NGEREN U TIMEN SHA MI 49
‘Shighe ngu u’ Eren Tom shi Memen
“Va nen . . . hen ape or nan lu ga yô, va mem nen kpuaa.”—MAR. 6:31.
ICAM 143 Za Hemen U Kuran shi Keghen Iyange I Yehova
KWAGH U I TIM SHA MI KEN NGEREN NE YÔ *
1. Ior kpishi mba nengen tom nena?
IOR kpishi mba nengen tom ape we u lu la nena? Ken ityar kpishi, ior mba hemban eren tom kpoghuloo hegen cii. Mbagen ka ve er tom je i gba jaki. Mba lun a shie u memen shin lun vea icombor ve gayô henen kwagh u Aôndo tsô kpaa ga. (Orpa. 2:23) Kpa zayol ugen di yô, ior kpishi soo tom ga nahan ka ve keren akaa a vea kôr ave sha mi sha er vea er tom ga yô.—Anz. 26:13, 14.
2-3. Ka ikyav i nyi Yehova man Yesu ve ver sha kwagh u tomo?
2 Ior mbagen ken tar ne ka ve er tom i ngee i gande, mbagen di soo tom ga. Kpa nenge ase gbenda u Yehova man Yesu ve nengen tom la. Yehova soo tom u eren je ka u henen a hen ga. Yesu yange pase kwagh ne wang. A kaa ér: “Terem ngu eren tom zan zan hegen, nahan mo kpa m ngu eren tom her.” (Yoh. 5:17) Hen ase sha tom u vesen u Aôndo yange er shie u gba mbatyomov kua tar sha won cii la. Shi ka se nenge a akaa a doonashe kpishi a Aôndo a gbe la shin tar. Orpasalmi yange kaa ér: “Kpash! TERE, ityom You ngi atô kposo kposo, U er i cii sha kwaghfan, tar iv a akaa a U gbe la.”—Ps. 104:24.
3 Yesu yange dondo ikyav i Ter na. Yange wase Ter na shie u “A er Usha la.” Yesu lu vea Yehova “er or u fan tom nahan.” (Anz. 8:27-31) Yesu va ve shin tar yô, a er tom u doon kpishi. Tom la lu un er ka kwaghyan nahan, shi u tese ér ka Aôndo a tindi un ye.—Yoh. 4:34; 5:36; 14:10.
4. Ka nyi se fatyô u henen hen Yehova man Yesu sha kwagh u memene?
4 Ikyav i Yehova man Yesu ve ver i eren tom kpoghuloo la tese ér maa ka u se kera memen a mem sha won gaa? Ei, ka nahala ga. Yehova vôron ga, nahan ityôkyaa ngi i una tema a mem keng ga. Ka mimi, Bibilo kaa ér Yehova yange gbe sha man tar been yô, “A mem, yôhôr Un iyol.” (Eks. 31:17) Kpa lu sha ci u vôr ga, ikyav tese wang ér Yehova yange hide tile nenge akaa a A gba la nahan doo un. Heela tseegh ga, er Yesu kpa eren tom kpoghuloo shie u lu shin tar la nahan kpa, yange a ker shie a mem shi a ya kwagh vea azende a na.—Mat. 14:13; Luka 7:34.
5. Ka mtaver u nyi ior kpishi ka ve tagher a mini?
5 Bibilo kaa a ior mba Aôndo ér ve lu mba eren tom. Gba u vea eren tom kpoghuloo, vea lu mba wan hwev ga. (Anz. 15:19) Alaghga u eren tom sha er u zuan a kwagh u nengen sha tsombor wou yô. Shi mbadondon Kristu cii i na ve tom u pasen ior loho u dedoo. Nahan kpa gba u u memen tsembelee. Ashie agen ka i taver we u veren shie u u eren tom shi u pasen kwagh shi u memen tsembelee yôô? Se er nan ve se fa shie u i doo u se tôô u eren tom man u se tôô u memene?
