jehová Diosca, Levítico librotaca 3 mil 500 yali huatacuna huashamanmi escribichirca. Shinapash chai libropi ‘escribishca shimicunaca ñucanchita yachachingapami’ escribishca tiajun (Rom. 15:4). Chai libropi escribishca yuyaicunaca Jehová Dios imashina pensajtami ricuchijun. Chaimandami chai yuyaicunamanda yachajunaca minishtirishcapacha can. Levítico libromanda ima chuscu yuyaicunata yachajui ushashcata ricupashunchi.

3. ¿Imamandata Día de Expiación o Juchata Anchuchina Punllapica sacrificiocunata rurana carca?

³ Punda yuyai: ñucanchi ruraicunata shuj sacrificiotashna chasquichunga, Jehovapa ñaupajpica alimi cana capanchi. Día de Expiación o Juchata Anchuchina Punllapica tucui israelitacunami tandanajun carca. Chai punllami sumo sacerdoteca animalcunata huañuchishpa sacrificiocunata cun carca. Día de Expiación punllapi sacrificiocunata ruranami israelitacunataca juchacunamanda perdonachun minishtishcata yarichun ayudan carca. Shinapash israelitacunapa juchacunata perdonachun Santísimo ucuman yaicushpa nara sacrificiocunapa yahuarta cushpallataca ¿imatata sumo sacerdoteca rurana carca?

4. Santísimo ucuman primera vez sumo sacerdote yaicushpaca ¿imatata Levítico 16:12, 13​pi nishca shinaca ruran carca? (Callari paginapi dibujota ricupangui).

⁴ (Levítico 16:12, 13, liingui). Caipi yuyapashun. Tabernáculo ucumanmi sumo sacerdoteca yaicujun. Paica nina rupajuj carbondami  shuj palagupi charijun. Cutin chaishuj maquipica inciensotami charijun. Santísimo ucuman yaicungapaj jarcajuj cortina ñaupajpimi shayarin. Chai punllaca primera vezmi Santísimo ucumanga yaicun. Jipaca Arca del Pacto nishca ñaupajpimi shayarin. Chaipi shayarinaca Jehová Diospa ñaupajpi shayajuj cuendami can. Chaimi nina rupajuj carbonbica inciensota churan. Chaimi chai ucu junda mishquillaguta ashnai callarin. * Jipaca juchacunata perdonachunmi sacrificiopa cushca animalcunapa yahuarhuan cutin Santísimo ucumanga yaicuna can. Sumo sacerdoteca juchacunata perdonachun yahuarta nara tsirapachishpallatami inciensotara rupachin.

5. Día de Expiacionbi inciensota cushnichishcamandaca ¿imatata yachajupanchi?

⁵ Día de Expiacionbi inciensota cushnichishcamandaca ¿imatata yachajupanchi? Bibliapica, Jehovapa ali sirvijcunapa mañaicunataca mishquillagu ashnajuj inciensohuanmi chimbapuran (Sal. 141:2; Apoc. 5:8). Jehovapa ñaupajpi shayajunshnami sumo sacerdoteca inciensota cushnichin carca. Shina cuendami ñucanchicunapash Jehovapa ñaupajpi shayajunshna Jehovata mañana capanchi. Imashinami shuj taitaca paipa huahua paiman quimirichun saquin, shina cuendami Tucuita Ruraj Jehová Diosta mañashpa quimirita ushapanchi. Shina quimirimandami cushilla sintiripanchi (Sant. 4:8). Jehová Diosca paipa amigocuna cachunbashmi saquin (Sal. 25:14). Jehovapa amigocuna caimandami Jehová Diosta llaquichingapaca nimamanda na munapanchi.

6. Jesuspaca ¿imata ashtahuan alipacha carca?

⁶ Sumo sacerdoteca sacrificiocunata nara cushpallatami inciensotara cushnichin carca. Chaita rurashpami Jehovapa ñaupajpi ali ricuringapaj munashcata ricuchin carca. Caimandaca ¿imatata yachajupanchi? Jesús cai Alpaman shamushpaca paipa causaita cushpami tucui gentecunata salvana carca. Shinapash Jesuspaca, Jehová Diosta huañungacaman tucui shunguhuan cazunami ashtahuan alipacha carca. Jehovata tucuipi cazujpimi Jehová Diosca Jesuspa causaitaca shuj sacrificiotashna chasquina carca. Jesusca paipa causaihuanmi Jehová Diosta tucuipi cazuna cashcata ricuchirca. Shinallata Jehovalla mandana derechota charishcata, pailla ali mandai ushashcatapashmi ricuchirca.

