1. Anni i pagimamma na totolay meyannung ta trabahu?

KUNNASI imammatan na totolay ta lugarnu i trabahu? Ta aru nga nasion, sossobra i pattrabahu na totolay. Danuri totolay nga sossobra i attrabahuda ay maruddu nga awan tu tiempoda nga magibannag, awan tu tiempoda ta familiada, anna ta pamannu ta espiritual ira nga pakawagadda. (Ecl. 2:23) Tadday paga nga problema, manaki na karuan i mattrabahu anna mappambar ira tapenu ari mattrabahu.​—Prov. 26:13, 14.

2-3. Anni ira nga ehemplo meyannung ta trabahu i nipasingan ni Jehova anni Jesus?

² Ari tu kagitta na totolay ta mundo nga ari tu balanse i pagimammada ta trabahu, ikonsidera tam nu kunnasi imammatan ni Jehova anna ni Jesus i trabahu. Ammu tam nga kakayà ni Jehova i mattrabahu. Siniguradu yatun ni Jesus ta pakkagina: “Awan tu immang na Yamà nga makatara-trabahu ay mawag tu kunnatun gapa i kuak-ku.” (Juan 5:17) Nonopan i ngamin nga trabahu nga kingngua na Dios durante nga pinaratuna i ari mabili-bilang nga anghel ira, biti-bitun, anna planeta ira. Masingattam gapa i aru nga ebidensia na makakkasta nga pinaratu ira na Dios ta davvun. Fustu i kinagi na salmista: “I kingnguam ira, O AFU, ay napakaru! Kingnguam ngamin danaw gafu ta ka-uto mu! Napannu yoye i davvun ta pinaro mu.”​—Sal. 104:24.

³ Pinarigan ni Jesus i Yamana. Zinuffunanna i Dios ta ‘keprepara na langi.’ Kavulu ni Jehova si Jesus “bilang malalaki nga trabahador.” (Prov. 8:27-31) Nappasa i tiempo, ta kegga ni Jesus ta davvun, aru i makapabbaw nga kingnguana. Kinagina nga i trabahu nga nipakua ni Jehova nisa ay kagitta na makan, anna i kingnguana ira i mamakurug nga zinog yayya na Dios.​—Juan 4:34; 5:36; 14:10.

4. Anni i magigiammu tam kani Jehova anna kani Jesus meyannung ta pagibannag?

 ⁴ Gafu kari ta malappo nga mattrabahu si Jehova anna si Jesus, kayàna kagian nga ariattam ngana gapa kawagan i magibannag? Ari gapa. Kagian na Biblia nga kabalin nga pinaratu ni Jehova i langi anna i davvun, “nagibannag yayya anna nagayayya.” (Ex. 31:17) Megafu ta ari vuluvuga mabannag si Jehova anna arianna kawagan i magibannag, i kayà gafu kagian natun ay nagimmang tu manganannuan si Jehova tapus niddanna tu tiempo i baggina nga magayayya ta pinaratuna ira. Maski paga nu malallappo si Jesus ta pattrabahu durante nga nattolay ta davvun, egga lagapa tiempona nga magibannag anna makipakkan kavulu i kokkofunna.​—Mat. 14:13; Luc. 7:34.

5. Marigatan i totolay na Dios nga kuan i anni?

⁵ Ipagaram na Biblia ta totolay na Dios nga magayayya nakuan ira nga mattrabahu. Mallallappo nakuan i aripanna ira, ari tu talakag. (Prov. 15:19) Awayyana nga mattrabahu ka tapenu meyawa mu i pakawagan na familiam. Anna egga i responsibilidad na ngamin nga disipulos ni Cristo nga ilayyagayya i mapia nga dumug. Ngem kawagammu lagapa i magibannag tu mapia. Marigatakka kari nga balanseyan i tiempom ta trabahu, ta ministerio, anna ta pagibannag? Kunnasi tam mammuan i mepangngo nga karu na tiempo ta pattrabahu anna ta pagibannag?

