1. Xú káʼnii eyáá ñajunʼ mbaʼin xa̱bu̱ rá.

XÚ KÁʼNII eyáá ñajunʼ mbaʼin xa̱bu̱ náa kuwáanʼlú rá. Náa mbaʼa xuajen mba̱ʼu̱, xa̱bu̱ nuñajunʼ itháán mba̱yu̱u̱ʼ. Ikha jngó, mbaʼin tséguapiin mu mbu̱ya̱a̱ xúúnʼ, ga̱jma̱a̱ rí makuwíin gajmiún bi̱ kúwá náa guʼwún asndu má rí muni ñajuunʼ Dios (Ecl. 2:23). Ga̱jma̱a̱ kúwá tikhun xa̱bu̱ bi̱ tsiniguunʼ muñajunʼ ga̱jma̱a̱ nduyáʼ xóo muthi mu xúñajunʼ (Prov. 26:13, 14).

2, 3. Xú káʼnii xkri̱da exnúlú Jeobá ga̱jma̱a̱ Jesús náa ikháanʼluʼ rá.

² Na̱nguá nindxu̱u̱ awa̱án dí nuni rígi̱. Mú, xú káʼnii endxa̱ʼwáminaʼ Jeobá ga̱jma̱a̱ Jesús numuu ñajunʼ rá. Gajkhun rí Jeobá naniguuʼ mañajunʼ. Jesús niniñuuʼ kaʼwu índo̱ niʼthí: “Asndu xúgi̱ Anu̱ʼ xtáa rañajunʼ ga̱jma̱a̱ xúʼko̱ má mangúún xtáá rañajunʼ” (Juan 5:17). Gundxaʼwamíjna̱ náa mbaʼin wéñuʼ ángeles bí niʼniwiinʼ bi̱ kúwá mekhuíí, ma̱ngaa xó má mbaʼa dí niʼniwíi náa numbaaʼ mitsaanʼ wéñuʼ rí kuwáanʼ, ikha jngó bi̱ niʼnirámáʼ Salmo niʼthí: “¡Oh Jeobá, ra̱ʼkhá tháán mbaʼa rí nitani̱! Ra̱ʼkhá tháán májánʼ nitani̱ xúgíʼ. Náa ku̱ba̱ʼ kajtíí rí nitani̱” (Sal. 104:24).

³ Jesús nisngájma ikháá má ku̱ma̱ rí gíʼdoo Anu̱u̱ Jeobá, ga̱jma̱a̱ ndiʼyáridoo. Nimbáyúu Dios índo̱ ‹niʼni mujúunʼ mekhu›, ma̱ngaa nixtáa ga̱jma̱á nindxu̱u̱ “xóo mbáa bi̱ nañajunʼ májánʼ wéñuʼ” (Prov. 8:27-31). Mba̱yu̱u̱ʼ mbiʼi nda̱wa̱á, índo̱ nixtáa náa tsu̱du̱u̱ Ku̱ba̱ʼ, niʼni mbá ñajunʼ mitsaanʼ. Rígi̱ ninindxu̱u̱ náa ikhaa xóo ganitsu, ga̱jma̱a̱ xúgíʼ rí niʼni nisngájma rí Dios nikunguanʼ (Juan 4:34; 5:36; 14:10).

