Sa laog nin ribo-ribong taon, mayo nin talagang nakaaram kan simbag sa hapot na iyan. Kan mga panahon na iyan, milyon-milyon an nagadan huli sa epidemya. Pag-abot nin panahon, naaraman kan mga siyentista an katotoohan. Nadiskubre ninda na sa parati, an kawsa kan mga hilang iyo an mga mikrobyo—mga mikroorganismo, arog nin bakterya o virus. An pakaaram sa katotoohan na iyan nakatabang sa mga tawo na malikayan asin mabulong an dakul na hilang. Nagresulta iyan sa mas halawig na buhay saka mas marahay na salud kan bilyon-bilyon na tawo.

Paano man an iba pang mahahalagang hapot? Sa hiling mo, paano ka makikinabang sa paghanap kan katotoohan manungod sa minasunod na mga hapot?

• Siisay an Diyos?

• Siisay si Jesu-Cristo?

• Ano an Kahadian nin Diyos?

• Ano an nakatagama sa maabot?

Nahanap kan milyon-milyon na tawo an simbag sa mga hapot na iyan asin nagin mas marahay an kalidad kan saindang buhay. Puwede ka man makinabang sa mga simbag.

Tibaad maisip mo, ‘Posible daw talagang maaraman an katotoohan manungod sa ano man na bagay?’ Kun iisipon kaya, lalong nagigin mas masakit an pag-aram kan katotoohan mapadapit sa dakul na bagay. Taano?

Dakul na tawo an dai nagtitiwala na masabi nin katotoohan an gobyerno, komersiyo, o media. Nadidipisilan sindang maaraman kun baga totoo an pinapaluwas na masasarigan na impormasyon na nadadangog ninda o iyan opinyon sana, bakong kumpletong mga detalye, asin purong kaputikan. Sa panahon na ini na lakop an pagduda saka salang mga impormasyon, dai nagkakauruyon an mga tawo sa kun ano talaga an totoo asin kun ano an kahulugan kaiyan para sainda.

Sa ibong kan mga kadipisilan na iyan, puwedeng mahanap an masasarigan na mga simbag sa pinakaimportanteng mga hapot sa buhay. Paano? Paagi sa paggibo kan mga ginigibo mo para mahanap an simbag sa mga hapot mo sa pang-aroaldaw na buhay.

Minsan paano, naghahanap ka nin katotoohan aroaldaw. Pag-isipan an sitwasyon ni Jessica. “Grabe an allergy sa mani kan aki kong babayi,” an sabi niya, “na dawa dikiton sanang protina nin mani puwede niyang ikagadan.” Kaipuhan na aramon ni Jessica kun an pagkakan na binabakal niya puwede sa aki niya. “Binabasa ko nguna an mga nakasurat sa patos kan pagkakan para maaraman an mga sangkap kaiyan. Tapos nagre-research pa ako saka kinokontak ko pa ngani an manufacturer para siguraduhon na dai iyan nasalakan nin dawa diit na protina nin mani. Nagre-research man ako sa iba pang masasarigan na reperensiya tanganing masigurado na may marahay na reputasyon an kompanya sa pagsunod sa mga regulasyon sa pagpreparar nin pagkakan.”

An aroaldaw na paghanap mo kan katotoohan tibaad bako man arog kahalaga kan ki Jessica, pero arog niya, puwede mong gamiton an minasunod na paagi para mahanap an simbag sa mga hapot mo:

• Aramon an mga impormasyon.

• Gumibo nin dagdag na research.

• Siguraduhon na masasarigan an pinagkuanan mo nin impormasyon.

Makakatabang man saimo an mga paaging ini para mahanap an masasarigan na mga simbag sa importanteng mga hapot sa buhay. Paano?

Sa paghanap sa mga katotoohan sa Bibliya, ginamit ni Jessica an mga paaging ginigibo niya pag nagreresearch siya manungod sa allergy kan aki niya. Sinabi niya, “Nakatabang sako an maingat na pagbasa asin matiyagang pagsiyasat para maaraman an katotoohan sa Bibliya.” Arog ni Jessica, minilyon na an nakaaram kan sinasabi kan Bibliya manungod sa mga hapot na:

• Taano ta yaon kita digdi?

• Ano an nangyayari pag nagadan kita?

• Taano ta may pagsakit?

• Ano an ginigibo nin Diyos para tapuson an gabos na pagsakit?

• Paano kita magkakaigwa nin maugmang buhay pampamilya?

Puwede mong mahanap an masasarigan na mga simbag sa mga hapot na ini asin sa iba pa paagi sa pagbasa nin Bibliya asin paggibo nin dagdag na research online sa www.pr418.com/bcl.