6. Kunnasi ipasingan na Marcos 6:30-34 nga balanse i pagimamma ni Jesus ta trabahu anna ta pagibannag?

⁶ Nu meyannung ta trabahu, importante i pabbalin tu balanse. Nainspiran si Patul Solomon nga itura: “Egga i natullo nga tiempo ta . . . kada aktibidad.” Kinagina i meyannung ta pammula, pamataddag, pattangi, paggalo, pattala, anna tanakuan paga nga aktibidad. (Ecl. 3:1-8) Manawag gafu nga i trabahu anna i pagibannag ay dua nga importante nga aspeto na pattolay. Balanse i pagimamma ni Jesus ta trabahu anna ta pagibannag. Mittan, nanoli i apostol ira kabalin na pallayyagayyada. Kuruga okupadu ira yatutta ‘ariadda ngana natangngaw i kuman.’ Kinagi ni Jesus: “Umay ittam ta malamma-lammo nga lugar nga sitta-sittam laman tapenu magibannag kamu tu manganannuan.” (Bibbigan i Marcos 6:30-34.) Maski nu ari kanayun nga makapagibannag si Jesus anna i disipulosna kada kayàda, ammu ni Jesus nga kawagadda ngamin i magibannag.

7. Kunnasi makoffun nittam i paggigiammu ta dob na Sabbath?

⁷ Nu mittan, kawagattam talaga ngamin i magibannag onu ulian i inaggaw nga rutina tam. Masingattam yatun ta importante nga unnug nga kingngua na Dios para ta totolena tagga​—i linigguan nga Sabbath. Ari ittam ngana sakup na Mosaiko nga Dob ngem makabenefisio nittam i pangikonsidera ta kinagi natun meyannung ta Sabbath. Makoffun i magigiammu tam tapenu mausito tam nu fustu i pagimamma tam ta trabahu anna ta pagibannag.

8. Segun ta Exodo 31:12-15, para ta anni i aggaw na Sabbath?

⁸ Kagian na Uvovug na Dios nga kabalin na annam nga “aggaw” nga pamaratu, nagimmang i Dios nga mamaratu ta davvun. (Gen. 2:2) Ngem kakayà ni Jehova nga mattrabahu anna ‘awan tu immanna nga makatara-trabahu’ ta karuan nga gannug. (Juan 5:17) Nattrabahu si Jehova tu annam nga “aggaw” anna nagibannag ta mekapitu nga “aggaw” anna kinagina gapa ta Israelita ira nga magibannag ta kada mekapitu nga aggaw. Kinagi na Dios nga i Sabbath ay pagisenialan nga espesial i relasion ni Jehova ta Israel. Yaw ay ‘espesial nga aggaw na  pagibannag, masanto kani Jehova.’ (Bibbigan i Exodo 31:12-15.) Magaplika ta ngamin i pangigamma nga mattrabahu nelagum ngana i abbarabbing, aripan ira, anna maski i aya-ayam. (Ex. 20:10) Megafu tatun, mas aru i tiempo na totolay ta espiritual ira nga gannug.

9. Anni i ari balanse nga pagimamma ta Sabbath ta tiempo ni Jesus?

⁹ Pammakapian na totolay na Dios i aggaw na Sabbath; ngem ta tiempo ni Jesus sossobra anna istrikto i pagimamma na relihioso ira nga lider tatun. Kagiadda nga megamma ta Sabbath maski i pangà tu dawa na trigu onu i panguru ta mataki. (Mar. 2:23-27; 3:2-5) Ari tu kunnatun i pagimamma na Dios, anna manawag nga kinagi yatun ni Jesus turi ta maggigginna ira.

