1-2. Xeeni maKristau anireerela aya osoma eliivuru ya Onamukuttho?

MURUMMWA Paulo aahimuupuxerya mmiravo ni mpatthani awe iihaniwa Timootheyo wira: “Solempwa sothene supuxeriwé ni Muluku”. (2 Tim. 3:16) Eyo enihela muhina eliivuru ya Onamukuttho. Munoonela sai eliivuru eyo ya mBiibiliyani? Atthu akina anuupuwela wira eliivuru eyo, erina malakiheryo ahinivarihana ni makhalelo a mahiku ala. Masi maKristau eekeekhai aakhalana moonelo woovirikana ni wa atthu awo.

² Eliivuru ya Onamukuttho elempwale iyaakha 3.500 sivinre. Hata vari siiso, Yehova ooruma olempwa “wira nixuttihiwe”. (aRom. 15:4) Nave Eliivuru ya Onamukuttho enninikhaliherya osuwela muupuwelo wa Yehova voohimya sa myaha sikina. Tthiri ninniphavela osoma itthu iyo. Maana sookhala itthu sinceene nikhanle ahu oowiixutta eliivuru ela ya mBiibiliyani. Vano nrowe nithokorerye itthu xexe.

3. Xeeni saavahiwa aya mikuttho Nihiku na Oleveleliwa Itampi?

³ Etthu yoopacerya nniixutta ahu: Wira Yehova eemererye mikuttho sahu nihaana weemereriwa ni yena. Ekwaha emosa vamwaakhani, naanikhala Nihiku na Oleveleliwa Itampi. Nihiku nne, nloko notheene na aIsarayeli naanithukumana, nto mukhulupale a anamukuttho aanivaha mikuttho. Tthiri mikuttho iyo saanaakhaliherya aIsarayeli wuupuwela wira yaahaana oleveleliwa itampi saya! Masi ohinatthi mukhulupale a anamukuttho okuxa ephome oroihaka Nipuro Nowaaryexa, owo aahaana ovara muteko mmosa, muteko owo waari wootepa otthuneya ovikana oleveleliwa itampi sa nloko na aIsarayeli.

4. Moovarihana ni Onamukuttho 16:12, 13, exeeni mukhulupale a anamukuttho aapaka awe ekwaha yoopacerya aakela awe Nipuro Nowaaryexa Nihiku na Oleveleliwa Itampi? (Nwehe elatarato ya ekaapa.)

 ⁴ Mmusome Onamukuttho 16:12, 13. Nkahaya muupuwele ele yiiraneya Nihiku na Oleveleliwa Itampi: Mukhulupale a anamukuttho aanikela mutabernaakulu. Ntata nimosa aanikuxa muhasa osareyale ene erupani yoowunkhela. Vano ntata nikina, aanikuxa muhasa wa eweero osareyale ene makhala a mooro. Vano owo aaneemela ohoolo wa ekuwo yaakhuneela Nipuro Nowaaryexa. Eyo yaari ekwaha yoopacerya sa ikwaha tthaaru mukhulupale a anamukuttho aarowa awe Opuro Wowaaryexa. Mwa nttittimiho, owo aanikela Nipuro Nowaaryexa oneemela ohoolo wa Nivuku na Waataana. Owo aakhala ntoko wira eemela ohoolo wa Yehova Muluku! Moottharelana, aaniyeeherya ni ephoole erupani vamakhalani a mooro, nto opuro ole wotheene waaninkhela vanceene ni wunkhela iwo waakhala woohakalaliha. * Moottharelana, aanitthikela nipuro Nowaaryexa okunxe ene ephome ya enama wira aleveleliwe itampi. Moone wira mukhulupale a anamukuttho aahaana opaha erupani ohinatthi ovaha ephome ya soovaha sa oleveleliwa itampi.

5. Exeeni nniixutta ahu mwaha wa orumeeliwa erupani Nihiku na Oleveleliwa Itampi?

⁵ Exeeni nniixutta ahu mwaha wa orumeeliwa erupani Nihiku na Oleveleliwa Itampi? Biibiliya onihimya wira mavekelo anipakiwa ni arumeyi awe oororomeleya, Yehova onnoona ntoko erupani. (Esal. 141:2; Wis. 5:8) Muupuweleke wira mukhulupale a anamukuttho aanittittimiha vanceene okathi aakela awe ni erupani ohoolo wa Yehova. Moolikanasa, vaavo nimmwaattamela ahu Yehova nnivekelo nihaana ottittimiha vanceene. Ninnimuxukhurela vanceene Mpattuxa a Olumwenku wotheene oneemererya omwaattamela yena ntoko mwaana onimwaattamela awe tiithi awe. (Yak. 4:8) Owo onnineemererya okhala apatthani awe! (Esal. 25:14) Eyo eparakha yuulupale, nto khanimphavela opaka etthu nnakhala yaamukhaani yaarowa omunyoonyiha Yehova.

