1-2. Соске ваљани о христијања те интересинен пе башо адава со пишинела ко лил 3. Мојсеева?

О АПОСТОЛ Павле сетинкерѓа пле терне амале е Тимотее кај „цело Лил авела таро Девел хем корисно тано“ (2. Тим. 3:16). Ки лесте тано вклучимо хем о лил 3. Мојсеева. Со мислинеа ту башо акава лил? Несаве мислинена кај тано само лил пхердо правилонцар кола на со важинена башо амаро време. Ама, о чачутне христијања џанена кај нане аѓаар.

² Иако о лил 3. Мојсеева сине пишимо англедер околу 3.500 берш, о Јехова на дозволинѓа те овел уништимо те шај амен авдиве те сикљова лестар (Рим. 15:4). Адалеске со акава лил поможинела аменге те хаљова сар размислинела о Јехова, шукар тано те истражина ле хари похор. Уствари, акава лил кова со авела таро Девел, иси ле бут поуке. Те дикха штар лендар.

3. Соске о првосвештенико секова берш дела сине жртве ко диве простибаске о гревија?

³ Прво поука: Ако мангаја о Јехова те прифатинел амаре жртве, мора те живина аѓаар сар со мангела ов. Секова берш, ко диве простибаске о гревија, о израелско народо кхедела пе сине хем о првосвештенико дела сине жртве. Адала жртве сетинкерена сине е Израелцон кај ваљани сине те овен чистиме таро грево. Ама, англедер те ингарел о рат таро жртве ки Најсвето светиња, о првосвештенико мора сине те керел нешто јавер — нешто со сине бут поважно таро простибе о гревија е народоскере.

4. Спрема 3. Мојсеева 16:12, 13, со керела сине о првосвештенико ко диве простибаске о гревија кеда кхувела сине прво пути ки Најсвето светиња? (Дикх и слика тари насловно страна.)

 ⁴ Читин 3. Мојсеева 16:12, 13. Ко диве простибаске о гревија, о првосвештенико ваљани сине те кхувел трин пути ки Најсвето светиња. Замислин туке сар кхувела ко свето шатори о прво пути. Ко јекх вас икерела о чаро колесте со иси мирисливо темјани, а ко јавер вас пхиравела златно лопата пхердо тате жаронцар. Англедер те кхувел ки Најсвето светиња, кратко ов ачхола англи завеса. Ки лесте иси баро поштовање спрема о Јехова. Пало адава, кхувела андре хем ачховела англо ковчег е сојузескоро. Ки симболично смисла, ов терѓола англо Јехова! О првосвештенико похари чхорела о свето темјани упро тате жарија, хем и соба пхерѓола шужо мирис. * Пало адава, ов кхувела панда дуј пути ки Најсвето светиња те шај те дел о рат таро жртве башо грево. Ама приметин кај о Јехова родела сине те тхарел пе темјани англедер те дел пе о рат таро жртве башо грево.

5. Сар кхувела сине о првосвештенико ки Најсвето светиња е темјанеа, хем со шај те сикљова таро адава?

⁵ Со сикљоваја таро адава со ко диве простибаске о гревија користинела пе сине темјани? И Библија сикавела кај о молитве е Јеховаскере верна слугенгере тане сар темјани (Пс. 141:2; Отк. 5:8). Е првосвештенико сине ле баро поштовање кеда кхувела сине те терѓол англо Јехова тхаре темјанеа. Слично, амен да иси амен баро поштовање кеда молинаја амен е Јеховаске. Бут сием благодарна со о Створители е вселенакоро дозволинела аменге те молина амен леске хем те ова леа паше сар јекх чхаво сој паше пле дадеа (Јак. 4:8). Ов прифатинела амен сар пле амала! (Пс. 25:14). Добором бут ценинаја акаја чест со на мангаја те кера нешто колеа со ка разочарина ле.

6. Со сикљоваја башо Исус таро адава со о првосвештенико тхарела сине о темјани англедер те дел о жртве?

⁶ Сетин тут кај о првосвештенико мора сине те тхарел о темјани англедер те дел о рат таро жртве. Ов мора сине те керел адава те шај о Јехова те овел лестар задоволно хем те прифатинел о жртве. Со шај те сикљова таро акава? Англедер те дел пло живото, о Исус ваљани сине те керел нешто бут поважно таро адава те спасинел е манушен. Со сине адава? Мора сине те ачховел верно хем послушно цело пло живото ки Пхув те шај о Јехова те прифатинел лескири жртва. Адалеа, о Исус докажинѓа кај единствено исправно начин сар те живинел пе тано те живина спрема е Јеховаскири волја. Ов сикавѓа кај само е Девле иси ле право те владинел соске лескоро начин сар владинела тано исправно хем праведно.

7. Соске о Јехова сине бахтало таро начин сар живинела сине о Исус џикоте сине ки Пхув?

