Ngani Jakulijiganya 47
Yampaka Tulijiganye M’buku ja Lefitiko
“Malemba gosope galembedwe ni Mlungu mwakupujilidwa lipuje, nipo gakusakamuchisya.”—2 TIM. 3:16.
NYIMBO 98 Malemba Gasalilidwe ni Mlungu
YACHITULIJIGANYE *
1-2. Ligongo chichi Aklistu akusosekwa kusachilila kulijiganya buku ja Lefitiko?
NDUMETUME Paulo jwamsalile Timoteo kuti “malemba gosope galembedwe ni Mlungu mwakupujilidwa lipuje, nipo gakusakamuchisya.” (2 Tim. 3:16) Malemba gelega gakupwatikaposoni buku ja Lefitiko. Ana akusajiwona mwamtuli buku ja m’Baibulo jeleji? Ŵandu ŵane akusajiwona kuti jigambile kuŵa buku jegumbale ni malamusi ganganigaŵa gakamwile masengo masiku agano. Nambo Aklistu ŵasyesyene ŵangajiwona myoyo.
2 Buku ja Lefitiko jalembedwe yaka 3,500 munyumamu, nambope Yehofa ŵayisunjile yayili m’bukuji “kuti yitujiganye uwe.” (Alo. 15:4) Ligongo lyakuti bukuji jikusatukamuchisya kupikanichisya mwakusaganichisya Yehofa soni mwakusayiwonela yindu, myoyo tukusosekwa kulijiganya bukuji. Kusala yisyene pana yindu yejinji yampaka tulijiganye kutyochela m’bukuji. Kwende tugambe kambilana yindu mchechepe.
YAMPAKA TUTENDE KUTI TUMSANGALASYEJE YEHOFA
3. Ligongo chichi chaka chilichose ŵandu ŵapelekaga mbopesi pa Lisiku Lyakukululuchila Ulemwa?
3 Lijiganyo lyandanda: Tukusosekwa kumsangalasya Yehofa kuti apocheleje mbopesi syetu. Chaka chilichose Palisiku Lyakululuchila Ulemwa, Aisalaeli ŵasonganaga pampepe soni ŵapelekaga mbopesi sya nyama. Mbopesisyo syakumbusyaga Aisalaeli kuti ŵasosekwaga kukululuchilidwa ulemwa wawo. Jwamkulungwa jwa mbopesi mkanajawusye mbopesi ja miyasi ku malo Geswela Mnope, chandanda, jwasosekwaga kutenda chindu chine chachaliji chakusosekwa mnope kupunda kupeleka mbopesi ja kululuchila ulemwa wa mtundu wosopewo.
(Alole ndime 4) *
4. Mwakamulana ni Lefitiko 16:12, 13, ana jwamkulungwa jwambopesi jwasosekwaga kutenda chichi paulendo wakwe wandanda wakwinjila kumalo Geswela Mnope palisiku Lyakululuchila Ulemwa?
4 Aŵalanje Lefitiko 16:12, 13. Agambe ganichisya yayatendekwaga palisiku Lyakululuchila Ulemwa. Jwamkulungwa jwambopesi jwasosekwaga kwinjila m’nyumba jakulambilila. Jwalakwe jwasosekwaga kwinjila maulendo gatatu kumalo Geswela Mnope palisikulyo. Pa ulendo wakwe wandanda jwalakwe jwajigalaga kaŵiga muli mwana ubani soni mkono winewu jwajigalaga chakupalila moto chagolide muli mwana moto. Jwalakwe jwajimaga palikatani lyalyaŵaga pamlango wakwawula kumalo Geswela Mnope. Mwauchimbichimbi, jwalakwe jwajinjilaga kumalo Geswela Mnope ni jwajimaga chiŵandika libokosi lyachilangano. Mwakuwanichisya, jwalakwe jwaŵaga mpela ajimi pameso pa Yehofa Mlungu. Kaneko jwambopesijo jwatagaga ubani pamakala, soni chipinda chosopecho chagumbalaga ni liwungo lyakununjila chenene. * Kaneko ŵajinjilagasoni kumalo Geswela Mnope kula ali ajigele miyasi jakupeleka mbopesi. Ayiweni, jwalakwe jwasosekwaga kutanda kaje kocha ubani pamoto mkanapeleche miyasi jakululuchila ulemwa jila.