6. Exeeni nniixutta ahu mwaha wa mukhulupale a anamukuttho opaha erupani ohinatthi ovaha mikuttho?

⁶ Muhiliyale wira mukhulupale a anamukuttho aahaana opaha erupani ohinatthi ovaha mukuttho. Opaka eyo, yaanimukhaliherya woona wira aaneemereriwa ni Muluku ohinatthi ovaha mikuttho. Yowiiraneya eyo enniixuttiha exeeni? Nkahaya mmuupuwele Yesu. Owo aanisuwela wira aarwiiye valaponi wira ovahe erutthu awe ntoko mukuttho. Masi ohinatthi opaka eyo, owo aahaana opaka etthu yootepa otthuneya, eyo piiyo, etthu yootepa otthuneya ovikana woopoliwa wa apinaatamu. Etthu xeeni? Owo aahaana olokiherya ephiro wira Yehova eemererye mukuttho awe. Aarowa opaka eyo, okhalaka oororomeleya ni omwiiwelela Yehova. Opaka eyo, yaahimukhaliherya Yesu woona wira opaka itthu moovarihana ni yootthuna ya Yehova enamuna yooloka mookumini mwahu. Yesu aahooniherya wira enamuna ya olamulela wa Yehova ti yoolokexa ni ya xariya.

7. Xeeni okumi wotheene wa Yesu valaponi waamuhakalaliha aya Yehova?

⁷ Okathi wotheene aari awe valaponi, Yesu aahimwiiwelela Yehova moomalela. Hata eehereriwe mwa inamuna soovirikana ni ohaaxiwa vanceene mpakha wiiviwa, Yesu aahilakela ovikaniha wooniherya wira enamuna ya olamulela wa Tiithi awe ti yootepa oloka. (aFil. 2:8) Okathi eehereriwa awe, Yesu aanivekela “n’uvara metto akhuwelaka, anlaka vanjene”. (aHéb. 5:7) Mavekelo awe yaahooniherya wira aaniroromeleya wa Yehova ni yaahimukhaliherya ohihiya omwiiwelela Tiithi  awe. Yehova aanoona mavekelo a Yesu ntoko erupani yoowunkhela ni yookurunuxa murima. Okumi awe wotheene, Yesu aahimuhakalaliha Yehova. Nave Yesu aahooniherya wira enamuna Yehova onlamulela awe ti yootepexa oloka.

8. Ninrowa otthara sai ntakiheryo na Yesu?

⁸ Hiyo nave nnoowerya omutakiha Yesu. Moota xeeni? Niimananihaka ororomeleya ni omwiiwelela Yehova. Okathi nneehereriwa ahu, nihaana onvekela Yehova ni murima wotheene wira onikhaliherye mwaha woowi nimphavela omuhakalaliha. Opaka eyo, munimooniherya wira munnikhaliherya olamulela wa Yehova. Muhiliyale wira Yehova khonrowa owiriyana mavekelo ahu akhala wira ninnipaka etthu ohimphavela awe wala oninyokha awe. Masi, akhala wira ninnikhala moovarihana ni malamulo a Yehova, owo onimweemererya mavekelo ahu ni anrowa okhalaka ntoko erupani yookurunuxa murima. Mukupaliki wira ororomeleya ni wiiwelela wanyu onnimusivela ni omuhakalaliha vanceene Yehova.​—Mir. 27:11.

9. Xeeni aIsarayeli yaavaha aya mukuttho wa opatthani?

⁹ Etthu ya nenli nniixutta ahu: Ninnimurumeela Yehova mwaha woowi ninnimuxukhurela vanceene. Etthu ela nniixutta ahu ennooneya ni mikuttho sa opatthani saapakiwa ni aIsarayeli. Mikuttho iyo, waari mpantta wootthuneya wa okokhorela wIsarayeli wa khalai. * Eliivuru ya Onamukuttho ninnoona wira aIsarayeli yaanivaha mukuttho wa opatthani, yoowo waari ‘mukuttho wowatthapela Apwiya’. (Okhum. 7:11-13, 16-18) AIsarayeli khiyaavaha mukuttho owo mwaha wookhanyereriwa, masi yaavaha vootthuna vaya.  Nave yaanivaha mukuttho owo mwaha woowi yaanimphenta Muluku aya, Yehova. Mutthu aavaha mukuttho owo aanikhuura enama ene ni emusi awe ni anamukuttho. Masi mpantta mmosa wa enama eyo aavahiwa paahi Yehova. Mpantta xeeni?

10. Moota xeeni mikuttho sa opatthani sinilavuliwa Onamukuttho 3:6, 12, 14-16, sinlikana aya ni muteko Yesu anvarenle awe Yehova?

