1, 2. Σόσκε πρέπει ο Χριστιανοί αντιβές τι μανγκέν τι σικλιόν σο βακερέλα ο βιβλίος Λευιτικό;

O ΑΠΟΣΤΟΛΟΣ ΠΑΥΛΟΣ αντάς κι γκοντί πι αμαλέσκι, κι Τιμοθεόσκι, ότι «ο άγιος πνεύμας ι Ντεβλέσκο βοηθιντάς τι γραφίντιβελ σαρί η Γραφή, ντα οτθάρ ισί λατσσί». (2 Τιμ. 3:​16) Ντα αντρέ κι Γραφή ισί ο βιβλίος Λευιτικό-ντα. Σαρ ντικχένα ανταβά βιβλίος ι Γραφιάκο; Μερικοί μπορεί τι ντικχένα-λες σαρ εκ βιβλίος πφερντό κανόνες σο νανέ αμαρέ ντιβεσένγκε, αλλά ο αληθινοί Χριστιανοί να ντικχένα-λες αντικάς.

² Ο βιβλίος Λευιτικό γραφισάλο περίπου πριν από 3.500 μπρεσά, αλλά ο Ιεχωβά κερντάς-λες τι ατσσόλ «αμαρέ σικλιαριμάσκε». (Ρωμ. 15:4) Επειδή ο βιβλίος Λευιτικό ντέλα-αμέν τι αγαβάς σαρ σκεφτίνελα ο Ιεχωβά, πρέπει τι μανγκάς μπουτ τι σικλιάς σο βακερέλα. Ντα μπορίνασα τι σικλιάς μπουτ πράγματα ανταλέ βιβλιόσταρ σο ισί κατά Ντεβέλ. Για τι ντικχάς σταρ ανταλέ πραγματένταρ.

3. Σόσκε αβένας-πες θυσίες κο Ντιβές σο κερένας κάθε μπρες για τι ιτσσάρντιβεν λένγκε αμαρτίες;

³ Πρώτος πράγμας σο σικλιάσα: Πρέπει τι τθεράς ι Ιεχωβάσκι ευλογία για τι δεχτίνελ αμαρέ θυσίες. Κο Ντιβές σο κερένας κάθε μπρες για τι ιτσσάρντιβεν λένγκε αμαρτίες, γκιντίντιβελας ο λαός Ισραήλ ντα θυσιάνελας ζώα. Οντουλά θυσίες ανένας κι γκοντί κι Ισραηλιτένγκι ότι έπρεπε τι καθαρίντιβεν κατά αμαρτία! Όμως, πριν τι ανέλ ο αρχιερέας ο ρατ κατά θυσίες κο Άγια των Αγίων οντουβά ντιβές, έπρεπε πρώτα τι κερέλ εκ γιαβέρ πράγμας, σο ισινέ πιο σημαντικός κατά συγχώρηση ι λαόσκι.

4. Σο κερέλας ο αρχιερέας κάνα τζάλας πρώτη φαρ κο Άγια των Αγίων ο Ντιβές σο κερένας για τι ιτσσάρντιβεν λένγκε αμαρτίες, σαρ βακερένα ο εδάφια Λευιτικό 16:​12, 13; (Ντικχ ι φωτογραφία κι ανγκλαϊνί σελίδα)

 ⁴ Διαβάνεν Λευιτικό 16:​12, 13. Ανέν τουμαρέ γκοντιάτε σο αβέλας-πες κο Ντιβές σο κερένας για τι ιτσσάρντιβεν λένγκε αμαρτίες: Ο αρχιερέας τζάλα κι σκηνή της μαρτυρίας. Ανταγιά ισί η πρώτη κατά τριν φαρ σο πρέπει τι τζαλ κο Άγια των Αγίων οντουβά ντιβές. Κο εκ βας ασταρέλα μπερεκέτι θυμίαμας σο κχάντελα μίσκι ντα κο γιαβέρ ανγκαρά σο πφαμπόνα. Ατσσόλα ανγκλάλ κι κουρτίνα σο γκεραβέλα ο Άγια των Αγίων. Με μπαρό σεβασμός, τζάλα κο Άγια των Αγίων ντα ατσσόλα ανγκλάλ κι κιβωτός της διαθήκης. Ανταβά μανγκέλα τι σικαβέλ ότι ατσσόλα ανγκλάλ κο Ιεχωβά Ντεβέλ! Ακανά ο αρχιερέας τσσουβέλα με προσοχή ο άγιος θυμίαμας κο ανγκαρά σο πφαμπόνα, ντα σαρό ο τθαν κχάντελα μίσκι. * Σοράν κα τζαλ πάλι κο Άγια των Αγίων ι ρατέσαρ κατά θυσίες. Προσοχίνεν ότι πφαμπαρέλα ο θυμίαμας πριν τι γκερέλ ο ρατ κατά θυσίες.

