1. Sonaha pangahap ni halak pasal na marhorja?

ANGGO bani iananmu tading, sonaha do somalni halak marhorja? Bani buei ianan, lambin bahat do halak manggunahon panorangni laho marhorja marimbangkon na hinan. Bahat do halak halani masibuktu marhorja, lang dong be panorang laho marsaran, marsaor pakon kaluarga, atap marlajar pasal Naibata. (Par. 2:23) Tapi dong do homa na marayoh marhorja. Sai dong do sidalianni ase ulang marhorja ia.​—Pod. 26:13, 14.

2-3. Siusihan aha ma na ibere Jahowa pakon Jesus pasal na marhorja?

² Jadi, bahat do halak i dunia on na marosuh tumang marhorja, janah dong homa na marayoh marhorja. Tapi sonaha pangahap ni Jahowa pakon Jesus pasal na marhorja? Jesus mangkatahon, “Na marhorja do Bapa ronsi nuan, ahu pe marhorja do.” (Joh. 5:17) Humbani na ihatahon Jesus ai, tangkas ma marosuh tumang Jahowa marhorja. Dingat ma sagala na ihorjahon-Si sanggah Ia manompa bahat malekat, bintang-bintang, ampa bahat planet. Boi do homa ididah hita jengesni tompaon ni Jahowa i tanoh on. Bibel mangkatahon, “Buei tumang do jadi-jadian-Mu, Ham Jahowa, haganupan in ipauli Ham marhitei hapentaran, gok do tanoh on bani na tinompa-Mu.”​—Ps. 104:24.

³ Jesus pe itiru do Bapani. Sanggah Naibata “pajongjongkon langit”, dihut do ia mangurupi. (Pod. 8:27-31) Dob ai, sanggah i tanoh on, buei do homa na ihorjahonsi. Jesus mangkatahon usih songon sipanganon do bani mangkorjahon tugas na ibere Jahowa. Anjaha ganup na ihorjahonsi patuduhkon sinuruh ni Naibata do ia.​—Joh. 4:34; 5:36; 14:10.

4. Siusihan aha ma na ibere Jahowa pakon Jesus pasal na marsaran?

⁴ Jadi marosuh tumang do Jahowa pakon Jesus marhorja. Anjaha hita pe sihol mangusihi sidea. Tapi ai maningon  torus do hita marhorja janah lang porlu marsaran? Lang sonai. Hassi pe Jahowa lang ongga loja, tapi dobkonsi itompa Ia langit ampa tanoh on, “marsaran ma Ia”. (2 Mus. 31:17) Artini ibere Ia do panorang laho mangidah jengesni tompaon-Ni. Itiru Jesus do homa ai sanggah ia i tanoh on. Ibere do panorang laho marsaran ampa rap mangan pakon susianni.​—Mat. 14:13; Luk. 7:34.

5. Sipata, tantangan aha do na iahapkon juakjuak ni Naibata?

⁵ Bani Bibel iojur do ase juakjuak ni Naibata pongkut marhorja, sedo gabe halak na parrayoh. (Pod. 15:19) Tontu maningon marhorja do nasiam laho manggoki haporluan ni kaluargamu. Tapi sobali ai, ibere do homa tanggung jawab hubanta laho mambaritahon ambilan na madear. Anjaha porlu do homa ibere hita panorang laho marsaran. Ai ongga do sipata iahap ham lang urah mambagi panorang laho marhorja, mangidangi, ampa marsaran? Sonaha hita boi mambotoh sadiha bahat do panorang na ibere laho marhorja ampa marsaran?

6. Domu bani Markus 6:30-34, sonaha Jesus patuduhkon porlu do panorang laho marhorja ampa marsaran?

⁶ Ponting tumang do ibotoh hita mambagi panorang laho marhorja. Raja Salomo manuratkon, ‘Bani sagala na masa, adong bei do panorangni.’ Dong panorang laho manuan, paulihon, tartawa, tangis, manortor, ampa na leganni. (Par. 3:1-8) Tangkas ma porlu do homa panorang laho marhorja ampa marsaran. Sonai ma na ibahen Jesus. Bani sada ari, mulak ma apostel-apostelni hun horja parambilanon. Sibuk tumang do sidea marbarita, “gari mangan seng sompat”. Halani ai, ihatahon Jesus ma bani sidea, “Laho ma hita bani ianan na lungun, ase marsaran otik.” (Basa Markus 6:30-34.) Jadi ibotoh Jesus do anggo ia pakon susianni porlu do marsaran hassi pe sipata lang sompat.

7. Aha ma na boi iparlajari hita humbani pangaturan pasal ari Sabat?

⁷ Sipata, dong do parubahan na porlu ibahen ase boi hita marsaran. Bani na basaia, ibahen Naibata do pangaturan na ponting bani juakjuak-Ni, ai ma mandalankon Sabat tiap minggu. Hassi pe sonari lang be iihutkon hita Titah ni si Musa, dong do gunani ai banta. Humbani pangaturan ai, gabe ibotoh hita ma holi ponting tumang do marhorja ampa marsaran.

