1. Abantu abanengi bakubona njani ukusebenza?

ABANTU abanengi endaweni ohlala kuyo bakubona njani ukusebenza? Emazweni amanengi abantu sebesebenza kakhulu futhi okwesikhathi eside kulakuqala. Abantu abasebenza njalo bajayele ukuswela isikhathi sokuphumula, esokuba lezimuli zabo kumbe esokuqhubeka befunda ngoNkulunkulu. (UmTshu. 2:23) Abanye bona abakuthandi ngitsho ukusebenza njalo bakhuluma izizatho ezingazwakaliyo zokungasebenzi.​—Zaga. 26:13, 14.

2-3. UJehova loJesu bakubona njani ukusebenza?

² UJehova loJesu bona kabafanani labantu laba. Akuthandabuzwa ukuthi uJehova uyakuthanda ukusebenza. UJesu wakucacisa lokhu aze athi: “UBaba ulokhu esebenza kuze kube khathesi, lami ngiqhubeka ngisebenza.” (Joh. 5:17) UNkulunkulu wenza umsebenzi omkhulu lapho edala izingilosi ezinengi, inkanyezi lamaplanethi. Lasemhlabeni omuhle esihlala kuwo siyazibona izinto ezinengi azidalileyo. Umhubi wathi: ‘Minengi kanganani imisebenzi yakho, O Jehova! Yonke wayenza ngenhlakanipho; umhlaba ugcwele izidalwa zakho.’​—Hubo. 104:24.

³ UJesu wamlingisela uYise. Wamncedisa ngesikhathi “ehlela kuhle izulu.” WayeloJehova ‘eyisisebenzi esiyingcitshi.’ (Zaga. 8:27-31, NWT) Ngemva kweminyaka eminengi uJesu esesemhlabeni wenza umsebenzi omuhle kakhulu. Umsebenzi lo wawunjengokudla kuye futhi akwenzayo kwaveza ukuthi uNkulunkulu wayemthumile.​—Joh. 4:34; 5:36; 14:10.

4. Sifundani kuJehova loJesu endabeni yokuphumula?

⁴ Ukusebenza nzima kukaJehova loJesu kutsho ukuthi akusamelanga siphumule yini? Hatshi. UJehova kadinwa yikho  akudingeki ukuthi aphumule. Kodwa iBhayibhili liyatsho ukuthi wathi esedale amazulu lomhlaba “waphumula.” (Eks. 31:17) Lokhu kutsho ukuthi uJehova wama ukudala ukuze abuke ubuhle balokho ayekwenzile. Ngesikhathi uJesu esemhlabeni wayesiba leqiniso lokuthi uyaphumula futhi akholise ukudla labangane bakhe lanxa wayesebenza nzima.​—Mat. 14:13; Luk. 7:34.

5. Kuyini okuthwalisa nzima abantu abanengi?

⁵ IBhayibhili likhuthaza abantu bakaNkulunkulu ukuthi bakuthande ukusebenza. Akumelanga bavilaphe kodwa kumele bakhuthale emsebenzini. (Zaga. 15:19) Engxenye uyasebenza ukuze wondle imuli yakho. Kanti njalo abafundi bakaKhristu bonke balomsebenzi wokutshumayela izindaba ezinhle. Lanxa kunjalo kumele uphumule okwaneleyo. Uyake uthwale nzima yini ukuthola isikhathi esaneleyo sokusebenza, esokutshumayela lesokuphumula? Singakwazi njani ukuthi kumele sisebenze okunganani lokuthi siphumule okunganani?

