1-2. Kiristtaaneti ha wodiyan Wogaabaa maxaafaabaa eranawu koyana koshshiyoy aybissee?

BA YELAGA laggiyaa Ximootiyoosa, kiitettida PHawuloosi, “Xoossaa maxaafa ubban Xoossaa Ayyaanai de7ees. Qassi he maxaafati . . . maaddoosona” giidi hassayissiis. (2 Xim. 3:16, 17) Hegaappe issoy Wogaabaa maxaafaa. He maxaafaa xeelliyaagan ne qofay aybee? Hegee ha wodiyan deˈiya nuussi maaddenna daro higgeti deˈiyo maxaafa giidi issi issi asay qoppees; shin Kiristtaaneti hegaadan qoppokkona.

² Wogaabaa maxaafay 3,500 gidiya layttappe kase xaafettiis; shin Yihooway “nuna tamaarissanau” he maxaafay hanno gakkanawu deˈanaadan oottiis. (Roo. 15:4) Wogaabaa maxaafay issi issibaa xeelliyaagan Yihoowa qofaanne ayyo siyettiyaabaa akeekanaadan nuna maaddees. Hegaa gishshawu, nuuni hegaappe tamaariyoogan ufayttana koshshees. Ayyaanay denttettin xaafettida he maxaafaappe nuuni tamaariyo darobay deˈees. Ane hegeetuppe oyddata beˈoos.

3. Layttan layttan Nagaraa Atto Giissiyo Gallassan, yarshshoy yarshshettiyoy aybissee?

³ Tamaariyo koyrobaa: Nu yarshshoy ekettanaadan nuuni Yihoowa ufayssana koshshees. Layttan layttan Nagaraa Atto Giissiyo Gallassan, Israaˈeela deree issippe shiiqin qeese ubbatu halaqay mehiyaa yarshshees. He yarshshoy Israaˈeelati nagaraappe geeyana koshshiyoogaa eti hassayanaadan maaddiis! SHin koyro qeese ubbatu halaqay Israaˈeelati nagaraappe geeyanaadan  yarshshettida mehiyaa suuttaappe ekkidi Ubbaappe Aadhdhiya Geeshsha Sohuwaa geliyoogaappe aaruwan keehi koshshiya issibaa oottana bessees.

4. Wogaabaa 16:12, 13n, qeese ubbatu halaqay Nagaraa Atto Giissiyo Gallassan Ubbaappe Aadhdhiya Geeshsha Sohuwaa geliyo koyro wode ay oottii? (Koyro sinttan deˈiya misiliyaa xeella.)

⁴ Wogaabaa 16:12, 13 nabbaba. Nagaraa Atto Giissiyo Gallassan aybi haniyaakko qoppa: Qeese ubbatu halaqay Xoossaa dunkkaaniyaa gelees. He galla I Ubbaappe Aadhdhiya Geeshsha Sohuwaa gelana koshshiyo heezzaappe hagee koyroogaa. I issi kushiyan cuwayiyo ixaanay kumido miishshaa oyqqees, qassi hankko kushiyan bonqqoy kumido worqqa miishshaa oyqqees. Ubbaappe Aadhdhiya Geeshsha Sohuwaa geliyoosan deˈiya magalashuwaa sinttan I eqqees. I Ubbaappe Aadhdhiya Geeshsha Sohuwaa gita bonchchuwan gelees; qassi maachchaa taabootaa sinttan eqqees. Leemiso hanotan, I Xoossaa Yihoowa sinttan eqqees! Haˈˈi qassi qeesee bonqquwaa bolli geeshsha ixaanaa yeggees, yaatin keettay sawuwaa tonggu gees. * Guyyeppe I yarshshettida mehiyaa suuttaa ekkidi Ubbaappe Aadhdhiya Geeshsha Sohuwaa haranttuwaa gelana. I nagaraa yarshshuwaa suuttaa efaanaappe kase ixaanaa cuwayiyoogaa akeeka.

5. Nagaraa Atto Giissiyo Gallassan, ixaanaa goˈettiyo hanotaappe ay tamaarana danddayiyoo?

⁵ Nagaraa Atto Giissiyo Gallassan, ixaanaa goˈettiyo hanotaappe ay tamaarana danddayiyoo? Ammanettidi Yihoowawu goynniyaageeti woossiyo A ufayssiya woosay ixaanaa mala gidiyoogaa Geeshsha Maxaafay yootees. (Maz. 141:2; Ajj. 5:8) Qeese ubbatu halaqay ixaanaa Yihoowa sinttan gita bonchchuwan shiishshiyoogaa hassayite. Hegaadan, nuuni Yihoowa gita bonchchuwan woossoos. Saluwaanne saˈaa Medhdhidaagee, issi naˈi ba aawaakko shiiqiyoogaadan nuuni akko shiiqanaadan paqqadiyoogawu keehi galatoos. (Yaaq. 4:8) I nuna ba dabbodan xeellees! (Yaaq. 2:23) Nuuni ha maataa keehi nashshiyo gishshawu A ufayssennabaa aybanne oottanawu koyokko.

