Kum tampi chung ahohmanh nih mah biahalnak a phi kha an hngal lo. Asinain tlangrai le chawnh khawhmi zawtnak ruangah mi nuai tampi cu an thi. A hnuah scientist pawl nih mah kong he aa tlaiin biatak kha an hun hngalh. Mah zawtnak cu bacteria asiloah virus ti bantuk thilnung hmetete a simi zawtnak rungrul ruangah a chuakmi a si ti kha an hun hngalh. Mah biatak nih mi pawl kha zawtnak tampi in i huhphenh khawh awk le i thlop khawh awkah a bawmh hna. Cucaah mi tampi cu ngandam tein le caan sau deuh in an nung kho.

A tanglei ah langhtermi, a dang a biapimi biahalnak hna he aa tlaiin tah zeitin?

• Pathian cu ahodah a si?

• Jesuh Khrih cu ahodah a si?

• Pathian Pennak cu zeidah a si?

• Hmailei ah zeidah a cang lai?

Mi nuai tampi cu mah biahalnak i a phi an hmuhnak thawngin a ṭha deuhmi nunnak an ngei. Nang zong mah in ṭhatnak na hmu kho ve.

‘Zei kong paohah biatak hngalh cu zeitindah a si khawh lai?’ tiah na ruah men lai. Mah lengah thil tampi kong he aa tlaiin biatak hngalh cu a har chinchin men lai. Zeicah?

Mi tampi nih cozah nawlngeitu pawl, chawlettu pawl asiloah media pawl nih biatak an chim lai tiah an zum lo. Mi nih an ruahnak kong, a cheu lawng a hmaanmi a konglam pawl le lihbia hna kha bochan awk a tlakmi lam in an langhter caah mi tampi nih a konglam taktak kha thleidan thiam awkah an i harh. Pakhat le pakhat an i zumh lo ca le a konglam tampi cu a palhmi a si caah mi nih an caah sullam a ngeimi a si hmanhah biatak kha an cohlang ti lo.

Cu bantuk zuamcawhnak hna a um ko nain nunnak he aa tlaiin a biapimi biahalnak a phi hna kha hmuh khawh a si. Zeitin in dah? Nifatin na nunnak ah na hmanmi na thiamnak hna kha na hmannak thawngin a si.

Na si khawh tawk in nifatin biatak kha kawl. Jessica kong hi ruathmanh. Jessica nih “ka fanu mipe aa ziak lo ning cu a cei tuk. Tlawmpal te a ei hmanhah a thi kho” tiah a ti. Jessica nih a fanu nunnak a khamh khawh nakhnga a cawkmi rawl kong kha ṭha tein a hngalh a hau. Hitin a ti: “A hmasa bik ah a chungah zeidah aa tel ti a langhtermi ca kha ka rel. Mah hnuah tam deuh in ka hlathlai i mipe aa tel sual maw, sual lo ti kha hngalh awkah a chuahtu hmanh kha pehtlaihnak ka tuah hna. Cun company nih rawl an timhtuah ning zumhawktlak a si le si lo ka hngalh khawh nakhnga a dang a konglam pawl zong kha ka hlathlai.”

Nifatin na nunnak ah a phi hngalh na duhmi biahalnak hna cu Jessica sining tluk in cun a biapi men lai lo. Asinain Jessica bantukin hngalh na duhmi biahalnak a phi hngalh awkah a tanglei kong hna hi na hman khawh:

• A konglam taktak kha hngalh i zuam.

• Hlathlainak tuah chap.

• A konglam pawl cu zumhawktlak a si le si lo kha hngalh i zuam.

Mah nih nunnak he aa tlaiin a biapimi biahalnak hna i a phi kha hngalh awkah aan bawmh lai. Zeitin in dah?

Jessica nih Baibal biatak a kawl tikah a fanu caah rawl kong he aa tlaiin hlathlainak a tuah lio i a hmanmi lam kha a rak hman. Hitin a ti: “Ṭha tein relnak le teima tein hlathlainak tuahnak nih Baibal biatak hmuh awkah a ka bawmh.” Jessica bantukin mi tampi nih mah biahalnak hna he aa tlaiin Baibal chimmi kha an hlathlai ve:

• Zeicah kan nun?

• Kan thih tikah zei ah dah kan can?

• Zeicah sifah harnak a um?

• Sifah harnak vialte donghter awkah Pathian nih zeidah a tuah lai?

• A nuammi chungkhar nunnak zeitindah kan ngeih khawh?

Baibal na relnak thawngin le www.pr418.com ah hlathlainak na tuahnak thawngin mah biahalnak hna le a dang biahalnak hna i a phi kha na hmuh khawh lai.