1. Nebã manesem yaa wãn ne tʋʋmã?

YÃMB sẽn beẽ wã, neb wʋsg manesem yaa wãn ne tʋʋmã? Tẽns wʋsgo, nebã wɩsgda b mens n tʋmd wʋsg masã, la b tʋmd n kaoosd n yɩɩd pĩndã. Naoor wʋsgo, sẽn tʋmd-b woto wã pa tar sẽk n vʋʋsdẽ, n sõsd ne b zakã rãmba, wall n na n bao n bãng Wẽnnaam sõma ye. (Koɛ. 2:23) La neb me n be n pa nong tʋʋm baa bilfu. B baooda bʋʋm n kõt b mense, n pa rat n tʋm ye.—Yel. 26:13, 14.

2-3. Tʋʋmã wɛɛngẽ, mak-sõng bʋg la a Zeova ne a Zeezi kõ-yã?

² Hakɩɩka, dũniyã nebã pa tar tagsg sẽn zems tʋʋmã wɛɛngẽ ye. La a Zeova ne a Zeezi tagsg yaa wãn ne tʋʋmã? D mii vẽeneg t’a Zeova nonga tʋʋma. Bũmb la a Zeezi yeel tɩ wilgd rẽ. A yeelame: “Hal n tãag masã, mam Ba wã tʋmdame, tɩ ma-me tʋmdẽ.” (Zã 5:17) Tags-y n ges-y Wẽnnaam sẽn tʋm to-to n na n naan malɛgs ka tɛkã, saasã la ãdsã. D sã n ges a sẽn naan tẽngã t’a yaa neer to-to, la a naan bũmb nins fãa sẽn be tẽngã zugã, d nee vẽeneg t’a tʋma wʋsgo. Sɩd me, yɩɩn-gʋlsdã yeelame yaa: “Sẽn-Ka-Saabo, yãmb tʋʋmã sõor waooga. Yãmb maana y tʋʋmã fãa ne yam. Dũniyã pida ne bũmb nins yãmb sẽn naanã.”—Yɩɩn. 104:24.

³ A Zeezi rɩka a Ba wã togs-n-taare. Yel-bũn sebrã pʋgẽ, b bilga a Zeezi, n bool-a tɩ yam sẽn gomde, la b wilg t’a naaga Wẽnnaam n ‘yɛdg sa-gãongã.’ Yẽ n dag n be a Zeova sɛɛgẽ “wa tʋʋmdã soaba.” (Yel. 8:27-31) Kaoosg zugẽ, a sẽn wa  n wa tẽng zugã, a tʋma tʋʋm-kãsenga. A tʋʋmdã ra yaa wa a rɩɩbo. Bũmb nins fãa a sẽn maanã ra yaa kaset me tɩ Wẽnnaam n tʋm-a.—Zã 4:34; 5:36; 14:10.

4. Bas tʋʋm n vʋʋsã wɛɛngẽ, mak-sõng bʋg la a Zeova ne a Zeezi kõ tõndo?

⁴ A Zeova ne a Zeezi sẽn tʋmd wʋsgã, rat n yeelame tɩ vʋʋsg pa tar yõod ne tõnd bɩ? A bada! A Zeova pa yat ye. Rẽ n so t’a pa baood n na n vʋʋs ye. La Biiblã yeelame t’a Zeova sẽn naan saasã la tẽngã n sa wã, a ‘basa a tʋʋmã n vʋʋse.’ (Yik. 31:17) Woto rat n yeelame bal t’a sẽn tʋm n sa wã, a bas n gesa a sẽn naanã, tɩ kõ-a sũ-noogo. A Zeezi sẽn wa n be tẽngã zugã, a ra wɩsgd a meng n tʋmdẽ, la a ra mi n bao sẽk n vʋʋs la a naag a zo-rãmb tɩ b rɩ la b sõse.—Mat. 14:13; Luk 7:34.