ER I DOO U SE NENGEN SHIE U EREN TOM MAN IAN I MEMEN YÔ
6. Marku 6:30-34 tese ér Yesu nengen tom man ian i memen er i doo u a lu la nena?
6 Gba hange hange u se nengen tom sha gbenda u vough. Jijingi yange mgbegha Tor Solomon nger ér: “Hanma kwagh ngu a . . . shighe” na. Yange ter kwagh u shie u môôr man shie u maan man u mlia kua shie u ahan man u yaren kwan shin vinen amar kua shie u eren akaa agen kpaa. (Orpa. 3:1-8) Kwagh ne tese wang ér akaa nga ahar a a lu hange hange ken uma yô, ka tom u eren man ian i memen. Yesu kpa yange nengen tom man ian i memen er i doo u a lu la. Kwa gen la, mbaapostoli za er tom u pasen kwagh zan zan je yô, ‘ve zua a shighe u memen shin yan kwaghyan tsô kpaa ga.’ Mba za hidi yô, Yesu kaa a ve ér: “Va nen ne tseegh hen ape or nan lu ga yô, va mem nen kpuaa.” (Ôr Marku 6:30-34.) Er Yesu man mbahenen nav zuan a ian i memen hanma shie u ve soo cii ga nahan kpa, Yesu fa je ér gba u ve cii vea memen.
7. Aluer se time sha kwagh u tindi u Iyange i Memen la yô, kwagh la una wase se nena?
7 Ashie agen ka i gba keng keng u se mem shin se gema gbenda u se eren akaa ayange ayange la. Ngise Aôndo kaa a ior nav ér ve eren kwagh ugen u a wase se u nengen a kwagh ne wang yô; ka Iyange i Memen i Aôndo na Mbaiserael ken hanma kasua la. Se mba sha ikyev i Tindi u Mose ga, kpa aluer se time sha kwagh u Tindi shon ôr sha kwagh u Iyange i Memen la yô, se zua a mtsera ker. Kwagh la una wase se u gbidyen kwar sha gbenda u se nengen tom kua ian i memen la.
IYANGE I MEMEN LA LU SHIE U MEMEN SHI CIVIR AÔNDO
8. Sha kwagh u Ekesodu 31:12-15 a ôr yô, Iyange i Memen la lu iyange i eren nyi?
8 Mkaanem ma Aôndo kaa ér Aôndo yange gba akaa “ayange” ataratar, been yô, a mem u gban akaa shin tar. (Gen. 2:2) Kpa Yehova soo tom u eren, shi sha igbenda igen yô, “ngu eren tom zan zan hegen.” (Yoh. 5:17) Aôndo yange er tom “ayange” ataratar maa mem sha “iyange” i sha utaankaruhar, nahan a kaa a Mbaiserael ér ve kpa ve eren tom ayange ataratar nahan ve memen sha iyange i sha utaankaruhar la. Aôndo yange kaa ér Iyange i Memen la ka ikyav hen atô na man Mbaiserael. Lu iyange ‘i memen tom cii, lu icighankwagh u TER je.’ (Ôr Ekesodu 31:12-15.) Lu kwagh u or a cihi a er tom sha Iyange i Memen la ga, kua mbayev man ikpan man zendenya cii. (Eks. 20:10) Sha nahan yô, ior ve hemba lun a shie u veren ishima sha akaa a ken jijingi.
9. Ka mnenge u shami ga u nyi ior mbagen lu a mi sha kwagh u Iyange i Memen sha ayange a Yesu laa?
9 Iyange i Memen yange i doo sha ci u ior mba Aôndo; kpa sha shie u Yesu la, mbahemenev mba kwaghaôndo wa atindi sha kwagh u Iyange i Memen la za per uwegh. Yange ve kaa ér aluer or tôndo asagher a uiyia ér nana ya shin or bee or angev sha iyange i memen yô, nan per tindi. (Mar. 2:23-27; 3:2-5) Kpa lu kwagh u Aôndo soo la ga. Yesu kpa yange a pase hanma or u nan kegh ato cii mnenge u Aôndo sha ikyaa ne wang.
Tsombor u Yesu yange u tôô Iyange i Memen la u hemban veren ishima sha akaa a ken jijingi (Nenge ikyumhiange i sha 10) *