6. UMakho 6:30-34 uveza njani ukuthi uJesu wayekubona ngendlela eqondileyo ukusebenza lokuphumula?

⁶ Kuqakathekile ukuthi sikubone ngendlela eqondileyo ukusebenza. INkosi uSolomoni yaphefumulelwa ukuthi ibhale amazwi la: ‘Kulesikhathi sakho konke okwenziwayo.’ Yakhuluma ngokuhlanyela, ukwakha, ukukhala, ukuhleka, ukugida kanye lokunye. (UmTshu. 3:1-8) Kusegcekeni ukuthi ukusebenza lokuphumula yizinto ezimbili eziqakatheke kakhulu empilweni. UJesu wayekubona ngendlela eqondileyo ukusebenza lokuphumula. Ngelinye ilanga abaphostoli bathi bevela tshumayela kwabuya abantu abanengi okokuthi “babengaselaso isikhathi sokuphumula badle.” UJesu wathi: “Wozani lina lodwa siye endaweni engelabantu siyephumula kancane.” (Bala uMakho 6:30-34.) Lanxa ngezinye izikhathi yena labafundi bakhe babengaphumuli ngendlela ababefisa ngayo, uJesu wayesazi ukuthi kwakumele baphumule.

7. Ukufunda mayelana leSabatha kuzasinceda njani?

⁷ Ngezinye izikhathi sonke siyakudinga ukuphumula kumbe ukwenza okutshiyene lalokho esijayele ukukwenza nsuku zonke. Lokhu sikubona emlayweni uNkulunkulu awunika abantu bakhe kudala. Umlayo lo wawumayelana lokugcinwa kweSabatha maviki wonke. Lanxa singasekho ngaphansi koMthetho kaMosi, ukufunda ngalokho owawukutsho kungasinceda. Esizakufunda mayelana leSabatha kuzasinceda sicabangisise ngokuthi sikubona ngendlela eqondileyo yini ukusebenza lokuphumula.

8. U-Eksodusi 31:12-15 uthi iSabatha kwakulilanga lokwenzani?

⁸ IBhayibhili lisitshela ukuthi uNkulunkulu wama ukudala izinto emhlabeni ngemva kwamalanga ayisithupha. * (Gen. 2:2) Lanxa kunjalo uyakuthanda ukusebenza futhi lakhathesi “ulokhu esebenza.” (Joh. 5:17) UJehova wasebenza okwamalanga ayisithupha njalo waphumula ngelanga lesikhombisa. Watshela ama-Israyeli ukuthi lawo aphumule ngelanga lesikhombisa maviki wonke. UNkulunkulu wathi iSabatha laliyisibonakaliso phakathi kwakhe lama-Israyeli.  Kwakulilanga ‘lokuphumula, elingcwele kuJehova.’ (Bala u-Eksodusi 31:12-15.) Akulamuntu okwakumele asebenze ngelanga lelo, ngitsho labantwana lezigqili lezifuyo. (Eks. 20:10) Ngelanga lelo abantu babesiba lesikhathi esinengi sokwenza izinto eziphathelane lokukhonza.

9. Abanye abantu ngesikhathi sikaJesu babelibona njani iSabatha?

⁹ ISabatha lalibanceda abantu bakaNkulunkulu. Kodwa ngesikhathi sikaJesu abakhokheli benkolo babefaka imithetho enzima emayelana leSabatha. Babesithi ngitsho lokukha izikhwebu zengqoloyi loba ukwelapha kwakungekho emthethweni ngeSabatha. (Mak. 2:23-27; 3:2-5) Kodwa lokho ayisikho uNkulunkulu ayekufuna futhi uJesu wakwenza kwacaca lokhu kulabo ababemlalele.

