1-2. Fu san ede Kresten na ini a ten disi musu studeri a buku Lefitikus?

NA APOSTEL Paulus taigi en yongu mati Timoteyus taki ’na Gado srefi ben meki sma skrifi ala den sani di de na ini Gado Buku èn taki den sani disi bun fu gi leri’ (2 Tim. 3:16). A buku Lefitikus na wan fu den buku na ini Gado Wortu. Fa yu e denki fu a Bijbel buku disi? Kande son sma feni taki a buku disi abi wan lo wet di no de gi a ten fu wi, ma tru Kresten e denki tra fasi.

² A buku Lefitikus skrifi sowan 3500 yari pasa, ma Yehovah sorgu taki wi abi a buku disi ete na ini a ten disi so taki ’wi kan leri wan sani fu en’ (Rom. 15:4). Fu di Lefitikus e sori fa Yehovah e denki fu son sani, meki wi musu studeri a buku disi. Fu taki en leti, wi kan leri furu sani fu a buku Lefitikus. Wi o poti prakseri na fo fu den sani dati.

3. Fu san ede a pipel ben abi wan spesrutu dei fu tyari ofrandi fu kan kisi pardon fu den sondu fu den?

³ A fosi sani: Efu wi wani taki Yehovah feni den ofrandi fu wi bun, dan a musu feni wi bun fosi. Ala yari den Israelsma ben e kon makandra tapu wan spesrutu dei fu tyari ofrandi fu kan kisi pardon fu den sondu. Den ofrandi dati ben e memre den Israelsma taki den ben musu kon krin fu den sondu fu den. Ma fosi a granpriester ben tyari a brudu fu den ofrandi go na ini a Moro Santa Presi, a ben musu du wan moro prenspari sani.

4. Soleki fa Lefitikus 16:12, 13 e sori, dan san a granpriester ben e du a fosi leisi te a ben e go na ini a Moro Santa Presi? (Luku a fowtow tapu a kafti.)

 ⁴ Leisi Lefitikus 16:12, 13. Prakseri san ben e pasa na tapu a spesrutu dei disi: A granpriester ben go na ini a tabernakel. A dei dati a ben e go dri leisi na ini a Moro Santa Presi. A fosi leisi te a ben e go na inisei, a ben e hori wan baki nanga switismeri na ini wan anu, èn na ini a tra anu a ben hori a gowtu pan di ben abi krofaya di e bron na ini. A e tan tanapu eife na fesi a garden di e tapu a Moro Santa Presi. Nanga bigi lespeki a e go na ini a Moro Santa Presi, dan a e tanapu na fesi a santa kisi fu a frubontu. Te a ben drape a ben de neleki a ben tanapu na fesi Yehovah Gado srefi! Now a granpriester e kanti a switismeri na tapu den krofaya èn a heri kamra e bigin smeri switi. * Bakaten a o go baka na ini a Moro Santa Presi nanga a brudu fu den meti di a ben tyari leki sondu-ofrandi. Luku taki a e bron a switismeri fosi a tyari a brudu fu den sondu-ofrandi go na ini a Moro Santa Presi.

5. San wi kan leri fu a bron di a granpriester ben e bron switismeri?

⁵ San wi kan leri fu a bron di a granpriester ben e bron switismeri tapu a spesrutu dei te den ben e aksi pardon? Bijbel e sori taki den begi fu den reti-ati anbegiman fu Yehovah de leki switismeri (Ps. 141:2; Openb. 5:8). Prakseri taki a granpriester ben musu tyari a switismeri na fesi Yehovah nanga bigi lespeki. Na so a de tu taki te wi e begi Yehovah, wi e du dati na wan lespeki fasi tu. Wi de nanga tangi trutru taki a Mekiman fu hemel nanga grontapu e gi pasi taki wi kan kon krosibei na en èn taki wi kan taki nanga en neleki fa wan pikin e taki nanga en papa (Yak. 4:8). A e teki wi leki en mati tu (Ps. 25:14). Wi breiti so te taki a gi wi a grani disi, taki noiti wi wani du wan sani di o meki a sari.

6. A granpriester ben e bron switismeri fosi a ben tyari den meti leki ofrandi. San disi e leri wi fu Yesus?

⁶ Neleki fa wi si, dan a granpriester ben musu bron a switismeri fosi a ben kan tyari den tra ofrandi. Na a fasi dati a ben e sorgu taki Yehovah ben o feni en bun te a ben o tyari den meti leki ofrandi. A sani disi e leri wi wan prenspari sani fu Yesus. Di a ben de na grontapu, a ben musu du wan prenspari sani, fosi a ben kan gi en libi leki wan ofrandi. A sani di a ben musu du ben prenspari moro a frulusu di libisma ben musu kisi. San a ben musu du? A heri pisi ten di a ben de na grontapu, a ben musu gi yesi na Yehovah so taki Yehovah ben kan feni na ofrandi fu en bun. Na a fasi dati Yesus ben o sori taki a moro bun fasi fu libi, na fu du sani soleki fa Yehovah wani. Yesus sori taki en Papa abi a reti fu tiri èn taki a fasi fa a e tiri na a moro bunwan.