5. Bõe n yaa toog ne neb wʋsgo?

⁵ Biiblã sagenda wẽn-sakdbã tɩ b yɩ neb sẽn nong tʋʋma. Sẽn tũud-b a Zeova wã segd n yɩɩ tʋm-tʋmdba, la b ra yɩ kʋɩɩmb ye. (Yel. 15:19) Tõe tɩ y tʋmdame n get y zakã yelle. La kiris-nebã fãa segdame me n sõngd ne koe-moonegã. Ne rẽ fãa, yaa tɩlɛ tɩ y yãt sẽk n vʋʋsd sõma. Mi n yaa toog ne-y tɩ y bãng n maan tɩ zemse, rat n yeel tɩ n tʋmd y tʋʋmã, n yãt sẽk koe-moonegã yĩnga, la y paamd sẽk n vʋʋsdẽ bɩ? Bõe n na n sõng-d tɩ d tʋmd n zemsdẽ, la d vʋʋsd n zemsdẽ me?

6. Bõe la b yet Mark 6:30-34 pʋgẽ, tɩ wilgdẽ tɩ tʋʋmã la vʋʋsgã wɛɛngẽ, a Zeezi ra tara tagsg sẽn zemse?

⁶ Tʋʋmã wɛɛngẽ, bãng n maan tɩ zemsã tara yõod wʋsgo. Wẽnnaam ra vẽnega rĩm a Salomo t’a yeel yaa: “Bũmb fãa tara a wakate.” A goma selb wakat yelle, meebo, yãbre, laado, saoog wakat la yɛl a taab yelle. (Koɛ. 3:1-8) Yaa vẽeneg tɩ tʋʋm la vʋʋsg yaa tɩlɛ vɩɩmã pʋgẽ. Tʋʋmã la vʋʋsgã wɛɛngẽ, a Zeezi ra tara tagsg sẽn zemse. Daar a yembre, a tʋm-tʋmdbã gilg n moona koɛɛgã n lebg n wa, tɩ b tʋʋmã ra yaa wʋsg hal tɩ b “pa tar sẽk n na n dɩ meng ye.” La a Zeezi yeel-b lame yaa: “Wa-y tɩ d kẽng zĩig neb sẽn ka beẽ n tɩ vʋʋs bilfu.” (Karm-y Mark 6:30-34.) Yaa sɩd tɩ pa wakat fãa la a Zeezi ne a karen-biisã ra paamd n vʋʋsd wa b sẽn dat ye. La a ra miime tɩ yaa tɩlɛ ne b fãa tɩ b mi n vʋʋsdẽ.

7. D sã n bãng tõogã sẽn yet bũmb ning vʋʋsg daarã wɛɛngẽ wã, wãn to la na n sõng-do?

⁷ D sã n mi n dɩk vʋʋsem, wall d bas d daar fãa tʋʋmã n maan bũmb a to, sõngd-d lame. Vʋʋsg daarã Wẽnnaam sẽn da lugl pĩnd wẽndẽ wã wilgda rẽ. Yaa sɩd tɩ d pa le tũud a Moyiiz tõogã ye, la d sã n bãng a sẽn yet bũmb ning vʋʋsg daarã wɛɛngẽ wã, na n sõng-d lame. Tõe n sõng-d lame tɩ d bʋgs n ges d tagsg sẽn yaa a soab tʋʋmã la vʋʋsgã wɛɛngẽ.

