Laa’n, sran’m be siman kosan sɔ’n i su tɛlɛ’n. Ɔ maan tukpacɛ sɔ’m be kunnin sran miliɔn kaka. Sanngɛ siansifuɛ’m be wa sili tukpacɛ sɔ’m be su ndɛ nanwlɛ’n. Yɛle kɛ be wunnin i wlɛ kɛ kakaa mma wie mun yɛ be di i sɔ junman’n niɔn. Kɛ be wa wunnin i sɔ liɛ’n i wlɛ’n, be wa yili ayre wie mun. I sɔ’n ti’n, sran’m b’a tɔman tukpacɛ dan kun yɛ be cɛ nguan nun tra laa’n.

E si kɛ kosan cinnjin wie mun ekun be o lɛ mɔ sran’m be fa usa be wun-ɔn. Sɛ sran’m be si be su tɛlɛ’n, ɔ́ kwlá yó be wun sa ye. Kosan sɔ’m be nun wie yɛ:

• ?Wan yɛle Ɲanmiɛn Kpli?

• ?Wan yɛle Zezi Klisi?

• ?Ngue yɛle Ɲanmiɛn i Famiɛn dilɛ’n?

• ?Cɛn wie lele’n, e liɛ yó sɛ?

Kɛ sran miliɔn kpanngban be sili kosan sɔ’m be su tɛlɛ’n, be mɛn dilɛ wafa’n kacili. Kosan sɔ’m be su tɛlɛ’n kwla yo amun ye wie.

Atrɛkpa’n, amun kwla usa amun wun kɛ: ?Sran kun sa’n, ɔ kwla si ninnge kwlaa nga be o mɛn’n nun’n be su ndɛ nanwlɛ’n? Afin ninnge sunman be su ndɛ nanwlɛ’n i silɛ’n ti kekle. ?Ngue ti-ɔ?

 Andɛ’n, sran kpanngban kpa be lafiman su kɛ awa mun nin aata difuɛ dandan’m be di nanwlɛ. Kpɛkun be lafiman su kɛ zronali annzɛ televiziɔn nun ndɛ’m be kwlaa be ti nanwlɛ. Asa ekun’n, be siman sɛ ndɛ nga be ti be’n, be ti nanwlɛ annzɛ ato-o. Afin ato ndɛ’m b’a tru mɛn nun dan. I kwlaa sɔ’n ti’n, sran’m be lafiman be wiengu’m be su kun. Ɔ maan, kɛ be ti ndɛ kun’n, kannzɛ ndɛ sɔ’n ti nanwlɛ bɔbɔ’n, i su falɛ’n ti kekle. I sɔ’n ti’n, sɛ ndɛ sɔ’n kwla yo be wun sa ye-o, annzɛ ɔ kwlá yoman be wun sa ye-o, be wunmɛn i wlɛ.

Ɔ nin i sɔ ngba’n, e kwla si kosan cinnjin wie’m be su tɛlɛ’n. ?Wafa sɛ? Yɛle kɛ e kwla yo ninnge kunngba nga e yo be aliɛ ba kwlaa nun’n naan y’a si kosan wie mɔ be timan cinnjin dan’n be su be tɛlɛ’n.

Sɛ é kwlá sé’n cɛn kwlaa’n, e kunndɛ ninnge wie’m be su ndɛ nanwlɛ’n. I sɔ yɛ bla kun m’ɔ suan Zesika’n ɔ yo-ɔ. Ɔ seli kɛ: “Kɛ min wa bla’n di ngatɛ’n, ɔ kle i yalɛ tɛtɛ kpa. Ɔ maan, sɛ ɔ di like wie naan ngatɛ kaan sa o nun’n, ɔ kwla kun i.” I sɔ’n ti’n, Zesika niɛn i wunsu kpa naan w’a toman like nga ngatɛ o nun’n w’a mɛnmɛn i wa’n. Ɔ seli ekun kɛ: “Sɛ min waan ń tó aliɛ wie’n, n dun mmua n si ninnge nga be fa tɔnnin aliɛ sɔ’n ka. I sin’n, n kunndɛ aliɛ sɔ’n i su ninnge wie mun ekun. Wie liɛ bɔbɔ’n, n flɛ susute ng’ɔ tɔn aliɛ sɔ’n. Kpɛkun n usa be sɛ kɛ bé tɔ́n aliɛ sɔ’n, b’a guaman nun like kun mɔ ngatɛ o nun’n nin-o. Asa ekun’n, n usa susute sɔ’n i su ndɛ kpa ekun. Afin min waan ń nían sɛ be kwla lafi be su-o.”

Atrɛkpa’n, like nga ti yɛ ɔ fata kɛ e si kosan nga e fa usa e wun titi’n be su tɛlɛ’n, ɔ timan cinnjin dan kɛ Zesika liɛ’n sa. Sanngɛ kɛ Zesika sa’n, sɛ e waan é sí kosan nga e fa usa e wun’n be su tɛlɛ’n, maan e yo ninnge nga mun:

• Maan e usausa ndɛ’n nun kpa.

• E kunndɛ ndɛ sɔ’n i su ninnge uflɛ wie mun ekun.

• Sɛ fluwa wie nun yɛ e waan é kúnndɛ kosan’n i su tɛlɛ’n, maan ɔ yo fluwa mɔ be kwla lafi i nun ndɛ’n su-ɔ.

Sɛ e waan é sí kosan cinnjin wie mun ekun be su tɛlɛ’n, e kwla yo ninnge kunngba sɔ mun. ?Wafa sɛ?

Sɛ é kwlá sé’n, kɛ Zesika kúnndɛ ndɛ nanwlɛ’n, ɔ yoli like kunngba ng’ɔ yoli naan w’a si aliɛ ng’ɔ su yomɛn i wa’n i like fi’n. Ɔ seli kɛ: “N wlali min wun ase n kanngannin Biblu’n nun yɛ n kunndɛli i su ninnge wie mun. I sɔ mɔ n yoli’n ti’n, n sili ndɛ nanwlɛ’n.” Kɛ Zesika sa’n, sran miliɔn kpanngban be sili ndɛ nga Biblu’n kɛn i ndɛ nga’m be su’n:

• ?Ngue ti yɛ e o asiɛ’n su-ɔ?

• ?Be wu be o lɔ?

• ?Ngue ti yɛ e wun ɲrɛnnɛn-ɔn?

• ?Ngue yɛ Ɲanmiɛn wá yó naan y’a yaci fɛlɛ-ɔ?

• ?É yó sɛ naan y’a di aklunjɔɛ e awlobo’n nun?

Sɛ amun kunndɛ kɛ amún sí kosan sɔ mun, ɔ nin uflɛ wie mun ekun be su tɛlɛ’n, amun kanngan Biblu’n nun kpɛkun amun kunndɛ be su tɛlɛ www.pr418.com/bci su wie.