10. Anni i magigiammu tam ta Mateo 12:9-12 meyannung ta pagimamma ni Jesus ta Sabbath?

¹⁰ Magibannag si Jesus tuange ta Judio nga disipulosna ta aggaw na Sabbath megafu ta parulattadda i Mosaiko nga Dob. * Ngem ipasingan na kinagi anna kingngua ni Jesus nga rasonable nakuan i panuttul ta Sabbath anna mepamavulun i pangngua tu kinasippo anna panguffun ta tanakuan. Manawag nga kinagina: “Ipamavulun na Dob i magangngua ta mapia ta Aggaw na Pagibannag.” (Bibbigan i Mateo 12:9-12.) Arianna minammatan nga palladdà ta Sabbath i pagangngua tu kinasippo anna panguffun ta tanakuan. Ipasingan na kingngua ira ni Jesus nga nalippawana i kuruga importante nga rason nu ngatta nidog na Dios ta totolena nga magibannag ira ta Sabbath. Megafu ta magibannag i totolay na Dios ta inaggaw nga pattrabahuda, makapaffokus  ira ta espiritual ira nga gannug. Ziminakal si Jesus ta familia nga maddayaw ta Dios ta aggaw na Sabbath. Ammu tam yatun megafu ta nabibbig tam i meyannung kani Jesus ta keggana ta ilina nga Nazaret: “Kunna annangngua [ni Jesus] ta Aggaw na Pagibannag, minay yaya ta sinagoga.”​—Luc. 4:15-19.

11. Anni i makasta nga ehemplo ni Jesus meyannung ta trabahu?

¹¹ Nituddu ni Jose kani Jesus nu kunnasi i makkarpinteru kunne na gapa i pagimamma na Dios ta trabahu. (Mat. 13:55, 56) Siguradu gapa nga nasingan ni Jesus si Jose nga kitellappo nga mattrabahu kada aggaw tapenu suportan i dakal nga familiada. Kunnaw gapa i kinagi ni Jesus ta disipulosna: “I mattrabahu ay mepangngo tu mafornalan” onu mataddanan. (Luc. 10:7) Wan, manawag nga ammu ni Jesus nu kunnasi i mattrabahu tu mapia.

12. Anni ira nga teksto i mangipasingan ta kagian na Biblia meyannung ta pattrabahu tu mapia?

¹² Ammu gapa ni apostol Pablo i mattrabahu tu mapia. I primeru nga trabahuna ay ilayyagayya i meyannung kani Jesus anna i mensahena ira. Ngem nattrabahu lagapa si Pablo tapenu suportan i baggina. Ammu na taga-Tesalonica ira i ‘aggaw-gabi nga banna-bannagna ta trabahu’ tapenu ari “mamakadammo” ta maski sinni. (2 Tes. 3:8; King. 20:34, 35) Awayyana nga tukuyan taw ni Pablo i trabahuna nga mamadday tu tolda. Ta keggana ta Corinto, nakipaddian yayya kani Akila anni Priscila anna ‘nakipattrabahu nira megafu ta parehu ira tu pagaleran nga mamadday tu tolda.’ Ari kebalinan na “aggaw-gabi” nga pattrabahu ni Pablo nga ari yayya vuluvuga nga nagimmang ta pattrabahu. Magimmang yayya ta pamadday tu tolda ta kada Sabbath. Usanna yatun nga aggaw tapenu layyagayyan i Judio ira, nga ari gapa mattrabahu ta aggaw na Sabbath.​—King. 13:14-16, 42-44; 16:13; 18:1-4.

13. Anni i magigiammu tam ta ehemplo ni Pablo?

¹³ Nangipasingan tu makasta nga ehemplo si apostol Pablo. Mawagna i mattrabahu ta sekular; ngem, siniguraduna nga regular yayya nga makipartisipa ta “kelayya-gayya na evanghelio nga maggafu ta Dios.” (Roma 15:16; 2 Cor. 11:23) Pinagaramna gapa i karuan nga kunnatun i kuadda. Inagalanna da Akila anni Priscila nga ‘kavuluna nga masserbi kani Cristo Jesus.’ (Roma 12:11; 16:3) Pinagaram ni Pablo i taga-Corinto ira nga ‘mallallappo ira nga masserbi ta Yafu.’ (1 Cor. 15:58; 2 Cor. 9:8) Ininspiran paga lagu ni Jehova si apostol Pablo nga itura: “I sinni laman nga manaki nga mattrabahu ay ari nga mapakan.”​—2 Tes. 3:10.