8. Wa Yikr 31:12-15 sẽn wilgdã, Wẽnnaam lugla vʋʋsg daarã bõe yĩnga?

⁸ Biiblã yeelame tɩ Wẽnnaam naana tẽngã la bũmb fãa n sɛ “rasem” a yoobe, la tɩ rasem a yopoe daarã, Wẽnnaam vʋʋsa ne tʋʋm-kãngã. (Sɩng. 2:2) La a Zeova sẽn nong tʋʋmã, hal n tãag masã, a ‘ket n tʋmda’ tʋʋm a taaba. (Zã 5:17) A Zeova yeela Israyɛll nebã tɩ bãmb me tʋm rasem a yoob la b vʋʋs rasem a yopoe daarã. A yeelame tɩ vʋʋsg daarã yaa sẽn na n tẽegd Israyɛll nebã tɩ yẽnda n yiis-b yembd tɩ b lebg a neba. Ra yaa ‘vʋʋsg daar sẽn welg toor a Zeova waoogr yĩnga.’ (Karm-y  Yikr 31:12-15.) Nebã fãa, hal baa kambã, yembsã, la rũmsã meng ra pa segd n tʋm ye. (Yik. 20:10) Woto, nebã paamd n wɩnga ne tũudmã yɛlã sõma n yɩɩd ray a taabã.

9. A Zeezi wakatẽ wã, bõe la b ra yet vʋʋsg daarã wɛɛngẽ tɩ pa zemse?

⁹ Vʋʋsg daarã rag n yaa Wẽnnaam nebã sõngr yĩnga. La a Zeezi wakatẽ wã, tũudmã taoor dãmb wʋsg ra tolg n maandame tɩ loog noore. B ra yetame tɩ ned sã n fãr ka-zut n wãb vʋʋsg daare, wall a maag bãada, a kɩɩsa tõogã. (Mark 2:23-27; 3:2-5) La ra pa Wẽnnaam tagsg la woto ye. A Zeezi sõnga sẽn dat-a soab fãa t’a bãng tɩ pa Wẽnnaam tagsg la woto ye.

10. Bõe la Matiye 12:9-12 yeta, tɩ wilgd tõnd a Zeezi tagsg sẽn da yaa a soab ne vʋʋsg daarã?

¹⁰ A Zeezi ne a karen-biisã sẽn da yaa zʋɩf-rãmbã, b ra tũuda vʋʋsg daarã noyã wa a Moyiiz tõogã sẽn wilgã. * La a Zeezi wilga ne a no-goamã la a tʋʋm-tʋmdɩ wã tɩ vʋʋsg daarã noyã tũub pʋgẽ, b segd n maaname tɩ zemse, la tɩ f sã n maan f to neer bɩ n tʋm tʋʋm-sõng baraare, pa tõogã kɩɩsg ye. A yeela vẽeneg yaa: “Zemsame tɩ d maan bõn-sõng Vʋʋsg daare.” (Karm-y Matiye 12:9-12.) A ra pa tagsd tɩ b pa segd n maan neer bɩ n sõng b to vʋʋsg daar ye. A Zeezi tʋʋm-tʋmdɩ wã wilgame t’a ra mii vʋʋsg daarã yõodã sõma. Nin-buiidã sẽn basd b daar fãa tʋʋmã baraarã, b ra paamd n tʋmda tũudmã tʋʋmã sõma n yɩɩda. B sẽn wub a  Zeezi zak ning pʋgẽ wã neb tog n da wɩngda ne tũudmã yɛl vʋʋsg daar fãa. Ad bũmb sẽn wilgd rẽ: B goma a Zeezi sẽn wa n be Nazarɛt sẽn yaa tẽng ning pʋgẽ b sẽn wub-a wã yelle, n yeel t’a ‘tɩ kẽe karen-doogẽ wã wa a sẽn minim n maand vʋʋsg daar fãa wã,’ la t’a wa n “yikame n na n karem.”—Luk 4:15-19.

11. Ãnd soab n kõ a Zeezi mak-sõng tʋʋmã wɛɛngẽ?

¹¹ A Zozɛf sẽn yɩ a Zeezi ba-wubdgã sõng-a lame t’a lebg ra-wãad wa yẽ, la a wilg-a t’a tog n nonga tʋʋm wa Wẽnnaam. (Mat. 13:55, 56) Sãmbg kae t’a Zeezi ra nee a Zozɛf sẽn da tʋmd wʋsg daar ne a to fãa, sẽn na yɩl n paam n ges a zakã neb sẽn da waoogã yellã. A Zeezi meng wa n yeela a karen-biisã tɩ “tʋm-tʋmd zemsa ne a yaoodo.” (Luk 10:7) Hakɩɩka, a Zeezi ra minima tʋʋm-toogo.

