1-2. Eaa te tumu ka inangaro te au Kerititiano i teia tuatau i te apii i te puka o Levitiku?

AKAMAARA te apotetoro ko Paulo ki tona oa mapu ko Timoteo i “te au tuatua tapu katoa i tataia ra, e mea akauruia mai e te Atua.” (2 Timo. 3:16) Kapiti mai te puka o Levitiku. Eaa toou manako i teia puka Pipiria? Manako tetai pae, e maata te ture i roto i teia puka kare e tau kia tatou i teia tuatau, tuke ra to te au Kerititiano manako.

² Tataia te puka o Levitiku e 3,500 mataiti akenei, inara kua akono a Iehova i te reira “kia kite tatou.” (Roma 15:4) No te mea te akaari maira te puka o Levitiku i to Iehova manako, ka inangaro tatou i te akara matatio i te reira. E maata te au apiianga ka apii tatou mei teia puka. Ka akara ana tatou e a.

3. Eaa te tumu i orongaia ai te atinga i te Ra Tapokiangaara?

³ Apiianga mua: Ka anoanoia e kia mareka mai a Iehova i ta tatou atinga. I te au mataiti o te Ra Tapokiangaara, ka putuputu mai to Iseraela e ka akaatinga i te au manu. Kua riro teia au atinga ei akamaara ki to Iseraela i te puapinga kia tamāia ta ratou ara! I mua ake ka apai ei te taunga maata i te toto tarangaara ki roto i te Ngai Tapu  Rava i te reira rā, ka rave aia i tetai angaanga puapinga rava atu i te akakoreanga i te ara a te iti tangata.

4. Ia Levitiku 16:12, 13, eaa ta te taunga maata ka rave i tona tomo mua anga ki te Ngai Tapu Rava, o te Ra Tapokiangaara? (Akara i te tutu i te kapi mua.)

⁴ E tatau ia Levitiku 16:12, 13. Akamanako ana i tei tupu i te Ra Tapokiangaara: Ka tomo te taunga maata ki roto i te puakapa. Ko te taime mua teia o te toru taime, tona tomo anga ki roto i te Ngai Tapu Rava i te reira rā. Okotai rima, te atinga kakara i akaungaungatitiia ra, e tetai rima, te āriki ngarau ka. Ka tapū aia ki mua i te arai o te Ngai Tapu. Ma te tu ngateitei, ka tomo aia ki roto i te Ngai Tapu Rava e ka tu ki mua i te aruna. E akatutuanga, tei mua aia i te aroaro o te Atua ko Iehova! Ka riringi marie te taunga i te atinga kakara tapu ki runga i te ngarau ka, e ka kakara mai te reira ngai. * E oti ka tomo akaou aia ki te Ngai Tapu Rava ma te toto tarangaara. Ka tutungi aia i te atinga kakara i mua ake ka oronga ai aia i te toto tarangaara.

5. Eaa ta tatou i apii mai no te atinga kakara i te Ra Tapokiangaara?

⁵ Eaa ta tatou i kite mai no te atinga kakara i te Ra Tapokiangaara? Akakite maira te Pipiria e mei te atinga kakara rai te pure ārikiia a te aronga akamori tiratiratu ia Iehova. (Sala. 141:2; Apo. 5:8) Akamaara kua apai mai te taunga maata i te atinga kakara ki mua i to Iehova aroaro na roto i te tu akangateitei. Pera katoa tatou me pure kia Iehova ka rave i teia ma te tu ngateitei. Akangateitei tikai tatou iaia. Āriki meitaki tatou e kua oronga mai Tei Anga i te ao katoa e pini ua ake i te tikaanga, kia akavaitata kiaia mei tetai tamaiti e tona metua tane. (Iako. 4:8) Āriki aia ia tatou ei oa nona! (Sala. 25:14) Āriki ngakau tae tatou i teia akameitakianga e kare tatou e inangaro i te akamareka kore iaia.

