1, 2. Ләвийләр китавини тәтқиқ қилиш немә үчүн муһим?

 ПАУЛ яш дости Тимотийға: «Пүтүн Язмилар Худа тәрипидин роһландурулған вә... пайдилиқтур»,— дәп язған (Тим. 2-х. 3:16). Муқәддәс Язмиларға Ләвийләр китавиму кириду. Сиз бу китап тоғрилиқ немә ойлайсиз? Нурғун адәмләр Ләвийләр китавиниң бүгүнки күндә һеч пайдиси йоқ қаидиләр тизимидин ибарәт дәп ойлайду. Лекин Йәһва Худаниң хизмәтчилири мундақ ойлимайду.

² Ләвийләр китави 3500 жил бурун йезилған болсиму, Йәһва Худа уни «бизниң нәсиһәт қилинишимиз» үчүн сақлап қоғдиған (Рим. 15:4). Ләвийләр китави бизгә Йәһва Худаниң ой-пикир тәрзини ениқ чүшинишкә ярдәм бәргәчкә, биз уни пухта тәтқиқ қилишимиз керәк. Муқәддәс роһниң илһами билән йезилған бу китаптин нурғун нәрсиләрни үгинәләймиз. Келиңлар, уларниң төртини көрүп чиқайли.

3. Гуналарниң кәчүрүлүш күни немә сәвәптин қурбанлиқлар қилинатти?

³ Биринчи савақ: Йәһва Худа қурбанлиғимизни қобул қилиши үчүн Униң разилиғиға еришишимиз керәк. Исраил хәлқи һәр жили Гуналарниң кәчүрүлүш күнигә җәм болатти вә баш роһаний һайванларни қурбан қилатти. Бу қурбанлиқлар исраиллиқларға уларниң гунадин тазилиниши керәклигини әсләткән. Лекин баш роһаний Әң муқәддәс җайға хәлиқниң гунаси үчүн қурбан қилинған малниң қени билән кириштин авал, бир вәзипини ада қилиши керәк еди. Бу хәлиқниң гунаси кәчүрүлүшидинму муһимирақ болған.

4. Ләвийләр 16:12, 13тә йезилғандәк, баш роһаний Әң муқәддәс җайға биринчи қетим киргәндә немә қилған? (Муқавидики рәсимгә қараң.)

⁴ Ләвийләр 16:12, 13ни оқуң. Кәчүрүлүш күнидә йүз бәргән вәзийәтни тәсәввур қилип көрүң: Баш роһаний  ибадәт чедириға кирди. Шу күни у Әң муқәддәс җайға үч қетим кириши керәк еди. Биринчи қетим киргәндә, у бир қолида хуш пурақ исриққа толған қачини, йәнә бир қолида чоғ көйүватқан алтун чоғданни тутти. Баш роһаний Әң муқәддәс җайни япқан пәрдиниң алдиға келип, бираз тохтап турди. У образлиқ мәнада дәл Йәһваниң алдида турғанлиқтин, өзиниң чоң шан-шәрәпкә еришкәнлигини чүшәнгән! Шуңа, у Әң муқәддәс җайға чоңқур иззәт-һөрмәт билән кирип, келишим сандуғиниң алдиға турған еди. Андин у муқәддәс исриқни көйүватқан чоғларға авайлап салатти вә униң хуш пурақ һиди шу җайни толдуратти b. Кейинирәк у йәнә Әң муқәддәс җайға малниң қени билән қайта кирәтти. Байқисиңиз, у хуш пурақ исриқни хәлиқниң гунаси үчүн қурбан қилиштин бурун көйдүрәтти.

5. Кәчүрүлүш күни исриқ көйдүрүлгәнлигидин қандақ савақ алсақ болиду?

⁵ Кәчүрүлүш күни исриқ көйдүрүлгәнлигидин қандақ савақ алсақ болиду? Муқәддәс китапта Худаниң садиқ хизмәтчилириниң дуалири исриққа охшаш дәп йезилған (Зәб. 141:2; Вәһ. 5:8). Жуқурида ейтилғандәк, баш роһаний Йәһваниң алдида исриқни көйдүрүш чоң шан-шәрәп дәп, буни иззәт-һөрмәт билән қилған. Дәл шуниңға охшаш, бизму Йәһва Худаға дуа қилғанда, Униңдин әйминип, чоңқур һөрмәт билән дуа қилимиз. Балиниң өз атиси билән йеқин мунасивәттә болалайдиғанлиғиға охшаш, бизму Аләмниң Яратқучиси Йәһваға дуа қилип, йеқинлишалаймиз. Биз буниң үчүн бәк миннәтдар! (Яқуп 4:8). Йәһва бизни Өзиниң достлири дәп һесаплайду! (Зәб. 25:14). Биз бу шан-шәрәп үчүн бәкму миннәтдар, шундақ екән, Йәһва Худани рәнҗитидиған ишларни һәргиз қилмаслиққа тиришимиз.

