1, 2. მუშენ რე ქრისტიანეფშო საინტერესო ლევიანეფიშ წიგნ?

მოციქულ პავლექ, მუშ ახალგაზრდა მეგობარ ტიმოთეს ქუგაშინ, ნამდა „მთელ წმინდა წერილ ღორონთშე რე შთაგონებულ დო მარგებელ რე“ (2 ტიმ. 3:16). ლევიანეფიშ წიგნ ხოლო წმინდა წერილეფიშ ნაწილ რე. თქვა მუს ფიქრენთ თე წიგნიშ გურშენ? ნამთინე შილებე ფიქრენს, ნამდა თე წიგნის მოჩამილ რე წესეფ, ნამუთ ამდღა ვა რე პრაქტიკულ, მარა ჭეშმარიტ ქრისტიანეფ თაშ ვა ფიქრენა.

² ლევიანეფიშ წიგნიქ სოდგარენ 3 500 წანაშ წოხოლე იჭარ, მარა იეჰოვაქ თინა „ჩქინ ოგურაფალო“ ქიკნომჩუეს (რომ. 15:4). ლევიანეფიშ წიგნ მოხვარნა ქინვანჭათ იეჰოვაშ აზროვნებას, ათეშენ მთელ მონდომათ ოკო გეგმიბრკვიათ თე წიგნი. ღორონთიშ შთაგონებულ თე წიგნიშე, ბრელ მუდგარენიშ გურაფა შემლებნა. მორთ, გუვარჩუათ თეშ ოთხ მაგალითი.

3. მუშენ წირენდეს ირ წანას მსხვერპლის გიშაჸიდირალიშ დღას?

³ პირველ: იეჰოვაქ ჩქინ მსხვერპლ მიღასინ, თიშ მოწონა ოკო მიღდან. ირ წანას, გიშაჸიდირალიშ დღას, ისრაელ ერი ართო იშაყარუდ დო მღვდელმთავარ ცხოველეფს წირენდჷ მსხვერპლო. თე შესაწირავეფ გაშინანდჷ ისრაელეფს, ნამდა თინეფქ ცოდვაშე ოკო გესუფთესკო! მარა სოიშახ მღვდელმთავარ წმინდათაწმინდაშა შეწირულ ზისხირს მინიღანდჷ, თიქ უმოს მნიშვნელოვან მუდგარენ ოკო აკეთკო.

4. მუჭოთ ლევიანეფიშ 16:12 დო 13-ს რე მოშინაფილ, მუს ორთჷ მღვდელმთავარ გიშაჸიდირალიშ დღას წმინდათაწმინდაშა პირველ მინულაშ დროს? (ქოძირით სურათ გალენ გვერდის)

⁴ წეკითხით ლევიანები 16:12, 13. წერმიდგინით მუ ხვადუდ  გიშაჸიდირალიშ დღას: მღვდელმთავარ მინურს კარავშა. თიქ თე დღას სუმშა ოკო მინორთას წმინდათაწმინდაშა; თენა პირველ მინულა რე. ართ ხეს თის უკებ ჟირ ხუშ მოფშა ჯგირ შურ უღუნ ფერ საკმეველ დო მაჟია ხეს ოქროშ საცეცხლურ, ნამუთ ეფშა რე ვარვალანსინ ფერ ნორცხვათ. თინა ჩენდუ ფარდაშ წოხოლე, ნამუთ წმინდათაწმინდაშა მინაულარს ფორუნს. დიდ მოწიწებათ მინურს წმინდათაწმინდაშა დო შეთანხმებაშ კიდობანიშ წოხოლე ჩენდუ. სიმბოლურ გაგებათ თინა იეჰოვაშ წოხოლე გერე! ასე მღვდელმთავარ ფრთხილაშე მინარღვანს საკმეველს ოქროშ საცეცხლურს დო თექიანობა ჯგირ შურით ეიფშაფუ. * უმოს გვიანო თიქ კინ ოკო მინორთას წმინდათაწმინდაშა დო გემნიღას შეწირულ ცხოველეფიშ ზისხირ. ყურადღება ქიმიაქცით, ნამდა საკმეველს ცოდვეფიშ მსხვერპლიშ შეწირუაშახ ჭუნს.