7. Fu san ede Yehovah ben breiti nanga ala san Yesus du di a ben de na grontapu?

⁷ A heri pisi ten di Yesus ben de na grontapu a gi yesi na Yehovah ala ten. Aladi a ben kisi tesi nanga problema èn aladi a ben sabi taki a ben o dede wan hati dede, toku a horidoro fu di a ben wani sori taki en Papa na a moro bun Tiriman (Fil. 2:8). Di Yesus ben e kisi tesi,  a ben e begi fayafaya (Hebr. 5:7). Den begi fu Yesus ben sori taki a ben lobi Yehovah nanga en heri ati èn den yepi en fu tan gi yesi na en. Gi Yehovah, den begi fu Yesus ben de leki switismeri. Yehovah ben breiti nanga ala san Yesus du di a ben de na grontapu. Iya, Yesus sori taki na Yehovah abi a reti fu tiri èn taki a tiri fu en na a moro bunwan.

8. Fa wi kan teki na eksempre fu Yesus?

⁸ Neleki Yesus wi musu du ala san wi man fu gi yesi na Yehovah ala ten. Te wi e kisi tesi, dan wi e begi Yehovah fayafaya fu yepi wi, fu di wi wani prisiri en ati. Na a fasi disi wi e sori taki wi e si Yehovah leki a moro bun Tiriman. Wi e frustan taki Yehovah no o arki den begi fu wi te wi e du sani di a no feni bun. Ma efu wi e libi soleki fa Yehovah wani, dan wi kan de seiker taki den begi fu wi o de leki switismeri gi en. Te wi e tan gi yesi na wi hemel Papa, dan wi o prisiri en ati.​—Odo 27:11.

9. Fu san ede wan Israelsma ben e tyari freide-ofrandi?

⁹ A di fu tu sani: Wi e dini Yehovah fu di wi de nanga tangi gi san a du gi wi. Den freide-ofrandi di den Israelsma ben musu tyari e sori fu san ede wi musu dini Yehovah. * Na ini a buku Lefitikus wi e si taki wan Israelsma ben kan tyari freide-ofrandi „fu taki Gado tangi” (Lef. 7:11-13, 16-18). A no ben du dati fu di a ben  musu fu du en, ma fu di a ben wani du en. Sobun, wan sma srefi ben bosroiti fu tyari na ofrandi disi fu di a ben lobi Yehovah Gado. A sma di ben tyari na ofrandi, ben nyan a meti makandra nanga en famiri nanga den priester. Ma son pisi fu a meti den no ben mag nyan. Den ben musu gi den pisi dati na Yehovah. Sortu pisi?

10. Fa den freide-ofrandi di kari na Lefitikus 3:6, 12, 14-16 e sori wi fu san ede Yesus ben e du a wani fu en Papa?

¹⁰ A di fu dri sani: Fu di wi lobi Yehovah, meki wi e gi en a moro bun sani di wi abi. Yehovah ben si a fatu fu den meti leki a moro bun pisi fu a meti. A ben taki tu dati den niri nanga a lefre ben de prenspari pisi fu a meti di den ben musu gi en. (Leisi Lefitikus 3:6, 12, 14-16.) Sobun, Yehovah ben breiti srefisrefi te wan Israelsma ben gi en den pisi disi fu a meti nanga a fatu. Efu wan Israelsma ben tyari so wan ofrandi, dan a ben sori taki a ben wani gi Yehovah a moro bun sani di a ben abi. Na so a ben de tu, taki Yesus gi Yehovah a moro bun sani di a ben abi, fu di a ben lobi Yehovah èn a ben e dini en nanga en heri-ati (Yoh. 14:31). A ben e gi Yesus furu prisiri fu du a wani fu Gado. A ben lobi den wet fu Gado trutru (Ps. 40:8). Yehovah ben breiti srefisrefi fu si taki Yesus ben e dini en na a fasi disi!

11. Fa a wroko di wi e du gi Yehovah de leki den freide-ofrandi èn fa disi kan trowstu wi?

¹¹ Den sani di wi e du gi Yehovah de leki den freide-ofrandi, fu di den e sori o furu wi lobi en. Wi e gi Yehovah a moro bun sani fu wi, fu di wi lobi en nanga wi heri ati. Yehovah musu fu breiti taki milyunmilyun sma e anbegi en fu di den lobi en èn fu di den lobi a fasi fa a e tiri! A de wan trowstu fu sabi taki Yehovah no e luku nomo san wi e du, ma a e luku tu fu san ede wi e dini en. Fu eksempre, efu yu owru èn yu no man du so furu moro leki fosi, dan yu kan de seiker taki Yehovah e frustan yu situwâsi. Kande yu e firi leki yu no e du furu gi Yehovah, ma Yehovah e si taki yu lobi en èn taki yu e du san yu man. A breiti nanga yu fu di yu e gi en a moro bun sani di yu abi.

