1-2. Kay ano nga an mga Kristiano yana kinahanglan magin interesado ha libro han Levitico?

GINPAHINUMDOMAN ni apostol Pablo an iya batan-on nga sangkay nga hi Timoteo nga “an ngatanan nga Kasuratan giniyahan han Dios ngan mapulsanon.” (2 Tim. 3:16) Upod hito an libro han Levitico. Ano an imo panhunahuna hito nga libro han Biblia? Para ha iba, ito nga libro nagsusulod hin mga surundon nga diri na aplikado ha aton panahon, pero iba an panhunahuna han tinuod nga mga Kristiano hito nga libro.

² An Levitico ginsurat mga 3,500 ka tuig na an naglabay, pero gintipigan ito ni Jehova para “ha pagtutdo ha aton.” (Roma 15:4) Tungod kay an Levitico nabulig ha aton nga masabtan an panhunahuna ni Jehova, kinahanglan magin interesado kita nga adman ito. Ha pagkamatuod, damu nga leksyon an aton mahibabaroan hini nga giniyahan nga libro. Hisgotan naton an upat hito.

3. Kay ano nga kada tuig naghahalad ha Adlaw han Pagpara han Sala?

³ Siyahan nga leksyon: Basi karawaton an aton mga halad, kinahanglan may-ada kita han pag-uyon ni Jehova. Kada tuig, ha Adlaw han Pagpara han Sala, an nasud han Israel nagtitirirok ngan may iginhahalad nga mga hayop. Ito nga mga halad nagpapahinumdom ha mga Israelita nga kinahanglan hira malimpyohan tikang ha sala! Pero hito nga adlaw, antes an hitaas nga saserdote magdara han dugo han iginhalad nga hayop ngadto ha Pinakabaraan, may-ada anay hiya kinahanglan buhaton, nga ha pagkamatuod mas importante pa ito kay ha kapasayloan han mga sala han nasud.

4. Sumala ha Levitico 16:12, 13, ano an ginbubuhat han hitaas nga saserdote ha iya siyahan nga pagsulod ha Pinakabaraan ha Adlaw han Pagpara han Sala? (Kitaa an retrato ha kobre.)

 ⁴ Basaha an Levitico 16:12, 13. Imadyina an nahitatabo ha Adlaw han Pagpara han Sala: An hitaas nga saserdote nasulod ha tabernakulo. Ini an siyahan han iya tulo ka beses nga pagsulod ha Pinakabaraan hito nga adlaw. Ha usa nga kamot, iya ginkakaptan an surudlan nga may sulod nga mahamot nga insenso, ngan ha usa pa nga kamot, iya ginkakaptan an bulawan nga insensaryo nga puno hin bága. Naundang hiya ha atubangan han kurtina antes sumulod ha Pinakabaraan. Nasulod hiya ha Pinakabaraan nga may daku nga pagrespeto ngan natindog ha atubangan han arka han kasabotan. Ha simboliko nga paagi, naatubang mismo hiya kan Jehova nga Dios! Hito nga takna, hinay-hinay nga ibububo han saserdote an baraan nga insenso ngadto ha mga bága, ngan mapupuno an kwarto hin mahamot nga amyon. * Nuroniyan, masulod hiya utro ha Pinakabaraan dara an dugo han iginhalad nga mga hayop. Tigamni nga nagsusunog anay hiya han insenso antes niya ipresenta an dugo han mga halad para ha sala.

5. Ano an aton mahibabaroan mahitungod ha paggamit han insenso ha Adlaw han Pagpara han Sala?

⁵ Ano an aton mahibabaroan mahitungod ha paggamit han insenso ha Adlaw han Pagpara han Sala? Iginpapakita han Biblia nga pariho ha insenso an gin-uuyonan nga mga pag-ampo han magtinumanon nga magsiringba ni Jehova. (Sal. 141:2; Pah. 5:8) Hinumdumi nga an hitaas nga saserdote nagdara han insenso ngadto ha atubangan ni Jehova nga may daku nga respeto. Ha pariho nga paagi, kon nag-aampo kita kan Jehova, ginbubuhat naton ito nga may daku nga respeto. Gin-aapresyar gud naton nga gintutugotan kita han Maglalarang han uniberso nga makadaop ha iya ha pag-ampo ngan magin duok ha iya, pariho hin anak ngadto ha iya tatay. (San. 4:8) Ginkakarawat kita niya sugad nga iya mga sangkay! (Sal. 25:14) Aton gud gin-aapresyar ini nga pribilehiyo salit diri naton karuyag nga mapasubo hiya.