5. Σο σικλιάσα κατά θυμίαμας σο πφαμπαρένας κο Ντιβές σο κερένας για τι ιτσσάρντιβεν λένγκε αμαρτίες;

⁵ Σο σικλιάσα κατά θυμίαμας σο πφαμπαρένας κο Ντιβές σο κερένας για τι ιτσσάρντιβεν λένγκε αμαρτίες; Η Γραφή σικαβέλα ότι ο προσευχές ι πιστέ τζενένγκε σο ασουνέλα ο Ιεχωβά ισί σαρ θυμίαμας. (Ψαλμ. 141:2· Αποκ. 5:8) Ντεν-τουμέν γκοντί ότι ο αρχιερέας ανέλας ο θυμίαμας ανγκλάλ κο Ιεχωβά με μπαρό σεβασμός. Αντικάς αμέν-ντα, κάνα τζάσα πασέ κο Ιεχωβά αντράλ κατά προσευχή, κεράσα-λες ανταβά με μπαρό σεβασμός. Ισινάμ πφερντέ εκτίμηση σο Οντουβά σο κερντάς-λεν σαρέ μουκχέλα-αμέν τι τζας πασέ λέστε, σαρ εκ τσσαβό πι νταντέστε. (Ιακ. 4:8) Βοβ δεχτίνελα-αμέν σαρ αμαλά! (Ψαλμ. 25:​14) Εκτιμίνασα-λες ανταβά αζόμ μπουτ σο ποτές να κα μανγκάας τι πφανγκάς λέσκο γκι.

6. Σο σικλιάσα κατά αρχιερέας σο πφαμπαρέλας ο θυμίαμας πριν τι κερέλ ο θυσίες;

⁶ Ντεν-τουμέν γκοντί ότι ο αρχιερέας έπρεπε τι πφαμπαρέλ ο θυμίαμας πριν τι κερέλ ο θυσίες. Αντικάς ισινέ σίγουρος ότι κα τθερέλας ι ευλογία ι Ντεβλέσκι κάνα κα κερέλας-λεν. Σο σικλιάσα; Κάνα ο Ιησούς ισινέ κι πφουβ, δεν έπρεπε απλά τι ντελ πι ζωή σαρ θυσία για τι σώνελ ι τζενέν. Τθερέλας τι κερέλ κάτι πιο σημαντικός πριν ανταλέσταρ. Σο ισινέ ανταβά; Έπρεπε τι ατσσικιαρέλ σαστό πο γκι κο Ιεχωβά ντα τι αβέλ αφοσιωμέ λέστε σαρί πι ζωή σο ισινέ κι πφουβ για τι δεχτίνελ ο Ιεχωβά λέσκι θυσία. Αντικάς, ο Ιησούς κα σικαβέλας ότι κάνα εκ τζενό κερέλα ο πράγματα σαρ μανγκέλα ο Ιεχωβά τζουβντιόλα σωστά. Ο Ιησούς κα σικαβέλας ότι ισί σωστή ντα δίκαια η κυριαρχία λέσκε Νταντέσκι, δηλαδή ο τρόπος σο κυβερνίνελα.