5. Ana tukulijiganya chichi pakamulichisya masengo ubani palisiku Lyakululuchila Ulemwa?
5 Ana tukulijiganya chichi pakamulichisya masengo ubani palisiku Lyakululuchila Ulemwa? Baibulo jikusalosya kuti mapopelo gakusagapika Yehofa ga ŵakutumichila ŵakwe ŵakulupichika gali mpela ubani. (Sal. 141:2; Ciw. 5:8) Paja jwambopesi pajwajochaga ubani pameso pa Yehofa jwatendaga yeleyo mwauchimbichimbi. Myoyosoni, patukupopela kwa Yehofa tukusasosekwa kutenda yeleyo mwauchimbichimbi. Tukusayamichila mnope kuti Atati ŵetu ŵakwinani akusatukunda kuti tuŵe nawo paunasi wambone mpela mwakusatendela mtati jwachinonyelo ni mwanagwe. (Yak. 4:8) Jwalakwe akusatuwona mpela achimjakwe. (Sal. 25:14) Tukusayamichila mnope upile welewu soni ngatukusosekwa kutenda chilichose champaka chimsakalisye jwalakwe.
6. Ana kocha ubani kuŵatendaga jwamkulungwa jwaŵambopesi mkanaŵe kupeleka mbopesi kukutujiganya chichi?
6 Paja jwamkulungwa jwambopesi jwasosekwaga kocha ubani mkanaŵe kupeleka mbopesi. Jwalakwe jwatendaga yeleyi kuti amsangalasye Mlungu. Ana tukulijiganya chichi pelepa? Yesu paŵaliji pachilambopa, mkanaŵe kupeleka umi wakwe mpela mbopesi ŵasosekwaga kutenda chindu chakusosekwa mnope kupunda kwakulupusya ŵandu. Ana chinduchi chaliji chichi? Kuti Yehofa apochele mbopesi jakwe, Yesu jwasosekwaga kumpikanila Yehofa ni umi wakwe wosope. Mwakutenda yeleyi, Yesu jwalosisye kuti kutenda yindu yakumsangalasya Yehofa kwaliji kwambone. Yesu jwalosisye kuti Atati ŵakwe ali ŵamachili soni ulamusi wawo wuli wambone mnope.
7. Ligongo chichi Yesu jwatendaga yindu yakwachimbichisya Atatigwe kwa umi wakwe wosope wa pachilambo chapasi?
7 Kwa umi wakwe wosope wapachilambo chapasi, Yesu jwampikanilaga Yehofa mu chilichose. Atamose kuti jwalakwe jwasimene ni yakusawusya yejinji kupwatikapo chiwa chakupweteka mnope, nambope jwalakwe jwasachilile kulosya kuti ulamusi wa Yehofa uli wambone mnope. (Afil. 2:8) Paŵasimanaga ni yakulingwa, Yesu jwapopelaga “mwakugumila ni kulila.” (Aheb. 5:7) Mapopelo gakwe gakutyochela pasi pamtima galosyaga kuti jwalakwe jwaliji jwakulupichika kwa Yehofa soni jwasachililaga kuŵa jwakupikanila. Kwa Yehofa, mapopelo ga Yesu galiji mpela liwungo lyakununjila mnope. Kwa umi wakwe wosope, Yesu jwatesile yakwasangalasya Atati ŵakwe soni kulosya kuti Atati ŵakwewo ali ŵakuŵajilwa kulamulila.
8. Ana mpaka tusyasye chamtuli yaŵatendaga Yesu?
8 Mpaka tumsyasye Yesu mwakumpikanila Yehofa soni kuŵa ŵakulupichika kwa jwalakwe. Patusimene ni yakulingwa, tukusapopela mwakutyochela pasi pamtima ligongo tukusasaka kumsangalasya. Mwakutenda yeleyi, tukusalosya kuti ulamusi wa Yehofa uli wakuŵajilwa. Tukusamanyililasoni kuti Yehofa nganaŵa ajanjile mapopelo getu naga tukutenda yindu yakusayiŵenga. Nambope, naga tukutenda yindu yakusasaka Yehofa, mpaka tuŵe ŵakusimichisya kuti mapopelo getu gakutyochela pasi pamtima gachiŵa liwungo lyakununjila mnope lyakwawula kwa jwalakwe. Soni mpaka tuŵe ŵakusimichisya kuti kulupichika soni kupikanila kwetu kukusasangalasya Atati ŵetu ŵakwinani.—Mis. 27:11.