8. Domu bani 2 Musa 31:12-15, aha do gunani ari Sabat ai?

⁸ Bibel mangkatahon dob onom “ari” Naibata manompa sagala na dong i tanoh on, marsaran ma ia humbani horja-Ni. (1 Mus. 2:2) Tapi marosuh do Jahowa janah totap do Ia marhorja ronsi sonari. (Joh. 5:17) Jadi onom ari ma Jahowa marhorja janah marsaran ma Ia bani ari papituhon. Halani ai, ipatugah ma bani halak Israel ase marsaran sidea bani ari papituhon. Gabe tanda do ari Sabat ai bani Naibata pakon halak Israel. ‘Ari parsaranan na pansing do ai bani Jahowa’. (Basa 2 Musa 31:12-15.) Bani ari ai, ise pe lang boi marhorja, age na matua, dakdanak, jabolon, sonai homa pinahan. (2 Mus. 20:10) Halani pangaturan ai, gabe adong ma panorang ni sidea laho paorotkon parhasomananni pakon Naibata.

9. Bani panorang ni Jesus, aha do na iajarhon pambobai ugama pasal ari Sabat?

⁹ Jadi marguna do ari Sabat ai bani juakjuak ni Naibata. Hassi pe sonai, bahat do pambobai ugama na mambahen aturan na  lepak pasal mandalankon ari Sabat ai. Sidea mangkatahon salah do bani ari Sabat mamutiki buyur ni omei atap pamalumkon halak na boritan. (Mrk. 2:23-27; 3:2-5) Tapi lang marosuh Jahowa bani aturan na ibahen sidea ai. Anjaha tangkas do ipatorang Jesus pasal ai bani halak.

10. Humbani Mateus 12:9-12, aha ma na ibotoh hita pasal ari Sabat?

¹⁰ Bani ari Sabat marsaran do Jesus pakon susianni halani unduk bani Titah na ibere Jahowa bani halak Israel hinan. * Tapi humbani parsahap ampa parlahouni, ipatuduh Jesus do lang salah mangkorjahon na madear anjaha mangurupi halak bani ari Sabat. Tangkas do ihatahon ia, “Bulih do mangkorjahon na madear bani ari Sabat.” (Basa Mateus 12:9-12.) Lang ongga ihatahon Jesus lang boi patuduhkon habujuron sanggah ari Sabat. Jesus patuduhkon iarusi ia do mase iparentahkon Jahowa ase juakjuak-Ni marsaran bani ari Sabat. Sanggah marsaran sidea humbani horjani, gabe boi ma sidea manombah Jahowa. Tontu sanggah dakdanak Jesus, somal do namatorasni mangajarhon bani sidea ase manombah Naibata sanggah ari Sabat. Hunja ibotoh hita ai? Sanggah laho Jesus hu Nasaret, huta hagodanganni ai, Bibel mangkatahon, “Mangihutkon hasomalanni, masuk ma ia hu parguruan ai sanggah ari Sabat, anjaha jongjong ma ia laho mambasa.”​—Luk. 4:15-19.

11. Ise ma na mambere siusihan bani Jesus pasal na marhorja?

¹¹ Sanggah si Josep mangajari Jesus sonaha gabe tukang kayu, tontu iajari ia do homa Jesus pasal aha na iharosuhkon Jahowa sanggah marhorja. (Mat. 13:55, 56) Anjaha ididah Jesus do si Josep pongkut marhorja bai ganup ari laho manggoki haporluan ni sidea sakaluarga. Dob ai, sanggah Jesus mangidangi ihatahon do bani susianni, “Patut do dapotan upah siparhorja.” (Luk. 10:7) Tangkas ma ibotoh Jesus do sonaha pongkut marhorja.

12. Ayat na ija do na patuduhkon pasal na pongkut marhorja?

¹² Apostel Paulus pe ibotoh do sonaha na pongkut marhorja ai. Sasintongni mambaritahon pasal Jesus ampa ajaranni do na sipontingan hu bani. Tapi marhorja do homa ia laho manggoki haporluanni. Ibotoh halak Tessalonika do ‘loja anjaha sunsah ia marhorja arian pakon borngin’ ase ulang ‘manunsahi’ atap ise pe. (2 Tes. 3:8; Lah. 20:34, 35) Sanggah si Paulus patugahkon pasal horjani ai, ra do maksudni ai sanggah ia marhorja martonun hiou tenda. Sanggah i Korint, rap pakon si Akila ampa si Priskilla do ia tading janah “rap marhorja pakon sidea, halani sada hapandeian do sidea, ai ma martonun hiou tenda”. Sanggah si Paulus “marhorja arian pakon borngin”, sedo artini torus ia marhorja. Tapi dong do panorangni lang marhorja umpamani sanggah ari Sabat. Ijai marbarita do ia bani halak Jahudi halani sidea pe lang marhorja bani sadari ai.​—Lah. 13:14-16, 42-44; 16:13; 18:1-4.

