1. Bantfu labanyenti bawutsatsa njani umsebenti?

BANTFU labanyenti basendzaweni lohlala kuyo bawutsatsa njani umsebenti? Emaveni lamanyenti, bantfu basebenta kamatima futsi basebenta sikhatsi lesidze kunangesikhatsi lesendlulile. Bantfu labasebenta kakhulu bavame kuba bete sikhatsi sekuphumula, sikhatsi labangasicitsa nemindeni yabo, nobe sikhatsi sekuchubeka bafundza ngaNkulunkulu. (Shu. 2:23) Lenye inkinga kutsi bantfu abakutsandzi sanhlobo kusebenta futsi bahlale banetizatfu tekungafuni kusebenta.—Taga 26:13, 14.

2-3. Jehova naJesu basibekela siphi sibonelo mayelana nemsebenti?

² Ngalokwehlukile endleleni lelive leliwutsatsa ngayo umsebenti, cabanga ngendlela Jehova naJesu labawutsatsa ngayo umsebenti. Siyati kutsi Jehova uyakutsandza kusebenta. Jesu wakucacisa loku nakatsi: “Babe solo usasebenta nanyalo, nami ngiyasebenta.” (Joh. 5:17) Cabanga ngemsebenti Nkulunkulu lawenta ngesikhatsi adala tingilosi letinyenti, tikhanyenti kanye nemaplanethi. Siphindze sibone tintfo letinyenti letinhle Nkulunkulu latidalile lapha emhlabeni. Umhlabeleli washo kufanele nakatsi: “Awu, Simakadze! Maye, minyenti imisebenti yakho! Yonkhe uyente ngekuhlakanipha; umhlaba ugcwele tidalwa takho.”—Hla. 104:24.

³ Jesu bekalingisa Babe wakhe. Wasita ngesikhatsi Nkulunkulu “amisa emazulu,” futsi bekanaJehova “njengengcweti yekwakha.” (Taga 8:27-31) Ngemuva kwesikhatsi Jesu alapha emhlabeni, wenta umsebenti lomuhle kakhulu. Jesu watsi lomsebenti Jehova lamnikete wona kutsi awente bewufana nekudla kuye. Konkhe lakwenta ngesikhatsi alapha emhlabeni kwafakazela kutsi bekatfunywe nguNkulunkulu.—Joh. 4:34; 5:36; 14:10.

4. Yini lesingayifundza kuJehova naJesu ngekuphumula?

 ⁴ Sibonelo lesasibekelwa nguJehova naJesu mayelana nekusebenta kamatima sisho kutsi akukabaluleki yini kutsi siphumule? Cha. Jehova akadzinwa, ngako akadzingi kuphumula ngemuva kwekusebenta. LiBhayibheli litsi ngemuva kwekutsi Jehova adale emazulu nemhlaba, “waphumula emsebentini wakhe.” (Eks. 31:17) Noma kunjalo, loko kufakazela kutsi Jehova wabese uyema kudala tintfo futsi wajabulela kubuka tonkhe tintfo lebesekatentile. Ngisho nobe Jesu bekasebenta kamatima ngesikhatsi alapha emhlabeni, bekatinika sikhatsi sekuphumula futsi ajabulele kudla nebangani bakhe.—Mat. 14:13; Luk. 7:34.

5. Ngubuphi bumatima bantfu labanyenti labahlangabetana nabo?

⁵ LiBhayibheli likhutsata bantfu baNkulunkulu kutsi bakujabulele kusebenta. Bantfu labakhonta Nkulunkulu kufanele basebente kamatima bangavilaphi. (Taga 15:19) Kungenteka kunemsebenti wekutiphilisa lowentako kuze unakekele umndeni wakho, kodvwa bonkhe balandzeli baKhristu kufanele bente umsebenti lobalulekile wekushumayela tindzaba letimnandzi. Noma kunjalo, kufanele utinike sikhatsi lesenele sekuphumula. Ngaletinye tikhatsi, kuba matima yini kutinika sikhatsi lesenele sekwenta umsebenti wekutiphilisa, sekwenta umsebenti wekushumayela nesekuphumula? Singati njani kutsi kufanele sisebentise sikhatsi lesingakanani nasenta umsebenti wekutiphilisa nanasiphumula?