6. Баш роһаний қурбанлиқни елип келиштин бурун исриқни көйдүргәнлигидин қандақ савақ алимиз?

⁶ Йәнә бир қетим есимизгә алсақ, баш роһаний қурбанлиқни елип келиштин бурун исриқни көйдүрәтти. Шундақ қилип, у авал Йәһва Худаниң разилиғиға еришкәнлигигә көз йәткүзгән, андин кейин қурбанлиқни елип кәлгән. Буниңдин биз қандақ савақ алимиз? Әйса йәрдә болғанда, һаятини қурбанлиққа бериштин авал, һәтта инсанийәтни қутқузуштинму муһимирақ бир нәрсини қилған. Йәһва Худа униң қурбанлиғини қобул қилиши үчүн, Әйса пүтүн һаятида, өзини садақәтмән вә әйипсиз сақлап қелиши керәк еди. Шундақ қилип, у Йәһваниң һөкүмранлиқ қилиш усули тоғра вә адил екәнлигини испатлалатти.

7. Немә үчүн Әйса йәр йүзидә яшиғанда Атисиниң жүригини хошал қилған?

⁷ Әйса йәрдә яшиғанда, Йәһва Худаға мукәммәл түрдә бойсунған. У нурғун қийинчилиқларға вә езиқишларға дуч кәлсиму вә азаплинип өлидиғанлиғини билсиму, Атисиниң һөкүмранлиғи әң яхши екәнлигини испатлашқа бәл бағлиған (Флп. 2:8). Синақларға учриғанда, қаттиқ жиғлап туруп, көз яшлири билән дуа-тилавәт қилған (Ибр. 5:7). Униң қизғин дуалири Йәһваға садиқ екәнлигини көрсәтти вә Әйса итаәтчан болуп қелиш хаһишини мустәһкәмлигән. Әйсаниң дуалири Йәһва Худа үчүн худди хуш-пурақ исриққа охшаш еди. Әйса пүткүл һаятида Атисини хошал қилған вә Униң һөкүмранлиқ һоқуқини қоғдиған.

8. Биз Әйсадин қандақ үлгә алалаймиз?

⁸ Йәһваға итаәтчан вә садақәтмән болуп қелиш үчүн қолумиздин кәлгининиң һәммисини қилип, Әйсадин үлгә  алалаймиз. Синақларға дуч кәлгәндә, биз Йәһваниң жүригини хошал қилишни халиғачқа, Униңдин ярдәм сорап қизғин дуа қилимиз. Шундақ қилсақ, биз Йәһваниң һөкүмранлиғини қоллайдиғанлиғимизни көрситимиз. Биз Йәһва Худа өч көридиған ишларни қилсақ, У дуалиримизни тиңшимайдиғанлиғини чүшинимиз. Амма биз Йәһва яхши көридиған ишларни қилсақ, чин жүрәктин қилған дуалиримиз Униң үчүн худди хуш-пурақ исриқтәк болиду. Садақәтмән вә итаәтчан болғинимизда, Йәһва Худаниң хурсән болидиғанлиғи шәк-шүбһисиз (Пәнд н. 27:11).

9. Течлиқ қурбанлиқлири немә сәвәптин қилинған?

⁹ Иккинчи савақ: Биз Йәһваға миннәтдар болғачқа, Униңға хизмәт қилимиз. Буни чүшиниш үчүн исраиллар тәғдим қилған течлиқ қурбанлиғи тоғрилиқ көпирәк биливалайли c. Ләвийләр китавида йезилғандәк, исраиллар течлиқ қурбанлиғини «шүкүр қурбанлиғи» сүпитидә әкеләтти (Ләв. 7:11—13, 16—18). Улар бу қурбанлиқни мәҗбурий әмәс, өзлири халап әкәлгән. Демәк, улар ихтиярий қурбанлиқларни Йәһвани яхши көргәнликтин елип кәлгән. Қурбан қилинған малниң гөшини уни әкәлгән киши, униң өйидикилири вә роһанийлар йегән. Лекин малниң бәзи қисимлири пәқәт Йәһва Худағила берилгән.

10. Ләвийләр 3:6, 12, 14—16дә тәсвирләнгән течлиқ қурбанлиғи қайси мәнада Әйсаниң Йәһваға қилған хизмитигә охшаш?