12. Vɛrse bʋs n tõe n sõng-d tɩ d bãng Biiblã sẽn yete, wɩsg f meng n tʋmã wɛɛngẽ?

¹² Tʋm-tʋmd a Poll me ra minima tʋʋm-toogo. Moon koe-noogã, n kõ kaset a Zeezi zugã n da yaa a tʋʋmd meng-menga. La a ra tʋmdame me n get a meng yelle. Tesalonik kiris-nebã ra mii vẽeneg t’a Poll ‘tʋma wʋsg wĩndg ne yʋng n kaag a neng tʋʋlgo,’ sẽn na yɩl tɩ ra yɩ tɩlɛ ne ned baa a ye t’a ‘ra bũmb n sõng-a’ ye. (2 Tes. 3:8; Tʋʋ. 20:34, 35) Tõe t’a Poll ra gomda a sẽn da sẽt fu-rotã yelle. A sẽn wa n be Korẽntã, a zĩnda ne a Akila la a Pirsill n ‘da tʋmd ne-ba, bala b ra sẽta fu-roto.’ La a Poll sẽn yeel t’a ra tʋmda ‘wĩndg ne yʋngã’ pa rat n yeel t’a ra tʋmdame n pa vʋʋsdẽ ye. Wala makre, vʋʋsg daare, a ra pa sẽt fu-rotã ye. Ra kõt-a-la weer t’a taasd zʋɩf-rãmbã koɛɛgã, bala bãmb me ra pa tʋmd vʋʋsg daar ye.—Tʋʋ. 13:14-16, 42-44; 16:13; 18:1-4.

13. Yam-bʋg la d tõe n dɩk a Poll mak-sõngã pʋgẽ?

¹³ Tʋm-tʋmd a Poll kõo tõnd mak-sõng tʋʋmã wɛɛngẽ. Ra yaa tɩlɛ t’a tʋm n ges a meng yelle, la a ra yãta sẽk me n naagd n moond Wẽnnaam koe-noogã “sẽn yaa sõngã.” (Rom. 15:16; 2 Kor. 11:23) A ra sagenda neb a taabã tɩ bãmb me maan woto. Dẽnd a Akila ne a Pirsill ra yaa a Poll “tʋmd-n-taas Kirist Zeezi pʋgẽ.” (Rom. 12:11; 16:3) A Poll sagla Korẽnt kiris-nebã tɩ b modg n ‘tʋmd wʋsg Zu-soabã tʋʋmdã pʋgẽ.’ (1 Kor. 15:58; 2 Kor. 9:8) A Zeova vẽnega tʋm-tʋmd a Poll t’a pʋd n yeel yaa: “Ned ning fãa sẽn pa rat n tʋme, bɩ a ra rɩ me ye.”—2 Tes. 3:10.

14. A Zeezi sẽn yeel bũmb ning Zã 14:12 võor yaa bõe?

¹⁴ Rũndã-rũndã, tʋʋmd sẽn tar yõod n tɩ yɩɩd yaa koɛɛgã mooneg la nebã zãmsgã. A Zeezi ra pĩnd yeelame meng t’a karen-biisã na n tʋma tʋʋm sẽn yɩɩd yẽ sẽn tʋmã. (Karm-y Zã 14:12.) A gomdã pa rat n yeel tɩ tõnd me na n maana yel-soalem wa yẽ ye. Rat n yeelame bal t’a poorẽ dãmbã sẽn na n moon zĩis ninsã, neb nins b sẽn na n taas koɛɛgã la b zãms Biiblã, la b sẽn na n moon n kaoos to-to wã na n yɩɩga yẽ.