4. Ndiéjunʼ ejmañulú náa Jeobá ga̱jma̱a̱ Jesús rí mbuʼya̱a̱xúlú rá.

⁴ Lá xkri̱da dí nigíiʼ Jeobá ga̱jma̱a̱ Jesús nandoo gáʼthúu̱n rí  xáʼyóoʼ má mbuʼya̱a̱xúlú ráʼ. Na̱nguá. Jeobá tségaaʼ nditháan, ikha jngó tséyóoʼ mba̱ya̱a̱xu̱u̱ʼ xóo ikháanʼlu. Náa Biblia naʼthí, rí nda̱wa̱á dí niʼni mekhu ga̱jma̱a̱ Ku̱ba̱ʼ, “niniñuuʼ rañajunʼ ga̱jma̱a̱ ndi̱ya̱a̱ xu̱u̱ʼ” (Éx. 31:17). Ajngáa rígi̱ nakujmaa rí nandoo gáʼthúu̱n dí niniñuuʼ raʼniwíi ga̱jma̱a̱ niriyaʼ mbiʼi mu xúʼko̱ mbaʼyoo rí mitsaanʼ niʼni. Maski ajndu Jesús niñajunʼ gakhi̱i̱, índo̱ nixtáa náa tsu̱du̱u̱ Ku̱ba̱ʼ, mú ma̱ngaa niríyaʼ mbiʼi mu mba̱ya̱a̱xu̱u̱ʼ ga̱jma̱a̱ rí nikuiʼtsu gajmíi̱n migiu̱u̱ (Mat. 14:13; Luc. 7:34).

5. Ndiéjunʼ rí naʼniún gakhi̱i̱ tikhun rá.

⁵ Náa Biblia naʼthí rí bi̱ ni̱ndxu̱lú xa̱bi̱i̱ Dios, gíʼmaa rí muñajunʼ ga̱jma̱a̱ rí xáʼskhulú (Prov. 15:19). Mbáa nuñajunʼ mu mumbáñuun bi̱ kúwi̱i̱n náa guʼwúlú. Xúgiáánʼ bi̱ ni̱ndxu̱lú cristiano gíʼmaa rí mu̱ʼgua̱ gúʼtaraʼa ajngáa rí májánʼ. Mú ma̱ngaa ndayúlú rí mbuʼya̱a̱xúlú májánʼ. Lá naʼniulú gakhii muriʼyáʼ mbá májánʼ awan mu muñajunʼ, muʼtáraʼa ga̱jma̱a̱ rí mbuʼya̱a̱xúlú ráʼ. Xóo gúʼyáá nguáthá mba̱yu̱u̱ʼ guñajunʼ ga̱jma̱a̱ nguáthá mba̱yu̱u̱ʼ gúʼya̱a̱xúlú rá.

6. Xú káʼnii esngájma náa Marcos 6:30-34 dí Jesús niríyaʼ májánʼ awa̱án náa niñajunʼ ga̱jma̱a̱ náa ndiya̱a̱xu̱u̱ʼ rá.

⁶ Gíʼdoo wéñuʼ numuu rí awa̱án gúʼyáá ga̱jma̱a̱ rí numuu ñajunʼ. Rey Salomón niʼnirámáʼ “Rígá mbiʼi mu maguma xúgíʼ; rígá mbiʼi mu maguma mámbá ñajunʼ” ga̱jma̱a̱ niʼthí xóo i̱ʼwáʼ, xóo rí matadu, rí matani, rí matambiyaʼ, matanduʼwa ga̱jma̱a̱ maratsian (Ecl. 3:1-8). Nakujmaa kaʼwu dí a̱jma̱ rígi̱, xóo matiejunʼ ga̱jma̱a̱ rí mbi̱ya̱a̱xa̱a̱ʼ mambáyaʼ maraxtaa. Jesús ndiʼyoo ga̱jma̱a̱ awa̱án a̱jma̱ rígi̱. Mbá miʼtsú, índo̱ apóstoles nitangi̱i̱n náa nigún gutaraʼa. Rí “asndu tsiguapiin mu muphiʼtsu”. Ikha jngó Jesús niʼthúún: “Aguwaʼ ga̱jma̱á ni̱ndxu̱u̱; guʼgua̱ índó ikháanʼ náa mitsínguánʼ mu mbu̱ya̱xala mbá xngaa” (atraxnuu Marcos 6:30-34). * Ikhaa gajmíi̱n discípulos na̱nguá guáʼdáá mbiʼi mu mbu̱ya̱a̱xu̱únʼ xó má nindúún ikhiin. Mú Jesús ndaʼyoo rí ikhiin ndañúunʼ rí mbu̱ya̱a̱xu̱únʼ.

