1-2. Momo lie Akristão va sukilila oku sanjukila oku lilongisa elivulu Liovisila?

UPOSTOLO Paulu wa ivaluisa ekamba liaye umalẽhe Timoteo okuti, “ovina viosi via sonehiwa Vovisonehua vi Kola, vi tunda ku Suku kuenje ovio vi silivila.” (2 Tim. 3:16) Vovisonehua viaco, mua kongelavo elivulu Liovisila. Nye o sima catiamẽla kelivulu eli? Ku vamue, elivulu Liovisila va litenda okuti ovina vi sangiwamo ka vi kuete esilivilo koloneke vilo. Pole, Akristão vocili va kuete ovisimĩlo via litepa.

² Elivulu Liovisila tunde eci lia sonehiwa pa pita ale ci soka 3.500 kanyamo. Pole, Yehova wa teyuila elivulu liaco oco li ‘tu longise.’ (Va Rom. 15:4) Elivulu eli, li tu kuatisa oku kuata elomboloko ndomo Yehova a tenda ovina. Omo liaco, tu sukila oku sanjukila oku lilongisa elivulu liaco. Ocili okuti, velivulu eli mu sangiwa ovolandu alua tu pondola oku lilongisilako. Tu konomuisi ovolandu akuãla pokati kavio.

3. Momo lie kua lingawaile ovilumba Keteke Lioku Tuvika Akandu?

³ Ceci tu lilongisilako. Tete: Oco Yehova a tave ovilumba vietu tu sukila oku taviwa laye. Onjanja yimosi vunyamo, kua enda oku lingiwa Eteke Lioku Tuvika Akandu. Va Isareli vosi va enda oku liongolola kuenda ocitunda cinene ca enda oku eca ovilumba. Ovilumba viaco, via kuatisa va Isareli oku ivaluka okuti va sukilile oku yelisiwa kakandu avo. Osimbu handi ocitunda cinene ka cambatele osonde yocilumba vohondo yi Kola Koku Kola, wa sukilile oku tẽlisa ocikele cikuavo.  Ocikele caco ca kuatele vali esilivilo okuti ongecelo yakandu a va Isareli, ci sule.

4. Ndomo ca lomboluiwa kelivulu Liovisila 16:12, 13, nye ocitunda cinene ca enda oku linga konjanja yatete eci a iñila Vohondo yi Kola Koku Kola Keteke Lioku Tuvika Akandu? (Tala ociluvialuvia koñoño.)

⁴ Tanga Ovisila 16:12, 13. Sokolola kulandu Weteke Lioku Tuvika Akandu. Ocitunda Cinene ci iñila votavernakulu. Peka limue, o kuata ocikuata cimue ci kuete insensu vielemba liwa. Peka likuavo, o kuata ociyukilo condalu. Eye o talama kovaso yongumbo ya sitika uvelo wohondo yi Kola Koku Kola. Eyi oyo onjanja yatete pokati kolonjanja vitatu, eye a iñila vohondo yi Kola Koku Kola vokuenda Keteke Lioku Tuvika Akandu. Lesumbilo lialua, eye iñila vohondo yi Kola Koku Kola kuenda o talama kovaso Yocikasia Covisila. Ci kasi ndu okuti eye o tãi kovaso a Yehova Suku! Kuenje ocitunda lutate, o pesila insensu kondalu kuenje ku tunda elemba limue liwa. * Noke, eye iñila vohondo yi Kola Koku Kola losonde yoku tuvika akandu. Ove wa ci limbuka? Ocitunda ca enda oku timiha insensu osimbu handi ka ecele osonde yoku tuvika akandu.

5. Oku timiha insensu Keteke Lioku Tuvika Akandu, ci tu longisa nye?

⁵ Nye tu pondola oku lilongisila koku timiha insensu Keteke Lioku Tuvika Akandu? Embimbiliya li lekisa okuti, ku Yehova olohutililo viafendeli vaye vi sokisiwa linsensu. (Osa. 141:2; Esit. 5:8) Ivaluka okuti ocitunda cinene ca enda oku lekisa esumbilo lialua, poku iñila linsensu kovaso a Yehova. Cimuamue haico okuti, eci tu likutilila ku Yehova tu sukila oku ci linga lesumbilo liocili. Tu eca olopandu kululiki wovina viosi poku ecelela okuti, tu amẽla kokuaye ndeci omõla a pondola oku amẽla ku isiaye. (Tia. 4:8) Eye o tu tava ndakamba vaye! (Osa. 25:14) Eli esumũlũho limue linene okuti ka tu yongola oku linga cimue ci sumuisa Yehova.