7. Σόσκε βακεράσα ότι ο Ιησούς κερντάς ι Ιεχωβάσκο γκι σαρέ πι ζωγιάσαρ;

⁷ Σαρί πι ζωή ατθέ κι πφουβ, ο Ιησούς ντινάς καν ι Ιεχωβάς σαρέ κο πράγματα. Καέκ πειρασμός ντα καέκ δοκιμασία​—ούτε ο μπέτι μεριπέ σο μπεκλεντίνελας τι τθερέλ—​να κερντάς-λες τι τσσιναβέλ τι υπερασπίνελ σαρέ πι γκίσαρ ο τρόπος σο κυβερνίνελα λέσκο Ντατ. (Φιλιπ. 2:8) Κάνα τθερέλας δοκιμασίες, ο Ιησούς προσευχισάλο «βικόσαρ ντα ροϊμάσαρ». (Εβρ. 5:7) Ο προσευχές σο νικιόνας αντράλ λέσκε γκίσταρ σικαβένας ότι ισινέ αφοσιωμέ κο Ιεχωβά ντα κερένας-λες τι μανγκέλ ατζέ πιο μπουτ τι ντελ καν. Ι Ιεχωβάσκε, ο προσευχές ι Ιησούσκε ισινέ σαρ θυμίαμας σο κχάντελας μίσκι. Σαρέ πι ζωγιάσαρ, ο Ιησούς  κερντάς πι Νταντέσκο γκι ντα σικαντάς ότι Λέσκι κυριαρχία ισί δίκαια ντα σωστή.

8. Σαρ μπορίνασα τι μοιάζας κο Ιησούς;

⁸ Αμέν μπορίνασα τι μοιάζας κο Ιησούς κάνα κεράσα ο πιο λατσσό για τι ατσσικιαράς σαστό αμαρό γκι κο Ιεχωβά ντα τι αβάς αφοσιωμέ λέσκε ντρομέστε ντα λέσκε νομόντε. Κάνα τθεράσα δοκιμασίες, κεράσα προσευχή αντράλ αμαρέ γκίσταρ για τι βοηθίνελ-αμέν ο Ιεχωβά σόσκε μανγκάσα τι κεράς λέσκο γκι. Άμα κεράσα-λες ανταβά, σικαβάσα ότι υποστηρίνασα ο τρόπος σο κυβερνίνελα. Αγαβάσα ότι ο Ιεχωβά να κα ασουνέλ αμαρέ προσευχές άμα κεράσα πράγματα σο να μανγκέλα. Αλλά άμα κεράσα Λέσκε κανόνες, μπορίνασα τι αβάς σίγουροι ότι ο προσευχές σο κεράσα αντράλ αμαρέ γκίσταρ κα αβέν σαρ θυμίαμας σο κχάντελα μίσκι ι Ιεχωβάσκε. Ντα ισινάμ σίγουροι ότι αβέλα ο γκι αμαρέ Νταντέσκο κάνα τθεράσα σαστό γκι ντα ντάσα-λες καν επειδή ισινάμ αφοσιωμέ λέστε.​—Παρ. 27:11.

9. Σόσκε κερντιόνας ο θυσίες συμμετοχής;

⁹ Δεύτερος πράγμας σο σικλιάσα: Υπηρετίνασα ι Ιεχωβάς για τι σικαβάς λέσκε αμαρί εκτίμηση. Για τι αγαβάς-λες ανταβά, κα ντικχάς ο θυσίες συμμετοχής, εκ γιαβέρ σημαντικός πράγμας σο κερένας κο πουρανό Ισραήλ για τι ντεν λατρεία. * Κο βιβλίος Λευιτικό, σικλιάσα ότι εκ Ισραηλίτης κερέλας εκ θυσία συμμετοχής «για τι βακερέλ ευχαριστώ». (Λευιτ. 7:​11-13, 16-18) Κερέλας ανταγιά θυσία, όχι επειδή έπρεπε, αλλά επειδή μανγκέλας. Ισινέ εκ  θυσία σο κερέλας-λα αντράλ πι γκίσταρ σόσκε μανγκέλας πι Ντεβλές, ι Ιεχωβάς. Ο τζενό σο κερέλας ι θυσία, λέσκι φαμιλί ντα ο ιερείς χάνας ο μας κατά ζώος σο θυσιασάλο. Αλλά συγκεκριμέ κομμάτια ντιντιόνας σάντε κο Ιεχωβά. Καλά;