10. UMathewu 12:9-12 usifundisani ngendlela uJesu ayebona ngayo iSabatha?

¹⁰ UJesu labalandeli bakhe abangamaJuda babeligcina iSabatha ngenxa yokuthi babengaphansi koMthetho kaMosi. * Kodwa uJesu watshengisa ngayekutsho layekwenza ukuthi kwakuqondile ukutshengisa abanye umusa lokubenzela izinto ezinhle ngelanga leSabatha. Wakucacisa lokhu ngokuthi: “Kusemthethweni ukwenza into enhle ngeSabatha.” (Bala uMathewu 12:9-12.) Wayengakuboni kuyinto embi ukutshengisa abanye umusa lokubanceda ngeSabatha. Okwenziwa nguJesu kwatshengisa ukuthi wayesizwisisa isizatho esiqakatheke kakhulu esenza uNkulunkulu wathi  abantu bakhe baphumule ngeSabatha. Abantu bakaNkulunkulu babesenelisa ukwenza izinto eziphathelane lokukhonza ngenxa yokuthi ngelanga leSabatha babephumula emisebenzini ababeyenza nsuku zonke. UJesu wakhulela emulini eyayisenza izinto eziphathelane lokukhonza ngelanga leSabatha. Ubufakazi balokhu sibubona kulokho esikutshelwa ngoJesu ngesikhathi esedolobheni langakibo eNazaretha. “Njengenjayelo [uJesu] wangena esinagogeni ngelanga leSabatha, wasukuma ukuze abale.”​—Luk. 4:15-19.

11. Ngubani owafundisa uJesu ukuthi akubone ngendlela eqondileyo ukusebenza?

¹¹ UJosefa wafundisa uJesu ukubaza lokuthi uNkulunkulu ukubona njani ukusebenza. (Mat. 13:55, 56) Kumele ukuthi uJesu wambona uJosefa esebenza nzima nsuku zonke ukuze ondle imuli yakhe enkulu. Kwathi sekudlule iminyaka uJesu watshela abafundi bakhe wathi: “Isisebenzi kusifanele ukuthola iholo laso.” (Luk. 10:7) Kuyacaca sibili ukuthi uJesu wayesebenza nzima.

12. Yiphi imibhalo etshengisa ukuthi iBhayibhili lithini ngokusebenza nzima?

¹² Umphostoli uPhawuli laye wayesebenza gadalala. Umsebenzi wakhe oyinhloko wawungowokufakaza ngoJesu kanye lalokho uJesu ayekufundisa. Kodwa wayesenza lomsebenzi wokuziphilisa. Abazalwane baseThesalonika babekwazi ukuthi ‘wayesebenza nzima ebusuku lemini engaphumuli esenzela ukungabathwalisi nzima ngezindleko.’ (2 Thes. 3:8; ImiSeb. 20:34, 35) Lapho uPhawuli ebhala amazwi la wayengabe ekhuluma ngomsebenzi wakhe wokwenza amatende. Ngesikhathi eseKhorinte wahlala emzini ka-Akhwila loPrisila njalo “wasebenza labo ngoba babesenza umsebenzi wokwenza amatende njengaye.” Amazwi athi uPhawuli wayesebenza “ebusuku lemini” kawatsho ukuthi wayesebenza engaphumuli, wayephumula ngamaSabatha. Ilanga lelo wayelisebenzisa ukutshumayeza amaJuda ngoba lawo ayengasebenzi ngeSabatha.​—ImiSeb. 13:14-16, 42-44; 16:13; 18:1-4.

13. Sifundani esibonelweni sikaPhawuli?

¹³ Umphostoli uPhawuli uyisibonelo esihle kithi. Lanxa kwakumele enze umsebenzi wokuziphilisa, wayesiba leqiniso lokuthi uhlala ewenza ‘umsebenzi ongcwele wezindaba ezinhle zikaNkulunkulu.’ (Rom. 15:16; 2 Khor. 11:23) Wayekhuthaza abanye ukuthi labo benze njalo. Yikho u-Akhwila loPrisila ‘babeyizisebenzi kanye laye kuKhristu uJesu.’ (Rom. 12:11; 16:3) UPhawuli wakhuthaza abazalwane beKhorinte ukuthi ‘benze okunengi emsebenzini weNkosi.’ (1 Khor. 15:58; 2 Khor. 9:8) UJehova wamphefumulela lokuthi abhale amazwi la: “Nxa umuntu engafuni ukusebenza, kangadli.”​—2 Thes. 3:10.