12. Fa Yehovah ben feni den freide-ofrandi èn fa dati e gi wi deki-ati?

¹² San wi kan leri fu den freide-ofrandi? Te a faya ben e bron den moro bun pisi fu a meti, smoko ben opo go na loktu èn Yehovah ben prisiri. Na so a de tu taki Yehovah breiti nanga yu te yu e du ala san yu man fu dini en (Kol. 3:23). Prakseri fa Yehovah e prisiri te a e si a muiti di yu e du fu dini en. A no abi trobi efu yu man du furu noso pikinso. Yehovah e warderi san yu e du gi en èn a o memre dati fu têgo.​—Mat. 6:20; Hebr. 6:10.

13. Te wi e luku san skrifi na Lefitikus 9:23, 24, dan fa Yehovah sori taki a ben feni den priester bun?

¹³ A di fu fo sani: Yehovah e blesi en pipel. Prakseri san pasa na a yari 1512 Fosi Krestes di den Israelsma seti a tabernakel na a futu fu Sinai-bergi (Eks. 40:17). Moses ben e teki fesi di den ben poti Aron nanga den manpikin fu en leki priester. Ala den Israelsma ben kon makandra fu luku fa den priester ben o tyari den fosi ofrandi (Lef. 9:1-5). Fa Yehovah sori taki a ben feni den priester bun? Di Aron nanga Moses ben e blesi a pipel, Yehovah meki faya fu hemel bron  na ofrandi di ben de na tapu na altari ete.​—Leisi Lefitikus 9:23, 24.

14. Suma den priester na ini a ten fu Israel e prenki?

¹⁴ San wi e leri fu a sani di pasa na a dei di den ben poti Aron leki granpriester? A faya fu hemel sori taki Yehovah ben feni en bun taki Aron nanga den manpikin fu en ben tron priester èn a ben o horibaka gi den. Di den Israelsma si san pasa, dan den srefi ben e frustan taki den ben musu horibaka gi den priester tu. Fu san ede disi prenspari gi wi? Fu di den priester na ini Israel ben e prenki wan moro prenspari sani. Krestes na a moro bigi Granpriester èn 144.000 sma o tiri makandra nanga en na ini hemel leki kownu nanga priester.​—Hebr. 4:14; 8:3-5; 10:1.

15-16. Fa Yehovah sori taki a e horibaka gi „a koni srafu di de fu frutrow”?

¹⁵ Na ini 1919 Yesus poti wan pikin grupu salfu brada leki „a koni srafu di de fu frutrow”. A srafu dati e teki fesi na ini a preikiwroko èn den e gi den bakaman fu Krestes „nyanyan na a reti ten” (Mat. 24:45). Wi e si krin buweisi taki Gado e horibaka gi a koni srafu disi.

¹⁶ Satan nanga a grontapu fu en e pruberi fu tapu a wroko fu a koni srafu di de fu frutrow. Efu Yehovah no ben o yepi den, dan den no ben o man du a wroko disi srefisrefi. Tu grontapufeti ben de èn bigi moni problema ben de na heri grontapu. Boiti dati, sma frufolgu wi èn den du furu ogri nanga wi. Toku a koni srafu tan gi den bakaman fu Krestes leri. Prakseri den so furu buku nanga tra sani di wi  e kisi na ini a ten disi na ini moro leki 900 tongo! Èn wi no abi fu pai gi den. Disi e sori krin taki Gado e horibaka gi a koni srafu. Wan tra sani di e sori taki Yehovah e blesi en pipel, na a preikiwroko di wi e du. A bun nyunsu e preiki „gi sma na heri grontapu” (Mat. 24:14). A de krin taki Yehovah e tiri en pipel na ini a ten disi èn a e blesi den bogobogo.

17. Fa wi kan sori taki wi e horibaka gi Yehovah en organisâsi?

¹⁷ Wi musu aksi wisrefi: ’Mi de nanga tangi taki mi de na ini na organisâsi fu Yehovah?’ Na ini a ten fu Moses, Yehovah ben seni faya komoto fu hemel fu sori taki a ben feni den priester bun. Na ini a ten disi Yehovah gi wi krin buweisi tu taki a e blesi na organisâsi fu en. Wi musu de nanga tangi taki wi de na ini na organisâsi disi (1 Tes. 5:18). Fa wi kan sori taki wi e horibaka gi na organisâsi fu Yehovah? Wi e du disi te wi e fiti den Bijbel rai di wi e kisi na ini den buku fu wi, na den gemeente konmakandra, den kring konmakandra nanga den kongres. Wi e horibaka gi Yehovah en organisâsi tu, te wi e preiki fayafaya èn te wi e gi sma leri.​—1 Kor. 15:58.

18. San yu wani du?

¹⁸ Meki wi du ala san wi man fu du san wi leri na ini a buku Lefitikus. Wi wani taki Yehovah feni den ofrandi fu wi bun. Wi wani dini Yehovah fu di wi de nanga tangi gi san a du gi wi. Wi wani tan gi Yehovah den moro bun sani fu wi fu di wi lobi en nanga wi heri ati. Èn wi wani horibaka gi na organisâsi fu en na ini a ten disi. Te wi e du den sani disi, dan wi e sori Yehovah taki wi e si en leki wan grani fu de en Kotoigi!