1. Nama runding orang mayuh pasal bekereja?

NAMA runding orang mayuh ba menua nuan pasal bekereja? Ba mayuh menua, orang bebendar sereta lama agi gawa ari ke sebedau tu. Kesuah agi, orang ke bebendar gawa nadai chukup awak alai belelak, begulai enggau diri sebilik tauka belajar pasal Petara. (P-jar. 2:23) Tang, bisi sekeda orang enggai gawa lalu ngiga tegal enggai bekereja.—J-lam. 26:13, 14.

2-3. Nama runding Jehovah enggau Jesus pasal bekereja?

² Mayuh orang ba dunya ngembuan runding ti salah pasal bekereja. Tang pikirka runding Petara Jehovah enggau Jesus pasal bekereja. Kitai nemu Jehovah endang rindu gawa. Jesus enggau terang madahka: ‘Apai aku seruran gawa. Lalu aku empu mega gawa.’ (Jhn. 5:17) Pikirka semua pengawa ke digaga Petara lebuh Iya nempa mayuh melikat, bintang enggau planet. Kitai mega meda mayuh utai ke ditempa Petara ba dunya ti ngerinduka ati. Ku pemasmur madahka: ‘Jehovah, Nuan udah ngaga mayuh macham utai! Naka meh pemintar Nuan ngaga semua utai nya! Dunya nyau penuh laban utai ti idup ti digaga Nuan.’—Mas. 104:24.

³ Jesus neladan Apai iya, Jehovah. Iya nulung Jehovah “ngengkahka langit.” Iya tukang ti landik gawa ke Jehovah. (J-lam. 8:27-31) Udah nya, lebuh Jesus ba dunya, iya ngereja pengawa enggau manah. Iya madahka pengawa ke diberi Jehovah nya baka pemakai ba iya. Lalu semua pengawa ke digaga Jesus ba dunya nunjukka Petara udah ngirumka iya.—Jhn. 4:34; 5:36; 14:10.

4. Nama ulih dipelajar kitai ari Jehovah enggau Jesus pasal belelak?

 ⁴ Kati teladan ari Jehovah enggau Jesus ti bebendar gawa nunjukka kitai enda ibuh belelak? Ukai. Bup Kudus madahka pengudah Jehovah nempa langit enggau dunya, Iya “ngetu gawa lalu diau.” (P-sut. 31:17) Ketegal Jehovah enda nemu lelak, nya alai Iya enda ibuh belelak. Iya “ngetu gawa lalu diau” reti nya Iya ngetu nempa utai lalu ngena awak belematika utai ke udah ditempa Iya. Pia mega enggau Jesus. Taja pan iya bebendar gawa lebuh ba dunya, iya nentuka diri bisi awak alai belelak sereta begulai makai enggau bala bakih iya.—Mat. 14:13; Luk. 7:34.

5. Nama penanggul ke ditapi mayuh nembiak Jehovah?

⁵ Bup Kudus meransang nembiak Petara rindu bekereja. Nembiak Iya patut bagas gawa, ukai ngelusu. (J-lam. 15:19) Nuan engka gawa sekular ngambika ulih nyediaka utai ke diguna diri sebilik. Lalu semua murid Kristus bisi tanggung pengawa nusui berita manah ari Bup Kudus. Tang, nuan mega patut bisi chukup awak alai belelak. Kati nuan kadang-kadang tusah deka ngatur jam ke kereja sekular, kena nginjil sereta belelak? Baka ni kitai nemu ni pengelama kitai patut bekereja sereta belelak?

6. Baka ni Mark 6:30-34 nunjukka Jesus ngembuan runding ti ngena pasal bekereja sereta belelak?

⁶ Endang beguna ngembuan runding ti ngena pasal bekereja. Nengah iring roh kudus, Raja Solomon nulis: “Semua utai bisi maya iya empu . . . ke tiap iti pengawa.” Iya nyebut pasal betanam, nirika rumah, nyabak, ketawa, betanda sereta pengawa bukai. (P-jar. 3:1-8, NWT) Endang amat, dua iti utai ke beguna ba pengidup nya bekereja enggau belelak. Jesus ngembuan runding ti ngena pasal bekereja sereta belelak. Bisi sekali, bala murid iya pulai pengudah kisuk nginjil. Ketegal kelalu kisuk, sida “nyau nadai peluang alai makai.” Jesus madahka: “Aram kitai mupuk ngagai endur ti sunyi, kediri kitai aja, lalu belelak dia enda lama.” (Bacha Mark 6:30-34.) Taja pan Jesus enggau bala murid iya enda seruran ulih belelak baka ti dikedekaka sida, tang Jesus nemu semua sida patut belelak.

7. Baka ni belajar pasal Hari Sabat ulih meri penguntung ngagai kitai?

⁷ Kadang-kadang, semua kitai patut belelak enda lama ari pengawa ke digaga kitai besehari-sehari. Kitai ulih nemu tu ari atur ke digaga Petara ke nembiak Iya kelia. Atur nya pasal Hari Sabat ke diintu ninting minggu. Kemayaharitu kitai enda agi nitihka Adat Moses. Taja pia, kitai tau bulih penguntung lebuh belajar pasal Hari Sabat. Utai ke dipelajar pasal Hari Sabat ulih nulung kitai meresa runding bekaul enggau bekereja sereta belelak.

