Walja waranqa maranakaw kunatsa contagioso usunakajj utji uk jaqenakajj jan yatipkänti, ukhamïpanwa uka usunakajj walja millón jaqenakar jiwarayawayi. Tiempompejja, uka toqet kunatï cheqäki ukwa cientificonakajj yatjjatawayapjje. Uka yatjjatatarjamajja, bacterianak kawsa, kunayman virus utjatap kawsaw walja usunakajj utjawayi, ukaw yatisiwayi. Ukanak yatiñaw kunayman usunakat jarkʼaqasiñatakisa, qollasiñatakis yanaptʼawayi, ukhamat walja millón jaqenakajj jukʼamp tiempo jan usuntas jakapjjañapataki.

¿Yaqha wakiskir jisktʼanakat kamsasirakispasa? ¿Akjjar jutki uka jisktʼanakan qhanañchäwip yatiñajj jakäwiman yanaptʼiristamti?

• ¿Khitis Diosajja?

• ¿Khitis Jesucristojja?

• ¿Kunas Diosan Reinopajja?

• ¿Kunas jutïrin pasani?

Walja millón jaqenakaw uka jisktʼanakan qhanañchäwip jikjjatasajj sumak jakasjjapjje. Uka jisktʼanakan qhanañchäwipajj ukhamarakiw jumarojj yanaptʼiristam.

Inas jumajj akham jisktʼassta: ‘¿Cheqapunit mä kunat kunatï cheqäki ukajj yatisispa?’ sasa. Cheqas kunatï kʼarïki ukasa, kunatï cheqäki ukas janiw facilak yatiñjamäkiti, wali chʼamäjjewa. ¿Kunatsa ukhamäpacha?

Walja jaqenakajja, janiw kuntï gobiernonakasa, empresanakasa, periodistanakas sapki ukar confiyjjapjjeti. Jupanakajj cheqti parlapjje janicha, amuyunakapakcha parlapjje, parti kʼarimpcha parlapjje jan ukajj kʼarinakcha parlapjje uk amuyañajj chʼamakiwa. Confiyañasa sum yatjjatañas aka tiempon chʼamakëjjewa, ukatwa mä kunat kunatï qhanañchaski ukar jaqenakajj jan confiyjjapjjeti, kunatï cheqpachapun paski ukatsa pächasjjapjjewa.

Ukhamäkchisa, jakäwisan kuna wakiskir jisktʼanakatï utjkistu ukanakan qhanañchäwip jikjjatsnawa. ¿Kunjams uk lursna? Kunjamtï yaqha jisktʼanakan qhanañchäwip thaqktan ukhamwa lursna.

Cheqas sapüruw kunatï cheqäki uk yatiñ muntanjja. Jessica warmit amuytʼañäni, jupajj kuna manqʼañanakatï jan akchʼas manianïki (cacahuete) ukanak thaqañatakiw chʼamachasi. Jupajj akham siwa: “Wawajajja maniar alergianïtap laykojj janiw ni mä jukʼsa uk manqʼañapäkiti, ukhamat jan jiwañapataki. Ukatwa janïr mä kun alkasajj mä manqʼañan uchatäki uka etiqueta liytʼta, ukhamat kunanakat luratasa uk yatiñataki. Ukatsti uka toqet yatjjataskaktwa, uka manqʼañanak lurki uka fabricarus jawsaraktwa, ukhamat fabrican luraski uka manqʼañanakarojj maniamp jan munkasin uchasiti janicha uk yatiñataki. Internet toqsa yatjjataraktwa, ukhamat fabricajj manqʼañanak sumti luri janicha uk yatiñataki” sasa.

Kuna jisktʼanakatï utjkistu ukan qhanañchäwip sapür thaqañajj inas jan sinti wakiskirïkchiti. Ukampis kunjamtï Jessica warmejj lurki ukhamwa luraraksna:

• Yatjjatsnawa.

• Ukanakat jukʼampwa yatjjatsna.

• Kawkitsa juti ukajj confiykañati janicha ukwa yatjjatsna.

Ukham lurañajja, jakäwisan kuna wakiskir jisktʼanakatï utjkistu ukanakan qhanañchäwip jikjjatañatakiw yanaptʼistaspa. Kunjamsa uk lursna uk jichhajj uñjañäni.

Yessica warmejj kunjamtï jan manian manqʼañanak wawapatak thaqkejja, uka pachparakwa Bibliajj kuntï cheqpachapun yatichki uk yatiñatakejj luri. Jupajj akham siwa: “Biblia wali amuyump liyiña, kuntï liykta ukat jukʼamp yatjjatañaw kuntï Bibliajj cheqpachapun yatichki uk yatiñatakejj yanaptʼawayitu” sasa. Yessica warmjamajj walja millón jaqenakaw lurapjjaraki. Ukham lurasajja, akjjar jutki uka jisktʼanakat Bibliajj kamsisa ukwa yatjjatawayapjje:

• ¿Jaqenakajj kuna amtamp luratätansa?

• ¿Maynejj jiwjje ukhajj kunas pasjje?

• ¿Kunatsa tʼaqesiñajj utjpacha?

• ¿Diosajj kunjamsa tʼaqesiñ chhaqtayani?

• ¿Kunjamsa familiasamp kusisit jakassna?

Jumajj uka jisktʼanakana ukat yaqha jisktʼanakan qhanañchäwipjja, Biblia liyisaw jikjjatasma, Internetan www.pr418.com cheqar mantasaw uka toqet jukʼamp yatjjatarakisma.