TUKUSAMTUMICHILA YEHOFA PAKULOSYA KUYAMICHILA SONI KUMNONYELA
(Alole ndime 9) *
9. Ligongo chichi Aisalaeli ŵapelekaga mbopesi jamkamulano?
9 Lijiganyo lyaŵili: Tukusamtumichila Yehofa pakulosya kuyamichila. Kuti tupikanichisye mwampaka tutendele yeleyi, kwende tulole ya mbopesi jamkamulano jaŵapelekaga Aisalaeli. * M’buku ja Lefitiko, tukusalijiganya kuti mundu jwa ku Isalaeli jwapelekaga mbopesi pakulosya “kutogolela kapena kuti kuyamichila.” (Lef. 7:11-13, 16-18) Mundujo jwapelekaga mbopesisyo ngaŵa ligongo lyakuti waliji udindo wakwe kupeleka, nambo ligongo lyakusachilila kwakwe. Mundu jwalijose jwasachililaga kupeleka mbopesi syelesi ligongo lyakumnonyela Yehofa. Mundu jwapeleche mbopesiji nambosoni ŵamwiŵasa mwakwe pampepe ni ŵambopesi, ŵalyaga nyama jine panyama jajikupelechedwa mbopesijo. Nambope pana mbali sine sya nyamaji syanganasosekwaga kulya. Mbalisi ŵasosekwaga kumpa Yehofa. Ana mbali syakwe sili syapi?
(Alole ndime 10) *
10. Ana mbopesi jamkamulano ja pa Lefitiko 3:6, 12, 14-16, jikulandana chamtuli ni utumiki waŵatesile Yesu kwa Yehofa?
10 Lijiganyo lyatatu: Tukusampaga Yehofa yosope yampaka tukombole ligongo lyakuti tukusamnonyela. Yehofa ŵagawonaga mawuta ga nyama kuŵa mbali jakusosekwa mnope. Jwalakwe jwasasilesoni kuti mbali sine sya nyama kupwatikapo mbyo, syaliji syakusosekwa mnope kwa jwalakwe. (Aŵalanje Lefitiko 3:6, 12, 14-16.) Myoyo, Yehofa jwasangalalaga naga Aisalaeli ampele jwalakwe mwakusachilila mbali syelesi kupwatikapo mawuta. Mwakulandana ni yeleyi, Yesu mwakusachilila jwatesile yakakombwele pakumtumichila Yehofa ligongo lyakumnonyela. (Yoh. 14:31) Kwa Yesu, kutenda lisosa lya Mlungu ŵakuwonaga kuŵa kwakusosekwa. Jwalakwe jwaganonyelaga mnope malamusi ga Mlungu. (Sal. 40:8) Kusala yisyene, Yehofa jwasangalalaga mnope paŵamwonaga Yesu ali mkutumichila mwakutyochela pasi pamtima.
Tukusamtumichila Yehofa ligongo lyakuti tukusamnonyela (Alole ndime 11-12) *
11. Ana kumtumichila Yehofa kukulandana chamtuli ni mbopesi jamkamulano, soni ana yeleyi yili yakulimbikasya chamtuli kwa m’weji?
11 Mwakulandana ni mbopesi jamkamulano, kumtumichila kwetu Yehofa kukusalosya mwatukusapikanila mumtima pakwamba ya jwalakwe. Tukusamtumichila Yehofa ligongo lyakuti tukusamnonyela ni mtima wetu wosope. Kusala yisyene, Yehofa akusasangalala mnope pakwawona ŵandu mamiliyoni gejinji ali mkutumichila jwalakwe ni mtima wawo wosope. Yili yakulimbikasya mnope kumanyilila kuti Yehofa akusalola yatukusatenda soni kumanyilila magongo gatukutendela yeleyo. Mwachisyasyo, naga ali ŵachikulile soni nganaŵa akombwele kutenda yejinji yakusasaka, amanyilile kuti Yehofa akusamanyilila yampaka wawojo akombole kutenda. Kombolekasoni kuti mpaka alipikaneje kuti nganaŵa akombwele kutenda yejinji pakumtumichila Yehofa, nambo jwalakwe akusalola chinonyelo soni magongo gakwete gakutendela yampaka akombole. Jwalakwe akusayamichila yakusatenda pakumtumichila.
12. Ana yaŵatendaga Yehofa ni mbopesi jamkamulano yikusatusimichisya ya chichi?
12 Ana tukulijiganya chichi kutyochela pa mbopesi jamkamulano? Moto pawajochaga mbali syambone sya nyama, lyosi lyajawulaga kwinani soni Yehofa jwasangalalaga. Myoyo, akakayichilaga kuti Yehofa akusasangalala ni yakusatenda pakumtumichila mwakusachilila. (Akolo. 3:23) Agambe ganichisya yakusati jwalakwe pakusangalala ni wawojo. Mwangasamala kandu kuti akusatenda yejinji kapena yamnono pakumtumichila Yehofa, chilichose chakusatenda pakumtumichila Yehofa, jwalakwe akusachiyamichila soni ngasachiliŵalila.—Mat. 6:20; Aheb. 6:10.
