Huelu cuifi mu quimngequelafui chumngelu ñi mülen huesaque cutran ca tati pu che quimquelafui ñi chumal tañi contunoaeteu tüfa, feimu fentren engün larqueingün. Huelu pu cientifico quimürpuingün ñi tul cutran-ngequefel tüfa. Quimngelu tüfachi dungu, feula pu che quimniei chumngelu cutranrumequei, quimniei ñi chumal tañi contunoaeteu tüfa, ca chumngechi lahuentuñmangeal ti tul cutran. Quimün mu tüfa, pu che doi tremoleafui ca alüñmayafui ñi mongen engün.

Huelu mülei caquelu falinque ramtun ngüneduamfalngelu:

• ¿Chumngei ta Chau Dios?

• ¿Inei am ta Jesús?

• ¿Chem am chi Chau Dios ñi Gobierno?

• ¿Chumlerpuaiñ iñchiñ?

Fentren che quimlu ti rüf dungu tüfachi ramtun mu müna ayüucülei, eimi ca femngechi duamcüleafuimi.

Fillque dungu mülei, fei pu che müna cüdautuquei quimal tuchi ta rüfngei, feimu ramtuhuafui chi: “Cüpa quimfuli quiñe dungu, ¿rüf quimpeafun mai?” piafui. ¿Chumngelu pu che ramtuuquei tüfa?

Fentren che feipiquei: “Manelfalngelai pu autoridad ca fütraque empresa”. Ca feipiquei: “Com ñi feipingeel television, internet ca radio mu manelfalngelai ca”. ¿Chumngelu? Fei tüfa engün entulu quiñe nütram, quiñeque mu quimeltuquei quisu tañi raquiduamqueel müten, cafei reyüconquei ti rüf dungu coilaque dungu meu, cam re coilatuquei müten. Femngechi felelu cai ti dungu, caquerumei chem mu ñi maneluucülen ta che.

Felei llemai, rume cüdaungei quimal ti rüf dungu. Huelu eimi quimürpuafuimi ti rüf dungu feichi falinque ramtun ngüneduamfalngelu. ¿Chumngechi? Raquiduamnge tüfa: müte falinole rume quiñe dungu, eimi eluuqueimi quimürpual ñi rüfngepen mai tüfa. Fei ca femngechi femafuimi tami quimal ti rüf dungu.

Fill antü cüpa quimiyiñ tati rüfngelu ca tati rüfngenolu. Ñi femquen quiñe domo, Jessica pingelu, pengeli tüfa. Quisu feipi: “Tañi domo püñeñ iñmule mani, tüfa rume cutranelafeyu. Pichin mani rehuall iñmufule, layafui cütu” pi. Fei, ¿chumquei Jessica? Ngillacamelu iyael, cüme ngüneduamquefi. Quisu feipi: “Hune cüme papeltufiñ chem ingrediente ñi tuculngequen feichi iyael. Fei hula doi cüme ngüneduamquen ca mütrümquefiñ cütu tati empresa deumaquelu feichi iyael, fei ñi quimal ñi niepen mai pichin mani rume. Cafei fillque dungu ngüneduamquefiñ ñi quimal ñi manelfalngepen mai chumngechi ñi deumaqueel tati iyael feichi empresa”, feipi Jessica.

Rume eluucülei Jessica ñi quimal ti rüf dungu, rume falin-ngelu cai tañi püñeñ meu. Eimi ca femngechi dungu rupamequelaimi chi, huelu Jessica reque, eluucüleafuimi tami quimal ñi rüfngepen mai fillque dungu tami mongen meu, ¿chumngechi? Tüfa tami femafel:

• Quimnge com ti dungu nüucülelu.

• Cüme ngüneduamnge com tami quimürpuafel.

• Ramtuunge: “¿Manelfalngepei mai chem tañi feipingen?”.

Femngechi femülmi, quimürpuafuimi tati rüf dungu tati falinque dungu meu. Huelu, ¿chem quelluafeimu cai?

Feichi domo Jessica ca femngechi femi ñi ngüneduamal chem quimeltuquei Biblia. Quisu feipi: “Cüme papeltufiñ Biblia ca ngüneduamün com ti dungu nüucülelu, fei ñi quimürpual ti rüf dungu mülelu Biblia mu”. Jessica reque, fentren che quimürpui chem quimeltuquei Biblia tüfachi ramtun mu:

• ¿Chumal elcünungeiñ mapu mu?

• ¿Chumlequetui pu layelu?

• ¿Chumngelu cutrancauqueiñ?

• ¿Chummequei Chau Dios ñi cutrancauhuenoal ta che?

• ¿Chumngechi ayüucüleafuiñ taiñ pu che iñchiñ?

Tami quimal tüfa ca caquelu falinque ramtun, papeltuafuimi ti Biblia ca conafuimi ti sitio www.pr418.com mu.