10. Σαρ ο θυσίες συμμετοχής σο βακέρντιβενα κο εδάφια Λευιτικό 3:6, 12, 14-16 μοιάζενα κι υπηρεσία σο ντέλας ο Ιησούς κο Ιεχωβά;

¹⁰ Τρίτος πράγμας σο σικλιάσα: Η αγάπη κερέλα-αμέν τι ντας κο Ιεχωβά ο πιο λατσσό. Ι Ιεχωβάσκε, ο κχιλ ισινέ ο πιο λατσσό πράγμας κο ζώος. Επίσης, βακερντάς ότι ο νεφρά ντα ο μπουκχό τθερένας μπαρί αξία. (Διαβάνεν Λευιτικό 3:6, 12, 14-16) Άρα, ο Ιεχωβά χαιρίνελας μπουτ κάνα εκ Ισραηλίτης ντέλας-λες αντράλ πι γκίσταρ ανταλά ντα ο κχιλ κατά ζώος. Ο Ισραηλίτης σο κερέλας εκ ασακί θυσία σικαβέλας ότι μανγκέλας τι ντελ αντράλ πι γκίσταρ ο πιο λατσσό κο Ντεβέλ. Αντικάς ο Ιησούς-ντα ντινάς ο πιο λατσσό κο Ιεχωβά κάνα υπηρετιντάς-λες σαρέ πι γκίσαρ ντα επειδή μανγκέλας-λες. (Ιωάν. 14:​31) Ο Ιησούς μπεϊντίνελας τι κερέλ οντουβά σο μανγκέλα ο Ντεβέλ ντα μανγκέλας μπουτ λέσκο νόμος. (Ψαλμ. 40:8) Καζόμ μπουτ πρέπει τι χαιρίνελας ο Ιεχωβά κάνα ντικχέλας ι Ιησούς τι υπηρετίνελ-λες αντράλ πι γκίσταρ!

11. Σαρ μοιάζελα αμαρί υπηρεσία με το θυσίες συμμετοχής, ντα σόσκε λοκχιαρέλα αμαρό γκι ανταβά;

¹¹ Αμαρί υπηρεσία κο Ιεχωβά ισί σαρ οντουλά θυσίες συμμετοχής επειδή αντικάς σικαβάσα κο Ιεχωβά σαρ νιωθίνασα λέσκε. Ντάσα κο Ιεχωβά ο πιο λατσσό, ντα κεράσα-λες ανταβά σόσκε μανγκάσα-λες σαρέ αμαρέ γκίσαρ. Καζόμ πρέπει τι χαιρίνελα ο Ιεχωβά κάνα ντικχέλα εκατομμύρια τζενέν τι υπηρετίνεν-λες σαρέ πουμαρέ γκίσαρ ντα επειδή μανγκένα λες ντα λέσκο ντρομ! Λοκχιόλα αμαρό γκι κάνα ντάσα-αμέν γκοντί ότι ο Ιεχωβά να ντικχέλα σάντε σο κεράσα αλλά σόσκε κεράσα-λες. Για παράδειγμας, άμα ισινέν πφουρέ ντα ναστί κερένα οντουλά σο κα μανγκένας τι κερέν, τι αβέν σίγουροι ότι ο Ιεχωβά αγαβέλα-τουμέν. Μπορεί τι νιωθίνενα ότι να τθερένα τι ντεν αζόμ μπουτ πράγματα, αλλά ο Ιεχωβά ντικχέλα ι αγάπη σο τθερένα αντρέ τουμέντε σο τσσίντελα-τουμέν τι κερέν σο-ντα μπορίνενα. Βοβ δεχτίνελα με χαρά ο πιο λατσσό σο μπορίνενα τι ντεν.