5. მუშ გურაფა შემლებნა გიშაჸიდირალიშ დღას საკმეველიშ გიმორნაფაშე?

⁵ მუშ გურაფა შემლებნა გიშაჸიდირალიშ დღას საკმეველიშ გიმორნაფაშე? ბიბლიაშე ვორწყეთ, ნამდა იეჰოვაშ ართგურ თაყვანიშმცემლეფიშ ლოცვეფ საკმეველცალ რე (ფსალმ. 141:2; გამოცხ. 5:8). ყურადღება ქიმიაქცით თის, ნამდა მღვდელმთავარს დიდ პატიცემათ მეუღუდ საკმეველ იეჰოვაშ წოხოლე. თეშნერო, მუჟამსით ბლოცულენთ, თეს დიდ პატიცემათ ვორთუთ. ჩქი მანგარო ვაფასენთ თის, ნამდა სამყაროშ გუმაჭყაფალ მარზენა უფლებას, იბლოცათ დო დევეახლოვათ თის, მუჭოთ სქუა მუმას (იაკ. 4:8). თინა მეგობრეფო ფთვალნა! (იგავ. 3:32). ჩქი მანგარო ვაფასენთ თე პატის, ათეშენ ვა მოკონა ვოწყინებაფუათ ღორონთის.

6. მუს ბგებულენთ იესოშ გურშენ თი შემთხვევაშე, მუჟამსით მღვდელმთავარ მსხვერპლიშ შეწირუაშახ საკმეველს ჭუნდჷ?

⁶ ქიგიშინით, ნამდა მღვდელმთავარს საკმეველ ცოდვეფიშ მსხვერპლიშ შეწირუაშახ ოკო დუჭუდკო. თეშნერო, მუჟამსით თე რიტუალს ზუსტაშე შეასრულენდჷ დო ცოცხალო გეგმიშ წმინდათაწმინდაშე, დერწმუნებუდ, ნამდა იეჰოვაქ მიწონუ თიშ საქციელ. თე შემთხვევაშე ართ მუდგარენს ბგებულენთ იესოშ გურშენ. დედამიწას ცხოვრებაშ დროს, სოიშახ თინა მუშ დუდის მსხვერპლო შეწირენდკო, ართ მუდგარენ აფუდ ოკეთებელ, ნამუთ უმოს მნიშვნელოვან რდუ, ვინემ კაცობრიობაშ რსხება. მუ რდუ თენა? თიქ ართგურო ოკო დემორჩილკო იეჰოვას დედამიწას ცხოვრებაშ დროს, ნამდა იეჰოვაქ თიშ მსხვერპლ მიწონუკო. თეთ იესო დამტკიცენდჷ, ნამდა იეჰოვაშ მითითებეფით ცხოვრება სწორ რდუ, ღორონთიშ უზენაესობა სამართლიან დო თიშ მართველობა არძაშ უჯგუშ რდუ.

7. მუშენ შემლებნა ფთქუათ, ნამდა იესოქ მუშ ცხოვრებათ განადიდ ზეციერ მუმა?

⁷ დედამიწას ცხოვრებაშ დროს იესოქ სრულყოფილო დეცვჷ იეჰოვაშ მითითებეფ. ვართ ცდუნებაქ, ვართ განსაცდელქ დო ვართ თიშ რჩქინაქ, ნამდა წამებათ ღურა მელუდ, ვეცილ იესოს დამტკიცკო, ნამდა მუშ ზეციერ მუმაშ მართველობა არძაშ უჯგუშ რდუ (ფილ. 2:8). რთულ სიტუაციეფიშ დროს იესო „მანგარ ხვეწინით დო ჩილამურეფით“ ლოცულენდჷ (ებრ. 5:7). თიშ ლოცვეფ ოძირანდჷ, ნამდა იეჰოვაშ ართგურ რდუ დო ხოლო უმოსო აფუდ გინოჭყვიდილ, ბოლოშა ართგურ ჸოფედკო. იეჰოვაშო იესოშ ლოცვეფ ჯგირ შურ უღუნ ფერ საკმეველცალ რდუ. თიქ მუშ ცხოვრებათ გურ გაუხარ მუშ ზეციერ მუმას დო დამტკიც თიშ უზენაესობა.

