1-2. Faandi mbei Keesitu sëmbë u di ten aki musu kë ko sabi soni u di buku Leifitiki?

APÖSUTU Paulosu bi toona mëni hën mati Timoteo taa „Gadu seei wë mbei sëmbë sikifi hii dee soni dee dë a Gadu Buku. Dee soni aki bunu” (2 Tim. 3:16). Hën da di buku Leifitiki seei dë a dendu tu. Unfa i ta si di buku dë? So sëmbë ta si ën kuma wan buku di abi sömëni wëti, di an bunu da u a di ten aki möön. Ma tuutuu Keesitu sëmbë an ta si ën sö.

² De sikifi di buku Leifitiki söwan 3500 jaa pasa, ma tökuseei Jehovah seeka soni sö taa u sa ta feni ën lesi (Lom. 15:4). U di di buku Leifitiki ta heepi u fuu ko fusutan unfa Jehovah ta si soni, mbei u musu kë ko sabi soni fëën. Sömëni soni dë di u sa lei a di buku Leifitiki. Boo taki u fö u dee soni dee u sa lei nëën.

3. Faandi mbei dee Isaëli sëmbë bi ta tjuma soni da Gadu a wan apaiti daka u di jaa?

³ Di fosu soni di u ta lei: Ee u kë u Jehovah wai ku dee soni dee u ta du dëën, nöö libi fuu musu kai ku ën. Wan pasi a wan jaa dee Isaëli sëmbë bi musu ta hakisi paadon u dee zöndu u de. De bi ta ko makandi, nöö di gaan mindima bi ta tjuma mbeti da Gadu. Di tja di dee Isaëli sëmbë bi ta tja mbeti go tjuma da Gadu a di daka dë, bi ta heepi de u de an fëëkëtë taa de bi abi heepi fanöudu u de kumutu a zöndu basu! Ma ufö di gaan mindima tja di buuu u dee mbeti go a di Möön Santa Kamian u di tenti u Gadu, nöö a bi musu du wan soni fosu. Di soni di a bi musu du dë, bi  dë fanöudu möön di tja di a bi musu tja di buuu u dee mbeti go a di Möön Santa Kamian, u Gadu bi sa da dee sëmbë paadon u dee zöndu u de.

4. Andi di gaan mindima bi ta du te a bi denda go a di Möön Santa Kamian u di fosu pasi, a di daka di dee Isaëli sëmbë bi musu hakisi paadon u dee zöndu u de? (Luku di peentje u di kafiti.)

⁴ Lesi Leifitiki 16:12, 13. Pakisei unfa soni bi ta dë a di daka di dee Isaëli sëmbë bi musu hakisi paadon u dee zöndu u de: Di gaan mindima ta waka nango a di tenti u Gadu dendu. A ta denda go a di Möön Santa Kamian u di tenti, nöö a musu du di soni dë dii pasi a di daka dendu. A ta panjan wan panu di dë fuufuu ku sumëë suti fatu a dendu, ku wan maun, nöö a di woto së maun, a ta tja wan goutu sikopu di dë ku zonka kendikendi. A taanpu a di koosu fesi, di ta paati di Santa Kamian ku di Möön Santa Kamian. Ku gaan lesipeki a ta denda go a di Möön Santa kamian, nöö a go taanpu a di këdë u di buka fesi. U sa taki taa a dë kuma a go taanpu a Jehovah Gadu fesi! Baka di dë, di mindima ta kandi di santa fatu këdëë tuwë a di kendikendi zonka liba, nöö hii di kamba ta bigi sumëë suti vaaan. * Bakaten a o toona ko a di Möön Santa Kamian ku di buuu u dee mbeti di de kii. Hoi a pakisei taa a ta tjuma di sumëë suti fatu ufö a tja di buuu u dee mbeti go a di Möön Santa kamian.

