1. Vandhu vamweni vanorangarirenyi ngo pamusoro po basa?

NGOWAPI murangariro uno vandhu vo ndharaundha yamunogararo ngo pamusoro po basa? Mu nyika jakawanda, vandhu vazinji vari kushanda maningi kupinda kare. Vandhu vanoshanda maningi, kazinji avawani nguva yo kuzorora, nguva yo kugara no mbhuri yavo nee yo kujija ngo pamusoro pa Mwari. (Mucumaeri 2:23) Asi, kuno vandhu vamweni vacikadakariri kuita basa zve vanotokhiya-khiya kuti vatame kuriita.—Mazwi Akangwara 26:13, 14.

2-3. Jehovha na Jesu vakagaja muezaniso wapi ngo pamusoro po basa?

² Jehovha na Jesu vano mavonero ari pakati no pakati ngo pamusoro po basa. Pacina kukana-kana, Jehovha anoda maningi kuita basa. Jesu wakanasa kuzvijekesa paakati: “Baba wangu vanobata basa njiku jese. Na ininivo ndinobatavo.” (Johani 5:17) Rangariranyi basi, basa rakawandisa rakava na Mwari pakusika ngirozi jicikaverengeki, dhondho pomwe no mudenga no pasi. Itusu tingakwanisavo kuvona zviro zvakawanda zvinovonesa mabasa akaita Mwari, tikasota nyika yatiri kuponari. Mutari wo nduyo wainga no razau paakananga kudari: “Mabasa enyu, Tenji Mwari, uwandu hwao! Makaita bzese ngo uzivi. Nyika yakazara ngo bzisikwa bzenyu.”—Nduyo 104:24.

³ Jesu wakanasa kutevejera baba wake. Iyena wakabesera Jehovha paainga ‘ecivangisa denga’ zve wainga na Jehovha inga “mujijisi wo mabasa.” (Mazwi Akangwara 8:27-31) Pa kufamba ko nguva, Jesu paainga pasi pano, wakaita basa rinodakajisa maningi. Basa rondhoro, raidari inga zvokuha kwaari zve zvese zvaakaita zvinokhombija kuti wainga wakatumwa ndi Mwari.—Johani 4:34; 5:36; 14:10.

4. Tingajijenyi ngo muezaniso wa Jehovha na Jesu ngo pamusoro po kuzorora?

 ⁴ Kureva kuti muezaniso wo kushanda ngo simba wa Jehovha na Jesu, unoda kunanga kuti atidikani kuzorora here? Haiwa. Jehovha aarembi. Ngokudaro, iyena aadikani kuzorora akapeja kuita ciri cese. Asi Bhaibheri rinotivhunja kuti, naapera kusika denga no nyika iyena ‘wakazorora.’ (Exodo 31:17) Izvi zvinoreva kuti Jehovha wakamboima kusika zviro kuti awane nguva yo kuvona kunyara kwazvo. Jesu wakashandavo maningi paainga pasi pano, asi wakapsaka nguva kuti azorore no kuha no shamwari jake.—Mateu 14:13; Luka 7:34.

5. Ngozvapi zvinganesa maningi ku vashandiri va Jehovha?

⁵ Bhaibheri rinovangisa vashandiri va Jehovha kuti vave vandhu vanodakarira kubata basa. Vashandiri vake avadikani kuva no nungo asi vanodikana kuvangisira maningi pa kubata basa. (Mazwi Akangwara 15:19) Kuti mukwanise kusapota mbhuri yenyu kangaije munodikana kubata basa. Cimwenizve, vateveri vese va Kristu vano basa ro kucumaera masoko akanaka. Pikija zvakadaro, munodikana kuwana nguva yo kuzorora. Kureva kuti zviri kumunesera kuwana nguva yo kubata basa, kucumaera no kuzorora here? Tingazvizivisa kudini kuti tinoda nguva yakati, kuti tibate basa zve nguva yakati, kuti tizorore?

6. Marco 6:30-34, inokhombijisa kudini kuti Jesu wainga no mavonero ari pakati no pakati ngo pamusoro po basa no kuzorora?