YEHOFA AKUJIPA UPILE GULU JAKWE
13. Mwakamulana ni Lefitiko 9:23, 24, ana Yehofa jwalosisye chamtuli kuti jwasangalele ni ŵambopesi ŵaŵasagulidwe?
13 Lijiganyo lyamcheche: Yehofa akujipa upile mbali japachilambo chapasi ja gulu jakwe. Aganichisye yayatendekwe mu 1512 B.C.E. paŵataŵile malo gakulambilila mungulugulu Litumbi lya Sinayi. (Eks. 40:17) Mose jwatendesye msongano wakusagula Aloni ni ŵanache ŵakwe ŵachalume kuŵa ŵambopesi. Aisalaeli wosope ŵayiche kukulolela yayatendekwaga pandaŵi jele Aloni ni ŵanache ŵakwe ŵapelekaga mbopesi jawo jandanda ja nyama. (Lef. 9:1-5) Ana Yehofa jwalosisye chamtuli kwajitichisya ŵambopesi ŵaŵasagulidwe kwenewo? Mose ni Aloni paŵaŵechetaga maloŵe gakwasosela yambone ŵanduwo, Yehofa jwayikasisye moto wawajochile mbopesisyo.—Aŵalanje Lefitiko 9:23, 24.
14. Ligongo chichi yaŵatesile Yehofa pakulosya kamulana ni Aloni ni ŵanache ŵakwe ŵachalume mpela ŵambopesi yikutukwayasoni m’weji?
14 Ana moto wawatyochele kwinani walosisye chichi? Yehofa jwatumisye motowo pakulosya kuti akukamulana ni masengo ga Aloni ni ŵanache ŵakwe ŵachalume mpela ŵambopesi. Aisalaeli paŵayiweni yaŵatesile Yehofayi, yatendekasisye jemanjajo kutanda kwakamuchisya ŵambopesiwo. Kusala yisyene yeleyi yikutukwayasoni m’weji. Ŵambopesi ŵa mundaŵi ja Aisalaeli ŵajimilaga jwambopesi jwakusosekwa mnope. Yesu jwali Jwamkulungwa jwa Ŵambopesi, akwetesoni ŵambopesi ŵakulupichika ŵakwana 144,000, ŵachachitumichila ni jwalakwe kwinani.—Aheb. 4:14; 8:3-5; 10:1.
Yehofa akulolela soni kujipa upile gulu jakwe. Soni m’weji tukusajikamuchisyaga guluji (Alole ndime 15-17) *
15-16. Ana Yehofa alosisye chamtuli kuti akumkamuchisya “kapolo jwakulupichika ni jwalunda”?
15 Mu 1919, Yesu jwasagwile gulu jamwana ja ŵasagulwe kuŵa “kapolo jwakulupichika ni jwalunda.” Kapolo jweleju akusalongolela masengo gakulalichila soni “kwapaga yakulya pandaŵi jakwe” ŵakumkuya ŵa Klistu. (Mat. 24:45, NW) Ana tukusawuwona umboni wakulosya kuti Mlungu akumkamulichisya masengo kapolo jwakulupichika ni jwalunda?
16 Satana alinjilelinjile kumtendekasya kapolo jwakulupichikaju kuti agawoneje masengo gakwe kupweteka. Nambo yeleyi nganiyikomboleka ligongo lyakuti Yehofa akusiŵakamuchisyaga. Mwangasamala kandu ya ngondo siŵili syekulungwa syasitendekwe munyumamu, kulagasidwa kwangalechesya, kusoŵa kwa mbiya soni kutendeledwa yangali chilungamo, kapolo jwakulupichikaju aŵele mkupitilisyape kupeleka chakulya kwa ŵakumkuya ŵa Klistu. Agambe ganichisya ya winji wa chakulya chausimu chatukwete apano chalulele soni chachikusimanikwa m’yiŵecheto yakupunda 900. Yeleyitu yikulosya kuti Mlungu akumkamuchisya kapoloju. Masengo gakulalichila uli umboni winesoni wekulungwa. Ngani syambone sikulalichidwa “pachilambo chosope chapasi.” (Mat. 24:14) Mwangakayichila, mpaka tujile kuti Yehofa akujilongolela gulu jakweji masiku agano.
