1-2. Aiseā e ao ai ona naunau Kerisiano i aso nei e suʻesuʻe le tusi o Levitiko?

NA FAAMANATU atu e le aposetolo o Paulo i lana uō talavou o Timoteo e faapea, “o Tusitusiga Paia uma e mai i le agaga o le Atua, ma e aogā.” (2 Timo. 3:16) E aofia foʻi le tusi o Levitiko i Tusitusiga Paia. O le ā sou manatu i lenei tusi? E manatu nisi o tulafono o loo i lenei tusi e lē o toe aogā i o tatou aso, ae e lē o le manatu lenā o Kerisiano moni.

² E sili atu i le 3,500 tausaga, talu ona tusia le tusi o Levitiko, peitaʻi na faasaoina e Ieova lenei tusi “e faatonu ai i tatou.” (Roma 15:4) Talu ai o loo faamatala mai e le tusi o Levitiko manatu o Ieova, e ao ai la ona tatou naunau e suʻesuʻe. O le mea moni, e tele lesona e tatou te aʻoaʻoina mai i lenā tusi faagaeeina. Seʻi o tatou talanoaina ni lesona se fā.

3. Aiseā na ofo ai taulaga i le Aso o le Togisala i tausaga taʻitasi?

³ Lesona muamua: E tatau ona tatou maua le finagalo malie o Ieova ina ia talia ai a tatou taulaga. I le Aso o le Togisala i tausaga taʻitasi, e faapotopoto faatasi le nuu o Isaraelu ma ofo atu iā Ieova a latou taulaga na fai i manu. Na fesoasoani na taulaga e faamanatu ai i tagata Isaraelu, e tatau ona faamamāina a latou agasala! Peitaʻi, a o leʻi avatu e le ositaulaga sili se toto o so o se taulaga i totonu o le Mea e Sili Ona Paia, sa manaʻomia ona ia faia se gaoioiga e sili atu ona tāua, nai lo o le faamagaloina o agasala a le nuu.

4. E pei ona taʻua i le Levitiko 16:12, 13, o le ā na faia e le ositaulaga sili a o ulu atu i le uluaʻi taimi i totonu o le Mea e Sili Ona Paia, i le Aso o le Togisala? (Tagaʻi i le ata i le faavaa.)

 ⁴ Faitau le Levitiko 16:12, 13. Seʻi mafaufau i le vaaiga lenei, na tupu i le Aso o le Togisala: Ua ulu atu le ositaulaga sili i le faleʻie paia. O le uluaʻi taimi lea mai i taimi e tolu e tatau ona ulu atu ai i le Mea e Sili Ona Paia i lenā aso. O loo ia uuina i lona lima se ipu ua tumu i mea manogi lelei, ae o loo uu i le isi lima le ipu ua tumu i malala ola. Ua tū teisi o ia i luma o le ie puipui o loo vaelua ai le Mea Paia mai i le Mea e Sili Ona Paia. Ua ulu atu o ia ma le faaaloalo tele i le Mea e Sili Ona Paia, ma tū i luma o le atolaau o le feagaiga. I se uiga faafaatusa, o loo tū o ia i luma o Ieova le Atua! Ua liligi atu ma le faaeteete e le ositaulaga mea manogi paia i luga o malala ola, ma ua sasala le manogi lelei * i le potu. Mulimuli ane, ua toe ulu atu foʻi o ia i le Mea e Sili Ona Paia ma le toto o taulaga o agasala. Ia mātau, e faamū e le ositaulaga sili mea manogi lelei, a o leʻi ofoina atu le toto o taulaga o agasala.

5. O le ā e tatou te aʻoaʻoina mai i le faaaogāina o mea manogi lelei i le Aso o le Togisala?

⁵ O le ā e tatou te aʻoaʻoina mai i le faaaogāina o mea manogi lelei i le Aso o le Togisala? Ua faailoa mai e le Tusi Paia, o tatalo a auauna faamaoni a Ieova e na te talia, ua pei o ni mea manogi. (Sala. 141:2; Faaa. 5:8) Ia manatua, na faaalia e le ositaulaga sili le faaaloalo tele a o ia ofo atu mea manogi i luma o Ieova. I se tulaga talitutusa, e tatou te faaalia foʻi le matuā faaaloalo pe a tatou tatalo iā Ieova. E tatou te matuā talisapaia le faatagaina o i tatou e Lē na foafoaina le vateatea, ina ia tatou tatalo ma faalatalata atu iā te ia e pei o se tamaitiiti i lona tamā. (Iako. 4:8) E na te taliaina i tatou o ni ana uō! (Sala. 25:14) Talu ai e tatou te matuā talisapaia lenei faaeaga, e tatou te lē mananaʻo ai e fai se mea e faatigā ai lona finagalo.