5. Unfa di gaan mindima bi ta denda go a di Möön Santa Kamian ku di sumëë suti fatu, nöö andi u sa lei a di soni dë?

⁵ Unfa di gaan mindima bi ta denda go a di Möön Santa Kamian ku di sumëë suti fatu, nöö andi u sa lei a di soni dë? Di Bëibel ta taki taa dee begi u dee dinima u Jehovah dë kuma sumëë suti fatu dëën (Ps. 141:2; Ako. 5:8). Kumafa u bi taki kaa, te di gaan mindima bi ta tja di fatu go tjuma da Jehovah, nöö a bi ta du ën ku gaan lesipeki. Sö nöö a musu dë te u ta begi. Te u ta begi Jehovah, nöö u musu du ën ku gaan lesipeki. U ta tei ën u bigi seei taa di Sëmbë di mbei hii soni a mundu ta da u pasi fuu fan ku ën, söseei taa a ta da u pasi fuu ku ën ko dë mati. A kë taa u ku ën musu libi kuma tata ku mii (Jak. 4:8). A ta si u kuma mati fëën! (Ps. 25:14) U ta tei di soni aki u bigi sö tee taa wa kë du na wan soni di an ta kai ku ën.

6. Andi u sa lei a di tjuma di di gaan mindima bi ta tjuma di sumëë suti fatu ufö a tjuma dee mbeti da Jehovah?

⁶ Hoi a pakisei taa di gaan mindima bi musu tjuma di fatu ufö a bi sa tjuma dee mbeti da Jehovah. Te a bi du di soni dë, nöö a bi o sa dë seiki taa Gadu ta wai ku ën. Di soni aki ta lei u wan soni u Jesosi. Di Jesosi bi dë a goonliba aki, a bi musu du wan gaan fanöudu soni ufö a bi sa dëdë paka zöndu da u. Di soni di a bi musu du, bi bigi möön di puu di a bi musu puu sëmbë a zöndu basu. Andi a bi musu du? A bi musu ta piki Jehovah buka hii hën libi longi, ufö Jehovah bi o sa tei di paima di a bi o paka da u, u bigi. Ee Jesosi bi piki Jehovah buka a hii soni, nöö a bi o lei taa di möön bunu soni di wan sëmbë sa du, da u du soni kumafa Jehovah kë. A sö wan fasi Jesosi bi sa lei tu taa Jehovah hën abi leti u tii, söseei taa Jehovah ta tii a wan bunu fasi.

7. Faandi mbei u sa taki taa di fasi fa Jesosi bi libi di a bi dë a goonliba aki bi kai ku Jehovah?

⁷ Di Jesosi bi dë a goonliba aki, a bi piki Jehovah buka a hii soni. Hii fa sömëni tesi bi ta miti ën, hii fa so juu soni bi ta taanga dëën, söseei hii fa a bi sabi taa de bi o kii ën a wan hogihati fasi, tökuseei a bi dë kabakaba u lei taa di fasi fa hën Tata ta du soni da di möön bunu fasi (Fil. 2:8). Te tesi bi ta miti Jesosi, nöö Jesosi bi ta begi „ku bai këë, ku wata a wojo seei”  (Heb. 5:7). Di begi di a bi ta begi ku hii hën hati bi ta lei taa a bi ta hoi hënseei a Jehovah, nöö dee lö begi dë bi ta heepi ën faa dë möön kabakaba u piki Jehovah buka. Dee begi u Jesosi bi ta dë da Jehovah kuma di sumëë suti fatu di de bi ta tjuma dëën. Di fasi fa Jesosi bi libi di a bi dë a goonliba aki bi kai ku Jehovah gaanfa seei, söseei di fasi fa a bi libi bi lei gbelingbelin taa Jehovah hën abi leti u tii.