¹⁰ Үчинчи савақ: Меһир-муһәббәт бизни  Йәһваға қолумизда бар әң яхшисини беришкә дәвәт қилиду. Йәһва Худа үчүн малниң әң яхши қисми яғ болған. Шундақла У җигәр билән бөрәкләрниң алаһидә екәнлигини ейтқан (Ләвийләр 3:6, 12, 14—16ни оқуң). Шу сәвәптин исраиллиқ киши өз ихтияри билән малниң бу алаһидә қисимлирини вә яғни қурбанлиқ сүпитидә тәғдим қилғанда, Йәһва Худа интайин хошал болған. Чүнки шу киши Йәһваға қолида бар әң яхши нәрсисини беришни халиғанлиғини көрсәткән. Шуниңға охшаш, Әйсаму Йәһвани яхши көргәнликтин Униңға бар күчи билән хизмәт қилиш арқилиқ өз ихтияри билән әң яхшисини бәргән (Йоһ. 14:31). Худаниң ирадисини орунлаш Әйсаниң көңлини қанаәтләндүргән вә у Худаниң қанунлирини бәк яхши көргән (Зәб. 40:8). Буни көрүш Йәһва Худаниң көңлини хурсән қилғанлиғи шәк-шүбһисиздур!

11. Йәһваға болған хизмитимиз қайси мәнада течлиқ қурбанлиғиға охшаш вә бу бизгә қандақ тәсәлли бериду?

¹¹ Йәһваға болған хизмитимиз течлиқ қурбанлиғиға охшаш. Чүнки өз ихтияримиз билән хизмәт қилсақ, Йәһвани қанчилик яхши көридиғанлиғимизни көрситимиз. Уни пүтүн вуҗудимиз билән сөйгәнликтин, Униңға қолумизда бар әң яхшисини беримиз. Миллионлиған хизмәтчилириниң Униңға меһир-муһәббәт түпәйлидин өз ихтияри билән хизмәт қилғанлиғини көрүш Йәһваниң жүригини шат-хорам қилиду. Йәһваниң пәқәт иш-һәрикәтлиримизнила әмәс, нийәтлиримизниму көридиғанлиғини вә қәдирләйдиғанлиғини билиш бизгә тәсәлли бериду. Мәсилән, сиз яшанған болсиңиз вә өзүңиз халиғандәк көп хизмәт қилалмисиңиз, Йәһва Худа сизниң чәклимилириңизни чүшинидиғанлиғини унтумаң. Сиз Йәһваға бәк аз хизмәт қиливатимән дәп ойлишиңиз мүмкин, бирақ У қолуңиздин кәлгиничә һәммисини қилишқа дәвәт қилидиған қәлбиңиздики чоңқур меһир-муһәббәтни көриду. Йәһва биздә бар әң яхшисини хошаллиқ билән қобул қилиду.

12. Йәһва Худа течлиқ қурбанлиғиға қандақ қариған вә бу бизгә қандақ тәсәлли бериду?

¹² Течлиқ қурбанлиғидин немини үгинәләймиз? От малниң әң яхши қисимлирини көйдүрүвәткәндә, униң ис-түтәклири асманға көтирилип, Йәһва Худаға хуш яққан. Йәһва сизниңму чин көңүлдин қилған ихтиярий хизмитиңиздин бәк хурсән екәнлигигә ишәнчиңиз камил болсун (Кол. 3:23). Йәһва Худаниң сиздин рази екәнлиги тоғрилиқ ойлап көрүңа. Сиз Йәһва үчүн мәйли аз яки көп қилишиңиздин қәтъийнәзәр, У хизмитиңизни бәк қәдирләйду вә уни мәңгү унтумайду (Мәт. 6:20; Ибр. 6:10).

13. Ләвийләр 9:23, 24кә асасән, Йәһва Худа роһанийларни қобул қилғанлиғини қандақ көрсәткән?

¹³ Төртинчи савақ: Йәһва Худа тәшкилатиниң йәрдики қисмиға бәрикәт бериду. Миладимиздин илгири 1512-жили муқәддәс чедир Синай теғиниң етигидә орнитилғанда йүз бәргән вақиәни көрүп чиқайли (Чиқ. 40:17). Муса роһанийларни тәйинләш мәрасимини өткүзүп, Һарун вә униң оғуллири роһанийлар сүпитидә тәйинләнгән еди. Исраил хәлқи роһанийларниң әң дәсләпки қурбанлиғини әкелидиғанлиғини көрүш үчүн җәм болған (Ләв. 9:1—5). Йәһва йеңидин тәйинләнгән роһанийларни қобул қилғанлиғини қандақ көрсәткән? Һарун билән Муса хәлиқни бәрикәтлигәндә, Йәһва Худа асмандин от чүшүрүп қурбангаһтики мални пүтүнләй көйдүрүвәткән (Ләвийләр 9:23, 24ни оқуң).

14. Йәһва Худа Исраилдики роһанийлар қобул қилғанлиғи немә сәвәптин биз үчүн муһим?