6. Eaa ta tatou i apii mai e kua tutungi te taunga maata i te atinga kakara i mua ake ka oronga ai aia i te au atinga?

⁶ Akamaara e kua tutungi te taunga maata i te atinga kakara i mua ake ka oronga ai aia i te au atinga. Na teia mataara, kua akapapu aia e kua mareka te Atua i tana atinga. Eaa te apiianga no tatou? Iaia i te enua nei, kua rave a Iesu i tetai angaanga puapinga—maata atu i te oraanga o te tangata ravarai—mua ake ka akaatinga ai aia i tona oraanga. Eaa te reira? Na te nooanga i te oraanga tuatua tika e te tiratiratu, kua akapapa a Iesu i te ravenga no Iehova kia āriki mai i tana atinga. I reira, a Iesu i akapapu ei i ta Iehova ravenga kia noo i te oraanga meitaki e te tuatua tika. Akapapu a Iesu kua tika rai—kua tau rai—te tutaraanga ngateitei a tona Metua.

7. Eaa te tumu i riro ei to Iesu oraanga i te enua nei ei akamareka i tona Metua?

⁷ I tona oraanga i te enua nei, kua akarongo meitaki a Iesu i te au kaveinga tuatua tika a Iehova. Kare e timataanga—noatu te mate mamae—i akaparuparu i tona inangaro i te paruru e kua tika rai tona Metua i te tutara. (Phili. 2:8) Te tupuanga te timata anga, kua pure a Iesu “ma te aue maata e te roi-mata.” (Ebe. 5:7) Maringi ua mai tana pure ngakau tae e kua akamaroiroi iaia kia vai tiratiratu. Kia Iehova, mei te atinga kakara rai ta Iesu pure. To Iesu  oraanga katoa kua akamareka te reira i tona Metua e kua akapapu e kua tika rai Aia kia tutara ma te ngateitei.

8. Akapeea tatou me aru i to Iesu oraanga?

⁸ Ka aru tatou ia Iesu na te rave anga i te ka rauka ia tatou na roto i te oraanga tuatua tika e te tiratiratu ki ta Iehova au kaveinga e te au ture. Me tupu te timataanga, ka pure ngakau tae tatou no ta Iehova tauturu no te mea kua inangaro tatou i te akamareka iaia. Na teia au tu, te turuturu ra tatou i to Iehova tikaanga kia tutara. Kite tatou kare a Iehova e āriki i ta tatou pure me rave tatou i te au angaanga tau kore. Inara, me akono tatou i ta Iehova kaveinga, papu ia tatou mei te atinga kakara rai ta tatou pure ngakau tae kia Iehova. Papu katoa ia tatou ka akamareka to tatou tu tuatua tika e te tiratiratu i to tatou Metua i te rangi.—Mase. 27:11.

9. Eaa te tumu i orongaia ai te au atinga au?

⁹ Apiianga rua: Tavini tatou ia Iehova no te tu āriki iaia. Ka uriuri ana tatou no runga i te au atinga au, e tuanga puapinga no te akamorianga mou i Iseraela taito. * I roto i te puka o Levitiku, ka apii mai tatou e ka rauka i te tangata Iseraela i te oronga i te atinga au “ei akameitaki” anga. (Levi. 7:11-13, 16-18) Ka oronga aia i teia atinga, no te mea kua inangaro tikai aia i te rave i te reira. No reira e atinga oronga ua teia ta tetai tangata ka oronga no tona aroa i te  Atua ko Iehova. Te tangata e oronga ra i teia, tona ngutuare, e te kau taunga ka kai ratou i te kiko o te manu akaatingaia. Tetai tuanga ra o te manu ka tapaoia na Iehova anake ua. Ko teea tuanga?

10. Ia Levitiku 3:6, 12, 14-16 eaa ta te au atinga au e apii maira ia tatou, no to Iesu inangaro i te rave i te anoano o tona Metua?