8. Unfa u sa djeesi Jesosi a di fasi fa a bi ta libi?

⁸ Useei sa djeesi Jesosi te u ta mbei hii möiti fuu ta piki Jehovah buka a soni, söseei te u ta hoi useei nëën hii juu. Te tesi ta miti u, nöö u ta begi Jehovah taangataanga faa heepi u, u di u kë du soni di ta kai ku ën. Te u ta du sö, nöö u ta lei taa u kë u Jehovah hën musu tii. U ta fusutan taa Jehovah an o haika dee begi fuu ee u ta du soni di a ta buuse. Ma te u ta du dee soni dee a lobi, nöö u sa dë seiki taa dee begi fuu o dë da Jehovah, kuma sumëë suti fatu di de bi ta tjuma dëën. Boiti di dë, u sa dë seiki taa di hoi di u ta hoi useei a Jehovah, ku di piki di u ta piki hën buka hii juu, ta kai ku Jehovah, di Tata fuu di dë a liba ala.​—Nöng. 27:11.

9. Faandi mbei dee Isaëli sëmbë bi ta tja mbeti go tjuma da Gadu u lei taa de ku ën bi dë bunu?

⁹ Di u tu soni di u ta lei: U ta dini Jehovah u di u ta tei dee soni dee a du da u, u bigi. Woo si taa sö di soni aki dë tuutuu, te woo taki soni u di tja di dee Isaëli sëmbë bi ta tja wan mbeti go tjuma da Gadu u lei taa de ku ën bi dë bunu. * A di buku Leifitiki, u ta lei taa dee Isaëli sëmbë bi sa tja wan mbeti go tjuma da Gadu, u lei taa de bi ta tei dee soni di Gadu bi ta du da de u bigi (Leif. 7:11-13, 16-18). De an bi ta tja sö  wan soni go tjuma da Gadu u di de bi musu u du ën, ma de bi ta du ën u di de bi fii u du ën. Fëën mbei u sa taki taa di tja di dee Isaëli sëmbë bi ta tja mbeti go tjuma da Gadu u lei taa de ku ën dë bunu, bi dë wan soni di wan sëmbë bi ta du da Gadu, u di a lobi ën. Di sëmbë di bi ta tja di mbeti go da Gadu, dee sëmbë fëën wosudendu, ku dee mindima tuu bi ta njan di gbamba dë. Ma de bi musu tjuma so pisi u di mbeti da Jehovah. Un pisi de bi musu tjuma dëën?

10. Leifitiki 3:6, 12, 14-16 ta taki u di tja di dee Isaëli sëmbë bi ta tja wan mbeti go tjuma da Gadu u lei taa de ku ën bi dë bunu. Unfa u sa tei di soni aki maaka ku di dini di Jesosi bi ta dini Jehovah?

¹⁰ Di u dii soni di u ta lei: U ta da Jehovah di möön bunu soni di u abi, u di u lobi ën. Jehovah bi ta si di fatu u di mbeti kuma di möön bunu pisi u di mbeti. Jehovah bi taki tu taa so pisi u di mbeti, ku di lëbë fëën, bi dë gaan dii soni dëën. (Lesi Leifitiki 3:6, 12, 14-16.) Fëën mbei Jehovah bi ta wai gaanfa seei te wan Isaëli sëmbë bi tja dee lö pisi u di mbeti dë go dëën, u di hënseei bi fii faa du ën. Dee Isaëli sëmbë dee bi ta du di soni dë, bi ta lei taa de bi kë da Jehovah di möön bunu soni di de abi. A di wan seei fasi, Jesosi bi da Jehovah di möön bunu soni di a bi abi, di a bi dini ën ku hii hën hati, u di a lobi ën (Joh. 14:31). Jesosi bi ta wai u piki Gadu buka a soni, nöö na piki lobi a bi lobi dee wëti u Gadu (Ps. 40:8). Na piki wai Jehovah bi o ta wai, di a bi ta si taa hii juu Jesosi bi ta dë kabakaba u dini ën ku hii hën hati!

11. Unfa di dini di u ta dini Jehovah dë kuma di tja di dee Isaëli sëmbë bi ta tja wan mbeti go tjuma da Gadu u lei taa de ku ën bi dë bunu, nöö unfa di soni aki sa da u taanga?

