1-2. Tipagine si aida aKristano wiriki agu apai ti ni du rogo Pa Amotumo areme?

GU MOKEDI nangia Pauro atingidi gu paranga bakureako nangia Timoteo na gupai nga, “Ziazia Kekeapai dunduko si aye be ga Mbori Toro na si na undo ti ni.” (2 Tim. 3:16, NW) Gu buku nga ga Pa Amotumo nga buku sa dagba agu abuku yo nga ga Ziazia Kekeapai. Waigu mo abi gu buku nga ga Ziazia Kekeapai re? Gu kura aboro naberã gupai nga si gbua nga gu buku du na badungu andiko rogoho nga gu adunga na undo ti ni ti gi gaani regbo re ya, ono aKristano aberãnga wa gure te.

² I ake gu buku nga ga Pa Amotumo agarã wa 3,500 kusayo, ono Yekova asa gupai nga i banda ha “tipa gaani wirikapai.” (Rom. 15:4) Gu buku nga Pa Amotumo naundo rani ani rugutirani na pa wai Yekova aberã na gako abipai tipa kura apai. Sidu, si ni nyanyakipa pai furani ani wiriki agu apai du rogoho. Nirengo, badungu apai duho rengbe ani ka wirikaha rogo gu buku ga Mbori toro adu kugii pa kehe re. Ani sakingo pai tipa agu biama.

3. Tipagine i anaafu amotumo ti ni rogo gu Uru Dada Ingapai nanaamanga na agarã dũ?

³ Bambata wirikapai: Tipa Yekova idi na gaani amotumo, si naida ko idi mbata na ani. Rogo Uru Dada Ingapai nga gu nanaamanga na agarã dunduko, gu rikaaboro nangia aYisaraere anaaye ku rogo ba sa, na agbiamotumo kini fu anya ni motumo. Agu amotumo re anaaundo ka tingida aYisaraere na gupai nga si aaida gupai nga i girisiyo agiriso be ingapai! Ono mbata fu gbiamotumo  ye na ai motumo nga ga kure ku rogo Kparakpara Ziazia Ba Kisusi, si anaaida gupai nga ko mangi kurapai amanga, nga gu paha anyaki kisusi gu nga ga mbupai ti ga gu rikaaboro re ingapai.

4. A wa duhe rogo Pa Amotumo 16:12, 13, ginipai gbiamotumo anaamangaha ti gu bambata regbo ko anaarimo ku rogo Kparakpara Ziazia Ba Kisusi rogo Uru Dada Ingapai? (Oni bi gu sura duti kpotoho.)

⁴ Oni gedi Pa Amotumo 16:12, 13. Mo berẽnga pa gupai nanaamanga rogo Uru Dada Ingapai: Gbiamotumo anaarimo ku rogo banye. Si aningia gako bambata rimo ku rogo Kparakpara Ziazia Ba Kisusi dagba agu arimo yo biata ko anaarimoho rogo gu uru re. Ko anaazada sukasuka wene fuõngua gbiati ũzokingire nga gu nanihi be kingiri we. Ko aniiru ngbadimo gu remu dada rago nanaakiso ngbadimo Kparakpara Ziazia Ba Kisusi. Ko anirimi na bakere irisa ku rogo Kparakpara Ziazia Ba Kisusi na ki ru barangba gu sanduki naaningia ga mozunga. Ka pepai ngba kura gene, ko anaaru barangba Yekova Mbori! Fuoho, gu boromotumo re aniiuka ziazia wene fuõngua ku rogo ũzokingire, na bambu aniihi be guzuguzu fuõrago. * Fuoho kusa, ko anirimi ku rogo Kparakpara Ziazia Ba Kisusi berewe na kure agu anya i anaafura ni motumo ingapai. Oni bingo gupai nga ko anaazo sukasuka wene fuõngua mbata fu ko fu kure agu anya i anaafura ni motumo ingapai.

5. Ginipai rengbe ani ka wirikaha ti wai i anaamangasunge na wene fuõngua rogo Uru Dada Ingapai?

⁵ Ginipai rengbe ani ka wirikaha ti gu guzuguzu fuõngua naanidu rogo Uru Dada Ingapai? Ziazia Kekeapai nayugo gupai nga agu akparakpee nga ga ruru airisi Yekova wakina wene fuõngua. (Tam. 141:2; Yugo. 5:8) Oni tingidi gupai nga gbiamotumo anaarimo na sukasuka wene fuõngua ku barabangiri Yekova na bakere irisa. Wakina gure a, ho ani akparakpee ni fu Yekova, ani namangaha na bakere irisa. Ani nabi ko na kiki. Ani na bakere tambuahe nga Bakusi zegino mbugene furani ani ye fuoko na ki mbedi na ko wakina bagude na wirini. (Yak. 4:8) Ko nadia rani kugume ni abakureako! (Tam. 25:14) Ani nabi gi momu re na nyanyakipaha gbe kisusi si kini sarani ka ani mangingo gupai rengbe ka ba gberãrago tiko ya.