7. Xú káʼnii gámbáyulú muʼnigajmaa xtángoo náa naʼthí ga̱jma̱a̱ numuu mbiʼi sábado rá.

⁷ Nguáná ndayóoʼ mbuʼya̱a̱xúlú mbáxngaa o muriʼkhuíí rí nu̱ʼni̱. Rúʼko̱ nisngájma mbá kiʼtáñajunʼ rí gíʼdoo wéñuʼ numuu rí Jeobá nixnúún bi̱ israelitas náa Xtángoo ndrígóo Moisés: Rí gíʼmaa mbu̱ya̱a̱ xu̱únʼ mbiʼi sábado rí mbá xmáná. Ikháanʼlu nánguá eʼnimbulú Xtángoo ndrígóo Moisés, mú ma̱ndoo mambáyulúʼ rí muʼnigajmaa ga̱jma̱a̱ numuu mbiʼi sábado. Dí gajmañulú mambáyulúʼ mbuʼyáá xóo eʼyáá ñajunʼ ga̱jma̱a̱ rí mbuʼya̱a̱ xúlú.

8. Xó ma eʼthí náa Éxodo 31:12-15, ndiéjunʼ rí ndiyóoʼ muni israelitas mbiʼi sábado rá.

⁸ Náa Ajngá rawunʼ Dios naʼthí rí índo̱ nijngoo majun ‹mbiʼi› Jeobá niniñuuʼ raʼniwíi dí rígá náa tsu̱du̱u̱ Ku̱ba̱ʼ (Gén. 2:2). Jeobá naniguuʼ mañajunʼ, ikha jngó tániñuuʼ raʼni i̱ʼwáʼ ñajunʼ (Juan 5:17). Xtángoo rí nigájnuu ga̱jma̱a̱ numuu mbiʼi sábado nambrígui̱i̱ ga̱jma̱a̱ rí naʼthí náa Génesis, xóo muʼthá, mixtiejunʼ majun mbiʼi ga̱jma̱a̱ rí maʼni juwan mbiʼi mbu̱ya̱a̱ xu̱únʼ. Dios niʼthí rí mbiʼi sábado ninindxu̱u̱ mbá tsinaʼ náa ikhaa ga̱jma̱a̱ Israel. Ninindxu̱u̱ mbá mbiʼi “rí mbu̱ya̱a̱xu̱únʼ” Ga̱jma̱a̱ “nindxu̱u̱ kaʼwu náa  Jeobá” (atraxnuu Éxodo 31:12-15). * Nimbáa xándoo muñejunʼ, ni e̱ji̱n ni má yumbáá. Asndu má xujkhúʼ bi kharaʼdiin xándoo muñejunʼ (Éx. 20:10). Rúʼko̱ niʼni rí israelitas maxmiéjúnʼ itháan muʼni ñajuunʼ Dios.

9. Ndiéjunʼ dí raʼkhí nikumu̱ún ga̱jma̱a̱ numuu mbiʼi sábado nákha mbiʼi rí nixtáa Jesús xá.

⁹ Mbiʼi sábado ninindxu̱u̱ mbá mbiʼi májánʼ náa xa̱bi̱i̱ Dios. Mú mbaʼin xa̱bu̱ ede̱ náa i̱ʼwáʼ guʼwá ndxajkun, nákha mbiʼi rí nixtáa Jesús nigíʼ xtángoo rí mingíjyúuʼ wéñuʼ mambanúu. Nithi dí asndu xándoo mataxmájuíi iña ga̱jma̱a̱ dí ragíʼmaa muni thanáá mbáa bi̱ nandoo kháñuu (Mar. 2:23-27; 3:2-5). Rí ikhiin nithi, na̱nguá nisngájma xóo endxa̱ʼwáminaʼ Jeobá, ga̱jma̱a̱ Jesús niʼthún kaʼwu bi̱ nidxáwiin.