12. Σαρ νιωθίνελας ο Ιεχωβά για το θυσίες συμμετοχής, ντα σαρ ντέλα-αμέν ζορ ανταβά;

¹² Σο σικλιάσα κατά θυσίες συμμετοχής; Καζόμ η γιακ χάλας ο πιο λατσσέ κομμάτια κατά ζώος, ο κάδος τζάλας οπρέ ντα ο Ιεχωβά χαιρίνελας. Οτθάρ τι αβέν σίγουροι ότι ο Ιεχωβά χαιρίνελα κάνα κερένα σαρέ τουμαρέ γκίσαρ ο πιο λατσσό για τι υπηρετίνεν-λες. (Κολ. 3:​23) Σκεφτίνεν καζόμ χαρούμενος ισί τουμέντζαρ. Να τθερέλα σημασία άμα κερένα μπουτ ή χάνικ πράγματα ι Ιεχωβάσκε. Σο-ντα κερένα ισί μπουτ σημαντικός λέσκε, ντα κα ατσσικιαρέλ-λες για πάντα πι γκοντιάτε.​—Ματθ. 6:​20· Εβρ. 6:10.

13. Σαρ σικαντάς ο Ιεχωβά πι ευλογία οντουλένγκε σο αβιλέ ιερείς σαρ βακερένα ο εδάφια Λευιτικό 9:​23, 24;

¹³ Τέταρτος πράγμας σο σικλιάσα: Ο Ιεχωβά ευλογίνελα πι λαός. Ντικχέν σο αβιλό κο 1512 Π.Κ.Χ. κάνα τσσουντέ ι σκηνή της μαρτυρίας κο βες Σινά. (Έξοδ. 40:​17) Ο Μωυσής κερντάς εκ γιορτή σο οτθέ ο Ααρών ντα λέσκε τσσαβέ αβιλέ ιερείς. Ο λαός Ισραήλ γκιντισάλο για τι ντικχέλ σαρ κα κερένας ο ιερείς πουμαρέ πρώτες θυσίες. (Λευιτ. 9:​1-5) Σαρ σικαντάς ο Ιεχωβά πι ευλογία οντουλένγκε σο αβιλέ ιερείς; Καζόμ ο Ααρών ντα ο Μωυσής ευλογίνενας ι λαός, ο Ιεχωβά μπουτσσαντάς γιακ σο χαλάς σαρί ι θυσία σο ατσσιλίας οπράλ κο θυσιαστήριος.​—Διαβάνεν Λευιτικό 9:​23, 24.

14. Σόσκε ισί σημαντικός αμένγκε αντιβές ότι ο Ιεχωβά ευλογίνελας τον Ααρών ντα λέσκε τσσαβέν σο αβιλέ ιερείς;

 ¹⁴ Σο σικαντάς η γιακ σο πελί κατά ουρανός; Σικαντάς ότι ο Ιεχωβά υποστηρίνελας σαρέ πι γκίσαρ τον Ααρών ντα λέσκε τσσαβέν σο αβιλέ ιερείς. Κάνα ο λαός ντικχλάς ότι ο Ιεχωβά ισινέ λέντζαρ, αγαντάς ότι έπρεπε τι υποστηρίνελ-λεν σαρέ πι γκίσαρ. Ισί σημαντικός ανταβά αμένγκε; Βα! Ο ιερείς κο Ισραήλ μανγκένας τι σικαβέν ότι κα αβένας γιαβερά πιο σημαντικοί ιερείς. Ο Χριστός, ο πιο μπαρό Αρχιερέας, τθερέλα 144.000 βασιλιαδέν σο ισί ιερείς-ντα σο κα υπηρετίνεν λέσαρ κο ουρανός.​—Εβρ. 4:​14· 8:​3-5· 10:1.

15, 16. Σαρ σικαβέλα ο Ιεχωβά ότι ντέλα πι ευλογία κο «πιστός ντα φρόνιμος δούλος»;

¹⁵ Κο 1919, ο Ιησούς τσσουντάς εκ χουρντί ομάδα χρισμέ πφραλένγκι τι αβέλ «ο πιστός ντα φρόνιμος δούλος». Οντουβά δούλος κερέλα κουμάντος τι βακέρντιβεν ο λατσσέ αμπέρια ντα ντέλα κο μαθητές κι Χριστόσκε «χαμπέ αζομάν σο πρέπει τι ντελ-λες». (Ματθ. 24:​45) Αμέν ντικχάσα ξεκάθαρα ι Ντεβλέσκι ευλογία οπράλ κο πιστός ντα φρόνιμος δούλος;