 ¹⁴ Асмандин чүшкән от немини көрсәткән? Бу Йәһва Худаниң роһанийлар болуп талланған Һарун вә униң оғуллирини қоллайдиғанлиғини көрсәткән. Исраил хәлқи Йәһваниң роһанийларни қоллайдиғанлиғиниң бу ениқ испатини көргәндә, өзлириниңму уларни қоллиши керәклигини чүшәнгән. Йәһва Худаниң Исраилдики роһанийларни қобул қилғанлиғи немә сәвәптин биз үчүн муһим? Чүнки Исраилдики роһанийлиқ униңдинму муһимирақ вә яхширақ бир роһанийлиқниң көләңгиси болған. Әң Улуқ Алий Роһаний — Әйса вә у 144000 роһанийлар һәм падишалар билән биллә асманда һөкүмранлиқ қилиду (Ибр. 4:14; 8:3—5; 10:1)

15, 16. Йәһва «садиқ һәм әқил-парасәтлик қулни» қобул қилидиғанлиғини қандақ көрсәткән?

¹⁵ 1919-жили Әйса майланған бурадәрләрниң кичик топини «садиқ һәм әқил-парасәтлик қул» сүпитидә тәйинлигән. Бу қул вәз паалийитигә йетәкчилик қилип, Әйсаниң шагиртлириға «озуқни вақти-вақтида бериду» (Мәт. 24:45). Йәһва Худаниң садиқ һәм әқил-парасәтлик қулни қобул қилидиғанлиғиға испат барму?

¹⁶ Шәйтан вә униң тәрәпдарлири садиқ қулниң паалийитини тохтатмақчи, шуңа Йәһва Худаниң ярдимисиз бу ишни давамлаштуруш мүмкин болмайду. Икки дуния уруши, дүшмәнләрниң зиянкәшлиги, дуния йүзлүк ихтисадий боһранлар вә адаләтсиз муамилиләргә қаримастин, садиқ қул Әйсаниң йәрдики әгәшкүчилиригә роһий озуқни өз вақтида беришни давамлаштурған. Биздә бар роһий озуқниң қанчилик мол екәнлиги тоғрилиқ ойлап көрәйли: әдәбиятлиримиз 900дин ошуқ тилларға тәрҗимә қилиниду вә һәқсиз тарқитилиду. Бу Йәһва Худаниң садиқ  қулни қоллайдиғанлиғиниң рошән испати. Вәз ишиму Йәһваниң садиқ қулға бәрикәт беридиғанлиғини дәлилләйду. Хуш хәвәр һәқиқәтән «пүткүл йәр йүзи бойичә» җакаланмақта (Мәт. 24:14). Шәк-шүбһисизки, бүгүнки күндә Йәһва Өз тәшкилатини йетәклимәктә вә мол бәрикәтлимәктә.

17. Йәһва пайдилиниватқан тәшкилатни қоллайдиғанлиғимизни қандақ көрситимиз?

¹⁷ Өзүмиздин мундақ дәп сорисақ болиду: «Мән Йәһваниң йәрдики тәшкилатиниң бир әзаси болғиним үчүн миннәтдарму»? Мусаниң заманида Йәһва Худа Өзи тәйинлигән хизмәтчилирини қобул қилидиғанлиғини көрситиш үчүн асмандин от чүшәргән еди. Шуниңға охшаш, бүгүнки күндиму Йәһва Өз тәшкилатидин пайдилиниватқанлиғиға испат бәргән. Биздә Йәһва Худаға миннәтдар болуш үчүн нурғун сәвәпләр бар (Сал. 1-х. 5:18, 19). Йәһваниң тәшкилатини қоллайдиғанлиғимизни қандақ көрситәләймиз? Әдәбиятлиримиз, җамаәт учришишлири вә конгресслиримизда алған Муқәддәс китапқа асасланған көрсәтмиләргә риайә қилиш арқилиқ. Шундақла биз вәз қилиш вә тәлим бериш ишиға қолумиздин кәлгиничә қатнашсақ, садиқ қулни қоллайдиғанлиғимизни көрситимиз (Кор. 1-х. 15:58).

18. Сиз немә қилишқа бәл бағлидиңиз?

¹⁸ Келиңлар, Ләвийләр китавидин алған савақларни әмәлийәттә қоллинишқа қәтъий бәл бағлайли. Йәһва Худа бизниң қурбанлиғимизни қобул қилиши үчүн Униң разилиғиға еришәйли. Бизни Йәһваға хизмәт қилишқа миннәтдарлиқ дәвәт қилғай! Йәһва Худаға болған меһир-муһәббитимиз бизни Униңға қолумизда барниң әң яхшисини беришкә үндигәй! Йәһваниң Өзи бәрикәтләватқан тәшкилатни чин жүрәктин қоллайли. Шундақ йол тутсақ, биз Йәһва Худаниң Гувачилири болуш шан-шәрипини қәдирләйдиғанлиғимизни көрситимиз!