14. Amazwi kaJesu akuJohane 14:12 atshoni?

¹⁴ Kulezinsuku zokucina umsebenzi oqakatheke kulayo yonke ngowokutshumayela lokwenza abafundi. UJesu wathi abafundi bakhe babezakwenza imisebenzi emikhulu ukwedlula eyakhe. (Bala uJohane 14:12.) Wayengatsho ukuthi sizakwenza izimangaliso njengaye kodwa wayesitsho ukuthi sizatshumayela ezindaweni ezinengi, okwesikhathi eside kulaye njalo sifundise abantu abanengi.

15. Yiphi imibuzo okumele sizibuze yona futhi kungani?

¹⁵ Nxa usebenza zibuze imibuzo le: ‘Ngaziwa njengomuntu okhutheleyo yini emsebenzini? Ngiwuqeda ngesikhathi yini umsebenzi wami futhi ngisebenza ngamandla ami wonke yini?’ Nxa ukwenza lokhu, umqhatshi wakho angakuthemba njalo kungenza labanye osebenza labo babe lesifiso  esikhulu sokulalela izindaba ezinhle. Kumele uzibuze imibuzo elandelayo mayelana lendlela otshumayela lofundisa ngayo: ‘Ngaziwa njengomuntu okhutheleyo yini ekutshumayeleni? Ngiyalungiselela yini nxa ngisiya ekutshumayeleni? Ngiyaphangisa yini ukuphindela ebantwini abafuna ukufunda? Ngiyahlanganyela yini engxenyeni ezitshiyeneyo zenkonzo?’ Nxa ukwenza lokhu, uzakukholisa ukutshumayela.

16. Indlela uJesu labaphostoli bakhe ababebona ngayo ukuphumula itshiyene njani leyabantu abanengi lamuhla?

¹⁶ UJesu wayekwazi ukuthi ngezinye izikhathi yena labaphostoli bakhe kwakumele baphumule. Kodwa abantu abanengi abaphila ngesikhathi sikaJesu labakhathesi bafanana lendoda enothileyo esemzekelisweni kaJesu. Yazitshela yathi: “Khululeka, udle, unathe futhi uzikholisele.” (Luk. 12:19; 2 Tim. 3:4) Yayicabanga ukuthi okuqakatheke kakhulu empilweni yikuphumula lokuzikholisela nje. Kodwa lokho kayisikho okwakusenziwa nguJesu labaphostoli bakhe.

17. Kumele sisisebenzise njani isikhathi esingahambi ngaso emsebenzini?

¹⁷ Lathi siyazama ukulingisela uJesu ngokusebenzisa isikhathi esingahambi ngaso emsebenzini ukuthi siphumule, siye ekutshumayeleni futhi singene imihlangano. Phela siwuqakathekisa kakhulu umsebenzi wokwenza abafundi lokungena imihlangano okokuthi senza konke okusemandleni ethu ukuthi sihlale sizenza izinto lezi ezingcwele. (Heb. 10:24, 25) Lanxa singaze sivakatshele kwezinye izindawo kasiyekeli ukungena imihlangano lokutshumayeza abantu esihlangana labo.​—2 Tim. 4:2.

18. INkosi yethu uKhristu uJesu ifuna senzeni?

¹⁸ Siyayibonga kakhulu iNkosi yethu uKhristu uJesu ngoba kayikhangelelanga ukuthi senze okungaphezu kwamandla ethu futhi iyasinceda ukuthi sikubone ngendlela eqondileyo ukusebenza lokuphumula. (Heb. 4:15) Iyafuna ukuthi siphumule okwaneleyo. Kanti njalo ifuna sisebenze nzima emisebenzini yokuziphilisa ukuze sondle izimuli zethu futhi senze umsebenzi othokozisayo wokwenza abafundi. Esihlokweni esilandelayo sizaxoxa ngalokho uJesu akwenzayo ukuthi asikhulule ebugqilini obusithwalise nzima.