14. Anni i kayà kagian ni Jesus turi ta kinagina i nerekord ta Juan 14:12?

¹⁴ I pinaka-importante nga trabahu taw ta pangurianan ira nga aggaw ay i pallayyagayya anna pagangngua tu disipulos. I kurug, niprofesiya ni Jesus nga mangngua noka i disipulosna tu mas paga nga makapabbaw nga annangngua anne nisa! (Bibbigan i Juan 14:12.) Arianna kayà kagian nga makapammilagro ittam gittana kingnguana ta nappasa. Lallagu, mallayyagayya anna manuddu i disipulosna ta mas dakal nga teritoria, ta mas aru nga tolay, anna ta mas apaddu nga tiempo anne ta nakuana.

15. Anni ira nakuan i iyavu tam ta baggi tam, anna ngatta?

¹⁵ Nu egga sekular nga trabahum, iyavu mu ta baggim: ‘Kilala ngà kari nga malappo ta pattrabahuakku? Mabalikku kari i trabahù ta eksakto nga oras anna kuakku yatun adde ta mawayyà?’ Nu wan i tabbag mu, magga malà mu i pattalo na boss mu. Anna mas magginna i katrabahum ira ta mapia nga dumug. Nu meyannung ta trabahu nga pallayyagayya anna panuddu, iyavu  mu danaw: ‘Kilala ngà kari nga malallappo ta ministerio? Mapprepara ngà kari tu mapia ta gafu nga pallayyagayya? Ariakku kari pabayagan i massinoli ta nakibbidà ira nga interesadu? Regular ngà kari nga makipartisipa ta nadduruma nga aspeto na ministerio?’ Nu wan i tabbag mu, makaleg ka tu pagayayya ta ministeriom.

16. Anni i neruman na pagimamma ni Jesus anna na apostolesna ta aru nga totolay ta kaggawattam meyannung ta pagibannag?

¹⁶ Ammu ni Jesus nga egga ira tiempo nga mawagna i magibannag kunne na gapa i apostolesna. Ngem, aru nga totolay tagga anna ta kaggawattam i meyarig ta mariku nga lalaki ta ilustrasion ni Jesus. Kinumbinsi natun nga lalaki i baggina: “Ari ngana nga mawag tu mattrabahu ka. I kuam-mu ngana laman ay kuman, mamissan anna maddibi-dibersion!” (Luc. 12:19; 2 Tim. 3:4) Puru ngana laman pagibannag anna pappaga-pagayayya i agga-nonona. Neruma yatun kani Jesus anna ta apostolesna nga ariadda nisentro i pattoleda ta pappagustu ta baggida.

17. Kunnasi tam iyusa i tiempo nga awan tu trabahu tam?

¹⁷ Sangawe, maparigattam si Jesus nu ariattam laman usan ta pagibannag i tiempo nga awan tu trabahu tam, nu ari, usan gapa yatun ta pangngua tu mapia gukaban na pallayyagayya ta tanakuan anna pagatende ta study ira. Kakuruganna, para nittam, kuruga importante i pangngua tu disipulos anna i pagatende ta study ira yatutta kuattam i adde na mawayya tam nga regular nga makiparte tatun ira nga aktibidad para kani Jehova. (Heb. 10:24, 25) Maski nu nakabakasion ittam, magatende ittam nakuan tu study ira maski sitaw i diattam, anna magaleg ittam tu oportunidad nga ipakiyuvovug i meyannung ta Biblia ta masimmuattam ira.​—2 Tim. 4:2.

18. Anni i kayà ni Cristo Jesus nga Patul tam nga kuattam?

¹⁸ Kuruga mappabalo ittam nga rasonable i Patul tam nga si Cristo Jesus anna uffunanna ittam nga mapeggan tu balanse nga pagimamma ta trabahu anna ta pagibannag! (Heb. 4:15) Kayàna nga mala tam i pagibannag nga kawagattam. Kayàna gapa nga mattrabahu ittam tu mapia tapenu mala tam i pakawagattam anna tapenu makapartisipa ittam ta makapagayayya nga trabahu nga pangngua tu disipulos. Ta tumunug nga artikulo, gigiammuattam i papel ni Jesus tapenu mapalubbangan ittam ta tadday nga kitaddake nga klase na pangaripan.