6. Nye tu pondola oku lilongisa konjila ndomo ocitunda cinene ca enda oku timiha insensu osimbu ka ecele ocilumba?

⁶ Ivalukavo okuti, ocitunda cinene ca ponduile lika oku timiha insensu osimbu handi ka ecele ovilumba. Lonjila eyi, eye wa ponduile oku kolela okuti wa taviwa la Suku poku eca ovilumba viaco. Ulandu owu u tu longisa nye? Sokolola ku Yesu. Tua kũlĩha okuti, eye weyile palo posi oku eca omuenyo waye ndocilumba. Osimbu handi ka ci lingile, wa sukilile oku linga cimue ci kuete esilivilo, okuti oku yovola omanu ci sule. Nye a sukilile oku linga? Yesu wa sukilile oku ci linga poku pandikisa loku kala ukuacili ku Yehova kuenda oku pongiya onjila oco Yehova a tave ocilumba caye. Lonjila eyi, Yesu wa laikele oku lekisa okuti oku linga ovina ndomo Yehova a yongola, oyo onjila yiwa yoku kala komuenyo. Handi vali, Yesu wa ponduile oku lekisa komanu vosi okuti onjila ya Yehova yoku viala, ya velapo hayo ya sunguluka.

7. Momo lie ekalo liomuenyo wa Yesu lia sanjuisila Yehova?

⁷ Yesu vokuenda kuomuenyo waye palo posi, eye wa pokola ku Yehova lonjila yimue ya lipua. Eci a pita loloseteko ndaño wa kũlĩhĩle okuti wa laikele oku fa, eye ka liwekelepo oku teyuila uviali wa Isiaye. (Va Fil. 2:8) Eci Yesu a pita loloseteko, wa likutilila “loku lila kuenda asuelẽla.” (Va Hev. 5:7) Ohutililo  viaye, via situlula okuti wa kala ukuacili ku Yehova kuenda vio kuatisa oku amamako oku lekisa epokolo okuti ka liwekapo. Ku Yehova, olohutililo via Yesu via kala ndelemba liwa linsensu. Ekalo liomuenyo wa Yesu lia sanjuisa calua Yehova. Yesu wa lekisa okuti onjila ya Isiaye yoku viala ya velapo.

8. Tu pondola oku setukula ndati ongangu ya Yesu?

⁸ Etu tu pondolavo oku setukula ongangu ya Yesu. Tu ci linga ndati? Tu ci linga poku likolisilako oku pokola ku Yehova kuenda oku kala vakuacili kokuaye. Eci o liyaka lovitangi, likutilila lutima wosi ku Yehova oco a ku kuatise oku linga ovina viusanjuisa. Kuenje o ka lekisa okuti o kasi oku teyuila uviali wa Yehova. Handi vali, ivaluka okuti Yehova ka tambulula olohutililo vietu nda tu linga ovina eye a suvuka. Pole, nda tu linga ovina via sunguluka, Yehova o tava olohutililo tu linga lutima wosi. Olohutililo viaco vi ka tendiwa ndinsensu vielemba liwa. Kolela okuti epandi liove lepokolo, vi sanjuisa calua Yehova.—Olosap. 27:11.

9. Momo lie va Isareli va enda oku lingila ovilumba viombembua?

⁹ Ceci tu lilongisilako. Vali: Tu vumba Yehova omo tu yongola oku lekisa olopandu vietu kokuaye. Eci ci tu ivaluisa ovilumba viombembua via enda oku eciwa. Onepa yovilumba viaco, via kuata esilivilo lialua kefendelo liocili ku va isareli. * Elivulu Liovisila li lombolola okuti, u Isareli wa ponduile oku eca ocilumba cocitundasonde combembua,  ‘ndocilumba coku lekisa olopandu.’ (Ovis. 7:11-13, 16-18) Eye ka ponduile oku eca ocilumba caco ndekisika, pole, wa sukilile oku ceca lutima wosi. U Isareli wa ponduile oku eca ocilumba caco lutima wosi momo wa solele Suku yavo, Yehova. Omunu una eca ocilumba, epata liaye kuenda ovitunda, ovo va ponduile okulia ositu yocinyama ca lumbiwa. Pole, olonepa vimue viatiamẽla kocinyama caco, va enda oku vieca ku Yehova. Vipi olonepa viaco?

