Sulod sa libolibo ka tuig, wala gyoy nahibalo sa tubag niana nga pangutana, ug milyonmilyon ang namatay tungod sa mga sakit ug epidemya. Sa ngadtongadto, nasayran sa mga siyentista ang tinuod. Ilang nadiskobrehan nga ang kasagarang hinungdan sa sakit mao ang mga kagaw​—sama sa mga bakterya o virus. Ang pagkahibalo niana nga kamatuoran nakatabang sa mga tawo nga malikayan ug matambalan ang daghang sakit, nga miresultag taastaas nga kinabuhi ug himsog nga panglawas sa bilyonbilyong tawo.

Komosta ang ubang importanteng mga pangutana? Unsa kahay epekto sa imong kinabuhi kon masayran nimo ang kamatuoran sa mosunod nga mga pangutana?

• Kinsa ang Diyos?

• Kinsa si Jesu-Kristo?

• Unsa ang Gingharian sa Diyos?

• Unsay mahitabo sa umaabot?

Milyonmilyon ang nakakita sa tubag sa maong mga pangutana ug nahimong mas maayo ang ilang kinabuhi. Makabenepisyo sab ka kon imong mahibaloan ang mga tubag.

Basin maghunahuna ka, ‘Posible ba gyong mahibaloan ang kamatuoran bahin sa tanang butang?’ Morag mas lisod nang mahibaloan karon kon unsa gyoy tinuod. Ngano?

 Daghang tawo ang walay pagsalig sa isulti sa gobyerno, mga kompaniya, o sa media. Ang mga impormasyon nga ilang madawat gipresentar nga daw katuohan maong dili sila segurado kon kini ba tinuod, opinyon lang, naay sagol bakak, o dili gyod tinuod. Kay ang mga tawo wala nay pagsalig sa usag usa ug ang kadaghanang impormasyon dili tinuod, daghan ang dili magkauyon sa kon unsa gyoy tinuod.

Bisan pa niana, posible gihapong makita ang tinuod nga tubag sa importante kaayong mga pangutana sa kinabuhi. Sa unsang paagi? Pinaagi sa pagbuhat kon unsay sagad nimong ginahimo dihang naa kay gustong mahibaloan.

Kada adlaw, mangita tag tinuod nga impormasyon. Tagda ang situwasyon ni Jessica. Siya miingon: “Ang akong anak allergic kaayo sa mani. Gani, puwede siyang mamatay kon makakaon bisag gamay ra kaayong protina sa mani.” Kinahanglang maseguro ni Jessica nga ang paliton niyang pagkaon dili makadaot sa iyang anak. “Basahon una nakog maayo ang label sa pagkaon aron masusi ang mga ingredient niini. Dayon, mag-research ko ug mokontak pa gani sa tighimo sa produkto aron seguroon kon naa bay posibilidad nga nasagolag protina sa mani ang maong pagkaon. Mangita pod kog kasaligang mga impormasyon nga makapamatuod nga ginasunod gyod sa kompaniya ang saktong paagi sa paghimog pagkaon.”

Ang imong pagpangitag tinuod nga impormasyon kada adlaw dili tingali sama sa situwasyon ni Jessica, pero sama kang Jessica, puwede nimong buhaton ang mosunod nga mga paagi aron matubag ang imong mga pangutana:

• Sayra ang saktong impormasyon.

• Paghimog dugang research.

• Seguroa nga kasaligan ang imong gikuhaan sa impormasyon.

Kini nga mga paagi makatabang nimo nga makita ang tinuod nga tubag sa importanteng mga pangutana sa kinabuhi. Sa unsang paagi?

Dihang nangita sa kamatuoran sa Bibliya, gigamit ni Jessica ang paagi nga iyang gihimo dihang mag-research bahin sa allergy sa iyang anak. Miingon siya, “Ang makugihong pagbasa ug pag-research nakatabang nako nga makita ang kamatuoran sa Bibliya.” Sama kang Jessica, milyonmilyon ang nakakat-on sa giingon sa Bibliya bahin niini nga mga pangutana:

• Nganong naa ta dinhi?

• Unsay mahitabo dihang mamatay ang tawo?

• Nganong naay pag-antos?

• Unsay himoon sa Diyos aron taposon ang tanang pag-antos?

• Sa unsang paagi magmalipayon ang pamilya?

Makita nimo ang tinuod nga tubag niana nga mga pangutana ug sa uban pa pinaagi sa pagbasa sa Bibliya ug pag-research diha sa www.pr418.com/ceb.