¹¹ Di dini di u ta dini Jehovah dë kuma di tja di dee Isaëli sëmbë bi ta tja wan mbeti go tjuma da Gadu u lei taa de ku ën dë bunu. Dee Isaëli sëmbë bi ta du di soni aki u di deseei bi kë du ën u lei unfa de lobi Jehovah tjika. Sö nöö useei ta dini Jehovah tu söndö duwengi, u di u kë lei unfa u lobi ën tjika. U ta da Jehovah di möön bunu soni di u abi, u di u lobi ën ku hii u hati. A musu u dë taa Jehovah ta wai, te a ta si unfa milionmilion sëmbë ta dini ën u di de lobi ën! Jehovah ta si dee soni dee u ta du dëën, söseei a ta si di soni di mbei u ta du dee soni dë dëën, nöö a ta tei di soni dë u bigi seei. I sa dë seiki taa Jehovah ta fusutan i ee ja sa du sö hia soni dëën möön u di i ko gaandi. Kandë i ta fii taa ja sa du soni da Jehovah wan bëtë, ma Jehovah ta si unfa i lobi ën tjika, söseei a ta si taa di lobi dë hën ta mbei i ta du soni dëën ka i sa du dou. A ta wai seei te i ta dëën di möön bunu soni di i abi.

12. Unfa Jehovah bi ta fii te dee Isaëli sëmbë bi ta tja wan mbeti go tjuma dëën u lei taa de ku ën dë bunu, nöö unfa di soni aki ta da u taanga?

¹² Andi u sa lei a di tja di dee Isaëli sëmbë bi ta tja wan mbeti go tjuma da Gadu u lei taa de ku ën dë bunu? Te di faja bi ta tjuma dee möön bunu pisi u di mbeti, nöö di sumuku fëën bi ta hopo go a liba, nöö di soni dë bi ta mbei Jehovah fii bunu. Fëën mbei i sa dë seiki taa Jehovah ta wai ku i tu te i ta mbei hii möiti di i sa, u dini ën (Kol. 3:23). Pakisei unfa a ta wai ku i tjika. Aan toobi ee i sa du hia soni da Jehovah, nasö ee ja sa du hia soni dëën. Jehovah ta tei dee soni dee i ta du dëën u bigi, nöö an o fëëkëtë dee soni dë.​—Mat. 6:20; Heb. 6:10.

13. Unfa Jehovah bi lei taa a bi wai ku dee sëmbë dee bi ko dë mindima fëën, te u luku Leifitiki 9:23, 24?

¹³ Di u fö soni di u ta lei: Jehovah ta mbei soni waka bunu da dee dinima fëën. Pakisei di soni di bi pasa a di jaa 1512 Bifö Keesitu, di dee Isaëli sëmbë bi seti di tenti u Gadu leti a di kuun de kai Sinai, fesi (Ëki. 40:17). Mosesi hën bi dë fesima u wan komakandi di de bi hoi, nöö de bi buta Alon ku dee womi mii fëën ko mindima. Dee Isaëli sëmbë bi ko makandi u de si  fa dee mindima bi o tjuma mbeti da Jehovah u di fosu pasi (Leif. 9:1-5). Unfa Jehovah bi lei taa a bi wai ku dee sëmbë dee bi ko dë mindima fëën? Di Alon ku Mosesi bi ta wensi bunu da dee sëmbë, hën Jehovah bi mbei faja kumutu a liba ala ko tjuma di mbeti di bi fika a di begitafa.​—Lesi Leifitiki 9:23, 24.

14. Faandi mbei di lei di Jehovah bi lei taa a bi dë ku dee mindima u Isaëli, dë wan fanöudu soni da u a di ten aki?

¹⁴ Andi di faja di bi kumutu a liba ala bi mbei dee sëmbë ko fusutan? Jehovah bi mbei di faja kumutu a liba ala, u lei taa a bi wai taa Alon ku dee womi mii fëën bi ko dë mindima fëën, söseei u lei taa a bi dë ku de. Di dee Isaëli sëmbë bi si taa Jehovah bi dë ku dee mindima, a bi da de taanga u de wooko makandi ku de. Faandi mbei di lei di Jehovah bi lei taa a bi dë ku dee mindima u Isaëli, dë wan fanöudu soni da u a di ten aki? Wë u di di soni dë ta lei taa wan möön gaan soni bi o pasa bakaten. Keesitu, da di möön heiwan u dee Gaan Mindima, nöö hën ku 144.000 sëmbë o dë mindima u Gadu a liba ala. Hën ku dee sëmbë aki o dë könu tu.​—Heb. 4:14; 8:3-5; 10:1.