6. Ano an aton mahibabaroan tikang ha punto nga ginsusunog anay han hitaas nga saserdote an insenso antes ipresenta an mga halad?

⁶ Hinumdumi nga ginsusunog anay han hitaas nga saserdote an insenso antes niya ipresentar an mga halad. Hito nga paagi, ginsisiguro niya nga uuyonan hiya han Dios kon maghalad na hiya. Ano an aton mahibabaroan tikang hini? Han nakanhi hi Jesus ha tuna, may kinahanglan hiya buhaton nga importante antes niya maihalad an iya kinabuhi​—usa nga butang nga mas importante kay ha paghatag hin katalwasan ha katawohan. Ano ito? Kinahanglan magin maunungon ngan masinugtanon hiya kan Jehova ha bug-os niya nga kinabuhi dinhi ha tuna basi karawaton ni Jehova an iya halad. Hito nga paagi, mapapamatud-an ni Jesus nga husto an pagkinabuhi nga uyon ha paagi ni Jehova. Mabibindikar ni Jesus​—o mapapamatud-an nga husto ngan matadong—​an pagkasoberano, o paagi han pagmando, han iya Amay.

7. Kay ano nga an bug-os nga pagkinabuhi ni Jesus ha tuna nakapalipay gud ha iya Amay?

⁷ Ha bug-os nga kinabuhi ni Jesus ha tuna, nagin matinumanon gud hiya ha matadong nga mga suruklan ni Jehova. Waray pagsulay o pagsari​—bisan an masakit nga kamatayon nga iya aatubangon—​nga makakapaluya han iya hingyap nga depensahan an paagi han pagmando han iya Amay. (Fil. 2:8) Han inatubang hi Jesus hin mga pagsari, nag-ampo hiya nga “may mga pangaraba ngan mga luha.” (Heb. 5:7) An iya sinsero gud nga pag-inampo nagpapakita nga maunungon hiya kan Jehova ngan nakabulig ito nga magin mas determinado pa gud hiya nga magin masinugtanon. Para kan Jehova, an mga pag-ampo ni Jesus pariho han amyon han mahamot nga  insenso. An bug-os nga pagkinabuhi ni Jesus nakapalipay gud ha iya Amay ngan nagbindikar han Iya soberanya.

8. Paonan-o naton masusubad an pagkinabuhi ni Jesus?

⁸ Masusubad naton hi Jesus pinaagi ha pagbuhat han aton bug-os nga mahihimo nga magin masinugtanon kan Jehova ngan magin maunungon ha iya. Kon naatubang kita hin mga pagsari, sinsero gud nga nag-aampo kita han bulig ni Jehova kay karuyag naton nga lipayon hiya. Hito nga paagi, aton iginpapakita nga nasuporta kita ha paagi han Iya pagmando. Maaram kita nga diri kakarawaton ni Jehova an aton mga pag-ampo kon may ginbubuhat kita nga iya nadidirian. Pero kon nagkikinabuhi kita uyon ha iya mga suruklan, makakasarig kita nga an aton kinasingkasing nga mga pag-ampo magigin pariho hin mahamot nga insenso para ha iya. Ngan makakasiguro kita nga an aton integridad ngan pagin masinugtanon nakakapalipay gud ha aton Amay ha langit.​—Prob. 27:11.

9. Kay ano nga an mga Israelita naghahatag hin mga halad nga ginsasarosaroan?

⁹ Ikaduha nga leksyon: Nag-aalagad kita kan Jehova tungod kay mapasalamaton kita ha iya. Basi pabug-atan ini, aton tagdon an mga halad nga ginsasarosaroan, nga usa pa nga importante nga aspekto han tinuod nga pagsingba ha kadaan nga Israel. * Ha libro han Levitico, aton nahibaroan nga an usa nga Israelita mahimo maghatag hin halad nga ginsasarosaroan “sugad nga kapahayagan hin pagpasalamat.” (Lev. 7:11-13, 16-18) Naghahalad hiya hini, diri tungod kay obligado  hiya, kondi tungod kay karuyag niya. Salit boluntaryo ini nga halad nga ginbubuhat han usa tungod kay hinigugma niya an iya Dios nga hi Jehova. An tawo nga naghahatag hini nga halad, an iya pamilya, ngan an mga saserdote makaon han karne han iginhalad nga hayop. Pero may mga parte han iginhalad nga hayop nga para kan Jehova gud la. Ano ito nga mga parte?