8. Nitihka Pemansut 31:12-15, nama tuju Hari Sabat diatur?

⁸ Bup Kudus madahka, pengudah enam “hari,” * Jehovah ngetu nempa utai di dunya. (P-kal. 2:2) Tang Iya rindu gawa, lalu Iya “seruran gawa.” (Jhn. 5:17) Jehovah gawa enam “hari” lalu belelak ba hari ti ketujuh. Iya mega ngasuh orang Israel belelak ba hari ti ketujuh ninting minggu. Jehovah madahka Hari Sabat nya kena nunjukka orang Israel bisi kaul ti spesial enggau Jehovah lalu nya mega kena ngingatka pasal Jehovah ke udah ngelepaska sida ari menua Ejip. Nya endang hari sida diau, lalu nya hari ti kudus ba Jehovah.  (Bacha Pemansut 31:12-15.) Ba hari nya, nadai seiku pan nyengkaum anak mit, bala ulun, tauka bala jelu ke dikena gawa ba umai, dikemendarka gawa. (P-sut. 20:10) Hari nya diungkup kena orang Israel nyembah Jehovah.

9. Nama runding ti salah pasal Hari Sabat ke bisi maya jeman Jesus?

⁹ Hari Sabat endang manah ke nembiak Jehovah. Tang, mayuh tuai pengarap maya jeman Jesus ngaga atur ti kelalu terit bekaul enggau atur Hari Sabat. Sida ngumbai nya salah ngumpul igi gandum ke pemakai tauka nyumanka orang ke sakit ba Hari Sabat. (Mrk. 2:23-27; 3:2-5) Tang runding ke baka tu enda sejalai enggau runding Jehovah. Lalu Jesus mega enggau terang madahka runding Jehovah pasal Hari Sabat ngagai orang ke deka mendingka iya.

10. Nama ulih dipelajar kitai ari Matthew 12:9-12 pasal runding Jesus bekaul enggau Hari Sabat?

¹⁰ Jesus enggau bala murid iya belelak maya Hari Sabat. Tu ketegal sida agi di baruh Adat Moses. * Tang nengah jaku enggau ulah, Jesus nunjukka enda salah ngintu Hari Sabat sereta ngereja utai ti manah ba hari nya. Jesus enggau terang madahka: “Nya alai kitai enda ngelanggar Adat enti kitai ngereja pengawa ti manah lebuh hari Sabat.” (Bacha Matthew 12:9-12.) Iya enda ngumbai ngereja pengawa ti manah ngelanggar Hari Sabat. Ari pengawa Jesus, iya nunjukka diri meretika kebuah Petara ngasuh nembiak Iya belelak ba hari nya. Ketegal nembiak Jehovah belelak ari pengawa  ke dikereja sida besehari-sehari, sida ulih ngenuluka sembah ngagai Iya. Lalu Jesus dibesaika ba ruang bilik ke netapka Hari Sabat alai sida sebilik nyembah Jehovah. Kitai nemu tu ari utai ke dibacha kitai pasal Jesus: ‘Iya [Jesus] datai di Nasaret, alai iya ke diau kenyau ari mit, iya mansang ngagai balai gempuru baka selama lebuh hari Sabat. Iya bediri, deka macha ari Bup Kudus.’—Luk. 4:15-19.

11. Sapa nyadi teladan manah ke Jesus bekaul enggau bekereja?

¹¹ Josep ngajar Jesus chara nyadi tukang kayu ti landik lalu iya mega madah ngagai Jesus pasal runding Petara bekaul enggau bekereja. (Mat. 13:55, 56) Lalu Jesus tentu meda Josep bebendar gawa ninting hari kena nyediaka utai ti diguna ruang bilik iya ti besai. Indah, Jesus madah ngagai bala murid iya: “Orang ke gawa endang patut diberi gaji.” (Luk. 10:7) Amat, Jesus endang teleba bebendar gawa.

12. Ni bagi ayat Bup Kudus ke madah pasal runding Paul bekaul enggau bebendar gawa?

¹² Rasul Paul mega bebendar gawa. Batang pengawa Paul iya nya, nusui ngagai orang pasal Jesus sereta utai ke diajar Jesus. Tang iya mega bekereja ngulihka belanja ke dikena ngidupka diri. Bala menyadi Kristian ba Tesalonika nemu pasal iya ke “bebendar gawa siang malam,” ngambika enda “nating” orang bukai. (2 Tes. 3:8; SKR. 20:34, 35) Lebuh Paul nulis pasal bekereja, iya engka madah pasal pengawa iya ke begagaka langkau kain. Lebuh ba Korint, iya diau enggau Akuila seduai Prisila, lalu ‘begulai gawa begagaka langkau kain.’ Lebuh Paul madahka diri gawa “siang malam,” ukai reti nya iya nadai ngetu gawa. Iya belelak ari ngaga langkau kain maya Hari Sabat. Ba hari nya, iya ngena peluang ti dikemisi iya nginjil ngagai orang Judah ke mega enda gawa lebuh Hari Sabat.—SKR. 13:14-16, 42-44; 16:13; 18:1-4.