7. Jesús cai Alpapi cashpaca ¿imatata ricuchirca?

⁷ Jesús cai Alpapi cashpaca Jehovapa tucui mandashcacunatami cazurca. Jesusca ima llaquita, ima tentacionda charishpa, llaquinayaita huañuna cashcata yachashpapash siempremi Jehovalla mandana derechota charishcata ricuchirca (Filip. 2:8, NM). Ashtaca llaquicunata charishpaca Jesusca ‘caparishpa, huacashpami Jehová Diostaca mañarca’ (Heb. 5:7). Jesuspa tucui shunguhuan mañaicunaca Jehovatalla sirvingapaj, tucuipi cazungapaj munashcatami ricuchijurca. Jehovapa ñaupajpica Jesuspa mañaicunaca inciensota rupachijuj cuendami ricurirca. Jesusca paipa tucui causaipimi Jehovatalla cushichingapaj munashcata, Jehovalla mandana derechota charishcatapash ricuchirca.

8. ¿Imashinata Jesuspa ejemplota catijushcata ricuchipanchi?

⁸ Jehová Diospa mandashcacunata cazushpa, paitalla sirvishpami Jesuspa ejemplota catijushcataca ricuchipanchi. Llaquicunahuan cashpaca, Jehová Diostami ayudahuai nishpa mañapanchi. Jehová Diosca paita mañachunmi munan. Jehovata mañashpami Jehovalla mandana derechota apoyajushcatapash ricuchipanchi. Ñucanchicuna Jehová Dios na alicachishca cosascunata rurajpi, Jehová Dios ñucanchi mañaicunata na uyana cashcataca alimi yachapanchi. Cutin Jehová munashcashna imatapash  rurajpica, ñucanchi mañaicunaca Jehovapa ñaupajpica inciensota cushnichinshnami canga. Tucui shunguhuan paitalla cazujpi, paitalla sirvijpica Jehová Diosca ninandami cushijunga (Prov. 27:11).

9. ¿Imamandata ofrendacunata o sacrificiocunataca ruran carca?

⁹ Ishcai yuyai: Jehová Diostaca tucui shunguhuan agradicimandami sirvipanchi. Cunanga Jehová Diosta adorangapaj israelitacuna cushca ofrendas de paz o de comunión nishca sacrificiocunamanda yachajupashun. * Levítico libropica israelitacuna Jehová Diosta agradicingapaj munashpa imata ruraj cashcatami parlajun. Israelitacunaca Jehovata ‘pagui ningapami’ ofrendacunata o sacrificiocunata ruran carca (Lev. 7:11-13, 16-18). Cai ofrenda o sacrificiocunataca paicunapa munaimi Jehovamanga caran carca. Jehovata juyaimandami caran carca. Cai sacrificiocunata rurashca jipaca, sacrificiopa utilizashca animalpa aichataca sacrificiota ruraj runa, paipa familia, sacerdotecunapashmi cai aichataca micun carca. Shinapash animal enterotaca na micunllu carca. Huaquin partecunaca Jehová Diospalla shicanyachishcami carca. ¿Maijan partecunata Jehovapalla shicanyachishca carca?

10. Levítico 3:6, 12, 14-16​pi nishca shinaca ¿imamandata Jesusca Jehovapa munaita ruran carca?

¹⁰ Quimsa yuyai: Jehovata juyaimandami tucui alita cungapaj munapanchi. Animalpa viraca Jehovapalla shicanyachishcami carca. Shinallata riñonda, yana shungutapashmi Jehová Diosman cuchun israelitacunataca mandarca  (Levítico 3:6, 12, 14-16, liingui). Shuj israelita animalpa virata, riñonda, yana shungutapash paipa munai tucui shunguhuan carajpica Jehová Diosca ninandami cushijun carca. Shina cuendami Jesusca Jehovata juyaimandaca tucui shunguhuan Jehovatalla sirvishpa causarca (Juan 14:31). Jehovapa mandashcacunata cazunata, paipa munaita ruranataca Jesusca ninandami alicachin carca (Sal. 40:8). Paipa Churi tucui shunguhuan paita sirvijujta ricushpaca, Jehová Diosca ninandami cushijushcanga.