6. O le ā e tatou te aʻoaʻoina mai i le faamūina e le ositaulaga sili o mea manogi lelei a o leʻi ofo atu taulaga?

⁶ Ia manatua, na faamū e le ositaulaga sili mea manogi a o leʻi ofo atu taulaga. O lona faia faapea, na ia faamautinoa ai e na te maua le finagalo malie o le Atua pe a ofo atu taulaga. O le ā e tatou te aʻoaʻoina mai ai? A o i ai Iesu i le lalolagi, na ia faia se mea e sili atu lona tāua nai lo o le saunia o le faaolataga mo tagata. Na ia faia lenā mea, a o leʻi ofoina atu lona ola e fai ma taulaga. O le ā lenā mea? Na saunia e Iesu le auala e talia ai e Ieova lana taulaga, e ala i lona usitaʻi ma faamaoni i lona olaga atoa a o i ai i le lalolagi. O le faia faapea, na ia faamaonia atu ai o le faia o mea i le auala a Ieova, o le auala saʻo lea e ola ai. Na faasilisilia e Iesu le pule silisili ese a lona Tamā, ma faamaonia le tonu o le auala e pule ai.

7. Aiseā na faafiafiaina ai Ieova i le olaga atoa o Iesu a o iai i le lalolagi?

⁷ I le olaga atoa o Iesu a o i ai i le lalolagi, na ia usitaʻi atoatoa i tapulaa amiotonu a Ieova. E leai se faaosoosoga po o se luʻi, e oo lava i le maliu tigā o le a oo iā te ia, e leʻi faavaivaia ai lona naunau e faamaonia atu le tonu o le auala e pule ai lona Tamā. (Fili. 2:8) Ina ua feagai Iesu ma tofotofoga, na tatalo atu o ia “ma le tagi tele ma loimata.” (Epe. 5:7) O ana tatalo faatauanau, na faamaonia ai lona faamaoni iā Ieova ma faamalosia ai lona naunau e tumau ona usiusitaʻi iā te ia. O tatalo a Iesu na pei o ni mea manogi lelei  iā Ieova. O le olaga atoa o Iesu na matuā faafiafiaina ai lona Tamā, ma faasilisilia ai Lana pule silisili ese.

8. E faapefea ona tatou faaaʻoaʻo i le auala na ola ai Iesu?

⁸ E mafai ona tatou faaaʻoaʻo iā Iesu, e ala i le faia o le mea e sili e usitaʻi ma faamaoni ai iā Ieova. Pe a fesagaʻia tofotofoga, e tatou te tatalo faatauanau mo le fesoasoani a Ieova ona e tatou te mananaʻo e faafiafia o ia. O le faia faapea, ua tatou lagolagoina ai le auala e pule ai Ieova. Ua tatou iloa e lē taliaina e Ieova a tatou tatalo, pe afai e tatou te faia amioga e na te inosia. Peitaʻi, pe a faatatau tapulaa a Ieova, e tatou te mautinoa o a tatou tatalo mai i le loto ua pei o ni mea manogi lelei iā Ieova. E tatou te mautinoa foʻi o lo tatou faamaoni ma le usiusitaʻi, e faafiafiaina ai lo tatou Tamā i le lagi.—Faata. 27:11.

9. Aiseā na ofo atu ai taulaga faifaatasi?

⁹ Lesona lona lua: E tatou te auauna iā Ieova ona o lo tatou lototalisapaia. Ina ia faamatilatila lenei uiga, seʻi o tatou iloiloina le taulaga faifaatasi, o se isi vala tāua o le tapuaʻiga moni i Isaraelu anamua. * Ua tatou aʻoaʻoina mai i le tusi o Levitiko, e ofo atu e se tagata Isaraelu se taulaga faifaatasi, e faaalia atu ai lona lototalisapaia. (Levi. 7:11-13, 16-18) E na te faia lenei taulaga, ona o lona manaʻo e fai, ae e lē ona o se tiute e tatau ona fai. O lea, na faia e lenei tagata le taulaga tauofo ona o lona alofa mo Ieova lona Atua. O le aano o le manu na osi ai le taulaga, na aai ai le tagata na faia le taulaga, o lona aiga, ma  ositaulaga. Ae e iai vaega o le manu e na o Ieova lava na ofo atu i ai. O ā na vaega?