8. მუჭო შემლებნა მივაჸუნათ იესოშ მაგალითის?

⁸ ჩქი შემლებნა მივაჸუნათ იესოშ მაგალითის, მუჟამსით მუთ შემლებნა ირფელს  გუვაკეთენთ, ნამდა დევემორჩილათ იეჰოვას დო მივაჸუნათ თიშ მითითებეფს. რთულ სიტუაციეფიშ დროს მთელ გურით ბლოცულენთ დო იეჰოვას ფთხინთ მოხვარას, მუშენდა მოკონა ვასიამოვნათ თის. თეთ ვოძირანთ, ნამდა ხუჯის ვუკინენთ იეჰოვაშ მართველობას. ჩქი მიჩქნა, ნამდა იეჰოვას ჯოგუნ ფერ მუდგარენს ქუვორთუთ-და, ვემირჩქილუანს ჩქინ ლოცვეფს. მარა, იეჰოვაშ მითითებეფს ქიმეპჸუნთ დო მუთ თის უჸორს თის ქუვორთუთ-და, შემლებნა დარწმუნებულ ვორდათ, ნამდა ჩქინ ლოცვეფ იეჰოვაშო ჯგირ შურ უღუნ ფერ საკმეველცალ იჸუაფ. თეს გეძინელ, შემლებნა ბჯერდან, ჩქინ ართგურობა დო მორჩილებათ გურს გავუხარენთ ზეციერ მუმას (იგავ. 27:11).

9. მუშენ წირენდეს მშვიდობაშ მსხვერპლის?

⁹ მაჟია: ჩქი იეჰოვაშ მარდულეფ ვორეთ დო ათეშენ ვომსახურუთ თის. თეშ უჯგუშო გაგებელო, გუვარჩუათ ხოლო ართ შესაწირავ — მშვიდობაშ მსხვერპლი, ნამუთ ისრაელეფშო ჭეშმარიტ თაყვანიშმცემლობაშ მნიშვნელოვან ნაწილ რდუ. * ლევიანეფიშ წიგნშე ბგებულენთ, ნამდა ისრაელეფს შეულებდეს შეწირესკო მშვიდობაშ მსხვერპლი, მუჭოთ „მარდულობაშ მსხვერპლი“ (ლევ. 7:11—13, 16—18). პიროვნება თიშენ წირენდჷ თე მსხვერპლის, ნამდა ოკოდ თეშ კეთება დო ვართ ხოლო თიშენ, ნამდა ვალდებულ რდუ. მუჭოთ ვორწყეთ, თენა რდუ ნებაყოფლობით შესაწირავ, ნამდგათ პიროვნება იეჰოვაშ ჸოროფას გიმირჩქინანდჷ. შეწირულ ცხოველიშ ხორც მუშ ოჯახიშ წევრეფს დო მღვდელეფს ოკო უჭკუმდესკო. მარა, ცხოველიშ სხეულიშ მუსხირენ ნაწილ ხვალე იეჰოვას ოკო შეწირესკო. ნამ ნაწილეფ რდუ თენა?

10. მუ გაგებათ მოგენს ლევიანეფიშ 3:6, 12 დო 14—16-ის ეჭარილ მშვიდობაშ მსხვერპლი იესოშ მსახურებას?