⁶ Zvinosisira maningi kuva no mavonero ari pakati no pakati ngo pamusoro po basa. Mambo Soromona vakafemehwa ndi Mwari kuti vatare kudari: “Bziro bzese bzo mu nyika bzino mukuvo wabzo.” Iyena wakananga kuti pano nguva yo kusima, kuvaka, kurira, kuseka, kutamba no nguva kuitira mabasa amweni. (Mucumaeri 3:1-8) Pacina kukana-kana, pano zviro zviviri zvinosisira maningi mu upenyu hwo mundhu, kubata basa no kuzorora. Jesu wainga no murangariro uri pakati no pakati ngo pamusoro po basa no kuzorora. Njiku imweni, vapostori vainga vakabatikana maningi ngo kucumaira zvokuti avazivi ‘kuwana mukuvo wo kuha.’ Asi Jesu wakavavhunja kudari: “Vianyi mega pa ndau icina vandhu, muzorore padoko.” (Verenganyi Marco 6:30-34.) Jesu no vajiji vake avacaikwanisa kuzorora pa nguva yese yovaida. Asi Jesu waizviziva kuti iyena no vajiji vake vaidikana kuzorora.

7. Ngenyi kujija ngo pamusoro po kungwarira Sabudu kungatibesera?

⁷ Nguva jimweni tinodikana kuzorora kana kucinja zvatinoita. Tinokwanisa kuvona izvi, ngo nasiriro yakapa Mwari Vaiziraeri. Nasiriro iyi, yainga yo kungwarira Sabudu. Itisu atiripi pasi po Mutemo wa Mosi. Asi kujija ngo pamusoro po mutemo uu, zvinotibesera kuti tive no mavonero ari pakati no pakati ngo pamusoro po basa no kuzorora.

8. Mukuzwirana na Exodo 31:12-15, Sabudu yainga njiku yokuitenyi?

⁸ Soko ra Mwari rinonanga kuti, nopapera njiku ndhandatu, Mwari wakazorora pa kusika zviro. (Genesi 2:2) Asi, zvecivoneka kuti iyena anoda maningi kubata basa, arikuenderera mberi ecibata basa mu njira jimweni. (Johani 5:17) Kudari inga Jehovha wakazorora pa njiku yo cinomwe, Vaiziraeri vaidikanavo kuzorora pa njiku yo cinomwe pa sumana jese. Mwari wakananga kuti Sabudu raizova civoniso pakati pake no Vaiziraeri. Yaizova njiku ‘yokuzorora kamare’ ngokuti yaizova yakacena kana ‘yaizoreremeja Tenji Mwari.’ (Verenganyi Exodo 31:12-15.) Apana mundhu waidikana kubata basa ngo musabudu, kubatanijavo vana vadoko, varanda,  no zvinyama zvo pamuzi. (Exodo 20:10) Izvi zvaibesera Vaiziraeri kuti vabatikane ngo shwiro jokunamata.

9. Mu njiku ja Jesu, ngowapi murangariro wakashata wainga no vandhu ngo pamusoro po Sabudu?

⁹ Kuzorora pa njiku yo Sabudu cainga ciro caushoni ku vandhu va Mwari. Asi vatungamiriri vo zviyara vo munjiku ja Jesu, vaishandisa Sabudu mu njira yakashata no yokuthisijira vamweni. Ivona vainanga kuti zvairambijwa kupurura musoso no kurapa mundhu mu njiku yo Sabudu. (Marco 2:23-27; 3:2-5) Asi murangariro wo vatungamiriri ava, waisiyana kamare no wa Mwari. Ngokudaro, Jesu wakanasa kujekesa kuti murangariro uu, wainga wakashata.

