1. Batinyu manni looso ma garinni laˈˈanno?

ATI heeˈratto qooxeessira mannu looso ma garinni laˈˈanno? Duucha gobbuwara heeˈranno manni albinni roore diinaggaawenna seeda yanna loosanno. Duucha woyite loosu batiˈrannonsa manni, fooliishshiˈrate, maatensa ledo yanna sayisate, hattono ayyaanaamittete hasattonsa wonshiˈrate yanna diafiˈranno. (Ros. 2:23) Wole widoonni kayinni mitu manni looso loosa ceeˈmanno; hattono looso loosa giwate yee korkaata shiqishanno.—Law. 26:13, 14.

2-3. Yihowanna Yesuusi looso loosate daafira dancha lawishsha ikkitinonkehu hiittoonniiti?

² Yihowaranna Yesuusira loosoho noonsa lao alamete mannira noonsate gara ikkitinokki laonni baxxitinote. Yihowa looso loosa baxannoti dihuluullissannote. Yesuusi tenne xawisanni togo yiino: “Anniˈya techo geeshsha loosanni no; anino loosanni noommo.” (Yoh. 5:17) Maganu kiirre gundannikkita ayyaanaame kalaqonna kalqete alame kalaqi woyite loosinore hanni hendo. Qoleno, Maganu heeˈnoommote biifado uulla aana batinyere kalaqino. Faarsaasinchu tini gara ikkitinota xawisanni togo yiino: “Kaaliiqa, ati lowore kalaqootto; baalanka ogimmakkinni seekkootto; baattote ati kalaqoottori woˈmino.”—Far. 104:24.

³ Yesuusi Annisi lawishsha harunsino. Maganu iimanna uulla kalaqi yannara Yesuusi ledosi loosino. Isi Yihowa ledo qara loosaasincho ikke loosino. (Law. 8:27-31) Yesuusi uullate aana heeˈri yannarano dhagge ikkanno looso loosino. Kuni loosi isira sagalete gedeeti; hattono Maganu soyinosita leellishannoho.—Yoh. 4:34; 5:36; 14:10.

4. Yihowanna Yesuusiwiinni fooliishshote daafira maa ronseemmo?

 ⁴ Yihowanna Yesuusi diinaggaabbe loosse dancha lawishsha ikkitinonke; hatto yaa kayinni fooliishsho dihasiissannonke yaatenni? Hatto yaa diˈˈikkitino. Yihowa horonta daafurannokki daafira ninke gede fooliishsho dihasiissannosi. Qullaawu Maxaafi Yihowa iimanna uulla kalaqihu gedensaanni ‘fooliishshiˈrino’ yaanno. (Ful. 31:17) Hatto yinoonnihu Yihowa loosino looso taxxi yee lae hagiidhinota xawisate ikkinoti dihuluullissannote. Yesuusino uullate aana heeˈri yannara diinaggaawe loosinoha ikkirono, fooliishshiˈratenna jaallasi ledo sagale itate yanna dihoogino.—Mat. 14:13; Luq. 7:34.

5. Lowo mannira mayi qarra ikkannonsa?

⁵ Qullaawu Maxaafi Maganu manni jawaate loosanno gede amaalanno. Soqqamaanosi diinaggaabbe loosa hasiissannonsa ikkinnina ceeˈmaleeyye ikka dihasiissannonsa. (Law. 15:19) Maatekkira hasiisannore shiqishate looso loosattoha ikkara dandaanno. Yesuusi harunsaano baalantera dancha duduwo sabbakate qeechi noonsa. Qoleno fooliishshiˈra hasiissannonke. Loosoho, soqqanshotenna fooliishshote gari yanna noohekkiha lawannohe? Mageeshsha loosanna mageeshsha fooliishshiˈra hasiissannonkero afa dandiineemmohu hiittoonniiti?

6. Maarqoosi 6:30-34 noo hedo Yesuusira loosohonna fooliishshote gara ikkitino lao noosita leellishshannohu hiittoonniiti?