¹⁰ Etthu ya neeraru nniixutta ahu: Ninniimananiha onvaha itthu sooloka Yehova mwaha woowi ninnimphenta. Yehova anoona makhura a enama okhala mpantta woolokexa wa enama. Nave ahooniherya wira mipantta sikina sa enama saahikhalana efaita yuulupale ohela muhina isyo. (Mmusome Onamukuttho 3:6, 12, 14-16.) Tthiri Yehova aanihakalala vanceene vaavo mwIsarayeli aavaha awe vootthuna vawe makhura a enama ni mipantta sikina soolokexa sa enama. Nave mwIsarayeli aapaka eyo, aanooniherya wira aaphavela onvaha Yehova etthu yootepexa oloka. Mwa enamuna emosaru, vootthuna vawe, Yesu aahinvaha Yehova etthu yootepexa oloka. Mwaha womphenta Muluku, Yesu aahimurumeela ni murima wotheene. (Yoh. 14:31) Yesu aanisiveliwa vanceene opaka yootthuna ya Muluku, nave aaniphenta vanceene malamulo awe. (Esal. 40:9) Moohaanyiherya, Yehova aahisiveliwa vanceene vaavo anweha awe Yesu omurumeelaka vootthuna vawe!

11. Mwa enamuna xeeni muteko nninvarela ahu Yehova onlikana aya ni mikuttho sa opatthani? Xeeni osuwela eyo ori aya woomaaliha?

¹¹ Muteko nninvarela ahu Yehova onoolikana ni mikuttho iye sa opatthani, mwaha woowi enamuna nnooniherya ahu moota nimmoonela ahu Yehova. Hiyo ninninvaha Yehova itthu soolokexa nrina ahu mwaha woowi ninnimphenta ni murima wotheene. Nkahaya muupuwele moota Yehova onihakalala awe vaavo onaaweha awe atthu imilyau sinceene amurumeelaka vootthuna vaya mwaha woowi annimphenta vanceene ni annisiveliwa malamulo awe! Ti voomaaliha osuwela wira Yehova onnivaha efaita ohiya paahi miteko sahu, masi-tho ele enniiriha ovara miteko iyo. Mwa ntakiheryo, akhala wira muhuuluvala ni khamunwerya ovara itthu mwaaphavela anyu mmutthenkesoni mwawe, mukupaliki wira Yehova onnisuwela mukhalelo anyu. Woonasa wene, munuupuwela wira khamurina itthu sinceene wira munvahe Yehova. Masi owo onnoona omphenta wanyu weiwo oniwiirihani ovara ele munwerya anyu. Owo onnihakalala ni onneemererya ele munwerya anyu onvaha.

12. Yehova oonela sai mikuttho sa opatthani, moota xeeni eyo ennilipiha aya?

¹² Etthu xeeni nniixutta ahu ni mikuttho sa opatthani? Vaavo mooro waalaliha aya mpantta woolokexa wa enama, mwiixi ene waanirowa wa Yehova ni waanimusivela vanceene. Tthiri Yehova onnisiveliwa vanceene vaavo munimurumeela anyu moowiivahererya. Vaavo munipaka anyu eyo, musuweleke wira munnimuhakalaliha vanceene Yehova. (aKol. 3:23) Nkahaya muupuwele moota Yehova onihakalala awe. Owo khonivaha efaita paahi mwaattelo wa itthu nninvaha ahu. Akhala wira muninvarela muteko mwaha wa omphenta, Yehova onnivaha efaita yinceene ni khonikhala-khala oliyalaka itthu iyo munivara anyu mahiku otheene.​—Math. 6:20; aHéb. 6:10.

13. Moovarihana ni Onamukuttho 9:23, 24, Yehova oonihenrye sai wira aaneemererya enamuna ele esya ya onamukuttho?

¹³ Etthu ya neexexe nniixutta ahu: Yehova onnireeliha mpantta wa valaponi wa mutthenkeso awe. Nkahaya muupuwele ele yiiraneyale 1512 ohinatthi Kristu orwa, okathi yaatekiwe aya etabernaakulu omwaako Sinayi. (Okhum. 40:17) Moise aahihoolela niira nne vaavo Aroni ni anaawe yaathanliwe aya okhala anamukuttho. Nloko notheene na aIsarayeli naahithukumana  wira yaawehe anamukuttho ale avahaka mikuttho soopacerya sa inama. (Onam. 9:1-5) Yehova oonihenrye sai wira aaneemererya enamuna ele esya ya onamukuttho? Okathi Aroni ni Moise yaareeliha aya atthu otheene, Yehova aahirumiha mooro okhumaka wiirimu yoowo waapanhe moomalela mikuttho iyo saari valtaari.​—Mmusome Onamukuttho 9:23, 24.