10. Mukuzwirana na Mateu 12:9-12, Jesu waivona kudini Sabudu?

¹⁰ Jesu no vateveri vake vaireremeja Sabudu ngokuti vaidikana kuzwira Mutemo wa Mosi. * Ngo zviito no magama, iyena wakavonesa kuti mutemo wo kureremeja Sabudu, wainga wakanaka zve waitendera kuti mundhu aite zviro zvakanaka kuti abesere vamweni. Iyena wakananga kudari: “Bzinotendehwavo kuita bzakanaka mu njiku yo Sabudu.” (Verenganyi Mateu 12:9-12.) Jesu aacaivona vandhu vaiita zvakanaka no kubesera vamweni inga vari kuphwanya mutemo wo kureremeja Sabudu. Izvi, zvinovonesa kuti iyena wainasa kuziva thangwe rakaitisa kuti Jehovha, ape vandhu vake mutemo uu. Kuzorora Musabudu, kwaipa mukana Vaiziraeri kuti vanamate Mwari. Jesu wakakurira pa mbhuri yainga no cirovejeso co kushandisa njiku yo Sabudu kuitira zviro zvo umwari. Tinozvizivisa  kudini izvi? Tinozviziva ngokuti Bhaibheri rinobhuya ngo pamusoro pa Jesu paainga Nazareta, dhorobha raakakurira, parinonanga kudari: “Kudari ngo cirovejeso cake wakanghwina mu Sinagoga ngo zuva ro sabudu, womuka woima, kuti avajijire tsamba.”—Luka 4:15-19.

11. Ngowapi muezaniso waushoni wakava na Jesu ngo pamusoro po kushanda ngo simba?

¹¹ Zvokadi kamare, Josefa wakajijisa Jesu kuti ave muvezi waushoni. Cimwenizve, wakamujijisa kuti ave no mavonero a Mwari ngo pamusoro po basa. (Mateu 13:55, 56) Jesu wakavona kuti Josefa waivangisira maningi pa kubata basa njiku jese, kuti akwanise kusapota mbhuri yake. Ngokudaro, tingakwanisa kuzwisisa cakaitisa kuti Jesu avhunje vajiji vake kudari: “Muranda anotendehwa kuaxira mupocero wake.” (Luka 10:7) Hina, Jesu wainasa kuziva kuti zvinorevenyi kushanda ngo simba.

12. Vhesi japi jinobhuya ngo pamusoro po upenyu hwa Pauro jinotikhombija mavonero anoita Bhaibheri basa?

¹² Mupostori Pauro waizvizivavo kuti zvinorevenyi kushanda ngo simba. Basa rake guru rainga ro kubhuya ngo pamusoro pa Jesu no zvaaijijisa. Pikija zvakadaro, iyena wakadikana kushanda kuti ajisapote. Hama jo Tesaronika jaizviziva kuti Pauro waishanda “usiku no masikati,” kuti atame ‘kuremera ariwese.’ (2 VaTesalònika 3:8; Maitiro o Vapostori 20:34, 35) Ngo magama aya, Pauro kangaije wainga ecinanga ngo pamusoro po basa rake ro kuita tende. Paainga ku Korinto, Pauro wakagara na Akira na Prisira zve vakaita “basa rondhoro na ivona, [ngokuti] vainga vaiti vo matende.” Ngo kunanga kwake kuti wakashanda “usiku no masikati,” Pauro aacaida kunanga kuti iyena wakashanda acikazorori. Iyena waizororavo mu Masabudu ese. Zvecivoneka kuti Vajudha avacaishandavo ngo Musabudu, Pauro wainga no nguva yo kuvacumaerera.—Maitiro o Vapostori 13:14-16, 42-44; 16:13; 18:1-4.

13. Tingajijenyi ngo muezaniso wa Pauro?

¹³ Mupostori Pauro wakatisiira muezaniso waushoni maningi! Iyena waidikana kubata basa, asi aacaishwa kwenda ‘kotokotesa vhangeri ra Mwari.’ (VaRoma 15:16; 2 VaKorinto 11:23) Cimwenizve, iyena waivangisa vamweni kuti vaitevo zviro zvakafanana. Akira na Prisira vainga “vadoni [va Pauro] mwa Kristu Jesu.” (VaRoma 12:11; 16:3) Pauro wakavangisavo hama jo ungano yo Korinto, eciti: “Batiranyi Tenji ngo simba rese.” (1 VaKorinto 15:58; 2 VaKorinto 9:8) Jehovha wakafemera Pauro kuti atare kudari: “Ndiani acikadi kubata basa, acaha.”—2 VaTesalònika 3:10.