⁶ Loosoho gara ikkitino lao heedhannonke gede assiˈra hasiissannonke. Moote Salamooni qullaawu ayyaaninni “baalunkurira yanna no” yee borreessino. Isi kaasa, mina, wiˈla, osoˈla sirbanna wole coyibba xawisino. (Ros. 3:1-8) Loosunna fooliishsho heeshshonke giddo lowo geeshsha hasiissannote. Yesuusira loosohonna fooliishshote gara ikkitino lao noosi. Mitte yannara Yesuusi soqqamaasine sabbakkanni hossinowiinni daafurtinori higgino; insa “sagale ittanno gara” nafa hooggino. Yesuusi togo yiino: “Ane ledo kaˈa shiqqi yitine, shiima geeshsha fooliishshidhe.” (Maarqoosi 6:30-34 nabbawi.) Yesuusinna harunsaanosi duucha woyite hasidhino geeshsha fooliishshiˈra dandiitinokkiha ikkirono, Yesuusi kayinni baalunkura fooliishsho hasiissannota afino.

7. Sambatu seera xiinxallanke kaaˈlitannonkehu hiittoonniiti?

⁷ Mite yannara baalunkura fooliishsho woy barru baala assiˈneemmore soorra hasiissannonke. Maganu hundi Israeelera qixxeessinoti lamalate Sambati qixxaawo tenne leellishshanno. Ninke Muse Seerinni galleemmore ikka hoongummorono, kuni seeri Sambatu daafira kulannore xiinxallanke kaaˈlitannonke. Konni seerinni ronseemmori, loosohonna fooliishshote noonke lao biddi assiˈrate kaaˈlannonke.

8. Fulo 31:12-15 kultanno garinni Sambatu mayi barraati?

⁸ Qullaawu Maxaafi kalaqonnihu lewu ‘barri’ gedensaanni Maganu uullate aana kalaqannore uurrisinota kulanno. (Kal. 2:2) Ikkirono, Yihowa looso baxanno; hakko daafira isi wolu garinni “techo geeshsha loosanni no.” (Yoh. 5:17) Yihowa qixxeessinoti lamalate Sambati qixxaawo, Kalaqamu maxaafi giddo xawinsoonnihu Yihowahu fooliishshote barri ledo mittu garite. Maganu Sambatu Israeeletenna isi mereero malaate ikkinota coyiˈrino. Kuni barri woˈmunni woˈma fooliishshote  barraati; hattono Yihowara “qullaawa barraati.” (Fulo 31:12-15 nabbawi.) Konne barra qaaqquulluno borojjuno, wole agurina saada nafa fooliishshidhe hossanno. (Ful. 20:10) Kuni barri mannu ayyaanaamittete coye roore illachishanno gede kaaˈlannonsa.

9. Yesuusi yannara Sambatu barri daafira mitu mannira hiittooti quwa saˈino lao noonsa?

⁹ Sambatu barri Maganu mannira danchaho; ikkollana Yesuusi yannara noori batinye ammaˈnote massagaano uminsa wodho ledde Sambatu barri seera agadha qarra ikkitanno gede assitino. Insa Sambatu barra shoye tattayinse ita woy dhiwamino mancho hursa seeru difajjanno yitanno. (Maq. 2:23-27; 3:2-5) Insa yitannori Maganu hedinore diˈˈikkino; Yesuusi macciishshannosi mannira tenne xawisino.