10. Ka nyi se fatyô u henen ken Mateu 12:9-12 sha gbenda u Yesu nengen Iyange i Memen laa?
10 Yesu kua Mbayuda mba ve dondo un la cii ve kuran Iyange i Memen sha ci u ve lu sha ikyev i Tindi u Mose. * Kpa Yesu tese sha mkaan man sha ieren ér ka kwaghbo u eren akaa a dedoo shin wasen ior sha Iyange i Memen ga. A ôr jighilii wener: “Tindi yange u eren kwagh u dedoo sha Iyange i Memen ga.” (Ôr Mateu 12:9-12.) Yange nenge ér aluer or er kwagh u dedoo shin nan wase or sha Iyange i Memen yô, nan per tindi ga. Akaa a yange er la tese ér a kav ityôkyaa i vesen i i ne ve Ter na a kaa a ior ér ve memen sha Iyange i Memen yô. Yange ior a mem tom sha iyange la yô, ve hemba veren ishima sha akaa a ken jijingi. Yesu vese hen tsombor u u civir Aôndo sha Iyange i Memen yô. Se fa kwagh ne sha ci u i ôr kwagh u Yesu shie u za hen ijiir na ken geri u Nasareti la ér: “A za nyôr ken shinagoge sha Iyange i Memen, er vanden eren keke nahan. Maa a mough a tile sha ér una ôr ruamabera.”—Luka 4:15-19.
WE U NENGEN TOM NENA?
11. Ka an yange nan ver Yesu ikyav i dedoo sha kwagh u tomo?
11 Yosev yange tese Yesu tom kapinta shi tese un gbenda u Aôndo a nengen tom la. (Mat. 13:55, 56) Shi Yesu yange una nengen er Yosev eren tom kpoghuloo hanma sev u nengen sha tsombor na yô. Kwagh er doo yô, Yesu yange va kaa a mbahenen nav ér: “Ortom kuma injar i nan.” (Luka 10:7) Kwagh ne tese ér Yesu yange lan kwagh u tom u eren kpoghuloo ga.
12. Ka avur a han nahan a tese er Bibilo i nengen tom u eren kpoghuloo?
12 Apostoli Paulu kpa yange fa u eren tom kpoghuloo. Tom na u vesen yô, lu u pasen ior kwagh u Yesu kua akaa a Yesu tese la. Kpa Paulu eren tom u una zuan a kwagh u nengen sha iyol na yô. Ior mba ken Tesalonika fa er “lu eren tom kpoghuloo sha ican tugh man atetan” sha er una ‘yuhwa or môm ikyav’ ga yô. (2 Tes. 3:8; Aer. 20:34, 35) Alaghga Paulu lu ôron kwagh u tom na u eren tenti la. Shie u lu ken Korinte la, lu tsan vea Akwila man Prisila shi “lu eren tom a ve imôngo, gadia ve eren tenti.” Kpa u ngu wer kwagh u Bibilo i kaa ér Paulu eren tom “tugh man atetan” la maa tese ér memen ga ze. Yange a va mem tom la ashie agen, er sha Iyange i Memen nahan. Yange a tôô Iyange i Memen la u eren shiada hen Mbayuda sha ci u ve kpa ve eren tom sha Iyange i Memen ga.—Aer. 13:14-16, 42-44; 16:13; 18:1-4.
13. Ka nyi se fatyô u henen ken ikyav i Paulu laa?
13 Apostoli Paulu ver ikyav i dedoo. Yange eren tom u zuan a inyaregh, kpa shi a “eren icighantom u pasen loho u dedoo u Aôndo” la hanma shie. (Rom. 15:16; 2 Kor. 11:23) Yange taver mbagen kpa ishima ér ve pasen kwagh hanma shie. Sha nahan yô, Akwila man Prisila lu ‘mba eren tom a na imôngo ken Kristu Yesu.’ (Rom. 12:11; 16:3) Paulu yange kaa a Mbakorinte ér ve luun a “akaa a eren kpishi ken tom u Ter.” (1 Kor. 15:58; 2 Kor. 9:8) Yehova shi yange mgbegha apostoli Paulu nger ér: “Aluer or soo u eren tom ga yô, kwaghyan kpa nana̱ de ye ga.”—2 Tes. 3:10.
14. Shie u Yesu ôr mkaanem ma ken Yohane 14:12 la, lu ôron ér nyi?
14 Tom u u hembe lun hange hange ken ayange a masejime ne yô, ka tom u pasen kwagh shi geman ior hingir mbahenen. Jim je yô, Yesu yange tsenga ôron ér mbahenen nav vea er tom ne a hemba un! (Ôr Yohane 14:12.) Yange lu kaan ér se er uivande er un nahan ga. Kpa lu kaan ér mbadondon un vea pase kwagh shi vea tese ior a hemba ngeen shi a hemba samber sha ajiir kposo kposo shi vea hemba eren tom shon shie gôgônan.