14. Xeeni weemererya wa Yehova oonihenrye awe onamukuttho wa Aroni ni anaawe orina aya efaita mookumini mwahu?

¹⁴ Etthu ele yiiraneya yaari yootikiniha. Mooro ole waakhuma wiirimu wooniherya exeeni? Wooniherya wira Yehova aanikhaliherya onamukuttho wa Aroni ni anaawe, yaawo aathanlale awe okhala anamukuttho. Okathi aIsarayeli yoonale aya wira Yehova aaheemererya ni aanikhaliherya onamukuttho ole, awo yaahikhalana mathowa ooloka wira akhaliheryeke. Niireke eyo yookhalana efaita mookumini mwahu? Aayo! Onamukuttho wa wIsarayeli waari eruku wa onamukuttho wuulupale waarowa orwa muhoolo. Tthiri Kristu tori Mukhulupale a Anamukuttho Muulupalexa. Owo onrowa ovaraka ni anamukuttho 144.000 wiirimu.​—aHéb. 4:14; 8:3-5; 10:1.

15-16. Exeeni enooniherya wira “murumeyi òroromeleya ni ànkhili” onneemereriwa ni Yehova?

¹⁵ Mwaakha wa 1919, Yesu aahithanla egrupu yaamukhaani ya maKristau oowoottihiwa wira akhale “murumeyi òroromeleya ni ànkhili”. Murumeyi owo onnihoolela muteko woolaleerya ni waavaha “yolya okathi aya” atthareli otheene a Kristu. (Math. 24:45) Niireke sookhala itthu sinooniherya wira Muluku onnimweemererya murumeyi oororomeleya ni ankhili?

¹⁶ Satana ni olumwenku awe ola wootakhala onnipaka itthu sotheene oniwerya awe wira ohonone muteko wa murumeyi oororomeleya. Moonelo wa apinaatamu, khivaarowa oweryaneya murumeyi oororomeleya ovara muteko awe.  Masi, hata saakhumelenle ikhotto piili suulupale olumwenku wotheene, olupatthiwa, othowa musurukhu ni othokoreriwa moohixariya, murumeyi oororomeleya ni ankhili onnivikaniha waavaha yoolya ya omunepani atthareli otheene a Kristu ari valaponi. Nave nkahaya muupuwele yoolya ya omunepani nnaavaha ahu mahala atthu olelo-va mattaava anivikana 900! Eyo enooniherya wira Yehova onnimukhaliherya ni omweemererya murumeyi oororomeleya ni ankhili. Nwehe etthu ekina enooniherya mareeliho a Yehova, etthu ene tiila: Muteko woolaleerya. Ihapari sooreera sinnilaleiwa “mulaponi mothene”. (Math. 24:14) Moohaanyiherya, olelo-va Yehova onnikhaliherya ni onnireeliha mutthenkeso awe.

17. Ninrowa wooniherya sai wira ninnikhaliherya mutthenkeso Yehova onirumeela awe?

¹⁷ Ti vooloka wiikoha so: ‘Kiireke kinnixukhurela wiirela mpantta mutthenkeso wa Yehova?’ Itthu sinooniherya wira Yehova onnireeliha mutthenkeso awe sinnooneya vanceene ntoko mooro ole waakhumelenle okathi wa Moise ni Aroni. Nto nookhalana mathowa manceene ooxukhurela. (1 aTes. 5:18, 19) Ninrowa wooniherya sai wira ninnikhaliherya mutthenkeso Yehova onirumeela awe? Nittharaka malakiheryo anikhuma mBiibiliyani ninvahiwa ahu muliivuruni mwahu, mithukumano sa mmulokoni, asembeleya ni akongresu. Ohiya-vo, nnimooniherya okhaliherya wahu niluttuweliwaka ovara muteko woolaleerya ni wiixuttiha.​—1 aKor. 15:58.

18. Mulakenle opaka exeeni?

¹⁸ Mwiimananiheke ovarihela muteko itthu sotheene muniixutta anyu eliivuru ya Onamukuttho. Yoopacerya, mwiimananiheke ophavela weemereriwa ni Yehova wira eemererye mikuttho nninvaha ahu. Ya nenli, mmurumeeleke Yehova mwaha woowi munnimuxukhurela. Ya neeraru, nvikanihe onvaha Yehova itthu sooloka mwaha woowi munnimphenta ni murima wotheene. Ni ya neexexe, mukhaliheryeke ni murima wotheene mutthenkeso yoowo onirumeela awe olelo-va. Akhala wira nnoopaka itthu iyo sotheene, nnoomooniherya Yehova wira ninnivaha efaita eparakha nrina ahu yookhala Anamoona awe!