11. a) ¿Imashpata israelitacuna cushca sacrificiocunaca ñucanchicuna Jehovata sirvinahuanga igual can? b) Caita yachanaca ¿imapita ayudan?

¹¹ Israelitacunaca Jehovata juyaimandami cai sacrificiocunataca paicunapa munai caran carca. Ñucanchicuna Jehovata sirvingapaj imatapash rurashpaca cai sacrificiocunata cujushca shinami ricuripanchi. Jehová Diostaca juyaimandami sirvipanchi. Jehová Diosca ashtaca millón gentecuna paita juyaimanda, paipa mandashcacunata cazungapaj esforzarinajujta ricushpaca ninandami cushijun. Jehová Diosca ñucanchicuna imata rurajta, imamandata chaita rurajtapash ricujunmi. Por ejemplo, ña mayoriashcamandami pundashnaca ñana Jehová Diosta sirvi ushapanchi. Shinapash imata na rurai ushashcataca Jehová Diosca na ricujunllu. Jehovata juyaimanda tucui usharishcaguta rurangapaj esforzarijtami Jehová Diosca ricujun. Paica ñucanchicuna imata rurai ushashcata rurashpa catingapaj esforzarijtami alicachishpa ricujun.

12. a) Israelitacuna sacrificiocunata rurajpica ¿imashinata Jehová Diosca sintirin carca? b) ¿Imatata na cungana capanchi?

¹² Israelitacuna cushca sacrificiocunamandaca ¿imatata yachajupanchi? Sacrificiopi cushca animalta rupachishpa cushnichijpica Jehová Diosca ninandami cushijun carca. Shinallatami ñucanchicuna Jehovata tucui shunguhuan, ñucanchi munai paita sirvingapaj esforzarijpica ninanda cushijun. Chaitaca na cunganachu capanchi (Col. 3:23, NM). Jehová Diosca ñucanchicuna paita sirvingapaj esforzarijujtaca alicachishpami ricun. Usharishcaguta tucui shunguhuan rurajta ricushpaca cushijunmi, chai rurashcataca nunca na cunganllu (Mat. 6:20; Heb. 6:10).

13. Levítico 9:23, 24​pi nishca shinaca ¿imashinata Jehová Diosca sacerdotecunata agllashcata ricuchirca?

¹³ Chuscu yuyai: Jehová Diosca cai Alpapi paipa organizaciondaca ayudajunmi. Jesús cai Alpaman nara chayamujpi huata1512​pi Sinaí urcupi jatun carpata shayachishca jipa ima pasashcata yachajupashunchi (Éx. 40:17). Moisesmi Aaronbash, paipa churicunapash sacerdotecunami can nishpa villarca. Cai sacerdotecuna primera vez shuj animalta Jehová Diosman cugrinajujta ricungapami israelitacunaca tandanajurca (Lev. 9:1-5). Jehová Diosca sacerdotecunata agllashcata ricuchingapaca ¿imatata rurarca? Aaronbash, Moisespash israelitacunata bendiciashca jipaca, Jehová Diosca jahua cielomandami ninata cachamushpa altar jahuapi churashca animalta rupachirca (Levítico 9:23, 24, liingui).

14. Aarón sacerdote cachun agllashcaca ¿imamandata ñucanchipaca minishtirishcapacha carca?

¹⁴ Shina rurashpami Jehová Diosca Aaronda siempre apoyagrijushcata ricuchirca. Jehová Dios sacerdotecunata apoyajushcata ricushpami israelitacunaca sacerdotecunata tucuipi apoyangapaj munarca. Cunanbi chaita yachanaca minishtirishcapachami can. Punda tiempopi israelitacunapa sacerdotecunaca, jipa punllacunapi shuj alipacha sacerdote tiana cashcatami ricuchinajurca. Chai alipacha Sumo Sacerdoteca Jesusmi can. Jesushuanmi, 144 mil sacerdotecuna, mandaj ungidocunaca cielopi canga (Heb. 4:14; 8:3-5; 10:1).