¹⁰ Apiianga toru: No to tatou aroa, oronga tatou te mea meitaki na Iehova. Te tongaua o te manu te mea meitaki roa atu kia Iehova. Karanga katoa aia, e au tuanga puapinga, te mape, te pukuatu e te ate. (E tatau ia Levitiku 3:6, 12, 14-16.) No reira ka mareka a Iehova me oronga ua tetai tangata Iseraela i te reira e te tongaua kiaia. Te tangata Iseraela tei oronga ua i teia, te akaari maira i tona inangaro ngakau tae te oronga i te mea meitaki ki te Atua. Pera katoa, kua oronga ua a Iesu tei meitaki kia Iehova, tona tavini pu tikai Iaia ma te ngakau katoa. (Ioa. 14:31) Kia Iesu, e mareka ana aia i te rave i te anoano o te Atua; e aroa mou tona i ta te Atua ture. (Sala. 40:8) Mareka rava a Iehova i te kite ia Iesu te tavini maoraora iaia!

11. Akapeea ta tatou tavini anga mei te au atinga au rai, akapeea teia me akamaroiroi ia tatou?

¹¹ Mei te au atinga au, ka tavini ua tatou ia Iehova no to tatou aroa iaia. Oronga tatou i te mea meitaki tikai kia Iehova, e ka rave tatou i teia no to tatou aroa iaia ma te ngakau tae. Mataora a Iehova i te kite mai e mirioni ua atu aronga akamori iaia no to ratou aroa oonu iaia! Pumaanaia tatou i te akamaara e te kite maira a Iehova e te akaperepere ra i ta tatou e rave ra nona. Ei akaraanga, me kua pakarikari koe i teianei e kare e maata taau ka rave, papu e te kite maira a Iehova ia koe e taau ka rauka i te rave. Penei ka manako koe kare e rava ana taau e rave ra, te kite maira a Iehova i toou aroa ngakau tae tei akakeu ia koe kia oronga i tei rauka ia koe. Mareka aia i te āriki i taau mea meitaki tikai.

12. Eaa to Iehova manako no te au atinga au, akapeea teia me akamaroiroi ia tatou?

¹² Eaa ta tatou ka apii mai mei te au atinga au? Mei te aʼi tei taʼu i te tongaua o te manu, kakara atura te auai kia Iehova e kua mareka rava aia i te reira. Kia papu e te mareka maira a Iehova i taau angaanga ngakau katoa e te maroiroi i te tavini iaia. (Kolo. 3:23) Akamanako ana e te kata maira aia ma te mataora. Kite maira aia i ta tatou tauta anga i te tavini iaia, noatu te maata e te meangiti, ei apinga akaperepere e mutu kore ua atu.—Mata. 6:20; Ebe. 6:10.

13. Ia Levitiku 9:23, 24, akapeea a Iehova i te akaari mai anga e kua mareka aia i te kau taunga?

¹³ Apiianga a: Akameitaki a Iehova i tana akaaerenga i te enua nei. Akamanako ana i tei tupu i te 1512 M.T.N. i te patu angaia te puakapa i raro i te Maunga Sinai. (Exo. 40:17) Akono a Mose i te oroa no te akataoonga ia Aarona e tana tamariki ei kau taunga. Akaputuputu mai te iti tangata Iseraela no te akara i te au kau taunga e oronga ra i ta ratou au atinga manu mua. (Levi. 9:1-5) Akapeea a Iehova te akaari mai anga e kua mareka aia i te kau taunga ou tei akataoongaia? Ia Aarona e Mose e akameitaki ra i te iti tangata, kua tuku mai a Iehova i te aʼi e kua akapou takiri rava i te atinga i rungao i te atarau.—E tatau ia Levitiku 9:23, 24.