13. Nama ulih dipelajar ari teladan Paul?

¹³ Rasul Paul netapka teladan ti manah. Iya bisi kereja sekular, tang iya nentuka diri “betusuika Berita Manah” pasal Petara enggau tetap. (Rom. 15:16; 2 Kor. 11:23) Paul mega meransang orang bukai nginjil enggau tetap. Akuila seduai Prisila nya menyadi Kristian ke sama enggau iya bekereja ke Jesus Kristus. (Rom. 12:11; 16:3) Paul meransang bala menyadi ba Korint ‘bebendar gawa ke Tuan.’ (1 Kor. 15:58; 2 Kor. 9:8) Nengah roh kudus, Jehovah ngasuh rasul Paul nulis: “Barang sapa enggai gawa, awakka iya enda makai.”—2 Tes. 3:10.

14. Nama reti jaku Jesus ke ditulis ba John 14:12?

¹⁴ Pengawa ti dikemeratka kitai diatu iya nya nginjil sereta ngaga orang nyadi murid. Indah Jesus madahka, bala murid iya deka ngereja pengawa ti besai agi ari ke digaga iya! (Bacha John 14:12.) Iya nadai madahka kitai deka ngereja pengawa ajih baka ke digaga iya. Tang, bala murid iya deka nginjil sereta ngajar ba mayuh agi endur, ngagai mayuh agi orang, lalu bejalaika pengawa nya lama agi ari ke digaga iya.

15. Nama tanya ke patut ditanya diri empu, lalu nama kebuah?

¹⁵ Enti sema nuan bisi kereja sekular, tanya diri empu: ‘Kati aku orang ke bebendar gawa ba endur aku bekereja? Kati aku nembuka kereja ba maya ti udah ditetapka sereta enggau naka ulih ngereja iya?’ Enti saut nuan “au,” tuke nuan tentu deka arap agi ke nuan. Lalu orang ke sama gawa enggau nuan engka deka agi mendingka berita manah ari Bup Kudus. Bekaul enggau chara nginjil sereta ngajar orang Bup Kudus, nuan mega patut nanya diri empu: ‘Kati aku orang ke bebendar gawa  ba pengawa nginjil? Kati aku besedia enggau manah kena ngepunka randau lebuh ngaga keterubah datai nginjil? Kati aku jampat datai ngabas ngagai orang ke bisi minat? Lalu kati aku bisi nyukung chara nginjil ke bukai?’ Enti saut nuan “au,” nuan deka bulih pengaga ati ba pengawa nginjil.

16. (a) Nama runding Jesus enggau bala rasul iya pasal belelak? (b) Lalu baka ni runding tu enda sama enggau runding mayuh orang kemayaharitu?

¹⁶ Jesus nemu, iya enggau bala rasul iya begunaka awak alai belelak. Taja pia, mayuh orang maya nya enggau orang kemayaharitu, baka seiku orang kaya ke disebut dalam sempama Jesus. Orang kaya nya enggau andal madah ngagai diri badu agi gawa. Iya deka “makai, ngirup lalu ngelantangka diri.” (Luk. 12:19; 2 Tim. 3:4) Iya ngumbai utai ti pemadu beguna ba pengidup nya belelak sereta ngelantangka diri. Tang Jesus enggau bala rasul iya enda ngumbai ngelantangka diri nya utai ti pemadu beguna ba pengidup sida.

17. Baka ni kitai ngena awak lebuh kitai enda bekereja?

¹⁷ Kemayaharitu, kitai nguji neladan Jesus. Maya kitai enda bekereja kitai deka ngena awak nya nginjil sereta datai begempuru. Indah, pengawa ngaga murid sereta datai begempuru endang beguna ba kitai. Nya alai, kitai deka enggau naka ulih ngereja semua pengawa nya ke Jehovah. (Heb. 10:24, 25) Indah lebuh kitai raun ngagai endur bukai, kitai agi datai begempuru enda ngira dini alai kitai. Lalu kitai mega nguji berandau pasal Bup Kudus enggau orang ke ditemu kitai.—2 Tim. 4:2.

18. Nama utai dikedekaka Jesus kereja kitai?

¹⁸ Kitai amat beterima kasih ngagai Raja kitai, Jesus Kristus. Iya nemu taka kitai lalu nulung kitai ngembuan runding ti ngena pasal bekereja sereta belelak! (Heb. 4:15) Iya deka kitai bisi chukup awak alai belelak. Iya mega deka kitai bebendar gawa nyediaka utai ke diguna ba pengidup besehari-sehari sereta gaga ati enggau pengawa ngaga orang nyadi murid. Ba artikel pengudah tu, kitai deka berandau pasal utai ke udah digaga Jesus kena ngelepaska kitai ari sebarang pengawa “ulun” ti ngemediska kitai.