15, 16. ‘Aliguta cazushpa, aliguta yarishpa sirvij’ esclavotaca ¿imashinata Jehová Diosca apoyajushcata ricuchin?

 ¹⁵ Huata 1919​pimi Jesusca huaquin ungido huauquicunata agllarca. Paicunataca ‘aliguta cazushpa, aliguta yarishpa sirvij esclavo’ cachunmi agllarca. Cai esclavomi ali villaigucuna ñaupaman catichun, Jesusta ali catijcunaman espiritualmente ‘micuna horas chayajpi micunaguta carajun’ (Mat. 24:45). Aliguta cazushpa, aliguta yarishpa sirvij esclavotaca ¿ciertopachachu Jehová Dios apoyajujta ricupanchi?

¹⁶ Aliguta cazushpa, aliguta yarishpa sirvij esclavo rurajujtami Diabloca imapash jarcaicunata churangapaj munashca. Shinapash aliguta cazushpa, aliguta yarishpa sirvij esclavoca Jehová Diospa ayudahuanllami imagutapash rurashpa cati ushashca. Cunan tiempopica ishcai guerra mundialpashmi tiashca. Mundo enteropi gentecunapashmi culqui illaj quedashca, shinallata Jehová Diosta sirvijcunatapash yangamandami catiriashpa llaquichishca. Shina tiempopi causajpipash aliguta cazushpa, aliguta yarishpa sirvij esclavoca Jesusta ali catijcunamanga espiritualmente micunata carashpami catishca. Cunanga caipi pensaripashunchi. Cunanbica ashtaca ashtaca publicaciongunatami charipanchi. Chai publicaciongunaca 900 yali shimicunapimi tian. Chaicunata ricushpami ‘aliguta cazushpa, aliguta yarishpa sirvij’ esclavota Jehová Dios apoyajushcata ricupanchi. Shinallata ali villaigucunata ñaupaman catijta ricushpapashmi Jehová Dios apoyajushcata ricupanchi. Bibliapica cashnami nin: “Cai ali villaitaca, cai pachapi tiaj tucui llactacunapi causajcuna yachachunmi villanajunga” nishpa (Mat. 24:14). Ali villaigucuna villachishca cachun, paipa organizacionbash ñaupaman catichunmi Jehová Dios ayudajushcata ricupanchi.

17. Jehovapa organizacionda apoyajushcataca ¿imashinata ricuchi ushapanchi?

 ¹⁷ Jehová Diospa organizacionbi caimandaca ninandami Jehovataca agradicina capanchi. Moisespa, Aaronba punllacunapica jahua cielomanda ninata cachamushpa, chai animalta rupachishpaca paicunata Jehová Dios apoyajushcatami ricuchirca. Shinallatami cunanbipash Jehová Diosca paipa organizacionda apoyashpa catijushcata ricupanchi. Chaicunata ricushpaca Jehovataca ashtaca cosascunamandami agradicina capanchi (1 Tes. 5:18). Jehovapa organizacionda apoyajushcataca ¿imashinata ricuchipanchi? Publicaciongunapi Bibliamanda consejocunata cazushpa, tandanajuiman rishpa, jatun tandanajuicunaman na faltashpami Jehovapa organizacionda apoyajushcata ricuchipanchi. Shinallata Diospa Reinomanda villachishpa, gentecuna Jesuspa ali catijcuna tucuchun ayudashpapashmi Jehovapa organizacionda apoyajushcata ricuchipanchi (1 Cor. 15:58).

18. Levítico libromanda yachajushpaca ¿imatata rurana capanchi?

¹⁸ Levítico libromanda yachajushcata cazungapaj, Jehovapa ñaupajpi ali cangapami ninanda esforzarina capanchi. Ñucanchicuna alita rurajpica Jehová Diosca alicachishpami ricunga. Jehovata agradicishcata, paita tucui shunguhuan sirvishcata ricuchipashunchi. Jehovata juyaimandami tucui usharishcapi Jehovata sirvingapaj munapanchi. Shinallata cunanbi Jehovapa organizacionda tucui shunguhuan apoyashpa catipashunchi. Shina apoyashpaca Jehovata sirvina shuj jatun privilegio cashcata, paimanda villachinapash shuj jatun bendición cashcatami ricuchipashun.