⁷ Џикоте сине ки Пхув, о Исус цело пло живото сине совршено послушно ко е Јеховаскере праведна мерилија. Иако накхља таро бут искушенија хем пхарипа хем џанља кај ка мерел ко јекх бут мучно начин, ов сине одлучно те докажинел кај лескоро Дад владинела ко најшукар начин (Фил. 2:8). Кеда накхела сине таро пхаре ситуацие, о Исус молинела пе сине „гласно хем асвенцар“ (Евр. 5:7). Лескере искрена молитве сикавѓе кај сине верно е Јеховаске хем керѓе ле панда поодлучно те ачховел послушно џи ко крајо. Е Јеховаске, о молитве лескере  Чхавескере сине сар шужо мирис таро темјани. Цело пле животоја, о Исус керѓа бут бахтало пле Даде хем докажинѓа кај ов тано о најшукар Владетели.

8. Сар шај те џа пало е Исусескоро пример?

⁸ Шај те џа пало е Исусескоро пример аѓаар со ка да амендар са те ачхова верна е Јеховаске хем ка шуна лескере законија хем начелија. Кеда иси амен испитија, таро вило молинаја е Јехова те поможинел аменге соске мангаја те постапина сар со мангела ов хем те кера ле бахтало. Аѓаар сикаваја кај аменге да о начин сар владинела ов тано најшукар. Џанаја кај о Јехова нане те шунел амаре молитве ако кераја буќа кола со ов осудинела лен. Сепак, ако живинаја спрема лескере мерилија, шај те ова сигурна кај амаре искрена молитве ка овен е Јеховаске шуже сар мирисливо темјани. Освен адава, шај те ова сигурна кај амари беспрекорност, верност хем послушност керена бут бахтало амаре Даде сој ко небо (Изр. 27:11).

9. Соске о Израелција дена сине жртве башо заедништво?

⁹ Дујто поука: Служинаја е Јеховаске тари благодарност. Те шај те хаљова кобор тано важно акава, те дикха о жртве башо заедништво со дена пе сине ко пурано Израел. * Таро лил 3. Мојсеева дикхаја кај јекх Израелцо шај сине те дел жртва башо заедништво те шај те сикавел пли благодарност (3. Мој. 7:11-13, 16-18). Ов дела сине асавки жртва на со мора сине, него соске мангела  сине. Значи, адаја сине доброволно жртва која со спремно дела ла сине соске мангела пле Девле, е Јехова. Окова со дела сине и жртва, лескири фамилија хем о свештеникија, хана сине о мас таро животно со жртвујнѓе ле. Ама, несаве делија тари адаја жртва на смејнена сине те хан пе — ола дена пе сине само е Јеховаске. Кола сине адала делија?

10. Сар о жртве башо заедништво сој пишиме ки 3. Мој. 3:6, 12, 14-16 поможинена аменге те хаљова таро кова мотиви о Исус керела сине пле Дадескири волја?

¹⁰ Трито поука: Даја е Јехова амаро најшукар адалеске со мангаја ле. Е Девлеске, о кхил сине о најшукар дело таро животно. Освен адава, ов јасно вакерѓа кај несаве андруне органија, машкар кола со сине о бубрекија, леске сине посебно важна. (Читин 3. Мојсеева 3:6, 12, 14-16.) Адалеске сине бут задоволно кеда несаво Израелцо доброволно ка дел ле сине адала органија хем о кхил таро животно. Окова со керела сине адава сикавела кај мангела те дел о најшукар е Девлеске. Слично, о Исус спремно денѓа пло најшукар е Јеховаске аѓаар со таро мангипе служинѓа леске цело душаја (Јован 14:31). Леске сине задоволство те керел е Девлескири волја хем ов бут мангела сине е Девлескоро закони (Пс. 40:8). О Јехова сигурно сине бут бахтало кеда дикхела сине кај о Исус доброволно служинела леске!

11. Сар амари служба тани слично е жртвенцар башо заедништво хем соске адава утешинела амен?

¹¹ Амари служба тани слично сар о жртве башо заедништво соске аѓаар сикаваја саве чувствија иси амен спрема о Јехова. Амен даја леске амаро најшукар, хем адава кераја соске мангаја ле цело вилеа. О Јехова сигурно тано бут бахтало кеда дикхела сар милиоња лескере верна слуге служинена леске адалеске со мангена ле хем лескере мерилија! Утешинела амен адава со џанаја кај о Јехова дикхела хем ценинела на само адава со кераја него хем соске кераја адава. На пример, ако сиан попхуро хем нашти више те кере башо Девел добором кобор со би мангеа, шај те ове сигурно кај о Јехова хаљовела тут. Шај мислинеа кај на кереа бут башо Јехова, ама ов дикхела тло искрено мангипе кова со поттикнинела тут те кере адава со шај. Ов спремно прифатинела тло најшукар.

12. Сар дикхела сине о Јехова ко жртве башо заедништво, хем сар адава охрабринела амен?