6. Umbhalo wa-Makho 6:30-34 ukhombisa njani kutsi Jesu bekanembono lokahle ngemsebenti nekuphumula?

⁶ Kubalulekile kutsi sibe nembono lokahle ngemsebenti. Inkhosi Solomoni yaphefumulelwa kutsi ibhale itsi: “Konkhe kunesikhatsi sako.” Watsi kunesikhatsi sekuhlanyela, sekwakha, sekukhala, sekuhleka, sekugidza, nesekwenta letinye tintfo. (Shu. 3:1-8) Kuyacaca kutsi tintfo letimbili letibalulekile ekuphileni kusebenta nekuphumula. Jesu bekanembono lokahle ngemsebenti nekuphumula. Ngalelinye lilanga, baphostoli bebabuya kuyowenta umsebenti wekushumayela. “Bebangakasitfoli sikhatsi sekuphumula ngisho nesekudla imbala.” Jesu watsi kubo: “Kotani siye endzaweni lethulile kute siphumule.” (Fundza Makho 6:30-34.) Ngisho nobe Jesu nebafundzi bakhe bebangasitfoli sikhatsi sekuphumula ngalokwenele, kodvwa bekati kutsi kufanele baphumule.

7. Kungasisita njani kufundza ngemtsetfo weliSabatha?

⁷ Ngaletinye tikhatsi, sonkhe siyakudzinga kuphumula nobe sishintje luhlelo lwetfu lwamalanga onkhe. Loku sikubona kuloko Nkulunkulu lebekakuhlelele bantfu bakhe endvulo—bekabahlelele kutsi bagcine liSabatha njalo ngeliviki. Ngisho nobe singekho ngephansi kwemtsetfo waMosi lamuhla, singazuza lokunyenti nasifundza ngaloko lokwashiwo mayelana neliSabatha. Loko lesingakufundza kungasisita sihlolisise umbono lesinawo ngemsebenti nekuphumula.

8. Ngekusho kwembhalo wa-Eksodusi 31:12-15, liSabatha bekulilanga lekwentani?

⁸ LiVi laNkulunkulu litsi ngemuva kwemalanga lasitfupha ekudala tintfo emhlabeni, Nkulunkulu wase uyaphumula. (Gen. 2:2) Jehova uyakutsandza kusebenta, futsi nangaletinye tindlela “usasebenta nanyalo.” (Joh. 5:17) Jehova wasebenta emalanga lasitfupha, waphumula ngelilanga lesikhombisa futsi watjela ema-Israyeli kutsi abophumula njalo ngelilanga lesikhombisa. Nkulunkulu watsi liSabatha bekuluphawu emkhatsini wakhe nema-Israyeli,  futsi bekulilanga ‘lekuphumula, lelingcwele kuJehova.’ (Fundza Eksodusi 31:12-15.) Kute lobekavumeleke kusebenta, ngisho bantfwana, tisebenti, kanye netilwane. (Eks. 20:10) LiSabatha belivumela bantfu kutsi banake tintfo letiphatselene naNkulunkulu.

9. Ngumuphi umbono longasiwo ngeliSabatha lobewukhona ngesikhatsi saJesu?

⁹ LiSabatha bekulilanga lelikahle lebantfu baNkulunkulu, noma kunjalo, baholi benkholo labanyenti ngesikhatsi saJesu babeka imitsetfo lecinile mayelana nekulandzela imitsetfo yeliSabatha. Bebatsi akukho emtsetfweni kuchulula kolo kuze uwudle nobe kuphilisa umuntfu logulako ngelilanga leliSabatha. (Mak. 2:23-27; 3:2-5) Kodvwa loko akusiko Nkulunkulu bekakufuna, futsi Jesu wakwenta kwacaca kulabo lebebamlalele.