10. O le ā ua tatou aʻoaʻoina mai i taulaga faifaatasi o loo i le Levitiko 3:6, 12, 14-16, i le uunaʻiga na fai ai e Iesu le finagalo o lona Tamā?

¹⁰ Lesona lona tolu: E tatou te avatu iā Ieova le mea e sili e tatou te mafaia, ona e tatou te alolofa iā te ia. O le gaʻo o le manu, o le vaega lea e sili ona lelei i le silafaga a Ieova. Na ia fetalai e iai totoga o le manu e sili ona tāua e aofia ai ma fatugaʻo. (Faitau le Levitiko 3:6, 12, 14-16.) O lea, e matuā faafiafiaina Ieova, pe a ofo atu iā te ia e se tagata Isaraelu na totoga tāua ma le gaʻo. O le tagata Isaraelu na faia lenā taulaga, na ia faaalia lona naunau moni e ofo atu i le Atua le mea e sili. I se tulaga talitutusa, na lotomalie Iesu e ofo atu iā Ieova le mea e sili e na te mafaia, e ala i lona auauna iā Ieova ma le lotoatoa ona o lona alofa mo Ia. (Ioa. 14:31) O le faia o le finagalo o le Atua o se mea na fiafia i ai Iesu, ma na matuā fiafia i le tulafono a le Atua. (Sala. 40:8) Maʻeu le faafiafiaina o Ieova i lona silasila mai o auauna atu Iesu ma le lotomalie!

11. Ua faapefea ona pei la tatou auaunaga o se taulaga faifaatasi, ma e faapefea ona faamāfanafanaina i tatou i le iloaina o lenā mea?

¹¹ I le pei o na taulaga faifaatasi, o la tatou auaunaga iā Ieova o se taulaga ofo e faaali atu ai o tatou faalogona mo ia. E tatou te avatu le mea e sili iā Ieova, ona e tatou te alolofa iā te ia ma o tatou lotoatoa. Maʻeu le faafiafiaina o Ieova i lona silasila mai i le faitau miliona o ona tagata tapuaʻi, ua lotomalilie e auauna iā te ia, ona o lo latou alolofa moni mo ia ma fiafia i ona ala! E faamāfanafanaina i tatou i le iloa, e silafia ma e faatāua e Ieova a tatou gaoioiga ma uunaʻiga e auauna ai iā te ia. O se faaaʻoaʻoga, pe afai o oe o se tagata matua ua lē mafai ona fai le tele o mea e te manaʻo iai, ia e mautinoa, e malamalama Ieova i mea e gata ai lou malosi, ma mea ua lē mafai ona e faia. E te ono mafaufau e itiiti le mea e mafai ona e faia mo Ieova, ae o loo silafia e Ieova, o lou alofa moni ua uunaʻia ai oe e fai le mea e te mafaia. E fiafia Ieova e talia le mea e sili e mafai ona e ofoina atu.

12. O ā faalogona o Ieova i taulaga faifaatasi, ma e faapefea ona faalaeiauina ai i tatou?

¹² O le ā e mafai ona tatou aʻoaʻoina mai i taulaga faifaatasi? A o mū i le afi vaega e sili ona lelei o le manu, ona alu aʻe lea i luga o le asu ma na faafiafiaina ai Ieova. Ia e mautinoa la, e faafiafiaina Ieova i lou lotomalie e fai le mea e sili e te mafaia e auauna ai iā te ia. (Kolo. 3:23) Seʻi faaata i lou mafaufau le fiafia o Ieova iā te oe. E tusa pe e itiiti pe e tele mea e te faia mo Ieova, e matuā tāua iā te ia na mea, ma e na te manatuaina e faavavau.​—Mata. 6:20; Epe. 6:10.

13. E tusa ai o le Levitiko 9:23, 24, na faapefea ona faaalia e Ieova lona finagalo malie i ositaulaga fou?

¹³ Lesona lona fā: O loo faamanuia e Ieova le vaega faalelalolagi o lana faalapotopotoga. Seʻi manatu i le mea na tupu i le 1512 T.L.M., ina ua faatū le faleʻie paia i le auvae mauga o Sinai. (Eso. 40:17) Na taʻimua Mose i se sauniga na tofia ai Arona ma ona atalii o ni ositaulaga. Na faapotopoto faatasi le nuu e molimauina le ofoina atu e ositaulaga o taulaga o manu mo le taimi muamua. (Levi. 9:1-5) Na faapefea ona faaalia e Ieova lona finagalo malie i ositaulaga fou? A o faamanuia atu Arona ma Mose i le nuu, ona sau ai lea o le afi mai iā Ieova ma faamū ai mea na totoe o le taulaga i luga o le fata faitaulaga.​—Faitau le Levitiko 9:23, 24.