15-16. Unfa Jehovah ta lei taa a dë ku „di köni saafu di dë u futoou”?

¹⁵ A di jaa 1919, Jesosi bi tei wantu baaa, hën a buta de ko dë „di köni saafu di dë u futoou”. Di saafu aki ta tii di peleikiwooko, söseei a ta da dee bakama u Keesitu „njanjan a di soifi ten” (Mat. 24:45). U ta si taa Gadu dë ku di köni saafu di dë u futoou ö?

¹⁶ Saatan ku dee bakama fëën ta mbei möiti u de tapa di wooko u di saafu di dë u futoou. Ee Jehovah an bi dë ku di saafu aki, nöö an bi o sa du di wooko di a ta du nöunöu. Tu Goonliba Feti bi dë, söseei möni soni u di goonliba aki an bi ta waka bunu. Boiti di dë, sëmbë bi du  ku dee sëmbë u Gadu, söseei de an bi libi ku de a wan leti fasi. Ma hii fa dee soni aki bi pasa, tökuseei di köni saafu di dë u futoou ta lei dee bakama u Jesosi soni u Bëibel go dou. Pakisei dee peipei buku ku dee woto soni dee u abi a di ten aki. Dee soni aki dë a möön leki 900 töngö, nöö u sa feni de söndö u paka! Di soni aki ta lei gbelingbelin taa Gadu dë ku di saafu aki. Di du di u ta du di peleikiwooko seei ta lei taa Jehovah dë ku u. Di bunu buka u di Könuköndë ta paaja te dou „hii goonliba” (Mat. 24:14). U ta si gbelingbelin taa Jehovah ta tii di ölganisaasi fëën a di ten aki, söseei taa a ta mbei soni waka bunu a di ölganisaasi fëën.

17. Unfa u sa lei taa u ta wooko makandi ku di ölganisaasi u Jehovah?

¹⁷ A bunu fuu hakisi useei di soni aki: ’Mi ta tei ën u bigi taa mi dë a di ölganisaasi u Jehovah u?’ A di ten di pasa, Jehovah bi mbei faja kumutu a liba ala ko tjuma soni a goonliba aki, u lei taa a bi dë ku dee sëmbë di de bi buta ko dë mindima fëën. Wë sö nöö Jehovah lei u gbelingbelin taa a ta tii di ölganisaasi fëën a di ten aki. Dee soni aki musu mbei u dë ku tangi a hati tuutuu (1 Tes. 5:18, 19). Unfa u sa lei taa u ta wooko makandi ku di ölganisaasi u Jehovah? Wë u sa du di soni aki te u ta du dee soni dee u ta lei a di Bëibel, a dee buku fuu, söseei a dee komakandi dee u ta hoi hiniwan wiki ku dee gaan komakandi fuu. Boiti di dë, u sa lei taa u ta wooko makandi ku di ölganisaasi u Jehovah te u ta mbei hii möiti ta peleiki, ta lei sëmbë soni u Bëibel.​—1 Kol. 15:58.

18. Andi joo mbei möiti fii du?

¹⁸ Boo mbei möiti fuu wooko ku dee soni dee u lei a di buku Leifitiki. Boo mbei Jehovah wai ku dee soni dee u ta du dëën. Boo ta dini Jehovah, u di u ta tei dee soni dee a du da u u bigi. Boo ta mbei möiti go dou fuu dini Jehovah ka u sa dini ën dou, u di u lobi ën ku hii u hati. Söseei boo du hii soni di u sa du, fuu wooko makandi ku di ölganisaasi fëën. Te u ta du hii dee soni aki, nöö woo lei Jehovah taa u ta tei ën u bigi taa u sa dë wan Kotoigi fëën!