6. Ginipai rengbe ani ka wirikaha ti gupai nga gbiamotumo anaazo wene fuõngua mbata fu ko fu amotumo?

⁶ Oni tingidi gupai nga gbiamotumo anaazo wene fuõngua mbata fu ko fu amotumo. Ni zo ko wene fuõngua mbata fu ko zo amotumo, ko anidu na gu kido nga Mbori nika duadu na ngbarago na ko. Ginipai rengbe ani ka wirikaha ti gupai re? Ho Yesu adu ni auru kpotosende, si aaida ko mangi nyanyakipa pai nga gu paha anyaki kisusi paye na bata fu aboro, mbata fu ko fu unga ko ni motumo. Ginipai du si aaida ko mangihe? Si aaida ko mbakadi gene tipa Yekova idi na gako motumo ni raka ko gu raka nga ga du ni ruruse. Rogo gi gene re, Yesu arengbe ka yugo gupai nga mangapai ngba gu gene Yekova akpinyemuhe nga wene gene raka. Yesu aziasi​—watadu ayugu gupai nga​—ga Bako bakere pagbia watadu gako gene zogorago ni ruruhe.

7. Tipagine ga Yesu raka auru kpotosende dunduko afu ngbarago ti ni fu Bako?

⁷ Rogo ga Yesu raka auru kpotosende dunduko, ko anaagiasangba Yekova. Wa si avura du nga ko aandu ka gbiatiko na aˈasada gbiati akpakarapai na ko ki ima ino gupai nga ko nandu ka kpi iigirã kpio, ko aima diaberã ka yugo gupai nga ga Bako gene zogarago ngba kisusi. (Frp. 2:8) Ho Yesu aagbiatiko ni na aˈasada, ko anaakpara “na asarawati na nyanyaki akpe du na aume.” (Eb. 5:7) Gako akparakpee aayugo gupai nga ko adu ni ruruko fu Yekova na ko ima diaberã ka giasangba ko. Ga Yesu akparakpee  adu fu Yekova wakina guzuguzu wene fuõngua. Ga Yesu raka dunduko aima fu ngbarago fu Bako na ki ziasi Gako bakere pagbia.

8. Waigu rengbe ani ka wirika ga Yesu gene raka?

⁸ Ani rengbe ka wirika Yesu ni manga ani ome ka giasangba Yekova na kidu ni rururani fuko. Ho ani agbiatirani ni na aˈasada, si naida ani mangi kparakpee kakaka fu Yekova tipa gako undo mbiko ani naida ka fu ngbarago fuko. Ni manga ani pai ngba agi agene re, ani nayugo gupai nga ani nasongoda ga Yekova gene zogarago. Ani naye ka ino gupai nga Yekova aidanga na gaani kparakpee te ka si du nga ani namanga agu apai ko asogaha. Ono tie, ka ani aamanga agu apai Yekova akpinyemuhe, ani ima rengba kadu na gu kido nga gaani akparakpee nika du wakina bawene guzuguzu fuõngua fu ko. Na ani ima rengba kadu na gu kido nga pa gaani kakuti ruru mangaapai na gaani padu ni ruruse nafu ngbarago afu fu gu Barani du ngbangbaturũ yo.​—Snz. 27:11.

9. Tipagine aYisaraere anaafu amotumo zereda ti ni?

⁹ Ue wirikapai: Ani namangasunge fu Yekova mbiko gupai nga ani na tambuahe fuko. Ani nika wirikapai tipa gipai re wa ani nikaa sakapai tipa agu amotumo zereda aYisaraere anaamangaha. * Rogo gu buku nga ga Pa Amotumo, ani nawirika gupai nga Yisaraere anifu motumo zereda “tipa tambuahe.” (Pa Mot. 7:11-13, 16-18) Ni anaafunga gu motumo re mbiko gupai nga si anaaida ni fuhe te, ono ni anaafuhe mbiko gupai nga ni du nanaaida ka fuhe. Sidu, boro anaafu gi gamahe re na ngbaduniyo dunduko mbiko  gupai nga ni ima kpinyemu gani Mbori nga Yekova. Gu boro nanaafu gu motumo re, gani aborokporo, gbiati gbiamotumo anari pasio gu nya i anaafu ru ni motumo re. Ono gu kura apapara nya kinaho i anaafu he sa fu kina Yekova. Gini apapara ru du?