14. Aiseā e aogā ai iā i tatou i aso nei le faiva faaositaulaga a Arona ma ona atalii?

 ¹⁴ O le ā na faailoa mai e le afi mai iā Ieova ina ua tofiaina le ositaulaga sili? Na faailoa mai ai le lagolagosua atoatoa a Ieova iā Arona ma ona atalii, o ē na ia tofia e avea ma ositaulaga. Ina ua vaaia e tagata Isaraelu le faamaoniga o le lagolagosua a Ieova i ositaulaga, na latou malamalama ai, e tatau foʻi ona latou lagolagoina le ʻauositaulaga. Pe e aogā mo i tatou? Ioe! O le faiva faaositaulaga i Isaraelu, ua na o se ata o se faiva faaositaulaga e sili atu. O Keriso o le ositaulaga e sili atu, e iai lana ʻauositaulaga ua avea ma tupu e 144,000, o ē o le a auauna faatasi ma ia i le lagi.​—Epe. 4:14; 8:3-5; 10:1.

15-16. O ā faamaoniga manino o le lagolagoina e Ieova o “le pologa faamaoni ma le faautauta”?

¹⁵ I le 1919, na tofia ai e Iesu se vaega itiiti o uso faauuina e avea ma “le pologa faamaoni ma le faautauta.” O lenā pologa e taʻimua i le galuega talaʻi, ma saunia “meaʻai i le taimi tatau” mo soo o Keriso. (Mata. 24:45) Po o tatou iloa atu faamaoniga manino o le lagolagosua a le Atua i le pologa faamaoni ma le faautauta?

¹⁶ O loo taumafai malosi Satani ma ana ʻau e taofi ma faafaigatā le galuega a le pologa faamaoni. E ui i aafiaga mai i taua e lua a le lalolagi, sauāga faifai pea, paʻū maulalo o le tamaoaiga o le lalolagi aoao ma faiga lē tonu, ae o loo faaauau pea ona saunia mai e le pologa faamaoni ma le faautauta meaʻai faaleagaga mo soo o Keriso i le lalolagi. Seʻi mafaufau i le anoanoaʻi o meaʻai faaleagaga o loo maua i aso nei, e maua fua, ma o loo maua i le silia ma le 900 gagana! O se faamaoniga manino o le lagolagosua a le Atua. O le galuega talaʻi o le isi faamaoniga o le faamanuia a Ieova. Ua talaʻia le tala lelei “i le  lalolagi atoa.” (Mata. 24:14) E mautinoa o loo taʻitaʻia ma faamanuia e Ieova lana faalapotopotoga i aso nei.

17. E faapefea ona tatou lagolagoina le faalapotopotoga o loo faaaogā e Ieova?

¹⁷ E tatau ona fesili ifo iā i tatou lava, ʻPo o oʻu talisapaia le auaufaatasi ma le vaega faalelalolagi a le faalapotopotoga a Ieova?’ Ua faailoa mai e Ieova faamaoniga manino ua faatalitonu ai i tatou, e pei o le afi mai i le lagi i aso o Mose ma Arona. E anoanoaʻi mea e tatou te lotofaafetai ai. (1 Tesa. 5:18) E faapefea ona tatou lagolagoina le faalapotopotoga o loo faaaogā e Ieova? E ala i lo tatou faatatauina o taʻiala mai i le Tusi Paia, o loo aumaia i a tatou lomiga, sauniga, fonotaga ma tauaofiaga. E lē gata i lea, e tatou te lagolagoina foʻi le pologa e ala i le faia o se sao atoatoa i le galuega talaʻi ma le aʻoaʻo atu.​—1 Kori. 15:58.

18. O le ā ua e maumauaʻi e fai?

¹⁸ Seʻi o tatou maumauaʻi e faatatau lesona ua tatou aʻoaʻoina mai i le tusi o Levitiko. Tau ina ia tatou maua le finagalo malie o Ieova, ina ia talia ai a tatou taulaga. Seʻi o tatou auauna pea iā Ieova ona o lo tatou talisapaia o ia. Ia faaauau ona avatu le mea e sili iā Ieova, ona e tatou te alolofa iā te ia ma o tatou lotoatoa. Ia tatou lagolagoina ma le lotoatoa le faalapotopotoga o loo ia faamanuia i ai i aso nei. O lo tatou faia o nei mea uma, ua faailoa atu ai iā Ieova e tatou te faatāuaina le faaeaga ua tatou maua, e auauna ai iā te ia o ni ana Molimau!