¹⁶ Ο Μπενγκ ντα λέσκο ντουνιάς κερντέ μπουτ πράγματα για τι τσσιναβέν ο έργος σο κερέλα ο πιστός ντα φρόνιμος δούλος. Άμα ανταβά δούλος να κα τθερέλας ι βοήθεια ι Ιεχωβάσκι, ναστί κα κερέλας ανταβά έργος. Παρόλο σο αβιλέ-πες ντούι μπαρέ τζένγκια σαρί κι πφουβ, αβιλέ οικονομικά προβλήματα, γκιλέ μπαρί κόντρα κι Ντεβλέσκε υπηρέτες ντα αδικιντέ-λεν, ο πιστός ντα φρόνιμος δούλος συνεχίνελα τι ντελ πνευματικός χαμπέ κο μαθητές κι Χριστόσκε κι πφουβ. Σκεφτίνεν ο πνευματικός χαμπέ σο τθεράσα αντιβές, χωρίς τι ποκινάς, 900 ντα πιο μπουτ τσσιμπέντε! Ανταβά σικαβέλα ξεκάθαρα ότι ο Ντεβέλ  υποστηρίνελα πι οργάνωση. Κάτι γιαβέρ σο σικαβέλα ι ευλογία ι Ιεχωβάσκι ισί ο έργος. Ο λατσσέ αμπέρια βακέρντιβενα μπαγιά «σαρί κι πφουβ». (Ματθ. 24:​14) Σίγουρα ο Ιεχωβά οδηγίνελα ντα ευλογίνελα αντράλ πι γκίσταρ πι οργάνωση αντιβές.

17. Σαρ μπορίνασα τι σικαβάς ότι υποστηρίνασα ι Ιεχωβάσκι οργάνωση;

¹⁷ Ισί λατσσό τι πουτσάς-αμέν: “Ισινόμ πφερντό εκτίμηση σο ισινόμ αντρέ κι οργάνωση κι Ιεχωβάσκι;” Αζομάν σο τζουβντιόλας ο Μωυσής ντα ο Ααρών, ο Ιεχωβά μπουτσσαντάς γιακ για τι σικαβέλ ότι ευλογίνελας οντουλέν σο αβιλέ ιερείς. Αντικάς αντιβές-ντα, ο Ιεχωβά σικαβέλα αμένγκε ξεκάθαρα ότι ανταγιά ισί λέσκι οργάνωση. Τθεράσα μπαγιά μπουτ λόγους τι αβάς πφερντέ εκτίμηση. (1 Θεσ. 5:​18, 19) Σαρ μπορίνασα τι σικαβάς ότι υποστηρίνασα ι Ιεχωβάσκι οργάνωση; Κεράσα-λες ανταβά κάνα ντάσα καν κο λάφια κι Γραφιάκε σο σικλιάσα κατά έντυπα, κατά συναθροίσεις ντα κατά συνελεύσεις, ντα κάνα κεράσα ο πιο λατσσό για τι βακεράς ο λατσσέ αμπέρια ντα τι σικλιαράς ι τζενέν.​—1 Κορ. 15:58.

18. Σο ισινέν αποφασισμέ τι κερέν;

¹⁸ Τι αβάς αποφασισμέ τι κεράς ανταλά σο σικλιλάμ κατά βιβλίος Λευιτικό. Μανγκάσα τι τθεράς ι Ιεχωβάσκι ευλογία για τι δεχτίνελ αμαρέ θυσίες. Τι υπηρετίνας ι Ιεχωβάς σόσκε ισινάμ πφερντέ εκτίμηση λέσκε. Τι συνεχίνας τι ντας κο Ιεχωβά ο πιο λατσσό σόσκε μανγκάσα-λες σαρέ αμαρέ γκίσαρ. Ντα τι κεράς σο νακχέλα αμαρέ βαστένταρ για τι υποστηρίνας ι οργάνωση σο βοβ ευλογίνελα αντιβές. Άμα κα κεράς-λεν σαρέ ανταλά, κα σικαβάς κο Ιεχωβά ότι εκτιμίνασα ο προνόμιος σο τθεράσα τι αβάς λέσκε Μάρτυρες!