10. Maatewoosi 12:9-12 Yesuusira Sambataho noosi lao leellishshannohu hiittoonniiti?

¹⁰ Yesuusinna Yihudu wido ikkitino harunsaanosi Muse seerinni galtannore ikkitino daafira Sambata ayirrissanno. * Yesuusi assinorinninna coyiˈrinorinni Sambata lainohunni quwa saˈˈa hasiissannokkitanna shaqqillunni woloota kaaˈla soˈro ikkitinokkita leellishino. Isi togo yee coyiˈrino: “Fooliishshote Barra danchare loosa fajjinoonni.” (Maatewoosi 12:9-12 nabbawi.) Yesuusi Sambatu barra shaqqillunni woloota kaaˈla seera diigate gede asse dilaino. Isi assinori Yihowa Sambata qixxeessinohu mayiraatiro leellishanno. Maganu manni hakko barra loosunni  fooliishshiˈre hosanno daafira ayyaanaamittete coye illachisha dandaanno. Yesuusi lophino maate Sambatu barra roore ayyaanaamittete coye illachishshannoti dihuluullissannote. Yesuusi lophino gobbara Naaziretete assinorinni tenne buuxa dandiineemmo; isi “albinte gede Ayihudete Fooliishsho Barra xaadu minira eˈˈe, nabbawara” kaino.—Luq. 4:15-19.

11. Yesuusi loosu daafira dancha lawishsha ikkinonkehu hiittoonniiti?

¹¹ Yooseefi, lossiˈrino beettisira Yesuusira hanaatsimma rosiisisi woyite Yihowara loosoho noosi laono rosiisinositi egennantinote. (Mat. 13:55, 56) Yesuusi Yooseefi lowo maatesira hasiisannonsare wonshate barru baala diinaggaawe loosanna laino. Gedensaanni Yesuusi rosaanosira ‘loosinohura daafurisi gumi hasiisannota’ kulinonsa. (Luq. 10:7) Yesuusi diinaggaambe loonsanni gara afino.

12. Diinaggaawe loosa jawaachishshanno qummeeshshuwa hiikkuriiti?

¹² Soqqamaasinchu Phaawuloosino diinaggaawe loosino. Isihu qaru loosi, Yesuusi daafira farciˈratenna sokkasi duduwate. Ikkirono, Phaawuloosi hasiisannosire wonshiˈrate loosono loosino. Teselonqe Kiristaani Phaawuloosi ‘ayerano duha ikkannokki gede hashshanna barra daafuranni diinaggaawe’ loosannota afino. (2 Tes. 3:8; Soq. 20:34, 35) Phaawuloosi hatto yiinohu dunkaana gowate loososi kulate ikkikki digatino. Isi Qorontoosi noo yannara Aqiilanna Phirisqila ledo heeˈrino; ‘isino insante gede dunkaana gowannoha ikkinohura, ledonsa loosiˈrino.’ Phaawuloosi ‘hashsha barra loosino’ yaa horo fooliishshiˈrikkinni loosino yaa diˈˈikkino. Lawishshaho, isi Sambatu barra dunkaana digowanno. Isi konne barra Yihudu mannira farciˈranno; insano Sambatu barra looso diloossanno.—Soq. 13:14-16, 42-44; 16:13; 18:1-4.

13. Phaawuloosi lawishshinni maa ronseemmo?

¹³ Soqqamaasinchu Phaawuloosi dancha lawishsha ikkinonke. Isi umisi looso loosiˈrannoha ikkirono, Maganunniha “dancha duduwo” diinaggaawe sabbakino. (Rom. 15:16; 2 Qor. 11:23) Isi wolootuno hatto assitanno gede jawaachishino. Aqiilanna Phirisqila “Kiristoosi Yesuusi soqqanshora ledosi” soqqantino. (Rom. 12:11; 16:3) Phaawuloosi Qorontoosi Kiristaana ‘Mootichu loosi’ batiˈrinonsare ikkitanno gede jawaachishinonsa. (1 Qor. 15:58; 2 Qor. 9:8) Qoleno, isi qullaawu ayyaaninni “loosa baxannokkihu itoonke” yee borreessino.—2 Tes. 3:10.