14. Jesu waida kunangenyi ngo magama anowanika pana Johani 14:12?

¹⁴ Basa rinosisira maningi ratinaro mu njiku jino jo kupejisira, ngo ro kucumaera no ro kuita kuti vandhu vave vajiji. Jesu wakatoguma pa kunanga kuti vajiji vake vaizoita mabasa makuru kupinda ake! (Verenganyi Johani 14:12.) Jesu acaidepi kunanga kuti itusu taizoita mushamaiso inga jaakaitaya. Kusiyapo zvondhozvo, waida kunanga kuti vateveri vake vaizocumaera no kujijisa mu ndima yakakura maningi, ino vandhu vakawanda zve pa nguva yakareba kunyisa iyena.

15. Tinodikana kujiita muvhunjo japi zve ngenyi?

¹⁵ Kudari imwimwi munodikana kubata basa kuti musapote mbhuri yenyu, jivhunjisenyi kudari: ‘Pa basa rondinoita, ndinozivika inga mushandi waushoni here? Ndinovangisira kuti ndipeje basa rangu, nguva iciripo here?’ Kudari mukadavira kuti hina pa muvhunjo iji, munozothembwa ndi patarawe wenyu. Kusiyapo zvondhozvo, mugariro wenyu unozoita kuti vandhu vamunoshanda navo vadakarire masoko akanaka. Tikabhuya ngo pamusoro po basa ro kucumaera no ro kujijisa, jivhunjisenyi kudari: ‘Ndinozivika inga mundhu anovangisira mu  basa ro kucumaera here? Ndinonasa kunasirira kuitira hwiririro here? Ndinohwiririra ngo kukasika vaya vanokhombija kudakarira here? Ndinoeja kubatikanavo pa manera akasiyana-siyana o kucumaera here?’ Kudari mukadavira kuti hina pa muvhunjo iji, munozodakara mu basa renyu ro kucumaera.

16. Jesu no vapostori vake vaisiyana papi no vandhu vo munguveyo pomwe no vo nyamasi uno?

¹⁶ Jesu waizviziva kuti nguva jimweni, iyena no vapostori vake vaidikana kuzorora. Asi vandhu vazinji mu nguveyo pomwe no vo nyamasi uno, vanorangarira inga mukhupuki wo pa muezaniso wakaita Jesu. Mukhupuki wiya wakazvivhunja ega kudari: “Zororai, ihai, imwai, jidakarisei.” (Luka 12:19; 2 Timoti 3:4) Iyena wairangarira kuti zvaisisira maningi mu upenyu i kuzorora no kubungaija. Asi Jesu no vapostori vake, vainga no murangariro wakasiyana no wo mukhupuki wiya. Ivona avacaibatikana maningi pa zvido zvavo.

17. Zvicinyi zvatinodikana kuita patinonga tiri mu feriya?

¹⁷ Nyamasi uno, tinoeja kutevejera Jesu. Kusiyapo kuzorora patinonga weya ticikabati basa, tinoshandisa nguva yedu kuti tiite zviro zvakanaka, inga kucumaera no kuviya pamusongano. Itusu tinoita zvese zvatinokwanisa kuti tiite kuti vandhu vave vajiji no kuviya pamusongano, ngokuti mabasa aya akacena, anosisira maningi kwatiri. (Vaheberi 10:24, 25) Pikija patinonga tiri mu feriya, tinovangisira kuti tibatikane mu zviro zvo umwari, inga kuviya nguva jese pa musongano no kuwana mukana wo kucumaera vandhu vatinowana.—2 Timoti 4:2.

18. Mambo wedu Jesu Kristu, anoda kuti tiitenyi?

¹⁸ Zvinodakajisa kuziva kuti Mambo wedu Jesu Kristu, aatikumbiri zvaticikakwanisi kuita. Tinodakara maningi ngo manera aanotibesera kuti tive vandhu vari pakati no pakati ngo pamusoro po basa no kuzorora. (Vaheberi 4:15) Jesu anoda kuti tizorore. Iyena anodazve kuti tishande ngo simba kuti tijisapote no kuita basa rinosisira maningi ro kuita kuti vandhu vave vajiji. Pa jijo inotevera, tinozovona zvakaita Jesu kuti atisujunure mu uranda wakashatisisa.