 ¹⁰ მასმა: იეჰოვაშ ჸოროფა აღბძრენა, მუთ შემლებნა ირფელ გუვაკეთათ თიშო. შეწირულ ცხოველიშ ქონი იეჰოვაშო არძაშ უჯგუშ ნაწილ რდუ. ღორონთშო მნიშვნელოვან რდუ თიცალ სასიცოცხლო ორგანოეფ მუნერით რე ჭაჭეფ (წეკითხით ლევიანები 3:6, 12, 14—16). თაშ ნამდა, იეჰოვას განსაკუთრებულო ოხიოლუდ, მუჟამსით ისრაელეფ ნებაყოფლობით წირენდეს თეცალ სასიცოცხლო ორგანოეფს დო ქონს. ისრაელ კოჩ, მით თეცალ შესაწირავს ორთუდ, ოძირანდჷ, ნამდა ოკოდ არძაშ უჯგუშ შეწირკო იეჰოვას. თეშნერო, იესო ჸოროფათ ომსახურუდ იეჰოვას დო თეთ ოძირუ, ნამდა ნებაყოფლობით მსხვერპლო არძაშ უჯგუშ შეწირ (იოან. 14:31). იესოს ღორონთიშ ნებაშ შესრულება ოსიამოვნუდ; თის უჸორდჷ იეჰოვაშ კანონ (ფსალმ. 40:8). იეჰოვას მანგარო გუხარენდჷ გურს თიშ ძირაფა, ნამდა იესო ნებაყოფლობით ომსახურუდ თის!

11. მუთ მოგენს ჩქინ მსახურება მშვიდობაშ მსხვერპლის დო მუჭო ელამკინანა თენა გურშა?

¹¹ მშვიდობაშ მსხვერპლცალო, ჩქინ ნებაყოფლობით მსახურება ხოლო ოძირანს, მუსხით მიჸორა იეჰოვა. ჩქი იეჰოვას არძაშ უჯგუშის ვარზენთ, მუშენდა მთელ გურით მიჸორა თინა. წერმიდგინით, მუჭო ოხიოლ იეჰოვას, მუჟამსით ორწყე, ნამდა მილიონობით თაყვანიშმცემელ მზათ რე ემსახურას თის, მუშენდა უჸორა თინა დო თიშ კანონეფ. გურშა ელამკინანა თიშ რჩქინა, ნამდა იეჰოვა ხვალე ჩქინ საქმეეფს ვარინ, გურიშ მოტივეფს ხოლო ორწყე. მაგალთო, ხანშა მიშულირ ქორეთ დო გოკონან თისხი ვა გაკეთებენან-და, დარწმუნებულ რდათ, იეჰოვას უჩქჷ თქვან შეზღუდულ შესაძლებლობეფიშ გურშენ. შილებე ფიქრენთ, ნამდა იეჰოვაშო ბრელიშ კეთება ვეშეილებნა, მარა ღორონთ ორწყე თქვან დიდ ჸოროფას, ნამუთ აღგძრენა აკეთათ თინა, მუთ შეილებნა. მუჟამსით მუთ შეილებნა თიშე, არძაშ უჯგუშის ორთუთ, თინა ხიოლით ღებულენს თის.

12. მუჭო უჯინედ იეჰოვა მშვიდობაშ მსხვერპლის დო მუჭო ელამკინანა თენა გურშა?

¹² მუს ბგურაფლენთ მშვიდობაშ მსხვერპლიშ შეწირუაშე? მუჟამსით ცხოველიშ არძაშ უჯგუშ ნაწილეფს დაჩხირ დოჭუნდჷ, ფურკ ჟიშე გიშურდჷ დო იეჰოვას ოსიამოვნუდ თენა. თეშნერო, დარწმუნებულ რდათ, იეჰოვას ოხიოლ, მუჟამსით მზათ რეთ, მთელ გურით ემსახურათ თის (კოლ. 3:23). წერმიდგინით მუჭო ხარენს თინა თქვან გურშენ. ვა უღჷ მნიშვნელობა ბრელიშ კეთება შეილებნა დოვარ ჭიჭეშ, დარწმუნებულ რდათ, იეჰოვაშო ძვირფას რე დო დღას ვეგიჭყოლიდუანს, მუდგას თიშო ორთუთ (მათ. 6:20; ებრ. 6:10).