6. Qesee ubbatu halaqay yarshshanaappe kase ixaanaa cuwayiyo hanotaappe nuuni ay tamaariyoo?

⁶ Qesee ubbatu halaqay yarshshanaappe kase ixaanaa cuwayiyoogaa hassayite. Ixaanaa koyro cuwayiyoogan, Xoossay an ufayttiyoogaa shaakki erees. Hegaappe nu ay tamaarana danddayiyoo? Yesuusi ba deˈuwaa yarshsho oottidi immanaappe kase, asaa atotettaappe aaruwan koshshiya issibaa, I saˈan deˈiyo wode oottiis. Hegee aybee? Yihooway A yarshshuwaa ekkanaadan, I saˈan deˈido wode ubban Yihoowawu ammanettidi azazettiis. Yesuusi yaatiyoogan, issibaa Yihoowa ogiyan oottiyoogee deˈanawu bessiya suure oge gidiyoogaa qonccissiis. Yesuusi ba Aaway ubbabaa haariyo woy ayssiyo ogee likkenne suure gidiyoogaa qonccissiis.

7. Yesuusa kumetta deˈoy A Aawaa ufayssidoy aybissee?

⁷ Yesuusi saˈan deˈido wode ubban, wottiyoobi baynna hanotan Yihoowawu azazettiis. Paaceenne metoy Yesuusa gakkikkokka, qassi I seelliya hanotan hayqqanaagaa erikkokka, I ba aaway haariyo ogee ubbaappe aadhdhiyoogaa bessanawu murttiis. (Pili. 2:8) Yesuusi bana paacee gakkido wode, “keehi yeekkidinne afuxxidi” woossiis. (Ibr. 5:7) I wozanappe woossidoogee I Yihoowawu ammanettidoogaa bessiis, qassi kaseegaappe aaruwan awu azazettanawu murttanaadan oottiis. Yesuusa woosay, Yihoowayyo  sawuwaa tonggu giya ixaanaa mala. Yesuusa kumetta deˈoy A Aawaa ufayssiisinne I ubbabaa haariyo ogee suure gidiyoogaa bessiis.

8. Yesuusa leemisuwaa waani kaallana danddayiyoo?

⁸ Yihoowawu azazettanawunne awu ammanettanawu nuuyyo danddayettida ubbabaa oottiyoogan Yesuusa leemisuwaa kaallana danddayoos. Nuuni Yihoowa ufayssanawu koyiyo gishshawu, paacee gakkiyo wode I maaddanaadan minttidi woossoos. Yaatiyoogan, nuuni Yihoowa haaruwawu exatiyoogaa bessoos. Yihooway ixxiyobata nuuni oottikko, I nu woosaa siyennaagaa eroos. SHin Yihooway dosiyoobata oottikko, nu woosay ayyo sawuwaa tonggu giya ixaanaa mala gidanaagaa ammanettoos. Qassi nu suuretettaynne ammanettidi azazettiyoogee saluwan deˈiya nu Aawaa ufayssiyoogaa ammanettana danddayoos.—Lee. 27:11.

9. Israaˈeelati issippetettaa yarshshuwaa yarshshiyoy aybissee?

⁹ Tamaariyo naaˈˈanttobaa: Nuuni Yihoowa galatanawu ayyo haggaazoos. Nuuni Israaˈeelati yarshshiyo issippetettaa yarshshuwaabaa pilggiyo wode hegaabaa tamaarana. * Wogaabaa maxaafan issi Israaˈeela asi issippetettaa yarshshuwaa “galata yarshsho” oottidi shiishshana danddayiyoogaa akeekoos. (Wog. 7:11-13, 16-18) I yarshshana bessiyo gishshawu gidennan, koyiyo gishshawu yarshshees. I ba Xoossaa Yihoowa siiqiyo gishshawu, ba dosan yarshshees. Yarshshida uri, A so asaynne qeeseti yarshshettida mehiyaa ashuwaa moosona.  SHin, ashuwaappe amaridaagee Yihoowa xallawu imettees. Hegee awugee?