10. Agu amotumo zereda fura yo tipa ha rogo Pa Amotumo 3:6, 12, 14-16 nayugo ginipai furani tipa gupai nasa Yesu ko mangisunge fu Yekova?

¹⁰ Biata wirikapai: Ani namanga ai gupai rengbe ani ka mangaha fu Yekova mbiko gupai nga ani ima kpinyemu ko. Yekova anaabi nzeme nya nga si nga nyanyakipa papara ru. Ko aima gumba gupai nga gu kura apapara nya kodihe na agbiiri watadu wirimbia ru anidu na nyanyakipaha. (Oni gedi Pa Amotumo 3:6, 12, 14-16.) Sidu, Yekova aanidu na ngbarago ho Yisaraere anaafu gu nyanyakipa apapara nya re ni gbiati nzeme ru fuko. Gu Yisaraere nanaafu agu apapara nya re fu Yekova anaayugo gupai nga ni naida ka fu guhe fu Yekova ngba kisusi. Wakina gure, Yesu afu tiko ka manga ai gupai ko arengbe ka mangaha na ngbaduko yo dunduko fu Yekova mbiko ko aima kpinyemu ko. (Yo. 14:31) Manga gupai Mbori akpinyemuhe angia pa bakere ngbarago fu Yesu, ko aima du na dudunguro nyemuse tipa ga Mbori andiko. (Tam. 40:8) Yekova aima du na bakere ngbarago ka bi Yesu ko nimangisunge fuko na ngbaduko yo dunduko!

11. Waigu du gaani sunge wakina amotumo zereda, na waigu rengbe gupai re kadu ni pa wasa furani?

¹¹ Gaani sunge fu Yekova wakina agu amotumo zereda re bambiko wo du ani ayugo gupai fu Yekova nga ani ima kpinyemu ko. Ani nafu guhe fu Yekova ngba kisusi, na ani namangaha wo mbiko gupai nga ani ima kpinyemu ko na ngbadurani yo dunduko. Yekova ima du na bakere ngbarago ka bi amirioni airisiko i niirisiko mbiko gupai nga i ima kpinyemuko gbiati gako agene! Yekova nabi agu apai abi ani amangaha na ko nabi ndu gupai ani amangaha ti ni na nyanyakipaha. Gi pai re nafu bakere wasa furani. Ni kpiapai, ka si du nga mo nga gbinza boro na gene berewe bero tipa ka mangapai wagu mo akpinyemuhe te, mo du na gu kido nga Yekova ima rugatiko na gupai du tipa ro. Mo ima rengba ka bihe nga mo arengbanga ka manga badungu apai berewe fu Yekova te, ono Yekova nabi gu dudunguro nyemuse abi du kpotoroyo nga gu nasa gupai nga mo mangi gupai rengbe mo ka mangaha. Ko na bakere ngbarago ka ida ai guhe ngba kisusi mo narengbe ka fuhe fuko.

12. Waigu Yekova anaabi amotumo zereda, na waigu gupai re anyakasa rani?

¹² Ginipai rengbe ani ka wirikaha ti amotumo zereda? Wa we anaazo agu apapara nya re, ngime anaaga ku ariyo na Yekova aniidu na ngbarago. Mo du na gu kido nga Yekova na ngbarago na gu sunge mo amangaha fu ko na ngbaduroyo dunduko. (Koro. 3:23) Mo berẽnga pa gu ngbarago du ko na ni ka bi ro. Ko nabi gu ome mo amangaha ka mangasunge fuko na nyanyakipaha ka si vura du tooni watadu ni kikihe vurũ, na ko ni ka tingidapaha nyeanye kindi.​—Mt. 6:20; Eb. 6:10.

13. Ringbisihe kuti Pa Amotumo 9:23, 24, waigu Yekova ayugu gupai nga ko ima ida na gu vovo aboromotumo re?

¹³ Biama wirikapai: Yekova nafu maku kurii papara gu gako riigbu du auru kpotosende. Oni makianga gupai namangi rogo gu garã nangia 1512 Mbata fu Batikayo Kristo ho i amoi banye ni rii Bagangara Sinai yo. (Gate 40:17) Moize nanungusi gu mbakadapai naadu tipa maa aArona na awiriko ni aboromotumo. Rimbasa aYisaraere adunguratiyo ka bi aboromotumo i nifu gayo bambata amotumo nga ga anya. (Pa Mot. 9:1-5) Waigu Yekova ayugu gupai nga ko ima ida na gu vovo aboromotumo re? Wa aArona na Moize aafu maku fu aboro, Yekova akedi we ngbangbaturũ yo si ki zo gu motumo naadu rii ba motumo dunduko.​—Oni gedi Pa Amotumo 9:23, 24.