10. May kalabotan ha halad nga ginsasarosaroan nga mababasa ha Levitico 3:6, 12, 14-16, ano an igintututdo ha aton mahitungod han motibo ni Jesus ha pagbuhat han kaburut-on han iya Amay?

¹⁰ Ikatulo nga leksyon: Tungod han gugma, ginhahatag naton kan Jehova an aton pinakamaopay. Para kan Jehova, an tambok an pinakamaopay nga parte han usa nga hayop. Espisipiko liwat niya nga gin-unabi nga an importante nga mga organo, upod na an mga kidney, may espesyal nga bili. (Basaha an Levitico 3:6, 12, 14-16.) Salit labi nga nalilipay hi Jehova kon boluntaryo nga iginhahalad ha iya han usa nga Israelita an importante nga mga organo ngan an tambok. An Israelita nga nagbubuhat hito nagpapakita han iya daku nga hingyap nga ihatag ha Dios an iya pinakamaopay. Ha pariho nga paagi, kinaburut-on nga iginhatag ni Jesus kan Jehova an iya pinakamaopay pinaagi han bug-os-kalag nga pag-alagad ha iya tungod han gugma ha Iya. (Juan 14:31) Para kan Jesus, makalilipay an pagbuhat han kaburut-on han Dios; hilarom an iya gugma ha balaud han Dios. (Sal. 40:8) Sigurado nga nalipay gud hi Jehova nga makita hi Jesus nga kinaburut-on nga nag-aalagad ha iya!

11. Paonan-o an aton pag-alagad pariho han mga halad nga ginsasarosaroan, ngan kay ano nga nakakaliaw ito ha aton?

¹¹ Pariho han mga halad nga ginsasarosaroan, an aton pag-alagad kan Jehova boluntaryo nga kapahayagan han aton inaabat ha iya. Ginhahatag naton kan Jehova an aton pinakamaopay, ngan ginbubuhat naton ito kay bug-os-kasingkasing an aton gugma ha iya. Nalilipay gud hi Jehova nga makita an minilyon nga magsiringba nga nag-aalagad ha iya hin kinaburut-on tungod han daku nga gugma ha iya ngan ha iya mga paagi! Nakakaliaw gud hibaroan nga nakikita ngan ginpapabilhan ni Jehova diri la an aton mga buhat kondi pati an aton mga motibo. Bangin abaton mo nga gutiay la an imo maihahatag kan Jehova, pero nakikita niya an imo daku nga gugma nga nagpapagios ha imo nga himoon an kaya mo buhaton. Nalilipay hiya pagkarawat han pinakamaopay nga imo kaya ihatag.

12. Ano an inaabat ni Jehova ha mga halad nga ginsasarosaroan, ngan paonan-o ito nakakadasig ha aton?

¹² Ano an aton mahibabaroan may kalabotan ha mga halad nga ginsasarosaroan? Samtang nasusunog an pinakamaopay nga mga parte han hayop, natipaigbaw an aso ngan nalilipay hi Jehova. Salit laumi nga nalilipay hi Jehova han imo kinaburut-on ngan bug-os-kalag nga pag-alagad. (Col. 3:23) Imadyina an iya hiyom han pag-uyon. Para ha iya, an imo mahigugmaon nga mga paningkamot ha pag-alagad, daku man o guti, pariho hin mga bahandi nga iya hihinumdumon ngan papabilhan ha kadayonan.​—Mat. 6:20; Heb. 6:10.

13. Sumala ha Levitico 9:23, 24, paonan-o iginpakita ni Jehova an iya pag-uyon ha pagkasaserdote?

¹³ Ikaupat nga leksyon: Ginbibendisyonan ni Jehova an tunan-on nga bahin han iya organisasyon. Tagda an nahitabo han 1512 B.C.E. han ginhimo an tabernakulo ha ubos han Bukid Sinai. (Ex. 40:17) Ginpangunahan ni Moises an seremonya ha pagpili kan Aaron ngan ha iya mga anak sugad nga mga saserdote. Nagkatirok an nasud han Israel para mag-obserbar ha mga saserdote ha pagpresentar han ira siyahan nga mga halad nga hayop. (Lev. 9:1-5) Paonan-o iginpakita ni Jehova an iya pag-uyon ha bag-o la nga ginpili nga mga saserdote? Samtang hira Aaron ngan Moises nagbibendisyon ha katawohan, nagpadara hi Jehova hin kalayo basi maugtang  an halad ha halaran.​—Basaha an Levitico 9:23, 24.

14. Kay ano nga importante ha aton yana an mahitungod han pag-uyon ni Jehova ha pagkasaserdote ni Aaron ngan han iya mga anak?