10. Wogaabaa 3:14-16n odettida issippetettaa yarshshoy Yesuusi Yihoowawu haggaazido haggaazuwaara waani issi mala gidii?

¹⁰ Tamaariyo heezzanttobaa: Nuuni Yihoowa siiqiyo gishshawu nuussi deˈiya keehi loˈˈobaa ayyo immoos. Issi mehiyaappe Yihooway handdaa loˈˈobadan xeellees. Qassi kilahota gujjin, mehiyaa ashuwaappe amaridaagee dumma gidiyoogaa I yootiis. (Wogaabaa 3:6, 12, 14-16 nabbaba.) Hegaa gishshawu, issi Israaˈeela asi ba dosan he ashotuppe yarshshiyo wode, Yihooway keehi ufayttees. Hegaa Yihoowawu immida Israaˈeela asi I baassi deˈiya keehi loˈˈobaa Xoossawu immanawu koyidoogaa bessees. Hegaadan, Yesuusi Yihoowa siiqiyo gishshawu, Yihoowawu haggaazanawu bawu danddayettida ubbabaa oottiyoogan, ba dosan baassi deˈiya keehi loˈˈobaa Yihoowawu immiis. (Yoh. 14:31) Xoossaa sheniyaa oottiyoogee Yesuusa ufayssees; I Xoossaa higgiyaa keehi siiqees. (Maz. 40:8) Yesuusi ba dosan haggaaziyoogaa beˈidi Yihooway keehi ufayttiis!

11. Nu haggaazoy he issippetettaa yarshshuwaa mala waani gidii, qassi hegee nuna waati minttettana danddayii?

¹¹ Nuuni Yihoowawu haggaaziyoogee A xeelliyaagan nuussi siyettiyaabaa ayyo bessiyooba gidiyo gishshawu, hegee he issippetettaa yarshshuwaara issi mala. Nuussi deˈiya keehi loˈˈobaa Yihoowayyo immoos; qassi nuuni A nu kumetta wozanaappe siiqiyo gishshawu hegaadan oottoos. Bantta dosan goynniya miilooniyan qoodettiya asay Yihoowanne A ogiyaa wozanappe siiqidi haggaaziyoogaa beˈidi Yihooway ay keena ufayttaneeshsha! Yihooway nuuni oottiyoobaa xalla gidennan, nu hegaa aybissi oottiyaakko akeekeesinne xoqqu ootti xeellees. Hegee nuna keehi minttettees. Leemisuwawu, neeni cima gidikko, ne koyiyoogaadan oottana danddayennaagaa Yihooway akeekiyoogaa ammanettana danddayaasa. Yihoowawu darobaa oottana danddayennabadan neessi siyettennan waayi aggana; shin neeni oottana danddayiyoobaa oottanaadan nena denttettiyay Yihoowa wozanappe siiqiyoogaa gidiyoogaa I akeekees. Neeni immana danddayiyo, neessi deˈiya loˈˈobaa I ufayttidi ekkees.

12. Issippetettaa yarshshuwaa xeelliyaagan Yihoowawu aybi siyettii, qassi hegee nuna waati minttettii?

¹² Issippetettaa yarshshuwaappe nu ay tamaariyoo? Mehiyaa ashuwaappe doretida murutta ashuwaa taman xuuggiyo wode kiyiya sawuwan Yihooway ufayttees. Hegaa gishshawu, neeni ne dosan Yihoowawu haggaazanawu neessi danddayettida ubbabaa oottiyo wode, I nenankka ufayttiyoogaa ammanettana danddayaasa. (Qol. 3:23) Yihooway nenan ay keena ufayttiyaakko qoppa. Daro gidin guutta gidin, neeni ayyo siiquwan haggaaziyoogaa Yihooway nashsheesinne mule dogenna.—Maa. 6:20; Ibr. 6:10.

13. Wogaabaa 9:23, 24y yootiyoogaadan, qeese gididi sunttettidaageetun Yihooway ufayttidoogaa waati bessidee?

¹³ Tamaariyo oyddanttobaa: Yihooway ba dirijjitiyawu saˈaa baggaa anjjiiddi deˈees. Xoossaa dunkkaanee Siinaa Deriyaa matan 1512n K.K. tolettido wode aybi hanidaakko qoppa. (Kes. 40:17) Muusee Aarooninne A naati qeese gidanaadan sunttettido wogaa kaalettiis. Qeeseti bantta mehiyaa yarshshuwaa koyroogaa yarshshiyo wode beˈanawu Israaˈeela deree issippe shiiqiis. (Wog. 9:1-5) Mati qeese gididi sunttettidaageetun Yihooway ufayttidoogaa waati bessidee? Aarooninne Muusee asaa anjjido wode, yarshshiyoosaa bollan deˈiya yarshshuwaa muleera  maanaadan Yihooway saluwaappe tamaa yeddiis.—Wogaabaa 9:23, 24 nabbaba.