¹² Со шај те сикљова тари жртва башо заедништво? Џикоте тхабљовена сине ко жртвенико о најшукар делија таро животно, лендар икљола сине шужо мирис колестар со о Јехова сине задоволно. Ов сигурно кај о Јехова тано задоволно тутар да кеда спремно деа тло најшукар те служине леске (Кол. 3:23). Замислин кобор тано бахтало кеда дикхела сар служинеа леске! Е Јеховаске тано скапоцено цело тло трудо со мангипаја деа ле, бизи разлика дали кереа бут или хари. Ов никогаш нане те бистрел адава хем ка ценинел ле вечно (Мат. 6:20; Евр. 6:10).

13. Спрема 3. Мојсеева 9:23, 24, сар сикавѓа о Јехова кај одобринела е свештеникон?

¹³ Штарто поука: О Јехова дела берекети пле организацијаке. Те дикха со случинѓа пе ко 1512 берш а.а.е., кеда сине кердо о свето шатори ко телуно дело тари планина Синај (2. Мој. 40:17). Ко диве кеда о Мојсеј ваљанѓа те чхивел е Ароне хем лескере чхавен сар свештеникија, о Израелција кхединѓе пе те дикхен сар ола дена сине пле прва животинска жртве (3. Мој. 9:1-5). Сар сикавѓа о Јехова кај одобринела е неве свештеникон? Џикоте о Арон хем о Мојсеј дена сине берекети е народоске, о Јехова мукхља јаг  таро небо која со тхарѓа цело жртва со сине денди ко жртвенико. (Читин 3. Мојсеева 9:23, 24.)

14. Соске тано аменге важно адава со одобринѓа о Јехова е Ароне хем лескере чхавен сар свештеникија?

¹⁴ Со сикавѓа о Јехова адалеа со мукхља јаг таро небо кеда о Арон сине чхивдо те служинел сар првосвештенико? Адава сине знако кај о Јехова одобринела хем кај целосно поддржинела е Ароне хем лескере чхавен ки адаја неви служба. Кеда о Израелција дикхле акава јасно доказ, халиле кај ола да ваљани целосно те поддржинен е свештеникон. Дали акава иси ле несаво значење аменге? Оја. О свештенство ко Израел сине само сенка башо јекх бут пошукар свештенство. О Христос тано о побаро Првосвештенико кова со ка служинел таро небо заедно 144.000 свештениконцар хем царенцар (Евр. 4:14; 8:3-5; 10:1).

15-16. Сар о Јехова сикавѓа кај одобринела е „верно хем разборито робо“?

¹⁵ Ко 1919 берш, о Исус чхивѓа јекх тикни група помазиме пхраља те служинен сар „верно хем разборито робо“. Акава „робо“ предводинела ко проповедибе хем дела е Христосескере следбениконге „храна ко право време“ (Мат. 24:45). Дали дикхаја јасна доказија кај о Јехова одобринела е „верно хем разборито робо“?

¹⁶ О Сатана хем лескоро свето пробинена ко секова начин те чхинавен е „верно робо“ те керел пли задача. Ако о Јехова на поддржинела акале робо, ов нашти те керел пли задача. Иако сине дуј светска војне, баро прогонство, финансиска проблемија ко цело свето хем е Девлескоро народо доживинела сине неправде, сепак „о верно хем разборито робо“ понадари да дела сине храна е Христосескере следбениконге ки Пхув.  Размислин кобор бут публикацие иси амен авдиве кола тане бизо паре ко повише таро 900 чхибја! Акава тано јасно доказ кај о Јехова поддржинела е „робо“. О проповедибе тано панда јекх доказ башо е Јеховаскоро берекети. О шукар хабери чаче проповединела пе „ко цело свето“ (Мат. 24:14). Јасно шај те дикха кај авдиве о Јехова водинела пле организација хем дела ла баро берекети.

17. Сар шај те поддржина е Јеховаскере организација?

¹⁷ Шукар тано те пуча амен: „Дали сиум благодарно со сиум дело тари е Јеховаскири организација?“ О Јехова дела амен добором јасна доказија исто сар со сине и дословно јаг таро небо ко време е Мојсеескоро хем е Аронескоро. Чаче ваљани те ова благодарна башо бут буќа (1. Сол. 5:18). Сар шај те поддржина е Јеховаскере организација? Аѓаар со ка шуна о библиска упатствија кола со добинаја лен преку амаре публикацие, состанокија хем конгресија. Освен адава, поддржинаја ла аѓаар со даја амендар са те шај те проповедина хем те сикава е јаверен (1. Кор. 15:58).

18. Со сиан одлучно те кере?

¹⁸ Те ова одлучна те применина о поуке таро лил 3. Мојсеева со дикхлем лен ки акаја статија. Те кера са со ваљани те шај амаре жртве те овен прифатлива е Јеховаске. Те служина е Јеховаске тари благодарност хем понадари да те да леске амаро најшукар соске мангаја ле таро вило. Хем те кера са со шај те поддржина е организација колаке со дела пло берекети авдиве. Аѓаар ка сикава е Јеховаске кај сием бут бахтале со иси амен чест те служина леске сар лескере Сведокија!