15. Ka mbampin mba nyi nahan i doo u se pine ayol a ase, man ka sha ci u nyi?
15 Aluer u eren tom u keren inyaregh yô, pine iyol you mbampin mban: ‘I fam hen ijiirtom yam ér m ngu or u eren tom kpoghuloo kpa? Ka m bee tom wam sha shie shi m er u sha afatyô wam cii kpa?’ Aluer u na mlumun wer een yô, alaghga a hemba lun or u nan tee u tom la zange u nan we jighjigh. Shi alaghga ior mba hen ijiirtom you la kpa vea hemba keghen ato a loho u Tartor la. Hide sha vegher u tom u pasen kwagh shi tesen ior la kpa, pine iyol you wer: ‘I fam ér m eren tom u pasen kwagh kpoghuloo kpa? Ka m wa iyol tsembelee u za lamen a ior sha kwa hiihii kpa? Ka m hide fele m za sôr ior mba ve tese isharen la kpa? M pasen kwagh sha igbenda kposo kposo i i pasen kwagh a mi la kpa?’ Aluer u na mlumun sha mbampin mban wer een yô, a saan we iyol ken tom wou.
WE U NENGEN IAN I MEMEN NENA?
16. Gbenda u Yesu kua mbaapostoli nengen ian i memen la kaha a mnenge u ior kpishi nyian nena?
16 Yesu yange a fa er i gbe u un kua mbaapostoli nav vea mem ashie agen yô. Nahan kpa ior kpishi sha ayange a Yesu la man sha ayange ase ne mba er ornyar u Yesu ôr kwagh na ken injakwagh la nahan. Or la yange kaa a iyol na ér: “De ze iyol you iyol ga, ya kwagh, ma kwagh, i saan we iyol.” (Luka 12:19; 2 Tim. 3:4) Yange gema ishima na cii ver sha kwagh u memen shi keren akaa a nan un msaanyol. Kpa Yesu man mbaapostoli yô lu nahan ga, ve shi sha u keren akaa a nan ve msaanyol ga.
Aluer se mba a mnenge u vough sha kwagh u tom man ian i memen yô, se hemba veren ishima sha u eren akaa a dedoo a nan se msaanyol (Nenge ikyumhiange i sha 17) *
17. Ka se er tom a memyol wase nena?
17 Nyian ne, ka se nôngo ser se dondo ikyav i Yesu la sha u eren tom a shie wase u memyol la sha u memen tseegh ga, kpa shi eren akaa a dedoo sha u pasen ior kwagh shi zan mbamkombo mba Mbakristu. Jim je yô, tom u geman ior hingir mbahenen la kua mbamkombo mba zan ka ve lu se kwagh u hange hange, nahan ka se nôngo sha afatyô wase cii se eren akaa a ken mciviraôndo ne hanma shie. (Heb. 10:24, 25) Ka sea lu ken memyol je kpa, se za hemen u zan mbamkombo hanma ijiir i se lu cii, shi se keren aan a se lam a ior mba se zough a ve yô.—2 Tim. 4:2.
18. Ka nyi Tor wase Yesu Kristu a soo ér se eren?
18 Doo se kpishi er Tor wase Yesu Kristu a veren ishima ér se er kwagh i hemba agee ase ga shi a wasen se u lun a mnenge u vough sha kwagh u tom man ian i memen nahan! (Heb. 4:15) A soo ér se memen tsembelee. Shi a soo ér se eren tom kpoghuloo sha er se zua a kwagh u nengen sha iyol yase yô. Heela tseegh ga, a soo ér se eren tom u geman ior hingir mbahenen u nan se msaanyol la kpaa. Se lu timen sha tom u Yesu a er u duen a vese ken kpan kera, yiman se la ken ngeren u a dondo ne.
ICAM 38 Una Taver We
^ par. 5 Ruamabera tese se gbenda u i doo u se nengen tom kua ian i memen yô. Ngeren ne ôr kwagh u Iyange i Memen i Aôndo na Mbaiserael ken hanma kasua la sha u wasen se u gbidyen kwar nengen ieren yase sha kwagh u tom kua ian i memen.
^ par. 10 Mbahenen mban yange ve numben sha kwagh u Iyange i Memen ga je yô, ve kera za hemen u nungwan ilyôghonough mbi za shighen sha ikyom i Yesu la ga, zan zan Iyange i Memen kar been.—Luka 23:55, 56.