¹⁴ Ano an iginpapasabot han kalayo nga iginpadara ni Jehova han ginpili an hitaas nga saserdote? Iginpakita ni Jehova an iya bug-os nga pag-uyon kan Aaron ngan ha iya mga anak nga ginpili sugad nga mga saserdote. Han nakita han mga Israelita inin klaro nga ebidensya han suporta ni Jehova ha mga saserdote, inabat nira nga kinahanglan liwat nira sumuporta hin bug-os ha ira. Importante ba ito ha aton yana? Oo! Kay an pagkasaserdote ha Israel nagpapadagaw ha mas harangdon nga pagkasaserdote. An Kristo, nga mas harangdon nga Hitaas nga Saserdote, may-ada 144,000 nga saserdote ngan hadi nga mag-aalagad kaupod niya ha langit.​—Heb. 4:14; 8:3-5; 10:1.

15-16. Paonan-o iginpapakita ni Jehova nga gin-uuyonan niya “an matinumanon ngan maaramon nga uripon”?

¹⁵ Han 1919, nagpili hi Jesus hin gutiay nga grupo han dinihogan nga kabugtoan sugad nga “an matinumanon ngan maaramon nga uripon.” Ito nga uripon an nangunguna ha pagsangyaw nga buruhaton ngan naghahatag ha mga sumurunod han Kristo hin “pagkaon ha husto nga panahon.” (Mat. 24:45) Nakikita ba naton an klaro nga ebidensya han pag-uyon han Dios ha matinumanon ngan maaramon nga uripon?

¹⁶ Damu gud an ginbubuhat ni Satanas ngan han iya kalibotan basi magin makuri an buruhaton han matinumanon nga uripon. Kon waray han bulig ni Jehova magigin imposible gud an pagtuman hito. Bisan pa han duha nga girra ha kalibotan, duro nga pagtimaraot, krisis ha ekonomiya ha kalibotan, ngan diri patas nga pagtratar, nagpadayon la gihapon an matinumanon  ngan maaramon nga uripon ha pagtagana han espirituwal nga pagkaon ha mga sumurunod han Kristo ha tuna. Hunahunaa la an hura ngan waray bayad nga espirituwal nga pagkaon nga may-ada kita ha sobra 900 nga linggwahe! Klaro ini nga ebidensya han suporta han Dios. An pagsangyaw nga buruhaton usa liwat nga ebidensya han bendisyon ni Jehova. Iginsasangyaw na gud yana an maopay nga sumat “ha bug-os nga inuukyan nga tuna.” (Mat. 24:14) Matin-aw, ginigiyahan ngan hura nga ginbibendisyonan ni Jehova an iya organisasyon yana.

17. Paonan-o naton maipapakita an aton suporta ha organisasyon nga ginagamit ni Jehova?

¹⁷ Maopay nga pakianhan an aton kalugaringon, ‘Mapasalamaton ba ako nga magin kaapi han tunan-on nga bahin han organisasyon ni Jehova?’ Naghahatag ha aton hi Jehova hin ebidensya nga makakombinse gud pariho han kalayo nga iginpadara ni Jehova tikang ha langit ha panahon nira Moises ngan Aaron. Damu gud an aton angay ipasalamat. (1 Tes. 5:18, 19) Paonan-o naton maipapakita an aton suporta ha organisasyon nga ginagamit ni Jehova? Pinaagi ha pagsunod ha basado ha Biblia nga giya nga aton nakakarawat tikang ha aton mga publikasyon, katirok, asembleya, ngan kombensyon. Maipapakita liwat naton an suporta pinaagi ha bug-os nga pakigbahin ha pagsangyaw ngan pagtutdo nga buruhaton tubtob ha aton mahihimo.​—1 Cor. 15:58.

18. Determinado ka nga buhaton an ano?

¹⁸ Magin determinado nga iaplikar an mga leksyon nga aton nahibaroan ha libro han Levitico. Hinaot magkaada kita han pag-uyon ni Jehova basi karawaton an aton mga halad. Hinaot mag-alagad kita kan Jehova tungod kay mapasalamaton kita ha iya. Hinaot padayon naton nga ihatag kan Jehova an aton pinakamaopay tungod kay hinigugma gud naton hiya. Ngan hinaot bug-os-kasingkasing nga suportaran naton an organisasyon nga ginagamit niya yana. Kon bubuhaton naton ito ngatanan, maipapakita naton kan Jehova nga aton ginpapabilhan an pribilehiyo nga mag-alagad sugad nga iya mga Saksi!