10. Ndiéjunʼ eʼsngúlú Mateo 12:9-12 rí xú kaʼnii Jesús ndiʼyoo mbiʼi sábado rá.

¹⁰ Jesús gajmíi̱n xa̱bi̱i̱ bi̱ ni̱ndxu̱ún Judío ndiya̱a̱xu̱únʼ mbiʼi sábado numuu rí ninimbu̱u̱n Xtángoo ndrígóo Moisés. * Mú Jesus nisngájma ga̱jma̱a̱ rí niʼni ma̱ngaa rí niʼthí rí ndiyóoʼ mbuyáá májánʼ ga̱jma̱a̱ rí mbiʼi rúʼko̱ ma̱ndoo maguma ñajunʼ rí májánʼ. Ikhaa niʼthí: “Ma̱ndoo maguma mbá rí májánʼ mbiʼi sábado”  (atraxnuu Mateo 12:9-12). * Ikhaa na̱nguá nindxa̱ʼwáminaʼ dí ra̱májánʼ dí ma̱nindxa̱a̱ʼ bi̱ májánʼ a̱jkiu̱u̱n ga̱jma̱a̱ rí matambáñun eʼwíínʼ rí mbiʼi sábado. Dí niʼni Jesús nisngájma rí nikro̱ʼo̱o̱ náá numuu rí Dios niʼthún xa̱bi̱i̱ rí mbu̱ya̱a̱xu̱únʼ. Numuu rí bi̱ israelitas nánguá ñajunʼ, ma̱ndoo maxmiéjúnʼ itháan rí muni ñajuunʼ Dios. Bi̱ kúwi̱i̱n náa goʼwóo Jesús nijmún májánʼ mbiʼi sábado mu mbuyamajkuíí Dios. Xó nasngájma índo̱ nuraxnuu náa naʼthí rí niʼni náa xuajen Nazaret. Náa Biblia naʼthí: “Xó má eguʼwuun naʼni rí mámbá sábado, nito̱ʼo̱o̱ náa sinagoga ga̱jma̱a̱ niwi̱ji̱ mu maguxnuu” (Luc. 4:15-19).

11. Tsáa nixnúu mbá májánʼ xkri̱da Jesús dí xú káʼnii nindxu̱u̱ rí matiejunʼ gakhi̱i̱ rá.

¹¹ Mbáa índo̱ José niʼsngóo Jesús xóo maʼtóo ixi̱, ikhú niʼsngóo xú káʼnii eʼyoo Dios ga̱jma̱a̱ numuu ñajunʼ (Mat. 13:55, 56). Ga̱jma̱a̱ Jesús ndiʼyoo xú káʼnii José niñajunʼ gakhi̱i̱ mu maxnún rí nda̱ñúnʼ bi̱ kúwá náa goʼwóo, ikha jngó Jesús niʼthún xa̱bi̱i̱ nda̱wa̱á: “Numuu rí bi̱ nañajunʼ kaʼyoo rí mada̱ʼ” (Luc. 10:7). Ikhaa ni̱jkha̱nú ndiʼyoo xú káʼnii nindxu̱u̱ rí matiejunʼ gakhi̱i̱.

12. Xú káʼnii texto nasngájma dí Biblia naʼsngáa ga̱jma̱a̱ numuu rí matiejunʼ gakhi̱i̱ rá.

¹² Apóstol Pablo ma̱ngaa ndiʼyoo rí xú káʼnii nindxu̱u̱ rí matiejunʼ gakhi̱i̱. Ikhaa nijmuu itháan mbiʼi mú maʼtáraʼa ga̱jma̱a̱ mu maʼsngáa rí niʼthí Jesús. Mú, ma̱ngaa niñajunʼ mu mambáyuminaʼ. Bi̱ tesalonicenses ndiyáá rí “niñajunʼxu mbiʼi mbruʼun rí asndu túya̱a̱xu xu ga̱jma̱a̱ ninimíjnaxu mu xúʼko̱ ikháanʼla xakiéʼkala mbújkha̱a̱” (2 Tes. 3:8; Hech. 20:34, 35). Mbáa ga̱jma̱a̱ ajngáa rígi̱ nindoo gáʼthi rí niʼni náa Corinto. Ikhí niguánu ga̱jma̱a̱ Áquila ma̱ngaa Priscila “niñajunʼ gajmíi̱n ikhiin”, numuu rí ‹ñajunʼ ndrígóo nindxu̱u̱ rí naʼni guʼwá xtíin›. Índo̱ niʼthí rí niñajunʼ “mbiʼi ga̱jma̱a̱ mbruʼun” raʼkháa rúʼko̱ eyoo gáʼthi rí táya̱a̱ xu̱u̱ʼ. Mbá xkri̱da, mbiʼi sábado niʼtáruʼun judios bi̱ tséñajunʼ mbiʼi rúʼko̱ (Hech. 13:14-16, 42-44; 16:13; 18:1-4).