14. Yesuusi Yohaannisi 14:12 noo hedo coyiˈrinohu mayyaate hedeeti?

¹⁴ Tenne goofimarchu yannara lowo geeshsha hasiisanno loosi sabbakatenna manna rosaano assate loosooti. Qoleno, Yesuusi rosaanosi isi loosinohunni roorino looso loossannota masaalino. (Yohaannisi 14:12 nabbawi.) Yesuusi hatto yiinohu isi gede maalale loonseemmota kulate diˈˈikkino. Hatteentenni harunsaanosi isi sabbakinonna rosiisinohunni roore batinyu qoqqowira, lowo mannira hattono seeda yanna sabbakkannota kulateeti.

15. Ninkeneeto hiikkuri xaˈmuwa xaˈma hasiissannonke? Mayira?

¹⁵ Looso loosattoha ikkiro, ateneeto togo yite xaˈmi: ‘Loosu basera diinaggaawe looseemmo? Loosoˈya danduummo deerrinni danchu garinni loose yannante gudeemmo?’ Hatto assattoha ikkiro, loosiisaanchikki ammanannohe. Qoleno, tini ledokki loosanno manni dancha duduwo roore macciishsha hasiˈranno gede assitara dandiitanno. Sabbakatenna rosiisate loosi daafirano ateneeto togo yite xaˈmi: ‘Konne looso diinaggaawe  looseemmo? Manna umo mare hasaawisate seekke qixxaaweemmo? Hasatto noonsa manna keeshshummokki wirro mare hasaawiseemmo? Duuchunku gari soqqansho ganye soqqameemmo?’ Kuri coyibba assattoha ikkiro, soqqanshokkinni hagiirre afiˈratto.

16. Yesuusiranna soqqamaasinera fooliishshote noonsa lao yannankera noohu batinyu mannitenni baxxitinohu hiittoonniiti?

¹⁶ Yesuusi, isirano ikko soqqamaasinesira fooliishsho hasiissannonsa woyiti noota afino. Ikkollana, hakkawarono ikko xaa yannara batinyu manni Yesuusi lawishshunni kuli manchi gedeereeti. Hakku manchi isonooto “xaate fooliishshidhe ittanninna agganni hagiidhi” yiino. (Luq. 12:19; 2 Xim. 3:4) Isi fooliishshonna umisi qiniite calla illachishino. Yesuusinna soqqamaasinesi kayinni uminsa hagiirre calla diˈˈillachishshino.

17. Fooliishshote yannanke ma garinni horoonsiˈra dandiineemmo?

¹⁷ Ninkeno Yesuusi lawishsha harunsine noonketa fooliishshote yanna fooliishshiˈrate calla ikkikkinni dancha looso loosate lawishshaho, dancha duduwo duduwatenna Kiristaanu gambooshshe haˈrate horoonsiˈneemmo. Manna rosaano assanna Kiristaanu gambooshshe haˈra ninkera lowo geeshsha hasiissannota ikkitino daafira, tenne qullaawa soqqansho ganyine soqqamate dandiinummore baala assineemmo. (Ibi. 10:24, 25) Fooliishshote wolewa haˈneemmo yannara nafa ayyaanaamittete rosichonke assa lawishshaho, marroommowa gambooshshe haˈranna xaandeemmo mannira farciˈra diagurreemmo.—2 Xim. 4:2.

18. Mootenke Yesuusi Kiristoosi ma assinammora hasiˈranno?

¹⁸ Mootenke Yesuusi Kiristoosi quwa saˈˈannokkiha ikkinohura, hattono loosohonna fooliishshote gara ikkitino lao heedhannonke gede kaaˈlannonke daafira lowo geeshsha galanteemmosi! (Ibi. 4:15) Isi fooliishsho hasiissannonke woyite fooliishshiˈnammora hasiˈranno. Qoleno, hasiisannonkere afiˈrate jawaante loonsammoranna hagiirsiisannoha manna rosaano assate looso loonsammora hasiˈranno. Aananno birxichira Yesuusi ninke gadadissanno borojjimma giddonni fushshate assinore ronseemmo.