13. მუჭოთ ლევიანეფიშ 9:23 დო 24-ის ჭარჷ, მუჭო ოძირუ იეჰოვაქ, ნამდა მიწონუ ახალ დანიშნულ მღვდელეფ?

¹³ მანთხა: იეჰოვა კურთხევეფს ვარკენს მუშ ორგანიზაციაშ მიწიერ ნაწილს. ქიგიფშინათ, მუქ მოხვად ჯვ. წ. 1512 წანას, მუჟამსით სინაშ გვალაწკუმა მოსექ კარავ გოფაჩ (გამ. 40:17). მოსექ ჩატარ რიტუალ, სოდეთ აარონ დო თიშ ქომოლსქუალეფ მღვდელეფო დანიშნჷ. ისრაელეფქ ართო გეკიშაყარეს, ნამდა ქოძირესკო, მუჭო მიღანდეს მღვდელეფ მუნეფიშ პირველ შესაწირავს (ლევ. 9:1—5). მუჭო ოძირუ იეჰოვაქ, ნამდა მიწონუ ახალ დანიშნულ მღვდელეფ? მუჟამსით აარონ დო მოსექ ხალხ დოხვამეს, იეჰოვაქ დაჩხირ გოუტუ ცაშე, ნამდა სრულაშო დოჭუკო სამსხვერპლოს რდუნ თი მსხვერპლი (წეკითხით ლევიანები 9:23, 24).

14. მუს ასიმბოლოენდჷ აარონიშ დო თიშ სქუალეფიშ მღვდელეფო მსახურება?

¹⁴ მუ ოძირუ მღვდელმთავარიშ დანიშნებაშ დღას ცაშე დაჩხირიშ გიმულაქ?  თეთ იეჰოვაქ ოძირუ, ნამდა იწონუანდჷ დო ხუჯის უკინენდჷ აარონს დო თიშ ქომოლსქუალეფს, მით მღვდელეფო რდეს დანიშნულეფ. მუჟამსით ისრაელეფქ ქოძირეს თენა, ქიმეხვადეს, ნამდა მუნეფქ ხოლო ხუჯ ოკო დუკინესკო თე მღვდელეფს. ქოუღუნო თე ირფელს მუთუნნერ კავშირ ჩქინწკუმა? მუშო ოკო რაგად, ქო. მღვდლობა, ნამუთ ისრაელს რდუ, უმოს დიდ მღვდლობას ასიმბოლოენდჷ. ქრისტეს, არძაშ უდიდაშ მღვდელმთავარს, ჸუნს სამეფო სამღვდელოება, სოდეთ 144 000 მღვდელ რე, მიდგა თიწკუმა ართო იმეფენს ზეცას (ებრ. 4:14; 8:3—5; 10:1).

15, 16. მუჭო ოძირუ იეჰოვაქ, ნამდა იწონუანდჷ „ართგურ დო გონიერ მონას“?

¹⁵ იესოქ 1919 წანას ცხებულ ჯიმალეფიშ ჭიჭე ჯგუფ „ართგურ დო გონიერ მონათ“ დანიშნჷ. თინეფ ხემძღვანელენა ქადაგებაშ საქმეს დო ქრისტეშ მიმაჸუნალეფს სულიერ საზრდოს დროულო არზენა (მათ. 24:45). ქუვორწყეთო თიშ არგამა მტკიცებულებას, ნამდა ღორონთ იწონუანს ართგურ დო გონიერ მონას?

