Enggo ribun tahun dekahna, la iteh kalak uga carana penakit menular banci kena ku kalak si deban. Akibatna enterem kel si mate. Tapi bas pudi wari, enggo iteh ilmuwan kai si erbanca bage. Kepeken, melala penakit terjadi perban kuman, bagi bakteri ntah pe virus. Perban meteh informasi si benar e, enterem kalak banci la kena penakit janah banci ka itambari. Dungna, miliaren kalak banci reh sehatna janah gedang umurna.

Adi bage, uga kerna penungkunen si penting enda:

• Ise kin Dibata?

• Ise kin Jesus Kristus?

• Kai kin Kerajan Dibata e?

• Kai nge si terjadi bas masa depan?

Enterem kalak enggo itehna jawapen si benar arah kerina penungkunen e. Dungna reh riahna kapna ndalani geluhna. Kam pe banci gejapkenndu bage.

Banci saja rukur kam, ‘Kuakap labo mungkin banci kuteh informasi si benar kerna kai pe.’ Memang gundari reh serana tempa ndatken informasi si benar. Engkai?

Enterem kalak lanai tek man pemerentah ntah pe pengusaha guna ndatken informasi si benar. Man berita-berita si lit pe, lanai kalak tek. Mesera akap kalak metehsa maka informasi si idatna e tuhu, pendapat pribadi, setengah benar, ntah pe berita si la tuhu. Perban gundari enterem kalak lanai siteken janah informasi si salah lit i japa pe, enterem kalak si lanai sada arihna kerna apai si benar ras apai si salah.

Aminna pe bage, banci datndu informasi si benar kerna kai si penting bas kegeluhen enda. Uga carana? Banci gunakenndu bagi cara si biasa ipakendu guna ndatken informasi si benar.

Situhuna, tiap wari sidarami informasi si benar. Contohna Jessica. Nina, “Anakku si diberu alergi kacang janah parah kel alergina e. Sitik saja pe panna kacang, banci ia mate.” Emaka, adi nukur pangan ate Jessica arus ipastikenna pangan e aman man anakna. Nina ka, “Kubaca lebe keterangen bas bungkus pangan e kerna kai saja bahan-bahanna. Kenca si e, kudarami ka terbuen informasi. Kusungkuni perusahan si erban pangan e gelah enggo pasti maka la lit kacang si tercampur bas pangan e alu la sengaja. Kudarami ka informasi arah sumber si deban kerna terteki ntah lang perusahan e.”

Banci saja, informasi si daramindu la bagi informasi si idarami Jessica ndai pentingna. Tapi, banci usihndu cara Jessica ndarami informasi si benar. Carana:

• Pelajari lebe informasina.

• Darami terbuen informasi.

• Pastiken sumberna terteki.

Adi ilakokenndu telu cara e, banci datndu informasi si benar kerna kai si penting bas kegeluhen.

Sanga ndarami informasi kerna kai si penting bas geluhna, igunaken Jessica cara si seri bagi carana ndarami informasi kerna alergi anakna. Nina Jessica, “Dungna, banci kudat informasi si benar kerna kegeluhen kenca tutus ateku mbaca Pustaka si Badia janah rusur kudarami informasi tambahen.” Bali bagi Jessica, enggo jutan kalak si ndatken informasi si benar arah Pustaka kerna penungkunen enda:

• Kai tujun Dibata nciptaken manusia?

• Kai si terjadi kenca manusia mate?

• Engkai maka mbue kel kiniseran?

• Kai nge pagi si ilakoken Dibata gelah lanai lit kiniseran?

• Uga carana gelah keluargandu banci ermeriah ukur?

Banci datndu jawapen arah kerina penungkunen e adi bacandu Pustaka janah idaramindu informasi tambahen arah Internet bas www.pr418.com/btx.