14. Tipagine du pa songoda Yekova aArona gbiati agu awiriko Ko asia yo ni aboromotumo ti ni na nyanyakipaha furani areme?

 ¹⁴ Pa ye we ngbangbaturũ yo ayugu ginipai? Yekova akedi we tipa ka yugo gupai nga ko ima idapa aArona na awiriko nga agu aboro Ko nasia yo tipa i du ni aboromotumo na ko nika songoda yo asongoda. Ya mo gupai re na nyanyakipaha furani? Ii! Bambiko agu aboromotumo re aarukuba nyanyakipa boromotumo. Yesu nga bakere Gbiamotumo, na agu aboromotumo na abakindo du bangeyo nga 144,000, nika mangasunge na Yesu ngbangbaturũ yo.​—Eb. 4:14; 8:3-5; 10:1.

15-16. Waigu Yekova nayugu gupai nga ko ima ida na “kangara moyambu”?

¹⁵ Rogo 1919, Yesu amoi umba rikaaboro ni “kangara moyambu.” Gu kangara moyambu re nangbe kumbatayo rogo sunge tungusapai yo na kini fu “riahe . . . ti ragoho” fu apefuo Kristo. (Mt. 24:45) Ya mo ani bi gu gopai nayugo gupai nga Mbori ima ida na ruru kangara moyambu?

¹⁶ Satana na gako zegino ima manga dungu apai tipa ka sa gu sunge nga ga kangara moyambu ni mbumbuhe, ka si nidu nga Yekova aundongo kangara moyambu te, ka i mangingo gi sunge re te. Ruru kangara moyambu ninaandu kindi kumbatayo kaa fu gu riahe nga ga toro fu apefuo Kristo auru kpotosende si ki vura du vurũ nga i agbiatiyo na agu asangbanapai nga ga agu avura ue nga ga zegino namangi, na si ki vura du vurũ a nga i nagbiatiyo na arungosiro, gu zingo marã namanga rogo zegino dunduko, gbiati iraira mangaapai. Oni berẽnga pa gu badungu awaraga du berani areme ani atumongo tipaha ya rogo afugo naima susa 900! Gipai re nayugo gupai ziazia nga Mbori naundo kangara moyambu aundo. Sunge tungusapai nga gu kura gopai berewe nayugopa ga Yekova amaku. I natungusa wene pangbanga “rogo zegino dunduko.”  (Mt. 24:14) Zanga kapa, ani nabi gupai abi ziazia nga Yekova nangbe kumbatayo fu gako riigbu areme na kini sa gupai nga si du na diabese.

17. Waigu rengbe ani ka yugo gupai nga ani nasongoda gu riigbu Yekova amangasunge na ni?

¹⁷ Si naida ani sana tirani nga, ‘Ya mo mi na bakere tambuahe kaa koda tire na gu papara ga Yekova riigbu du auru kpotosende?’ Ti rago Moize, Yekova akedi we ngbangbaturũ yo tipa ka yugo gupai nga ko ima ida na agu aboro ko amoi yo. Wakina gure a, Yekova ima yugoho ziazia furani nga ko namangasunge amanga na gako riigbu areme. Ni rengo, badungu apai duho rengbe ani kadu na tambuahe tipaha. (1 Tesa. 5:18, 19) Waigu rengbe ani ka songoda gu riigbu Yekova amangasunge na ni? Ani rengbe ka songodaha ni peka ani fuo agu arugapai du mburuhe rii Ziazia Kekeapai i afuhe furani rogo gaani awaraga, ba gaani adunguratise yo, na ba bakere adunguratise yo. Kurigure, ani rengbe ka songodaha ni manga ani sunge tungusapai na yugopai wa rengbe omerani na ni.​—1 Kor. 15:58.

18. Ginipai mo nadiberã ka mangaha?

¹⁸ Ani dinga berã adia ka manga agu apai ani awirikaha rogo gu buku nga ga Pa Amotumo. Si naida Yekova idinga aida na ani tipa wa ka ko idi na gaani amotumo. Ani naamanganga sunge amanga fu Yekova mbiko gupai nga ani na tambuahe fuko. Ani naamanganga ai gupai amanga rengbe ani ka mangaha fu Yekova mbiko gupai nga ani ima kpinyemu ko na kpotoraniyo dunduko. Na ani naasongodanga gu riigbu asongoda na kpotoraniyo dunduko Yekova afu maku kuriihe areme. Ka ani mangi agu apai re, ani nika yugo gupai fu Yekova nga ani nabi gu momu du berani nga ga irisoko ni gako aDezire na nyanyakipaha!