10. Yini lesiyifundza embhalweni waMatewu 12:9-12 mayelana nembono waJesu ngaliSabatha?

¹⁰ Jesu kanye nebalandzeli bakhe labangemaJuda bebaligcina liSabatha ngobe bebangephansi kweMtsetfo waMosi. * Jesu washo waphindze wenta tintfo letinyenti lebetikhombisa kutsi bekungasiko kubi kusita bantfu ngelilanga leliSabatha. Washo ngalokucacile kutsi “kuvumelekile kwenta intfo lenhle ngeliSabatha.” (Fundza Matewu 12:9-12.) Akazange acabange kutsi kukabi kusita bantfu ngelilanga leliSabatha. Tintfo Jesu latenta betikhombisa kutsi uyasicondza sizatfu lesibalulekile sekutsi kungani Nkulunkulu atjela bantfu bakhe kutsi  baphumule ngelilanga leliSabatha. Ngenca yekutsi bantfu baNkulunkulu bebaphumula emsebentini yamalanga onkhe, bebakhona kunaka tintfo letiphatselene naNkulunkulu. Jesu wakhulela emndenini lokungenteka bewusebentisa lilanga leliSabatha kuze ucinise buhlobo bawo naJehova. Loko siyakwati ngobe siyafundza ngaloko Jesu lakwenta nakasedolobheni lakubo eNazaretha. “Njengobe [Jesu] abehlale enta ngeliSabatha, wangena esinagogeni, wasukuma kuze afundze imiBhalo.”—Luk. 4:15-19.

11. Ngubani lowabekela Jesu sibonelo lesihle mayelana nemsebenti?

¹¹ Akungabateki kutsi Josefa bekanembono waNkulunkulu ngemsebenti ngobe wafundzisa Jesu, iNdvodzana yakhe kutsi ibe ngumbati. (Mat. 13:55, 56) Futsi kungenteka Jesu bekambona Josefa asebenta kamatima lilanga nelilanga kuze anakekele umndeni wakhe lomkhulu. Lokujabulisako kutsi ngekuhamba kwesikhatsi Jesu watjela bafundzi bakhe kutsi “sisebenti kufanele sitfole liholo laso.” (Luk. 10:7) Kuyacaca kutsi Jesu bekakwati kusebenta kamatima.

12. Ngumiphi imibhalo lekhombisa loko lokushiwo liBhayibheli mayelana nekusebenta kamatima?

¹² Umphostoli Pawula naye bekakwati kusebenta kamatima. Umsebenti wakhe loyinhloko bekukutjela bantfu ngaJesu kanye nangaloko Jesu bekakufundzisa. Noma kunjalo, Pawula bekenta umsebenti wekutiphilisa kuze atinakekele. EmaKhristu aseThesalonika bekati “ngekushikashikeka nangekukhandleka” kwakhe “busuku nemini” kuze ‘angabi ngumtfwalo’ kunobe ngubani. (2 Thes. 3:8; Imis. 20:34, 35) Ngesikhatsi Pawula abhala ngemsebenti wakhe, kungenteka bekakhuluma ngemsebenti wekwakha emathende. Ngesikhatsi aseKhorinte, bekahlala na-Akhwila kanye naPrisila futsi ‘wasebenta’ nabo ngobe bebenta umsebenti lofanako ‘wekwakha emathende.’ Kusebenta kwaPawula “busuku nemini” akusho kutsi bekasebenta angaphumuli. Bekatinika sikhatsi sekuphumula ngisho nangelilanga leliSabatha. Lilanga leliSabatha belimniketa litfuba lekushumayela kumaJuda, nawo lebekangasebenti ngalelo langa.—Imis. 13:14-16, 42-44; 16:13; 18:1-4.

13. Yini lesingayifundza esibonelweni saPawula?

¹³ Umphostoli Pawula wasibekela sibonelo lesihle. Bekudzingeka ente umsebenti wekutiphilisa, kodvwa bekaciniseka kutsi uwenta njalo ‘umsebenti longcwele wekushumayela tindzaba letimnandzi taNkulunkulu.’(Rom. 15:16; 2 Khor. 11:23) Wakhutsata nalabanye kutsi bachubeke bashumayele. Akhwila naPhrisila ‘bebatisebenti kanye naye kuKhristu Jesu.’ (Rom. 12:11; 16:3) Pawula wakhutsata emaKhristu aseKhorinte kutsi abe nalokunyenti kwekukwenta emsebentini weNkhosi. (1 Khor. 15:58; 2 Khor. 9:8) Jehova waphefumulela umphostoli Pawula kutsi abhale kutsi: “Nangabe umuntfu angafuni kusebenta, akangadli.”—2 Thes. 3:10.