14. Yihooway Aarooni qeese gidiyoogan ufayttidoogee ha wodiyan nuussi koshshiyoy aybissee?

¹⁴ Saluwaappe wodhdhida tamay ay qonccissii? Qeese gidanaadan doorettida Aaroonaaninne A attuma naatun ufayttidoogaanne eta sunttidoogaa bessanawu Yihooway saluwaappe he tamaa yeddiis. Qeeseta Yihooway sunttidoogaa bessiya he qoncce naqaashaa Israaˈeelati beˈido wode, eti he qeesetuura hashetana koshshiyoogaa akeekidosona. Israaˈeelatu qeesetettan Yihooway ufayttidoogee ha wodiyan nuussi keehi koshshiyoy aybissee? He qeesetettay hegaappe aadhdhiya qeesetettawu eeshsho gidido gishshataassa. Qeesenne kawo gididi Qeese Ubbatu Halaqaa gitaa, Kiristtoosaara saluwan oottana 144,000ti deˈoosona.—Ibr. 4:14; 8:3-5; 10:1.

15-16. ‘Ammanettida wozannaama ashkkaran’ Yihooway ufayttiyoogaa waati bessidee?

¹⁵ Yesuusi 1919n ayyaanan tiyettida amarida ishantta ‘ammanettida wozannaama ashkkara’ oottidi sunttiis. He ashkkaray sabbakiyo oosuwaa minni oottiiddi deˈees; qassi Kiristtoosa kaalliyaageetussi “qumaa koshshiyo wodiyan” immees. (Maa. 24:45) Ammanettida wozannaama ashkkaran Yihooway ufayttiyoogaa bessiyaabaa akeekidetii?

¹⁶ Seexaanaynne aara hashetiyaageeti ammanettida ashkkaraa oosuwaa teqqanawu baaxetoosona. He ashkkaraa Yihooway maaddennaakko, ha oosuwaa oottana danddayettenna. Koyronne naaˈˈantto alamiyaa olay, zarbbenna yedetay, kumetta alamiyan miishshaa metoy, qassi naaqoy deˈishinkka, ammanettida wozannaama ashkkaray saˈan deˈiya Kiristtoosa kaalliyaageetussi ayyaanaa qumaa  aggennan immees. Ha wodiyan, miishshaa qanxxennan nuuni demmiyo, 900⁠ppe dariya qaalatun deˈiya daro xuufeta ane qoppa! Hagee Xoossay ashkkaraa maaddiiddi deˈiyoogaa bessiya naqaasha. Sabbakiyo oosoykka Yihooway anjjiiddi deˈiyoogaa bessiyaaba. Mishiraachchoy “sa7a ubban” sabbakettiiddi deˈees. (Maa. 24:14) Yihooway ha wodiyan ba dirijjitiyaa kaalettiiddinne darissidi anjjiiddi deˈiyoogaa akeekana danddayoos.

17. Yihooway goˈettiiddi deˈiyo dirijjitiyaa maaddiyoogaa nuuni waati bessana danddayiyoo?

¹⁷ Nuna hagaadan oychchana danddayoos: ‘Taani Yihoowa dirijjitiyaa bagga gidiyoogaa nashshiyaanaa?’ Yihooway Muuse wode I sunttidoogeetun ufayttidoogaa bessanawu saluwaappe tamaa yeddiis. Hegaadan, ha wodiyan Yihooway ba dirijjitiyaa goˈettiiddi deˈiyoogaa bessiya qoncce naqaashay nuussi deˈees. Nuuni galatanaadan oottiya darobay deˈees. (1 Tas. 5:18, 19) Yihooway goˈettiiddi deˈiyo dirijjitiyaa nuuni waati maaddana danddayiyoo? Nu xuufetun, gubaaˈe, woradaanne killiliyaa shiiqotun nuuni Geeshsha Maxaafaappe tamaariyoobaa oosuwan peeshshiyoogan hegaadan maaddoos. Hegaa bolli qassi, sabbakanawunne tamaarissanawu nuussi danddayettida ubbabaa oottiyoogan maaddiyoogaa bessana danddayoos.—1 Qor. 15:58.

18. Neeni ay oottanawu murttadii?

¹⁸ Simmi yaakko, Wogaabaa maxaafaappe nuuni tamaaridobaa oosuwan peeshshanawu murttidaageeta gidoos. Nu yarshshuwaa Yihooway ekkanaadan nuuni koyoos. Nuuni Yihoowa galatanawu ayyo haggaazoos. Nu kumetta wozanaappe Yihoowa siiqiyo gishshawu nuussi deˈiya keehi loˈˈobaa ayyo ubbatoo immoos. Qassi ha wodiyan I goˈettiiddi deˈiyo dirijjitiyaa maaddanawu nuuyyo danddayettida ubbabaa oottoos. Hageeta oottiyoogan, Yihoowa Markkata gididi awu haggaaziyo maataa xoqqu ootti xeelliyoogaa bessoos!