13. Aha do na boi itiru hita humbani si Paulus?

¹³ Jadi hassi pe maningon marhorja, tongtong do si Paulus mambaritahon “ambilan na madear na humbani Naibata”. Tontu sada siusihan na madear do on. (Rom 15:16; 2 Kor. 11:23) Leganni ai, iojur si Paulus do homa ase na legan mangusihisi. Itiru si Akila ampa si Priskilla do si Paulus. Halani ai, isobut si Paulus do sidea “hasoman[-ni] parhorja ibagas Kristus Jesus”. (Rom 12:11; 16:3) Janah iojur si Paulus do homa ase kuria Korint ‘lambin surung ibagas horja ni Tuhan’. (1 Kor. 15:58; 2 Kor. 9:8) Marhitei tonduy-Ni, itogu-togu Naibata do si Paulus ase manuratkon on, “Barang ise na so ra marhorja, ulang ma ia mangan.”​—2 Tes. 3:10.

14. Aha do maksud ni Jesus bani na ihatahon ia i Johannes 14:12?

¹⁴ Sonari, horja sipontingan na boi ihorjahon hita ai ma marbarita janah mangajari halak ase gabe susian ni Jesus. Ia mangkatahon lobih humbani na dob ihorjahonsi do holi na ihorjahon susianni. (Basa Johannes 14:12.) On sedo maksudni sidea mambahen halongangan songon na dob ibahen ia. Tapi hu lobih bahat ianan do holi sidea marbarita. Bahatan do holi halak na iajari sidea anjaha dokahan do sidea mangkorjahon ai marimbangkon Jesus sandiri.

15. Sungkun-sungkun aha ma na porlu irimangi hita, janah mase?

¹⁵ Laho mambotoh halak na sonaha do ham i parhorjaan, sungkun ma dirimu: ‘Ai halak na pongkut marhorja do ahu itanda hasomanku sahorja? Ai husaloseihon do horjangku domu bani panorangni, anjaha hubahen do na sidearan sanggah mangkorjahon ai?’ Anggo eak balosmu, tontu porsaya do bosmu bamu. Ra do gabe marosuh hasomanmu sahorja manangar barita na madear halani mangidah parlahoumu ai. Laho mambotoh halak na sonaha do ham mangkorjahon tugas parambilanon, rimangi ma sungkun-sungkun on: ‘Ai itanda  do ahu sahalak na ringgas marbarita? Hubahen do lobei persiapan paima marbarita? Anggo dong na marosuh, mintor podas do ahu manrohi use? Ai husuba do marmasam sara sanggah marbarita?’ Anggo eak balosmu, tontu malas do uhurmu mangkorjahon ai.

16. Sonaha Jesus ampa susianni legan pakon bahat halak i dunia on?

¹⁶ Bahatan halak sonari on usih songon dalahi bani limbaga ni Jesus. Dalahi ai mangkatahon bani dirini, “Marsaran ma ho, mangan, minum anjaha marmalas ni uhur.” (Luk. 12:19; 2 Tim. 3:4) Nini uhurni marsaran janah marsonang-sonang do na sipontingan ibagas goluhni. Hape legan do anggo Jesus ampa apostelni. Iarusi Jesus porlu do sidea marsaran tapi sedo ai na sipontingan.

17. Sonaha hita manggunahon panorang sanggah lang marhorja?

¹⁷ Hita pe marusaha do homa maniru Jesus. Sanggah lang marhorja, igunahon hita do panorang laho marbarita ampa martumpu. Sasintongni ai do horja na sipontingan na porlu ibahen hita. Halani ai, marusaha do hita tongtong ase boi mangkorjahon ai. (Heb. 10:24, 25) Hassi pe mardalani hita, huja pe hita laho marusaha do hita ase boi totap martumpu, anjaha patugahkon pasal Bibel bani ise pe na boi ijumpahi hita.​—2 Tim. 4:2.

18. Aha do na iharosuhkon Jesus ase ihorjahon hita?

¹⁸ Tontu martarima kasih do hita bani Kristus Jesus, Rajanta in halani lang ipindo ia lobih humbani na tarbahen hita. Anjaha iurupi ia do hita ase mambagi panorang laho marhorja ampa marsaran. (Heb. 4:15) Sihol do ia ase dong panorangta laho marsaran. Janah sihol do homa ia ase hita pongkut marhorja laho pasirsirhon haporluanta anjaha dihut bani horja parambilanon. Bani artikel na mangihut, iulas hita ma aha do na ibahen Jesus laho paluahkon hita humbani parjabolonan.