10. Ovilumba viombembua via tukuiwa kelivuli Liovisila 3:6, 12, 14-16, vi sokisiwa ndati lupange Yesu a lingila Yehova?

¹⁰ Ceci tu lilongisilako. Tatu: Tu eca ku Yehova cosi tu kuete omo tu u sole. Yehova wa tendele ulela okuti oyo onepa ya velapo yocinyama. Eye wa handeleka okuti ovimatamata via velapo viocinyama ndeci, olongẽla, via kuatele esilivilo lilikasi. (Tanga Ovisila 3:6, 12, 14-16.) Eci u Isareli a enda oku eca ocilumba lutima wosi ulela kuenda ovimatamata via velapo viocinyama, ca enda oku sanjuisa calua Yehova. Poku ci linga, u Isareli wa lekisile okuti oyongola oku eca ovina via velapo ku Yehova. Cimuamue haico Yesu a linga okuti, lutima wosi wa eca ku Yehova ovina via velapo a kuata. Handi vali, Yesu wa kuatela ocisola coku vumba Suku, lutima wosi. (Yoa. 14:31) Oku linga ocipango ca Suku oco Yesu a enda oku sanjukila. Eye wa solaile calua ovihandeleko via Suku. (Osa. 40:8) Ocili okuti, Yehova wa kuata esanju lialua poku mola onjongele ya Yesu yoku u vumba!

11. Momo lie upange tu lingila Yehova u sokisiwa ndovilumba viombembua? Kuenda momo lie ci tu lembelekela?

¹¹ Ndeci ca kala ovilumba viombembua, upange tu lingila Yehova onjila yimue yoku lieca olumue yi lekisa ocisola tu u kuetele. Etu tu yongola oku eca ku Yehova eci ca velapo, omo okuti tu u sole lutima wosi. Sokolola kesanju Yehova a pondola oku kuata, eci a mola okuti olohuluwa viomanu viu vumba lutima wosi omo lioku u sola kuenda oku sola ovihandeleko viaye. Ci lembeleka calua oku kũlĩha okuti, Yehova ka sanjukila lika ovilinga vietu, pole, o sanjukilavo onjongole yetu. Ndeci, nda wa kuka kuenda ku tẽla vali oku linga cosi o yongola kupange wa Yehova, kolela okuti eye o lete ekalo liove. Ove pamue o sima okuti ku kuete calua coku eca ku Yehova. Pole, eye o lete ocisola cu ku vetiya oku linga eci o tẽla. Yehova o sanjukila calua ovina via velapo eca kokuaye.

12. Yehova wa enda oku liyeva ndati catiamẽla kovilumba viombembua, kuenda ndamupi eci ci tu lembeleka?

¹² Nye tu pondola oku lilongisila kovilumba viombembua? Osimbu olonepa via velapo viocinyama via enda oku timihĩwa, owisi u lamanela kilu kuenje Yehova o sanjuka. Omo liaco, nda o kasi oku vumba Yehova lutima wosi loku eca eci ca velapo, kolela okuti Yehova o yeva esanju. (Va Kol. 3:23) Sokolola kesanju Yehova a kuata, poku mola ovilumba viove. Ku Yehova eci ca velapo hupangeko walua tu linga. Nda upange o linga u vetiyiwa locisola, owo u velapo ku Yehova. Kuenje Yehova lalimue eteke a ka ivalako upange waco.—Mat. 6:20; Va Hev. 6:10.

13. Ndomo ca tangiwa kelivulu Liovisila 9:23, 24, Yehova wa lekisa ndati okuti wa tava upange wovitunda?

¹³ Ceci tu lilongisilako. Kuãla: Yehova o kasi oku sumũlũisa onepa yocisoko caye palo posi. Sokolola kueci ca pita kunyamo wo 1512 K.Y, eci otavernakulu ya tungiwa ketapi Liomunda Sinai. (Etu. 40:17) Mose wa linga ohundo yimue, kuna Arone lomãla vaye va  ñoliwa oco va kale ovitunda. Va Isareli va liongolola oku tala ovitunda oku eca ovilumba viatete viovinyama. (Ovis. 9:1-5) Yehova wa lekisa ndati okuti wa tava ovitunda viaco viokaliye? Osimbu Mose la Arone va sumũluĩsa omanu, Yehova wa tuma ondalu ya lia ovilumba viosi via kala kilu liutala.—Tanga Ovisila 9:23, 24.