15. Bõe la d segd n sok d menga, la bõe yĩnga?

¹⁵ B sã n dɩka yãmb tʋʋma, sok-y y meng yaa: ‘Tʋʋmã zĩigẽ, yaa vẽeneg ne nebã tɩ mam nonga tʋʋm bɩ? M sã n deeg tʋʋmde, m tʋmda ne m sũur fãa, la m modg t’a sɛ n zems a wakat bɩ?’ Y sã n sɩd maand woto, y tõe n paamame tɩ y tʋʋmdã taoor soab kɩs-y sɩda. Tõe n kɩtame me tɩ y tʋʋmã zĩigẽ nebã sakd n kelgd Rĩungã koɛɛgã. La koɛɛgã mooneg la nebã zãmsgã wɛɛngẽ wã yẽ? Yɩta sõma tɩ y sok y meng yaa: ‘Yaa vẽeneg  tɩ m wɩngda ne tʋʋmdã bɩ? M segenda m meng neere, tɩ m sã n seg ned pipi bɩ m tõe n sõs ne-a bɩ? Ned sã n tʋll n bãng n paase, m lebgd n tɩ kaag-a-la tao-tao bɩ? Mam minima koe-moonegã buk toor-toorã bɩ? Y sã n maanda woto, y tʋʋmdã na n kõt-y-la sũ-noogo.

16. A Zeezi ne a tʋm-tʋmdbã manesem ra yaa wãn ne vʋʋsgo, la wãn to la rẽ yaa toor ne nebã wʋsg manesmã?

¹⁶ A Zeezi rag n miime tɩ segdame tɩ yẽ ne a tʋm-tʋmdbã mi n vʋʋsdẽ. Rũndã-rũndã, la baa a Zeezi wakatẽ wã, nebã wʋsg manesem wõnda arzɛk soab ning yell a sẽn gom a yel-bũnd a ye pʋgẽ wã. Rao-kãng yeela a meng yaa: “Vʋʋse, n dɩ la f yũ, n maan sũ-noogo.” (Luk 12:19; 2 Tɩm. 3:4) Sẽn da pak-a n tɩ yɩɩdã, yaa a vʋʋs la a noog a yõore. La sẽn da pak a Zeezi ne a tʋm-tʋmdbã n tɩ yɩɩdã pa b noog b yõor ye.

17. Bõe la d maand ray nins d sẽn pa tʋmdã?

¹⁷ Tõnd me maoodame n dɩkd a Zeezi togs-n-taare. Ray nins d sẽn pa tʋmdã, sẽn pak-dã pa d paam n vʋʋs bal ye. D tũnugda ne rẽ n maand sẽn yaa neere. Wala makre, n yit n taasd nebã koe-noogã, la d kẽnd tigissã. D getame tɩ sõng nebã tɩ b lebg karen-biisã, la tigissã kẽndã yõod waoogame, hal tɩ d maood d sẽn tõe fãa n maand tũudmã yel-kãensã n pa vaandẽ ye. (Ebre. 10:24, 25) Baa d sã n paam vʋʋsem, n tog sore, d maanda d sẽn tõe fãa n ket n kẽnd tigissã, la d baood segb n taasd nebã koe-noogã.—2 Tɩm. 4:2.

18. Bõe la tõnd Rĩm a Zeezi Kirist rat tɩ d maane?

¹⁸ D sũur yaa noogo, d sẽn paam tɩ d Rĩm a Zeezi Kirist yaa maan-tɩ-zems soaba, n pa baood tɩ d maan tɩ yɩɩg d pãngã, la a sõngd tõnd tɩ d tõe n tall tagsg sẽn zemse, tʋʋmã la vʋʋsgã wɛɛngẽ wã! (Ebre. 4:15) A ratame tɩ d mi n vʋʋsdẽ. A ratame me tɩ d wɩsgd d meng n tʋmd n get d meng yelle, la d wɩngd ne Wẽnnaam tʋʋmdã sẽn kõt sũ-noogã. Bũmb la a pʋd n maan n na n fãag-d ne yembd sẽn yaa toaaga. D na n goma rẽ yell sõsg ning sẽn pʋgdã pʋgẽ.