13. Ndiéjunʼ gándoo gájmañulú náa xkridoo Pablo rá.

¹³ Apóstol Pablo nixná mbá májánʼ xkri̱da. Maski má ndiyóoʼ mañajunʼ gakhi̱i̱, tániñuuʼ raʼtáraʼa má xúʼko̱ “ajngáa rí májánʼ ndrígóo Dios” (Rom. 15:16; 2 Cor. 11:23). Ga̱jma̱a̱ nimbáñun eʼwíínʼ mu muni xó má ikhaa. Áquila ga̱jma̱a̱ Priscila ninindxu̱ún “bi̱ niñajunʼ gajmíi̱nʼ náa Cristo Jesús” (Rom. 12:11; 16:3). Pablo nixnúún xtágabu bi̱ Corinto rí muni má xúʼko̱ ñajunʼ ndrígóo Señor› (1 Cor. 15:58; 2 Cor. 9:8). Ga̱jma̱a̱ ikhaa niʼnirámáʼ: “Á mu mbáa tsíyoo gáñajunʼ, ragíʼmaa makuiʼtsu” (2 Tes. 3:10).

14. Ndiéjunʼ nindoo gáʼthi Jesús ga̱jma̱a̱ ajngáa rí na̱ʼkha̱ náa Juan 14:12 rá.

¹⁴ Ñajunʼ rí itháan gíʼdoo numuu náa iwáá mbiʼi rí kuwáanʼ, nindxu̱u̱ rí muʼtáraʼa ga̱jma̱a̱ muʼsngúún xa̱bu̱. Jesús niʼthí rí xa̱bi̱i̱ muni ñajunʼ rí itháan mba̱ʼu̱ ki xóo rí niʼni ikhaa (atraxnuu Juan 14:12). * Tándoo gáʼthi rí muni milagru xó má ikhaa, rí phú nindoo gáʼthi rí mutaraʼa ga̱jma̱a̱ muʼsngáa náa i̱ʼwáʼ xuajin, ga̱jma̱a̱ mutaruʼun itháan mbaʼin xa̱bu̱ ki xóo nákha nixtáa ikhaa.

15. Ndiéjunʼ gíʼmaa muraximíjna̱ ga̱jma̱a̱ náá numuu rá.

¹⁵ Á mu kuaʼdáá mbá ñajunʼ, gurajximíjnalú: “Lá najmaʼniúnʼ xóo mbáa bi̱ nañajunʼ májánʼ rá’. Lá naguámbó’ wapháá ñajunʼ ga̱jma̱a̱ lá  nani májánʼ xó má eʼngoʼ rá’”. Á mu xúʼko̱, mbáa jefe ndrígúlú mbaʼyoo rí májánʼ e̱ʼni̱ ga̱jma̱a̱ bi̱ nuñajunʼ gajmiúlú maʼndún itháan mudxawíín índo̱ nuʼthúún ajngáa rí májánʼ. Ga̱jma̱a̱ numuu ñajunʼ rí nuʼtáraʼa ma̱ngaa rí nuʼsngúún xa̱bu̱, guraʼjximíjnalú: “Lá najmaʼniúnʼ xóo mbáa bi̱ naʼniminaʼ wéñuʼ maʼtáraʼa ráʼ. Lá nanirataminaʼ mu magíʼdu̱u̱ matamíjná gajmíi̱nʼ xa̱bu̱ ráʼ. Lá natangu̱ún nacha̱ gáñuun xa̱bu̱ bi̱ nandún mudxawíín ráʼ. Ga̱jma̱a̱ lá nayambáá náa mixtiʼkhu ñajunʼ rí narígá mu majuiʼtáraʼa ráʼ.” Á mu nuriʼña̱a̱ dí xúʼko̱, mbáa gajkhun manigulúʼ ñajunʼ rí gúʼni.