14. Momo lie Yehova poku tava kupange utunda wa Arone kumue lomãla vaye ci kuetele esilivilo kokuetu?

¹⁴ Ulandu waco u komõhisa calua. Ondalu ya tunda kilu ya lombolokele nye? Eci ca lombolokele okuti Yehova wa tava utunda wa Arone kumue lomãla vaye. Eci va Isareli va mola uvangi wokuti ovitunda via taviwa la Yehova, ovo va fetika oku lekisavo onjongole yoku va kuatisa. Anga hẽ eci cikuetevo esilivilo kokuetu? Ocili okuti ci kuete! Utunda ko Isareli, wa kala ulembo wutunda wa velapo. Kristu eye Ocitunda cetu Cinene kuenda eye o ka viala kumue 144.000 va ka kala olosoma kuenda ovitunda kilu.—Va Hev. 4:14; 8:3-5; 10:1.

15-16. Nye ci lekisa okuti “ukuenje wa kolelua haeye wa lunguka” o kasi oku songuiwa la Yehova?

¹⁵ Kunyamo wo 1919, Yesu wa nõla ocimunga cimue citito Cakristão olombuavakua okuti “ukuenje wa kolelua haeye wa lunguka.” Ukuenje waco o songuila upange woku kunda kuenda eca kolondonge via Kristu “okulia votembo ya sokiyiwa.” (Mat. 24:45) Anga hẽ tua kolela okuti ukuenje wa kolelua haeye wa lunguka o kasi oku songuiwa muẽle la Suku?

¹⁶ Satana kumue lomanu vaye, va siata oku amamako oku tateka upange wukuenje wa kolelua. Nda ca kaile lekuatiso liomunu, ukuenje wa kolelua nda ka tẽlele oku tẽlisa  ocikele caye. Ndaño lovoyaki avali a pita voluali luosi, alambalalo, ekambo lilombongo, oku tatiwa lungangala, ukuenje wa kolelua haeye wa lunguka o kasi oku amamako oku eca okulia kuespiritu kolondonge via Kristu palo posi. Sokolola okulia kualua kuespiritu kua sandekiwa ocali, kueci ci soka 900 kalimi koloneke vilo! Owu uvangi u lekisa okuti ukuenje wa kolelua o kuete ekuatiso lia Suku. Uvangi wesumũlũho likuavo li tunda ku Yehova, upange woku kunda. Olondaka viwa vi kasi oku “kundilua koluali luosi.” (Mat. 24:14) Ocili okuti, Yehova o kasi oku songuila loku sumũlũisa ocisoko caye palo posi koloneke vilo.

17. Tu lekisa ndati okuti tu kasi oku kuatisa ocisoko Yehova a kasi oku songuila?

¹⁷ Tu sukila oku lipula ndoco: ‘Anga hẽ nda sanjukila oku panga onepa vocisoko ca Yehova?’ Ovina Yehova a siata oku tu lingila, vi sokisiwa londalu ya tunda kilu kotembo ya Mose la Arone. Tu kuete ovina vialua vioku eca olopandu. (1 Va Tes. 5:18, 19) Tu lekisa ndati okuti tu kasi oku kuatisa ocisoko Yehova a kasi oku songuila? Tu ci linga poku kuama olonumbi via kunamẽla Vembimbiliya, tua siata oku tambula valivulu etu, kolohongele viekongelo, vimbo kuenda viofeka. Handi vali, tu ci linga poku likolisilako oku kuatisa kupange woku kunda kuenda woku longisa.—1 Va Kor. 15:58.

18. Nye wa nõlapo oku linga?

¹⁸ Nõlapo oku kapako ovina viosi tua lilongisa kelivulu Liovisila. Tete, sanda oku taviwa la Yehova oco eye a tave ovilumba viove. Vali, vumba Yehova poku lekisa olopandu. Tatu, eca ku Yehova cosi o kuete, omo liocisola u kuetele. Kuãla, kuatisa lutima wosi ocisoko Yehova a kasi oku sumũlũisa. Nda tua linga ovina evi, tu lekisa ku Yehova okuti tua sanjukila esumũlũho tu kuete lioku kala Olombangi viaye!