14. Eaa i puapinga ai kia kite tatou kua mareka a Iehova i te kau taunga o Aarona i teia tuatau?

 ¹⁴ Eaa ta te aʼi mei te rangi i akaari mai i te akataoongaia anga te taunga maata? Akaari maira a Iehova e te turuturu ra aia i teia akanooanga kau taunga no Aarona e tona kopu. I te kiteanga te ngati Iseraela ia Iehova e turu ra i te au kau taunga, kua turuturu katoa ratou i teia. Kua tau ainei teia kia tatou? Ae! E akaraanga ua te kau taunga i Iseraela no te au mea maata ka tupu mai. Ko Karaiti te Taunga Maata rava, e tona kau taunga e 144,000, ka tavini kapiti kiaia i te rangi.—Ebe. 4:14; 8:3-5; 10:1.

15-16. Akapeea a Iehova te akaari anga mai i tona mareka i “te tavini akono meitaki e te pakari”?

¹⁵ I te 1919, kua iki a Iesu i tetai pupu taeake akatainuia e ko “te tavini akono meitaki e te pakari.” Na teia tavini e arataki ra i te angaanga tutu aere e “ei tua i te kai na ratou i te ora mou ra.” (Mata. 24:45) Te kite takataka nei tatou i te au akapapuanga e te mareka ra te Atua i te tavini akono meitaki e te pakari?

¹⁶ E maata ta Satani e tona ao i rave kia ngata te angaanga a te tavini akono meitaki e te pakari, e kia kore e tere ki mua. Noatu te nga tamaki o te ao e rua, te takinokino anga pakari, manamanata i te pae moni o teia ao, e te takinga kino tika kore, kua oronga mai rai te pupu tavini akono meitaki e te pakari i te kai pae vaerua no te au pipi a Karaiti i te enua nei. Akamanako ana i te maata o te au kai pae vaerua i teianei, kare e tutaki, e tei roto i te 900 tuma reo! Papu roa e te turuia nei rai teia angaanga e te Atua. Tetai akaou mai akapapuanga i ta Iehova akameitakianga: ko te angaanga  tutu aere. Te tutu aereia nei te nuti meitaki “e kako rava ake te ao katoa nei.” (Mata. 24:14) Papu e te arataki nei a Iehova e te akameitaki nei i tana akaaerenga i teia tuatau.

17. Akapeea tatou me akaari e te turuturu ra tatou i te akaaerenga ta Iehova e taangaanga ra?

¹⁷ Ka ui tatou e, ‘Āriki ainei au i te kapiti atu ki teia akaaerenga na Iehova i te enua nei?’ Maata ta Iehova akapapuanga tei oronga mai mei te aʼi rai tana i tuku mai mei te rangi i to Mose e Aarona tuatau. Kia akaari ua tatou i te ngakau āriki. (1 Tesa. 5:18, 19) Akapeea tatou me turu i teia akaaerenga ta Iehova e taangaanga nei? Na te akono anga i te au kaveinga Pipiria tei orongaia mai i roto i te au puka e ta tatou au uipaanga, akaputuputuanga, e te uruoaanga. Ka akaari katoa tatou e te turuturu ra tatou na te rave maata i te angaanga tutu aere e te apiianga.—1 Kori. 15:58.

18. Eaa ta tatou ka aruaru i te rave?

¹⁸ E aruaru tatou i te taangaanga i te au apiianga i roto i te puka o Levitiku. Kia aruaru tatou e kia mareka mai e kia āriki mai a Iehova i ta tatou atinga. Kia tavini tatou ia Iehova no to tatou ngakau aroa iaia. E oronga ua tatou i to tatou meitaki kia Iehova no to tatou akaperepere maata iaia. E kia turuturu ngakau katoa tatou i tana akaaerenga, e akameitaki nei i teia tuatau. Na teia mataara, te akaari nei tatou kia Iehova e te akaperepere ra tatou i te akameitaki anga no te tavini iaia ei Au Kite nona!