16. Xú káʼnii mixtiʼkhu ndiʼyoo Jesús gajmíi̱n xa̱bi̱i̱ rí mbuya̱a̱xu̱únʼ ga̱jma̱a̱ xú káʼnii eku̱mu̱ún mbaʼin xa̱bu̱ rí mbiʼi xúgi̱ rá.

¹⁶ Jesús ndiʼyoo rí nguáná ikhaa gajmíi̱n xa̱bi̱i̱ ndañúnʼ rí mbu̱ya̱a̱xu̱únʼ. Mú nákha ikhú, xó má xúgi̱, mbaʼin xa̱bu̱ nikumu̱ún xóo xa̱bu̱ bi̱ nigiʼdoo, bi̱ niʼthí Jesús náa mbá xkri̱da. Xa̱bu̱ bugi̱ niʼtáminaʼ “ayáaxa̱a̱ʼ, atsiʼtsu, agi̱i̱n, tsímáá gáraxtaa” (Luc. 12:19; 2 Tim. 3:4). Xa̱bu̱ bugi̱ ndiʼyoo dí ra̱ʼkhá tháán gíʼdoo numuu rí mba̱ya̱a̱ xu̱u̱ʼ ga̱jma̱a̱ maʼni gagiminaʼ. Mú Jesús gajmíi̱n xa̱bi̱i̱ na̱nguá nixmiéjúúnʼ maguaʼdáá ga̱jma̱a̱ rí makuwa májánʼ.

17. Ndiéjunʼ e̱ʼni̱ índo̱ nduʼya̱a̱xúlú rá.

¹⁷ Nuʼnimíjna̱ mbuʼyaridáá Jesús índo̱ najmulú mbiʼi rí mbu̱ʼya̱axúlú mu mu̱ʼgua̱ gúʼtaraʼa ga̱jma̱a̱ mu mu̱ʼgua̱lú reunión. Ga̱jma̱a̱ nduʼyáá rí gíʼdoo wéñuʼ numuu nájma̱ ñajunʼ rígi̱ rí mitsáʼkháan, ikha jngó nu̱ʼni̱ asndu xó má eʼngo̱o̱ mu xúniʼñájmán (Heb. 10:24, 25). Rí nu̱ʼni̱, najkualú reunión ga̱jma̱a̱ nduʼyáá náa ma̱ndoo muʼthúún xa̱bu̱ rí gajkhun, tséʼniuu má asndu náá ga̱jma̱a̱ á mu na̱jkua̱ pasia náa i̱ʼwáʼ xuajen (2 Tim. 4:2).

18. Ndiéjunʼ rí nandoo Rey ndrígúlú Jesucristo muʼni rá.

¹⁸ Dí ra̱ʼkhá tháán nadxulú dí Rey ndrígúlú, Jesucristo, nakro̱ʼo̱o̱ kaʼyulú ga̱jma̱a̱ rí nambáyulúʼ mbuʼyáá awa̱án ñajunʼ ga̱jma̱a̱ rí mbuʼya̱a̱xúlú (Heb. 4:15). Ikhaa nandoo rí mbuʼya̱a̱ xúlú xó má ndayóoʼ. Ma̱ngaa nandoo rí muñejunlú gakhi̱i̱ mu mutsi rí itháán ndayúlú. Mú ma̱ngaa nandoo rí mu̱ʼni̱ tsiakimijna mú mu̱ʼni̱ ñajúnʼ dí ra̱ʼkhá tháán mitsaanʼ rí muʼsngúún xa̱bu̱. Náa i̱mba̱ artículo mbuʼyáá ndiéjunʼ niʼni Jesús mú maʼnikawáánʼ náa kuwáanʼlu xóo yumbáá.