¹⁶ სატანა დო თიშ ქვეყნიერება ირნერო ოცად თე ჯგუფის საქმე გურთულას. ართგურ დო გონიერ მონას ღორონთ ვახვარუდასინ, ვეშიალებედეს თე საქმეშ კეთება. მართალ რე, ჟირ მსოფლიო ომქ ქუმოხვად, მსოფლიოს ეკონომიკურ კრიზის რდუ, ჩქინ და დო ჯიმალეფს უსამართლოთ ოქცუდეს დო თხოზუდეს, მარა თე ირფელიშ უმკუჯინუო, ართგურ დო გონიერ მონა ამდღარშახ ვარკენს სულიერ საზრდოს ქრისტეშ მიმაჸუნალეფს. დეფიქრით, მუსხი პუბლიკაცია მიღნა უფასოთ, ნამუთ 900-შე მეტ ნინაშა რე ხეშა მალაფარ! თე ირფელ არგამათ ოძირანს, ნამდა იეჰოვა ხუჯის უკინენს ართგურ დო გონიერ მონას. ქადაგებაშ საქმე იეჰოვაშ კურთხევაშ ხოლო ართ მტკიცებულება რე.  მართალო, სახიოლო ამბეს „მთელ მსოფლიოს“ ქადაგენა (მათ. 24:14). არგამა რე, იეჰოვა ხემძღვანელენს დო კურთხევეფს ვარკენს მუშ ორგანიზაციას.

17. მუჭო შემლებნა ვოძირათ, ნამდა ხუჯის ვუკინენთ იეჰოვაშ ორგანიზაციას?

¹⁷ ჯგირ იჸუაფ ჩქინ დუდის ქობკითხათ: „ქუვაფასენქო თის, ნამდა იეჰოვაშ ორგანიზაციაშ ნაწილ ვორექ?“. მოსეშ დროს, ღორონთიქ ცაშე დაჩხირ გუმაშკვჷ, მუდგათ მუშ დანიშნულ ხალხიშ მოწონა გიმოხანტჷ. თეშნერო, იეჰოვაქ არგამა მტკიცებულებეფ მუჩეს, მუთ ოძირანს, ნამდა თინა გიმირინუანს მუშ ორგანიზაციას. ჩქი მარდულეფ ოკო ვორდათ, ნამდა თე ორგანიზაციაშ ნაწილ ვორეთ (1 თეს. 5:18). მუჭო შემლებნა ვოძირათ, ნამდა ხუჯის ვუკინენთ იეჰოვაშ ორგანიზაციას? თეს ვოძირანთ, მუჟამსით მეპჸუნთ ბიბლიაშა გერსხილ მითითებეფს, ნამუთ პუბლიკაციეფიშ, კრებაშ შეხვალამეფიშ დო კონგრესეფიშ საშვალებათ მერზიებნა. თეს გეძინელ, მუჟამსით, მუთ შემლებნან ირფელს ვორთუთ, ნამდა სრულაშე მიბღათ მონაწილება ქადაგებაშ დო გურაფაშ საქმეს, ვოძირანთ, ნამდა ხუჯის ვუკინენთ იეჰოვაშ ორგანიზაციას (1 კორ. 15:58).

18. მუშ კეთება გაფნა გინოჭყვიდილ?

¹⁸ მორთ, გინოჭყვიდილ მაფდან, გეგმიბრინუათ თი ირფელ, მუთ ლევიანეფიშ წიგნშე დიბგურეთ. ჩქი მოკონა იეჰოვაქ მიწონუას ჩქინ შესაწირავეფ. მორთ, ვემსახურათ იეჰოვას, მუშენდა თიშ მარდულეფ ვორეთ. გინოჭყვიდილ მაფდან, კინ არძაშ უჯგუშ მეფჩათ იეჰოვას, მუშენდა მთელ გურით მიჸორა თინა. თეს გეძინელ, სრულაშე ქუდვუკინათ ხუჯ თიშ ორგანიზაციას, ნამდგას კურთხევეფს ვარკენს. თეშნერო იეჰოვას ვოძირანთ, ნამდა ვაფასენთ თიშ მსახურებაშ პატის!