17. Ana mpaka tujikamuchisye chamtuli gulu jakujikamulichisya masengo Yehofa?
17 Tukusosekwa tuliwusyeje kuti, ‘Ana ngusasangalala kuŵa ku mbali ja gulu ja Yehofa ja pachilambo chapasi?’ Yehofa atupele maumboni gakamula mtima mpela mwayaŵelele mu ndaŵi ja Mose soni Aloni ni moto wawatyochele kwinani. Tukwete yindu yejinji yakututendekasya kuyamichila. (1 Ates. 5:18, 19) Ana mpaka tujikamuchisye chamtuli gulu jakujikamulichisya masengo Yehofaji? Mpaka tutende yeleyi mwakamulichisya masengo yatukusalijiganya m’Baibulo, m’mabuku getu soni pamisongano jekulungwa ni jamwana jakwe. Kupwatika pelepa mpaka tujikamuchisye guluji mwakulipeleka mnope pa masengo gakulalichila soni gakwiganya.—1 Akoli. 15:58.
18. Ana wawojo ali ŵakusimichisya kutenda chichi?
18 Tukusosekwa kulingalinga kuyikamulichisya masengo yindu yatulijiganyisye kutyochola m’buku ja Lefitikoji. Tukusasaka kuti Yehofa apochele mbopesi syetu. Tukusamtumichila pakulosya kuyamichila. Tukusampaga Yehofa yosope yampaka tukombole ligongo lyakuti tukusamnonyela ni mtima wetu wosope. Soni tukusosekwa kutenda yampaka tukombole pakujikamuchisya gulu jakujikamulichisya masengo Yehofa masiku agano. Naga tukutenda yeleyi ni kuti tuchimlosya Yehofa kuti tukusayamichila upile wakumtumichila jwalakwe mpela Mboni syakwe.
NYIMBO 96 Buku ja Mlungu Jili Chipanje
^ ndime 5 Buku ja Lefitiko jikwete malamusi gaŵapeleche Yehofa kwa Aisalaeli. Ligongo lyakuti tuli Aklistu nganituŵa pasi pa malamusi gelega, nambope malamusiga mpaka gatukamuchisye. Munganiji, chitukambilane yampaka tulijiganye m’buku ja Lefitiko.
^ ndime 4 Ŵandu ŵawuwonaga ubani wawajochedwaga pamoto kunyumba jakulambilila kuti waliji wapajika, soni Aisalaeli ŵawukamulichisyaga masengo pakumlambila Yehofape. (Eks. 30:34-38) Nambo pangali ngani jajikusalosya kuti Aklistu ŵa m’yaka 100 yandanda ŵajochaga ubani mpela mbali jakulambila.
^ ndime 9 Naga akusaka kumanyilila yejinji yakwamba mbopesi jamkamulano, alole Sanja ja Mlonda ja Januwale 15, 2012 peji 19 ndime 11 kapena it-E 2 p. 526.
^ ndime 54 KULONDESYA YIWULILI: Pa Lisiku lya Kululuchila Ulemwa jwamkulungwa jwa ŵambopesi akwinjila ku Malo Geswela Mnope ali ajigele moto nambosoni ubani wakusaka kuti ununjilisye m’chipinda chosope ni kaliwungo kambone. Kaneko akwinjilasoni kumalo Geswela Mnope kula ali ajigele miyasi jakupelechela mbopesi
^ ndime 56 KULONDESYA YIWULILI: Mundu jwa Chiisalaeli akupeleka ngondolo kwa jwambopesi mpela mbopesi jamkamulano pakulosya yalitite liŵasa lyakwe kumyamichila Yehofa
^ ndime 58 KULONDESYA YIWULILI: Paŵaliji pachilambo chapasi, Yesu jwalosisye kumnonyela Yehofa mwakusunga malamusi gakwe soni kwakamuchisya ŵakumkuya ŵakwe kuti nombesoni agasunjeje.
^ ndime 60 KULONDESYA YIWULILI: Mlongo jwachikulile, akutenda yampaka akombole pakumtumichila Yehofa mwakulalichila kupitila m’yikalata atamose kuti akwete yakusawusya yine.
^ ndime 62 KULONDESYA YIWULILI: Mu Febuluwale 2019, M’bale Gerrit Lösch jwa M’likuga Lyakulongolela jwakopwesye Baibulo jelinganyesoni ja New World Translation ja m’chiŵecheto cha Chijelemani. Ŵakulalichila ŵa ku Germany akukamulichisya masengo Baibulo jajigambile kopoka kwenejo.