14. Jesu bekasho kutsini nakasho emavi labhalwe kuJohane 14:12?

¹⁴ Umsebenti lobalulekile lesingawenta kulamalanga ekugcina kushumayela kanye nekwenta bafundzi. Ecinisweni, Jesu wabiketela kutsi bafundzi bakhe bebatawenta imisebenti lemikhulu kuneyakhe! (Fundza Johane 14:12.) Bekangasho kutsi sitawenta timangaliso njengobe yena enta. Kunaloko, balandzeli bakhe bebatawushumayela etindzaweni letinyenti, kubantfu labanyenti, futsi bebatawushumayela sikhatsi lesidze kunesakhe.

15. Ngumiphi imibuto lokufanele sitibute yona, futsi leni?

¹⁵ Nangabe wenta umsebenti wekutiphilisa, tibute nayi imibuto: ‘Ngatiwa njengemuntfu losebenta kamatima yini? Ngiyatimisela yini nangenta umsebenti wami  futsi ngiwucedza ngesikhatsi yini?’ Nangabe imphendvulo yakho inguyebo, kungenteka umphatsi wakho uyakwetsemba, futsi bantfu losebenta nabo bangaba nesifiso sekulalela tindzaba letimnandzi. Nakutiwa endzabeni yekwenta umsebenti wekushumayela kanye nekufundzisa, tibute nayi imibuto: Ngatiwa njengemuntfu losebenta kamatima yini emsebentini wekushumayela? Ngilungiselela kahle yini nangiyococa nemuntfu kwekucala? Ngisheshe ngibuyele yini kubantfu labanesifiso sekwati lokunyenti ngeliBhayibheli? Utisebentisa tonkhe yini tindlela letehlukahlukene tekushumayela? Nangabe imphendvulo yakho inguyebo, utawutfola injabulo emsebentini wakho wekushumayela.

16. Ngumuphi umehluko lokhona endleleni Jesu nebaphostoli bakhe lebebakutsatsa ngayo kuphumula kanye nendlela bantfu labanyenti lamuhla labakutsatsa ngayo?

¹⁶ Jesu bekati kutsi ngaletinye tikhatsi yena nebaphostoli bakhe bebakudzinga kuphumula. Nobe kunjalo, bantfu labanyenti bangesikhatsi lesendlulile kanye nalabanyenti basesikhatsini salamuhla bangafananiswa nendvodza lenjingile Jesu lakhuluma ngayo emfanekisweni wakhe. Lendvodza yatsi: “Ngako phumula, udle, unatse futsi utijabulise.” (Luk. 12:19; 2 Thim. 3:4) Beyicabanga kutsi intfo lebaluleke kakhulu ekuphileni kutsi uphumule futsi utijabulise. Ngalokwehlukile, Jesu kanye nebaphostoli bakhe abazange banake kakhulu kutijabulisa njengentfo lebaluleke kakhulu ekuphileni kwabo.

17. Singasisebentisa njani sikhatsi lesingakayi ngaso emsebentini wekutiphilisa?

¹⁷ Lamuhla, setama kulingisa Jesu ngekusebentisa sikhatsi lesingakayi ngaso emsebentini kuze sishumayele kulabanye futsi siye emihlanganweni yelibandla. Kubaluleke kakhulu kutsi sente bafundzi futsi siye emihlanganweni yelibandla. Ngako senta konkhe lesingakwenta kuze sidvumise Jehova. (Heb. 10:24, 25) Ngisho nobe sivakashile, siyachubeka siya emihlanganweni yelibandla noma kungatsiwa sikuphi, futsi sifuna ematfuba ekucoca ngeliBhayibheli nebantfu lesihlangana nabo.—2 Thim. 4:2.

18. INkhosi yetfu, Khristu Jesu, ifuna senteni?

¹⁸ Sijabula kakhulu ngekutsi iNkhosi yetfu, Khristu Jesu, ayilindzeli kutsi sente lokungetulu kwaloko lesingakhona kukwenta! (Heb. 4:15) Ifuna siphumule ngalokwenele. Ifuna sisebente kamatima kuze sinakekele tidzingo tetfu futsi ifuna siwujabulele umsebenti wekwenta bafundzi. Esihlokweni lesilandzelako, sitawucoca ngaloko Jesu lakwentile kuze asisindzise eluhlotjeni lolutsite lwekugcilateka.